1-2. (a) Niki ekirikutuhwera kugumira oburemeezi buri izooba? Shoboorora. (b) Nituza kwega ki omu kicweka eki?

“KU NDIKUTEEKATEEKA aha kugyezibwa oku ndabiremu, ninyetegyereza ngu timbaasize kukurabamu ahabw’amaani gangye.” Oragambireho ebigambo nk’ebyo? Baingi ahariitwe turagambireho tutyo. Obundi okagamba ebigambo nk’ebyo bwanyima y’okugumisiriza endwara y’amaani, nari bwanyima y’okufeerwa omukundwa. Ku orikuteekateeka aha kugyezibwa oku waarabiremu, nooreeba ngu okabaasa kukurabamu ahabw’okugira ngu Yehova akakuha “amaani agarikukirira kimwe” arikukoresa omwoyo gwe gurikwera.​—2 Kor. 4:7-9.

² Kandi nitwesiga omwoyo gurikwera kutuhwera kwemera okugyemeserezibwa kw’ensi egi embi. (1 Yoh. 5:19) Okwongyera ahari ekyo, twine kutunga amaani g’okurwanisa ‘amahe g’emyoyo emibi.’ (Efe. 6:12) Hati nituza kureeba oku omwoyo gurikwera gurikubaasa kutuhwera omu kugyemeserezibwa oku kwona. Bwanyima nituza kureeba eki twine kukora omwoyo gurikwera kubaasa kutuhwera omu bwijwire.

3. Ni mu muringo ki ogu Yehova arikutuhwera kwemera okugyezibwa?

³ Yehova naatuha omwoyo gurikwera kutuhwera kutunga amaani g’okuhikiiriza obujunaanizibwa bwaitu n’obu twakuba nitugyezibwa. Entumwa Paulo akareeba ngu akaba naabaasa kugumizamu naaheereza Yehova n’obu araabe yaabaire naagyezibwa, ahabw’okuba akeesiga “amaani ga Kristo.” (2 Kor. 12:9) Paulo omu rugyendo rwe rw’obumiisani orwa kabiri, akaba naakora n’obweziriki omu kubuurira, kandi arikwebaisaho n’omu by’entaatsya. Akaba naatuura omuri Korinso omu ka ya Akula na Priskila, abaabaire nibakora amahema. Obu Paulo nawe yaabaire naakora amahema, akaba agakora nabo yaaba atagiire mu kubuurira. (Byak. 18:1-4) Ahabw’omwoyo gurikwera Paulo akatunga amaani g’okukora omurimo gw’okwebaisaho, n’okuhikiiriza obuheereza bwe.

4. Kurugiirira aha 2 Abakorinso 12:7b-9, Paulo akaba aine buremeezi ki?

 ⁴ Shoma 2 Abakorinso 12:7b-9. Omu kyahandiikirwe eki, Paulo akaba naamanyisa ki obu yaagira ngu akaba aine “eihwa omu mubiri”? Waaba oine eihwa omu mubiri, buzima nooba oine obusaasi bw’amaani. N’ahabw’ekyo Paulo akaba naamanyisa ngu aine okugyezibwa okwe nk’omuntu ahabw’okugira obusaasi bwingi. Okugyezibwa oku akakweta “entumwa ya Sitaane” eyaabaire ‘neemuteera entomi.’ Shana obundi Sitaane nari baadaimoni tibarareetaire Paulo okugyezibwa oku butunu, okwabaire kuri nk’eihwa omu mubiri. Kwonka emyoyo mibi egyo ku yaareebire obusaasi oburi nk’eihwa omu mubiri gwa Paulo, neebaasa kuba yaabaire rwongyerera maganya erikutsindika eihwa eryo omu mubiri gwe. Paulo akakora ki?

5. Yehova akagarukamu ata okushaba kwa Paulo?

⁵ Omu kubanza, Paulo akaba naayenda ngu Yehova amwihemu eihwa eryo. Naagira ati: “Nkeeshengyereza Mukama [Yehova] kashatu . . . ngu kindugyeho.” Kwonka n’obu Paulo araabe yaabaire naashaba, eihwa rikaguma omu mubiri gwe. Kwonka shi eki nikimanyisa ngu Yehova taragarukiremu okushaba kwa Paulo? Ngaaha buzima. Akakugarukamu. Yehova taraihireho buremeezi, kwonka akaha Paulo amaani g’okugumisiriza oburemeezi obwo. Yehova akagira ati: “Amaani gangye gahikiirizibwa omu bweremwa.” (2 Kor. 12:8, 9) Kandi Paulo ahabw’obuhwezi bwa Ruhanga, akabaasa kuguma ashemereirwe kandi aikaikaine!​—Fil. 4:4-7.

6. (a) Yehova naabaasa kugarukamu ata okushaba kwaitu? (b) Ni kuraganisa ki okuri omu byahandiikirwe okurikukuha amaani?

⁶ Nka Paulo, oreeshengyereizeho Yehova kukwiha omu kugyezibwa? Obundi okashaba oyihire aha mutima emirundi mingi orikugamba oburemeezi bwawe kwonka bwayanga kurugaho, kureka bwaguma nibweyongyera. Mbwenu shi okateekateeka ngu Yehova tarikusiima ebi orikukora? Ku kiraabe nikwo kiri, ijuka eky’okureeberaho kya Paulo. Nk’oku Yehova yaagarukiremu okushaba kwa Paulo, hatariho kubangaanisa naija kugarukamu okushaba kwawe! Naabaasa kutaihaho oburemeezi. Kwonka arikukoresa omwoyo gwe ogurikwera, naija kukuha amaani agarikwetengyesa kubaasa kugumisiriza okugyezibwa. (Zab. 61:3, 4) Noobaasa kuba ‘oyikariirwe’ ahansi, kwonka Yehova tarikwija kukutsigaho.​—2 Kor. 4:8, 9; Fil. 4:13.

7-8. (a) Ni mu muringo ki ogu omwoyo gurikwera guri nk’omuyaga? (b) Petero akashoboorora ata oku omwoyo gurikwera gurikukora?

⁷ Ni muringo ki ogundi ogu omwoyo gurikwera gurikutuhwera? Nitubaasa kugyeragyeranisa omwoyo gurikwera n’omuyaga. Nk’oku omuyaga murungi gurikuhwera emeeri kugumizamu neegyenda omu bwire bw’eihunga, nikwo n’omwoyo gurikwera gurikutuhwera kugumizamu nituheereza Yehova kuhitsya obu turaahikye omu nsi ensya n’obu twakuba nitugyezibwa.

⁸ Ahabw’okugira ngu entumwa Petero akaba ari omujubi w’eby’enyanja, akaba naamanya gye eby’okugyendera aha maizi. N’ahabw’ekyo, neebaasa kuba niyo nshonga ahabw’enki ku yaabaire naagamba aha ku omwoyo gurikwera gurikukora, yaakoreise ebigambo ebiine akakwate n’okugyendera aha maizi. Akahandiika ati: “Tihariho kigambo kya baanabi ekyabaire kireetwa okukunda kw’omuntu, kureka abantu bakaba bagamba ebyaruga ahari Ruhanga, nibakoresibwa” omwoyo gurikwera. Ekigambo ky’Orugriika ekirikuvunuurwa nk’okukoresibwa, nikibaasa kumanyisa okutwarwa, okutsindikwa, nari okuhwerwa.​—2 Pet. 1:21.

9. Petero akaba naayenda ngu abantu beetegyereze ki obu yaakoresa ekigambo “nibakoresibwa”?

⁹ Petero okugira ngu “nibakoresibwa,” akaba naayenda ngu abantu beetegyereze nshonga ki? Ekigambo ky’Orugriika ekirikwenda kushushana nakyo kikakoresibwa Luka, owaahandiikire ekitabo ky’Ebyakozirwe Entumwa, kushoboorora oku emeeri ‘erikutwarwa’ omuyaga. (Byak. 27:15) N’ahabw’ekyo obu Petero yaahandiika  ngu abaahandiikire Baibuli bakaba ‘nibakoresibwa omwoyo gurikwera,’ akakoresa “ebigambo ebirikubaasa kureetera abantu kuteekateeka aha bavugi b’obwato,” nikwo omucondooza omwe wa Baibuli yaagizire. Petero akaba ari nk’orikugira ngu, nk’oku emeeri erikuhwerwa omuyaga omu rugyendo rwayo, n’abaahandiikire Baibuli bakahwerwa omwoyo gurikwera kuhikiiriza obujunaanizibwa bwabo. Omucondooza niwe omwe akagira ati: “Baanabi bakaimutsya amatanga gaabo omu muringo gw’akamanyiso.” Yehova akakora eki yaabaire aine kukora. Akoohereza “omuyaga,” nigwo omwoyo gurikwera. Abahandiiki ba Baibuli nabo bakakora eki baabaire baine kukora. Bakaikiriza kuhwerwa omwoyo gurikwera.

10-11. Ni bintu ki bibiri ebi twine kukora kubaasa kuhwerwa omwoyo gurikwera? Ha eky’okureeberaho.

¹⁰ N’amazima, hati Yehova takiha bantu omwoyo gurikwera kuhandiika ebitabo bya Baibuli. Kwonka, naakikoresa omwoyo gurikwera kwebembera abaheereza be. Yehova na hati naahikiiriza obujunaanizibwa bwe. Omwoyo gurikwera nigubaasa kutuhwera guta? Naitwe twine kuhamya ngu twaguma nituhikiiriza obujunaanizibwa bwaitu. Ekyo nitukikora tuta?

¹¹ Teekateeka aha kugyeragyeranisa oku. Kubaasa kuhwerwa omuyaga, omuvugi w’obwato aine kukora ebintu bibiri. Eky’okubanza, aine kureebesa obwato bwe ahu omuyaga gurikureetwa. Ahakuba obwato tiburikubaasa kugyenda omuvugi yaabureka kuguma aha nkungu hare n’ahu omuyaga gurikureetwa. Ekya kabiri, naaba aine kuzingurira gye amatanga g’obwato. Nangwa n’obu omuyaga gwakuba niguhuuha, obwato tiburikwija kugyenda omuyaga gwaba gutataahire omu matanga. Omuringo nigwo gumwe, nitwija kugumizamu nituheereza Yehova twaba twine obuhwezi bw’omwoyo gurikwera. Omwoyo gurikwera kubaasa kutugasira, twine kukora ebintu bibiri. Eky’okubanza, twine kukora ebintu ebirikutureetera kutunga obuhwezi bw’omwoyo gurikwera. Ekya kabiri, twine kwimutsya amatanga gaitu ag’akamanyiso turikwejumbira kimwe omu buheereza nk’oku kirikubaasa. (Zab. 119:32) Twakora ebintu ebyo, omwoyo gurikwera nigwija kutuhwera kugumizamu nitugumisiriza turikuraba omu bingonzi  by’okuhiiganisibwa n’okugyezibwa kuhitsya obu turaahikye omu nsi ensya.

12. Nituza kushwijuma ki hati?

¹² Hati twaherize kureeba emiringo ebiri oku omwoyo gurikwera gurikutuhwera. Omwoyo gurikwera nigutuha amaani kandi nigutuhwera kuguma turi abeesigwa twaba nitugyezibwa munonga. Kandi omwoyo gurikwera nigututsindika kugyenda omu maisho, n’okuguma omu muhanda ogurikuhitsya omu magara agatahwaho. Hati nituza kureeba ebintu bina ebi twine kukora kubaasa kuhwerwa omwoyo gurikwera omu bwijwire.

13. Kurugiirira aha 2 Timoseo 3:16, 17, Ebyahandiikirwe nibibaasa kutuhwera kukora ki, kwonka itwe twine kukora ki?

¹³ Eky’okubanza, yega Ekigambo kya Ruhanga. (Shoma 2 Timoseo 3:16, 17.) Ebigambo ‘okuhandiikisibwa Ruhanga’ omu Rugriika, amakuru aga butunu nibimanyisa “Ruhanga okuhuuha.” Ruhanga akakoresa omwoyo gwe ‘kuhuuha’ emiteekateekyere ye omu biteekateeko by’abaahandiikire Baibuli. Twashoma Baibuli kandi tukateekateeka aha bi twashoma, obuhabuzi bwa Ruhanga nibutaaha omu biteekateeko byaitu n’omu mitima yaitu. Obuhabuzi obwo nibutuhiga kukora empindahinduka kubaasa kukora ebi Ruhanga arikukunda. (Heb. 4:12) Kwonka kubaasa kuhwerwa omwoyo gurikwera omu bwijwire, twine kutaho obwire bw’okwega Baibuli butoosha kandi tukateekateeka munonga aha bi turikushoma. Obwo Ekigambo kya Ruhanga nikiija kutuhwera omu bi turikugamba n’ebi turikukora.

14. (a) Ahabw’enki turikubaasa kugira ngu omwoyo gurikwera niguba guri omu nteerane zaitu? (b) Nitubaasa kuza tuta omu nteerane amatanga gaitu g’akamanyiso gazinguriire?

¹⁴ Ekya kabiri, ramya Yehova ori n’abandi. (Zab. 22:22) Omu nteerane zaitu niyo ahu omuyaga gw’akamanyiso gurikuhuurira. Ekirikumanyisa ngu omwoyo gurikwera niguba guri omu nteerane zaitu. (Kush. 2:29) Ahabw’enki turikubaasa kugira tutyo? Ahakuba ku turikuteeranira hamwe n’Abakristaayo bagyenzi baitu, nitushaba Yehova kutuha omwoyo gurikwera, nitweshongora ebyeshongoro by’Obukama ebirikwegamira aha Kigambo kya Ruhanga, kandi nituhurikiza obuhabuzi kuruga omu Baibuli oburikuheebwa ab’eishe-emwe abatoorainwe omwoyo gurikwera. Kandi omwoyo gurikwera niguhwera banyaanyazi-itwe kutebeekanisa n’okuha ebicweka byabo. Kwonka kubaasa kuhwerwa omwoyo gurikwera omu bwijwire, twine kwija omu nteerane tutebeekaniise kuzeejumbamu. Omu muringo ogwo, nituza omu nteerane amatanga gaitu ag’akamanyiso gazinguriire.

15. Omwoyo gurikwera nigutuhwera guta omu murimo gwaitu gw’okubuurira?

¹⁵ Ekya kashatu, yejumbe omu kubuurira. Twakoresa Baibuli omu murimo gw’okubuurira n’okwegyesa, nitwikiriza omwoyo gurikwera kutuhwera omu buheereza bwaitu. (Rom. 15:18, 19) Kwonka kubaasa kuhwerwa omwoyo gurikwera omu bwijwire, nooba oine kwejumba omu murimo gw’okubuurira butoosha, kandi orikukoresa n’Ekigambo kya Ruhanga kyaba nikibaasika. Omuringo gumwe gw’okugaaniiramu gye n’abantu omu buheereza n’okukoresa enyanjura ezirikuba ziri omu Obuheereza Bwaitu n’Oku Turikutwaza Akatabo k’Okukoresa.

16. Ni muringo ki ogwa butunu ogw’okutungamu omwoyo gurikwera?

¹⁶ Ekya kana, shaba Yehova. (Mat. 7:7-11; Luk. 11:13) Omuringo gwa butunu ogw’okutunga omwoyo gurikwera n’okurabira omu kushaba Yehova. Tihaine ekirikubaasa kuremesa okushaba kwaitu kuhika ahari Yehova nari kuzibira ekiconco kirungi ky’omwoyo gurikwera kutuhikaho, n’obu byakuba ebisiika by’ekihome nangwa na Sitaane. (Yak. 1:17) Twine kushaba tuta kugira ngu omwoyo gurikwera gutuhwere omu bwijwire? Kubaasa kutunga eky’okugarukamu, ka tushwijume enshonga y’okushaba omu bwijwire turikushwijuma eky’okureeberaho ekiri omu Ngiri ya Luka. *

17. Nitwegyera ki aha ky’okureeberaho kya Yesu ekiri omuri Luka 11:5-9, 13 aha bikwatiraine n’okushaba?

¹⁷ Shoma Luka 11:5-9, 13. Eky’okureeberaho kya Yesu nikyoreka oku twine kushaba kutunga omwoyo gurikwera. Omu ky’okureeberaho eki, omushaija akatunga eki yaabaire naayenda “ahabw’okugumizamu” naashaba eki arikwenda aine obumanzi. Akaba atarikutiina kushaba munywani we kumuhwera n’obu buraabe bwabaire buri nyekiro. (Reeba ebigambo by’okwegaho ebya Luka 11:8.) Yesu akahikaanisa ata eky’okureeberaho eki n’okushaba? Akagira ngu mugume nimushaba, nimwija kuheebwa, mugume nimusherura, nimwija kuzoora, mugume ‘nimwiguza, nimwija kwigurirwaho.’ Mbwenu shi eki nitukyegamu ki? Kubaasa kuhwerwa omwoyo gurikwera, twine kugumizamu nitushaba.

18. Kurugiirira aha ky’okureeberaho kya Yesu, ahabw’enki turikubaasa kuhamya ngu Yehova naija kutuha omwoyo gurikwera?

¹⁸ Kandi eky’okureeberaho kya Yesu nikituhwera kureeba ahabw’enki Yehova naija kutuha omwoyo gurikwera. Omushaija omu ky’okureeberaho eki akaba naayenda kureeberera gye omugyenyi we. Akareeba ngu omugyenyi we owaamutaayaayiire nyekiro aine kumuha eby’okurya, kwonka akaba ataine ki aine. Yesu akagira ngu mutaahi w’omushaija ogwo akacwamu kumuha omugaati ahabw’okugira ngu akagumizamu naagumushaba. Yesu akaba ariyo naayegyesa ki? Omushaija otahikiriire ku araabe yaabaire ayeteekateekire kuhwera omutaahi owaagumiizemu naamushaba omugaati, nitubaasa kugira obuhame ngu Tataitwe ow’omu iguru naija kuha omwoyo gurikwera abo abarikugumizamu nibamushaba! N’ahabw’ekyo, nitubaasa kushaba twine obuhame ngu Yehova naija kugarukamu okushaba kwaitu okw’okuheebwa omwoyo gurikwera.​—Zab. 10:17; 66:19.

19. Ahabw’enki turikubaasa kugira obuhame ngu nitwija kuba abasinguzi?

¹⁹ Nitubaasa kuhamya ngu n’obu Sitaane araabe naaguma naateeraho obutaitsya kuturwanisa, nitwija kuba abasinguzi. Ahabw’enki? Ahabw’okugira ngu omwoyo gurikwera nigutuhwera omu miringo ebiri. Ogw’okubanza, nigutuha amaani agarikwetengyesa kusingura okugyezibwa. Ogwa kabiri, nigo maani agarikutsindika amatanga gaitu g’akamanyiso kubaasa kugumizamu nituheereza Yehova kuhitsya obu turaahikye omu nsi ensya. N’ahabw’ekyo ka tumariirire kutunga obuhwezi bw’omwoyo gurikwera omu bwijwire!