1. Yehova naatuha obugabe bw’okukora ki?

YEHOVA naatuha obugabe bw’okucwamu eki turikwenda kukora. Naatwegyesa oku turikubaasa kucwamu gye, kandi naatuhwera kuba abasinguzi twacwamu ebirikumushemeza. (Zab. 119:173) Oku turikweyongyera kugyendera aha bwengye bw’omu Kigambo kya Ruhanga, nikwo turikwongyera kucwamu gye.​—Heb. 5:14.

2. Nitubaasa kugumirwa kukora ki bwanyima y’okucwamu?

² N’obu twakuba tucwiremu gye, nitubaasa kugumirwa kuhikiiriza eki tutandikire kukora. Teekateeka aha by’okureeberaho ebi: Ow’eishe-emwe omunyeeto yaacwamu kushoma Baibuli yoona. Bwanyima y’okugishoma esaabiiti nkye haagira ekyamuremesa kugumizamu naagishoma. Munyaanyazi-itwe yaacwamu kuba payoniya ow’obutwire kwonka naaguma naayongerayo ebiro by’okutandikiraho. Akakiiko k’abareeberezi kaacwamu kutaayaayira ab’omu kibiina kubagumya, kwonka bwanyima y’ameezi maingi tihaine n’omwe ou baataayaayiire. Embeera ezi nizitaana, kwonka haine eki zirikushushanisa. Ebyacwirwemu byona tibiratairwe omu nkora. Abakristaayo b’omu kyasha ky’okubanza omuri Korinso bakagiraho embeera nk’ezo. Ka tureebe eki turikubaasa kubeegyeraho.

3. Abakorinso bakacwamu ki, kwonka niki ekyabaireho?

³ Nk’omu gwa 55 Y.A.K., ab’eishe-emwe omuri Korinso bakacwamu kukora ekintu kikuru. Bakamanya ngu ab’eishe-emwe omuri Yerusaalemu na Buyudaaya bakaba nibabonabona kandi bari abooro, kwonka ebibiina ebindi bikaba nibirundaana sente z’okubahwera. Ahabw’embabazi zaabo n’okuba efura, ab’omuri Korinso bakacwamu kuhayo ahabw’ekigyendererwa eki kandi  baashaba Paulo kubagambira oku barikubaasa kuhwera. Paulo akabaha obuhabuzi kandi yaatoorana Tito kuhwera omu kurundaana esente ezo. (1 Kor. 16:1; 2 Kor. 8:6) Kwonka bwanyima y’ameezi makye, Paulo akeetegyereza ngu Abakorinso tibarahaireyo nk’oku baabaire bacwiremu. N’ahabw’ekyo, ekiconco kyabo kikaba nikibaasa kwija kukyerererwa kuhika Yerusaalemu kubaasa kutwarwa n’ebyahairweyo ebibiina ebindi.​—2 Kor. 9:4, 5.

4. Nk’oku kirikworekwa omu 2 Abakorinso 8:7, 10, 11, Paulo akahiga Abakorinso kukora ki?

⁴ Abakorinso bakaba bacwiremu gye, kandi Paulo akabasiima ahabw’okwikiriza kwabo kw’omutaano n’okugira ekihika ky’okuba efura. Kwonka akaba aine kubahiga kuhendera eki baatandikire kukora. (Shoma 2 Abakorinso 8:7, 10, 11.) Eki nikitworeka ngu n’Abakristaayo abeesigwa nibabaasa kugumirwa kuhikiiriza ebi bacwiremu kukora.

5. Nituza kugarukamu bibuuzo ki?

⁵ Naitwe nitubaasa kugumirwa kuhikiiriza ebi turikucwamu nk’oku Abakorinso baabaire. Ahabw’enki? Ahabw’obutahikiirira, nitubaasa kuguma nitweziringa kukora eki tucwiremu. Nari ebirikubaho kitaraariire nibibaasa kuturemesa kuhendera ebi tucwiremu kukora. (Mub. 9:11; Rom. 7:18) Nitubaasa kushwijuma tuta eki tucwiremu reero tukakora empindahinduka ezirikwetengyesa? Nitubaasa kuhamya tuta ngu twahendera ebi tutandikire kukora?

6. Ni ryari obu turikubaasa kuhinduramu omu bi tucwiremu?

⁶ Hariho okucwamu oku tutaine kuhindura. Nk’eky’okureeberaho, nituhamira aha kucwamu kwaitu kuheereza Yehova, kandi nitumariirira kuguma turi abeesigwa aha bakundwa baitu omu bushwere. (Mat. 16:24; 19:6) Kwonka ebindi ebi turikucwamu nitubaasa kuhinduramu. Ahabw’enki? Ahakuba embeera nizihinduka. Nitubaasa kukuratira madaara ki twaba nitwenda kucwamu kurungi?

7. Niki eki tushemereire kushaba, kandi ahabw’enki?

⁷ Shaba Yehova obwengye. Yehova akahwera entumwa Yakobo kuhandiika ati: “Omuriimwe ku haraabe harimu obuzirwe obwengye, abushabe Ruhanga, oha boona n’omutima ogutarikwima.” (Yak. 1:5) Omu miringo etari emwe, twena nituba ‘tubuzirwe obwengye.’ N’ahabw’ekyo yesigye Yehova waaba noocwamu nari waaba nooza kuhindura omu bi ocwiremu. Reero Yehova naija kukuhwera kucwamu gye.

8. Ni kucondooza ki oku twine kukora tutakacwiremu?

⁸ Condooza gye. Sherura obuhabuzi omu Kigambo kya Ruhanga, shoma ebitabo by’ekibiina kya Yehova, kandi gambaho n’abantu abarikubaasa kukuha obuhabuzi burungi. (Enf. 20:18) Okucondooza nk’okwo ni kukuru waaba noocwamu omurimo ogu oraakore, waaza kufuruka, nari waaza kutoorana obwegyese buringaniire oburakuhwere omu buheereza bwawe.

9. Twaba ab’amazima omu kweshwijuma nitwija kugasirwa tuta?

⁹ Shwijuma ebigyendererwa byawe. Ebigyendererwa byaitu ni bikuru ahari Yehova. (Enf. 16:2) Naayenda ngu tube ab’amazima omu bintu byona. N’ahabw’ekyo twaba nitucwamu, nituba twine kwebeera ab’amazima hamwe n’abandi. Twaba tutabaire ab’amazima, nikiija kutugumira kuhamira aha ki tucwiremu. Nk’eky’okureeberaho, ow’eishe-emwe omunyeeto naabaasa kucwamu kuba payoniya ow’obutwire. Kwonka haahinguraho obwire, naatandika kugumirwa kuhitsya eshaaha kandi okushemererwa kwe omu buheereza nikutuuba. Naabaasa kuba yaabaire naateekateeka ngu ekigyendererwa kye ekikuru eky’okuba payoniya n’okwenda kushemeza Yehova. Kwonka shi, tokaashanga ngu ekigyendererwa kye ekikuru akaba naayenda kushemeza abazaire be nari omuntu ondiijo?

10. Niki ekirikwetengyesa kubaasa kukora empindahinduka?

 ¹⁰ Teekateeka aha mbeera y’omwegi wa Baibuli orikwenda kucwa omuze gw’okureetsa. Omu kubanza naagumirwa, obundi arikumara saabiiti emwe nari ibiri atarikureetsa kwonka bwanyima agaruka areetsa. Kwonka aha muheru asingura omuze ogwo! Ekimuhweraire kusingura n’ahabw’okunda Yehova n’okugira ekyetengo ky’okumushemeza.​—Kol. 1:10; 3:23.

11. Ahabw’enki twine kutaho ekigyendererwa ky’okuhikiiriza ebi turikucwamu kukora?

¹¹ Manya ekigyendererwa kyawe. Waataho ekigyendererwa ky’okuhikiiriza ebi ocwiremu, nikibaasa kukworobera kuhendera eki otandikire. Nk’eky’okureeberaho, noobaasa kuba ocwiremu kuguma nooshoma Baibuli. Kwonka waaba otataireho engyenderwaho, noobaasa kutahikiiriza ekigyendererwa kyawe. * Nari abareeberezi omu kibiina nibabaasa kucwamu kuguma nibataayaayira ab’eishe-emwe kubagumya, kwonka haahinguraho obwire, nibabaasa kutahikiiriza eki baacwiremu. Kubaasa kuhikiiriza eki bacwiremu, nibabaasa kwebuuza ebibuuzo ebi: “Nitumanya ab’eishe-emwe abaine kutaayaayirwa kubaasa kugumibwa? Twataireho obwire bwenyini obu turaabataayaayiremu?”

12. Nikibaasa kutwetengyesa kukora ki, kandi ahabw’enki?

¹² Manya obugarukiro bwawe. Tihariho oine obwire burikumara, ebirikwetengyesa byona, nari amaani g’okukora buri ki arikwenda kuhikiiriza. N’ahabw’ekyo manya obugarukiro bwawe kandi obe omuringaaniza. Kyaba nikyetengyesa, noobaasa kuhindura eki ocwiremu kukora waaba otarikukibaasa. (Mub. 3:6) Kwonka shi ku waakushwijuma gye eki ocwiremu, okahinduramu ahu kirikwetengyesa, kandi okareeba ngu noobaasa kukihendera? Yetegyereze amadaara ataano agarikubaasa kukuhwera kuhendera eki waatandikire.

13. Niki ekiraakuhwere kugira amaani g’okuhikiiriza ebi ocwiremu?

¹³ Shaba Yehova amaani g’okukora. Yehova naabaasa kukuha amaani ‘g’okukora’ ebi ocwiremu. (Fil. 2:13) N’ahabw’ekyo mushabe kukuha omwoyo gurikwera oguraakuhwere kutunga amaani g’okukora. Gumizamu nooshaba n’obu waakuba nooreeba ngu okushaba kwawe kukyerereirwe kugarukwamu. Yesu akagira ngu mugume “mushabe [Omwoyo gurikwera],” nimwija kuheebwa.​—Luk. 11:9, 13.

14. Omusingye oguri omu Enfumu 21:5 nigubaasa kukuhwera guta kuhikiiriza eki ocwiremu kukora?

¹⁴ Taho entebeekanisa. (Shoma Enfumu 21:5.) Kubaasa kuhendera ekintu kyona eki otandikire kukora, oine kutaho entebeekanisa. Reero nooba oine kugyendera aha ntebeekanisa egyo. Omu muringo nigwo gumwe, waacwamu, handiika amadaara agu oraakurate kuhikiiriza okucwamu kwawe. Omurimo waagukora omu bicwekacweka nigubaasa kurahuka kuhwa. Paulo akahiga Abakorinso kugira eki baabiika “aha kiro ky’okubanza omu saabiiti” omu mwanya gw’okurundaana esente zoona omurundi gumwe yaija. (1 Kor. 16:2) Okukora omurimo muhango omu bicwekacweka nikikuhwera kutatiina ngu toraaguheze.

15. Bwanyima y’okutaho engyenderwaho, noobaasa kukora ki?

¹⁵ Engyenderwaho nungi neija kukuhwera kutandika kuhikiiriza ebi ocwiremu. (1 Kor. 14:40) Nk’eky’okureeberaho, obukiiko bw’abareeberezi nibuhigwa kuhandiika byona ebi bacwiremu, otwariiremu n’ogwo otoorainwe kuhikiiriza obujunaanizibwa bwo, n’ebiro by’okwezi obu aine kuhendera obujunaanizibwa  obwo. Abareeberezi abarikukuratira obuhabuzi obu nikiboorobera kuhikiiriza ebi barikucwamu. (1 Kor. 9:26) Naiwe noobaasa kuteeraho kukuratira obuhabuzi obwo omu bi orikukora obutoosha. Nk’eky’okureeberaho noobaasa kuguma noohandiika ebi oraakore buri izooba, n’obu orikwenda kubihikiiriza. Eki nikibaasa kukuhwera kuhendera eki waatandika kukora, n’okuhikiiriza ebintu bingi omu bwire bukye.

16. Niki ekirikwetengyesa kuhikiiriza eki ocwiremu, kandi ebiri omu Abarooma 12:11 nibishagika bita enshonga egi?

¹⁶ Ba omweziriki. Nikyetengyesa okukora n’amaani okukuratira engyenderwaho n’okuhendera ebi otandikire kukora. (Shoma Abarooma 12:11.) Paulo akagambira Timoseo kuba ‘omweziriki’ kandi ‘n’okugumizamu’ kuba omwegyesa murungi. Obuhabuzi obwo nibubaasa kukora n’omu bigyendererwa eby’omwoyo.​—1 Tim. 4:13, 16.

17. Ebiri omu Abaefeso 5:15, 16 nibibaasa kutuhwera bita twaba nituhikiiriza eki tucwiremu?

¹⁷ Koresa gye obwire bwawe. (Shoma Abaefeso 5:15, 16.) Taho obwire bw’okuhikiiriza ebi ocwiremu kukora, kandi obuhamireho. Yetantare okutegyereza obwire burungi, ahakuba obwire burungi nibubaasa kutabaho. (Mub. 11:4) Yegyendesereze kwikiriza ebitari bikuru okutwara obwire bwingi n’amaani kikakuremesa kukora ebintu ebikuru. (Fil. 1:10) Kyaba nikibaasika, toorana obwire obu orikumanya ngu nihaija kuba hatariho ebirikuteganisa. Manyisa abandi ngu nooyenda kuta omutima aha ki orikukora kugira ngu batakuteganisa. Ihaho esimu yaawe kandi obutumwa bw’aha simu nari aha mukura noobaasa kubushoma bwanyima. *

18-19. Niki ekiraakuhwere kutaremwa kugumizamu n’ebi ocwiremu n’obu waakutunga emirabanamu?

¹⁸ Teekateeka aha biraarugyemu. Ebirikuruga omu kucwamu kwawe nibibaasa kugyeragyeranisibwa n’omwanya ogu orikuzamu waaba ori omu rugyendo. Buzima waaba nooyenda kuhika ahu orikuza, noija kugumizamu noogyenda n’obu oruguuto rwakuba rukingire, noija kutoora omuhanda ogundi. Omu muringo nigwo gumwe, twateekateeka aha biraarugye omu kucwamu kwaitu, titurikwija kurahuka kuhanika n’obu twakutunga emirabanamu.​—Gal. 6:9.

¹⁹ Okucwamu gye tikyorobi, kandi n’okuhendera eki ocwiremu kigumire. Kwonka waaba oine obuhwezi bwa Yehova, noobaasa kutunga obwengye n’amaani g’okuhendera eki waandikire kukora.