1-2. Ahabw’enki Abakristaayo obunaku obu baine kufayo aha biri omu kitabo ky’Abaleevi?

ENTUMWA Paulo akaijutsya omunyeeto munywani we Timoseo ngu ‘Ebyahandiikirwe byona, ebihandiikisiibwe omwoyo gwa Ruhanga, biine omugasho.’ (2 Tim. 3:16) Kimwe aharibyo nikitwariramu ekitabo ky’Abaleevi. Iwe ekitabo kya Baibuli ekyo nookitwara ota? Bamwe nibabaasa kureeba ekitabo eki nk’ekirimu ebiragiro bingi ebitarikukora obunaku obu, kwonka Abakristaayo ab’amazima tikwo barikuteekateeka batyo.

² Ekitabo ky’Abaleevi kikahandiikwa emyaka nka 3,500 ira, Yehova akakihandiikisa kandi yaakirinda ngu ‘kitwegyese.’ (Rom. 15:4) Ahabw’okugira ngu ekitabo ky’Abaleevi nikyoreka emiteekateekyere ya Yehova, twine kugira ekihika ky’okukishwijuma. Kandi ekitabo ekyo ekyahandiikisiibwe Ruhanga kirimu amashomo maingi agu turikubaasa kwega. Ka tureebe amashomo ana aharigo.

3. Ahabw’enki aha Izooba ry’Okurihiirira Ebibi baabaire batamba ebitambo?

³ Eishomo ry’okubanza: Twine kuba nitushemeza Yehova kubaasa kuhayo ebitambo ebi arikusiima. Buri mwaka aha Izooba ry’Okurihiirira Ebibi, Abaisraeli bakaba beeteeranira hamwe kandi bahayo ebitambo by’enyamaishwa. Ebitambo ebyo bikaba nibihwera Abaisraeli kwijuka ngu baine kwihwaho ekibi. Kwonka omunyamurwa omukuru atakatwaire eshagama Aharikwera Munonga aha izooba eryo, akaba aine kugira eki yaakora ekyabaire  kiri kikuru munonga, ekirikukira okusaasirwa kw’ebibi by’eihanga.

4. Nk’oku kiri omu Abaleevi 16:12, 13, omunyamurwa omukuru akaba akora ki aha murundi gw’okubanza kutaaha Aharikwera Munonga aha Izooba ry’Okurihiirira Ebibi? (Reeba ekishushani eky’aha mutwe.)

⁴ Shoma Abaleevi 16:12, 13. Teekateeka aha kyabaire kibaho aha Izooba ry’Okurihiirira Ebibi: Omunyamurwa omukuru akaba ataaha omu ihema. Ogu n’orundi gw’okubanza ahari eshatu ei yaabaire aine kutaaha Aharikwera Munonga eizooba eryo. Akaba akwata obubaane bw’omugaju omu mukono ogumwe, kandi ogundi gukwata ekyoterero ekiriho amakara g’omuriro. Akaba abanza ayemerera aha rutimbe rw’omuryango ogurikutaaha Aharikwera Munonga. Reero omu muringo gw’ekitiinisa, akaba ataaha Aharikwera Munonga ayemerera omu maisho g’eshanduukye y’endagaano. Omu muringo gw’akamanyiso akaba aba ari nk’oyemereire omu maisho ga Yehova Ruhanga! Omunyamurwa akaba ashuka obubaane aha makara g’omuriro reero ekishengye kyona kizamu omugaju murungi. * Bwanyima akaba agaruka ataaha Aharikwera Munonga aine eshagama y’ebitambo by’okwihaho ebibi. Yetegyereze ngu akaba abanza kwoterera obubaane atakataireyo eshagama y’ebitambo by’ebibi.

5. Nitubaasa kwegyera ki aha kukoresa obubaane aha Izooba ry’Okurihiirira Ebibi?

⁵ Nitubaasa kwegyera ki aha kukoresa obubaane aha Izooba ry’Okurihiirira Ebibi? Baibuli neeyoreka oku okushaba kw’omuheereza wa Yehova okurikusiimwa kurikugyeragyeranisibwa n’obubaane bw’omugaju. (Zab. 141:2; Kush. 5:8) Ijuka ngu omu muringo gw’ekitiinisa omunyamurwa omukuru akaba areeta obubaane omu maisho ga Yehova. Omu muringo nigwo gumwe, twaba nitushaba Yehova twine kukikora omu muringo gw’ekitiinisa. Nitusiima munonga kureeba ngu Omuhangi w’ebintu byona naatwikiriza kumushaba n’okumwirira haihi, nk’oku omwana arikuba ari na ishe. (Yak. 4:8) Yehova naatwikiriza kuba banywani be! (Zab. 25:14) Nitusiima omugisha ogwo n’ahabw’ekyo titurikwenda kukora ebirikumugwisa kubi.

6. Omunyamurwa omukuru okubanza yayoterera obubaane atakahaireyo ebitambo nitukyegyeraho ki?

⁶ Ijuka ngu omunyamurwa omukuru akaba ayoterera obubaane atakahaireyo ebitambo. Omu muringo ogwo, akaba ahamya ngu naasiimwa Yehova atakahaireyo ebitambo. Ekyo nitukyegyeraho ki? Obu Yesu yaabaire ari omu nsi, akaba aine kukora ekintu kikuru munonga kukira okucungura abantu, atakahaireyo amagara ge nk’ekitambo. Ni kintu ki ekyo? Yesu ahabw’okuguma ataine kamogo kandi ahamiire ahari Yehova, ekyo kikareetera Yehova kusiima ekitambo kye. Omu muringo ogwo, Yesu akooreka ngu okukora ebintu omu muringo ogu Yehova arikusiima nikyo kihikire. Kandi akooreka ngu omuringo ogu Ishe arikutegyekamu nigwo guhikire kandi ogw’oburingaaniza.

7. Ahabw’enki Yesu omu buheereza bwe bwona omu nsi yaayorekire ngu naashemeza Ishe?

⁷ Yesu omu buheereza bwe bwona omu nsi, akoorobera gye emitindo ya Yehova ehikiriire. Tihariho okwohibwa nari okugyezibwa nangwa n’obu kwakuba okuteekateeka aha kufa kw’obusaasi bwingi, okwamuremeise kushagika omuringo ogu Ishe arikutegyekamu. (Fil. 2:8) Yesu ku yaagyeziibwe, akashaba ‘naayeshengyereza munonga kandi arikurira.’ (Heb. 5:7) Okushaba nk’okwo okurikuruga aha mutima kukahamya okumariirira kwe kuguma naayorobera Ishe. Ahari Yehova, okushaba kwa Yesu kukaba kuri nk’obubaane bw’omugaju murungi. Yesu akashemeza Ishe omuri byona ebi  yaakozire kandi yaayoreka ngu Ishe niwe ahikire kutegyeka byona.

8. Nitubaasa kutwaza tuta nk’oku Yesu yaatwarize obu yaabaire ari omu nsi?

⁸ Nitubaasa kutooreza Yesu turikukora kyona ekirikubaasika kuhamira ahari Yehova n’okumworobera. Twagyezibwa, nitushaba turikweshengyereza Yehova kutuhwera ahakuba nitwenda kukora ebi arikusiima. Twakora tutyo nitworeka ngu nitushagika omuringo ogu Yehova arikutegyekamu. Nitumanya ngu Yehova tarikubaasa kuhurira okushaba kwaitu twaba nitukora ebintu ebi arikwanga. Kwonka, twaba nitugyendera aha mitindo ye, nitubaasa kuhamya ngu okushaba kwaitu nikwija kuba nk’obubaane bw’omugaju murungi ahari Yehova. Kandi nitubaasa kuhamya ngu nitumushemeza twamworobera kandi tukamuhamiraho.​—Enf. 27:11.

9. Ahabw’enki Abaisraeli baabaire bahayo ebitambo by’okusiima?

⁹ Eishomo rya kabiri: Nituheereza Yehova ahabw’okumusiima. Kubaasa kwetegyereza eki, ka tushwijume ekindi kintu kikuru omu kuramya kw’Abaisraeli aba ira, nibyo bitambo by’okusiima. * Omu kitabo ky’Abaleevi, nitwega ngu Omwisraeli obumwe akaba ahayo ekitambo “ahabw’okusiima.” (Lev. 7:11-13, 16-18) Ekitambo eki akaba atakihayo ahabw’okugira ngu naaragiirwa kukihayo, kureka akaba akihayo ayekundiire. N’ahabw’ekyo ekitambo eki eky’okwekundira, omuntu akaba akihayo ahabw’okukunda Yehova, Ruhanga. Omuntu ku yaabaire ahayo ekitambo, ab’omu ka ye, n’abanyamurwa  bakaba barya aha nyama egyo ei baahayo nk’ekitambo. Kwonka ebicweka byayo ebimwe bikaba biheebwayo ahari Yehova wenka. Ni bicweka ki ebyo?

10. Ebitambo by’okusiima ebirikugambwaho omu Abaleevi 3:6, 12, 14-16 nibitwegyesa ki aha kyabaire nikihiga Yesu kukora ebi Ishe arikukunda?

¹⁰ Eishomo rya kashatu: Nituha Yehova ekirikukirayo oburungi ahabw’okumukunda. Yehova akaba naatwara ebishaju nk’ekicweka ekirikukirayo oburungi aha nyamaishwa. Kandi akagambira Abaisraeli ngu ebicweka by’enyamaishwa ebimwe nk’entsigo, bikaba biri eby’omutaano. (Shoma Abaleevi 3:6, 12, 14-16.) N’ahabw’ekyo Omwisraeli ku yaabaire ahayo ayekundiire ebicweka ebyo otwariiremu ebishaju, eki kikaba kishemeza Yehova. Omwisraeli owaabaire akora ekyo akaba ayoreka ngu naaha Ruhanga ekirikukirayo oburungi. Omu muringo nigwo gumwe, Yesu akahayo ekirikukirayo oburungi ayekundiire arikuheereza Yehova n’omutima gwe gwona ahabw’okumukunda. (Yoh. 14:31) Yesu kikaba nikimushemeza kukora ebi Ruhanga arikukunda, kandi akaba naakundira kimwe ebiragiro bye. (Zab. 40:8) Yehova ka aine kuba yaashemereirwe kureeba Yesu arikumuheereza ayekundiire!

11. Obuheereza bwaitu nibushusha buta n’ekitambo ky’okusiima, kandi ekyo nikituhuumuriza kita?

¹¹ Obuheereza bwaitu ni nk’ebitambo by’okusiima, ahakuba nituba nitworeka Yehova oku turikwehurira. Nituha Yehova ekirikukirayo oburungi, kandi nitukikora ahakuba nitumukunda twihire aha mutima. Yehova ka aine kuba naashemererwa ku arikureeba abaheereza be barikumuramya beekundiire ahabw’okugira ngu nibamukunda n’emitindo ye! Nikituhuumuriza kumanya ngu Yehova naareeba ebi turikukora n’ebigyendererwa byaitu, kandi naabitwara nka bikuru. Nk’eky’okureeberaho, waaba okuzire omu myaka kandi otakibaasa kukora bingi nka ira, omanye ngu Yehova naayetegyereza gye obweremwa bwawe. Noobaasa kuteekateeka ngu tokibaasa kukora bingi, kwonka Yehova naareeba rukundo ei oine erikukuhiga kukora ekyo eki orikubaasa. Naashemererwa kwakiira ekirungi ekirikukirayo eki orikumuha.

12. Oku Yehova yaabaire naatwara ebitambo by’okusiima nikituhamiza ki?

¹² Nitwegyera ki aha bitambo by’okusiima? Omuriro ku gwabaire gwotsya ebicweka by’enyamaishwa ebirungi, omwika gukaba gucumbuuka ahaiguru reero Yehova asiima ekitambo ekyo. Gira obuhame ngu Yehova naashemererwa ku arikukureeba noomuheereza n’omutima gwawe gwona oyekundiire. (Kol. 3:23) Teekateeka aha kushemererwa oku arikugira ahabw’okusiima eki orikukora. Okuteeraho kwawe kumuheereza orikukora bikye nari bihango, naakureeba nk’okw’omuhendo oku atarikwija kwebwa ebiro byona.​—Mat. 6:20; Heb. 6:10.

13. Kurugiirira aha biri omu Abaleevi 9:23, 24, Yehova akooreka ata ngu naasiima okuteebwaho kw’abanyamurwa?

¹³ Eishomo rya kana: Yehova naaha omugisha ekicweka eky’omu nsi eky’ekibiina kye. Teekateeka aha kyabaireho omu mwaka gwa 1512 Y.A. obu eihema ryayombekwa haihi n’Orushozi Sinai. (Kur. 40:17) Musa akeebembera omukoro gw’okutongoza Arooni n’abatabani kuba abanyamurwa. Eihanga rya Israeli rikeerundana hamwe kureeba abanyamurwa nibahayo ebitambo by’enyamaishwa eby’okubanza. (Lev. 9:1-5) Yehova akooreka ata ngu akasiima abanyamurwa basya abaatairweho? Arooni na Musa ku baabaire nibashabira abantu, Yehova akareetera omuriro kuruga omu iguru gwayotsya ekitambo ekiri aha itambiro.​—Shoma Abaleevi 9:23, 24.

14. Ahabw’enki Yehova okusiima Arooni n’abatabani kuba abanyamurwa kiri kikuru ahariitwe obunaku obu?

 ¹⁴ Omuriro kuruga omu iguru gukooreka ki aha bikwatiraine n’okuteebwaho kw’omunyamurwa omukuru? Yehova akooreka ngu akaikiriza Arooni na batabani be kuheereza nk’abanyamurwa. Abaisraeli ku baareebire obuhame obu kuruga ahari Yehova, egyo ekaba enshonga ehikire kubashagika omu bwijwire. Mbwenu shi ekyo naitwe nikitukwataho? Eego! Entebeekanisa y’obunyamurwa omuri Israeli ekaba neejwekyera entebeekanisa y’obunyamurwa erikukirayo. Kristo, Omunyamurwa Omukuru, n’abandi 144,000 abeesigwa abatoorainwe, nibaija kuheereza nawe omu iguru.​—Heb. 4:14; 8:3-5; 10:1.

15-16. Yehova ayorekire ata ngu naashagika ‘omwambari omwesigwa kandi ow’obwengye’?

¹⁵ Omuri 1919, Yesu akatoorana guruupu y’ab’eishe-emwe abashukirweho amajuta kuba ‘omwambari omwesigwa kandi ow’obwengye.’ Omwambari ogwo naayebembera omurimo gw’okubuurira kandi naaha abakuratsi ba Kristo eby’okurya by’omwoyo “omu bunaku obuhikire.” (Mat. 24:45) Mbwenu shi nitureeba oku Yehova arikworeka ngu naashagika omwambari omwesigwa kandi ow’obwengye?

¹⁶ Sitaane n’abarikumushagika bakozire kihango omu kuremesa omurimo gw’omwambari omwesigwa, kwonka Yehova naaguma naahwera omwambari kuhikiiriza omurimo gwe. N’obu haraabe haabaireho entaro z’ensi yoona ibiri, okuhiiganisibwa kw’amaani, oburemeezi omu by’entaatsya omu nsi yoona, n’obutari buringaaniza, omwambari omwesigwa kandi ow’obwengye naagumizamu kuha abakuratsi ba Kristo eby’okurya by’omwoyo omu nsi yoona. Teekateeka aha by’okurya by’omwoyo nyamwingi ebi turikutunga obunaku obu omu ndimi ezirikurenga 900 hatariho kushashura! Obu  n’obuhame ngu Yehova naashagika omwambari omwesigwa. Teekateeka aha buhame obundi oburikworeka ngu Yehova naaha omugisha omurimo gw’okubuurira. Amakuru marungi buzima nigabuurirwa omu ‘nsi yoona’ erikutuurwamu. (Mat. 24:14) Hatariho kubangaanisa, Yehova naahwera ekibiina kye obunaku obu kandi naakiha emigisha.

17. Nitubaasa kworeka tuta ngu nitushagika ekibiina eki Yehova arikukoresa?

¹⁷ Ni kirungi kwebuuza oti: ‘Ninkitwara nka kikuru kuba omwe aha b’ekicweka eky’omu nsi eky’ekibiina kya Yehova?’ Yehova atuhaire obuhame obu turikubaasa kugyeragyeranisa n’omuriro ogwarugire omu iguru omu bunaku bwa Musa na Arooni. Buzima twine bingi by’okusiimira Yehova. (1 Tes. 5:18, 19) Nitubaasa kworeka tuta ngu nitushagika ekibiina eki Yehova arikukoresa? Nitukikora turikukuratira obuhabuzi bwa Baibuli oburikushangwa omu bitabo byaitu, enteerane z’aha gati ya saabiiti, n’enteerane empango. Okwongyera ahari ekyo, nitubaasa kukikora turikwejumbira kimwe omu murimo gw’okubuurira n’okwegyesa abantu.​—1 Kor. 15:58.

18. Niki eki omaririire kukora?

¹⁸ Ka tumariirire kugyendera aha mashomo agu twayega omu kitabo ky’Abaleevi. Ka tuteereho kukora ebirikureetera Yehova kusiima ebitambo ebi turikuhayo. Ka tuheereze Yehova ahabw’okusiima ebi atukoreire. Ka tugumizemu nituha Yehova ekirikukirayo oburungi ahakuba nitumukunda n’omutima gwaitu gwona. Kandi ka tumariirire kushagika ekibiina eki Yehova arikuha emigisha ye obunaku obu. Omu miringo egi yoona, nituba nitworeka Yehova ngu nitusiima omugisha ogu atuhaire ogw’okuba Abajurizi be!