BAINGI aha Abakristaayo abaafurukire bakaza omu mahanga agatunguukire babaasize kugaruka omu mahanga ei barikuzaarwa. Barikuhigwa rukundo ei bainiire Yehova n’abantu bagyenzi baabo, bagiire kuheereza omu bicweka ahu ababuurizi barikwetengwa munonga. (Mat. 22:37-39) Bakeefeerereza ki, kandi batungire migisha ki? Okutunga eky’okugarukamu, ka tute omutima aha ihanga rya Cameroon omuri Africa.

Omuri 1998 ow’eishe-emwe Onésime akaruga owaabo Cameroon. Akamara emyaka 14 arikutuura aheeru. Eizooba rimwe, ari omu ruteerane, akahurira eky’okureeberaho ekirikukwata aha murimo gw’okubuurira. Omugambi akagira ati: “Ka tugire ngu abanywani babiri nibajuba omu myanya etarikushushana, kandi omwe naakwata eby’enyanja bingi kukira mugyenzi we, mbwenu shi ogwo orikukwata bikye tarikuza ahari eby’enyanja bingi?”

Eky’okureeberaho ekyo kikareetera Onésime kuteekateeka aha kugaruka Cameroon ahu abantu baingi barikwenda kwega Baibuli. Kwonka haine ebyabaire nibimwerarikiriza. Mbwenu shi akaba naija kumanyiira embeera z’omu ihanga eryo bwanyima y’okumara emyaka mingi omu ihanga erindi? Onésime kubaasa kumanya ekyo, akataayaaya omuri Cameroon kumara ameezi mukaaga. Reero omu 2012, akafuruka yaaza kutuurirayo kimwe.

Onésime naagira ati: “Nkaba nyine kumanyiira embeera y’obwire n’ezindi mbeera. Aha Kyombeko ky’Obukama, nkaba nyine kushutama aha bufoomu bw’embaaho. Kwonka ku naabaire nta omutima aha nteerane,” eki naakigamba arikumwenya, “ekyo kikaba kimpwera kwehuzya entebe mbi ezo.”

Omu 2013, Onésime akataaha omu bushwere na Géraldine, owaabaire agarukire Cameroon kuruga France ei yaabaire amazire emyaka mwenda. Bakatunga migisha ki ahabw’okucwamu kwebembeza ebirikukirayo obukuru? Onésime naagira ati: “Twembi tukaza omu Ishomero ry’Ababuurizi b’Obukama kandi twaheereza n’aha Beseeli. Omwaka oguhweire, abeegi ba Baibuli 20 bakabatizibwa omu kibiina kyaitu. Hati ninyehurira nk’ori omu mwanya guhikire ‘ogw’okujubamu.’” (Mak. 1:17, 18) Géraldine naayongyeraho arikugira ati: “Ntugire emigisha mingi okukira ei naabaire nimbaasa kuteekateeka.”

Judith akaza kutuura omuri United States kwonka akaba aine ekihika ky’okwongyera aha buheereza bwe. Naagira ati: “Ku naabaire nduga kutaayaayira abanyabuzaare omuri Cameroon, nkaba ndira ahabw’okutsigaho abantu baingi abu ntandikire kwegyesa Baibuli.” Kwonka, Judith akaguma naayeziringa kugaruka owaabo  Cameroon. Akaba aine omurimo gw’esente nyingi ogwabaire nigumubaasisa kujanjaba ishe owaabaire ari omuri Cameroon. Kwonka, ahabw’okwesiga Yehova, akacwamu kufuruka. Naikiriza obweremwa bwe arikugira ngu obumwe akaba ayegomba embeera nungi ezi yaatsigire omuri United States. Akashaba Yehova kumuhwera kumanyiira embeera ensya kandi omureeberezi orikutaayaayira ebibiina n’omukazi we bakamuhwera barikumugumya.

Judith ku arikureeba enyima, naagira ati: “Omu myaka eshatu nkatunga okushemererwa ahabw’okugira abaana bana ab’eby’omwoyo.” Judith akatandika kuheereza nka payoniya w’omutaano. Ebiro ebi, naaheereza na iba Sam-Castel barikutaayaayira ebibiina. Kwonka shi niki ekyahikire ahari ishe wa Judith? We n’ab’omu ka ye bakatunga irwariro omu ihanga erindi ahu baikiriize kumushashurira esente z’okushemezibwa. Ekirikushemeza, okushemezibwa kukagyenda gye.

Ow’eishe-emwe orikwetwa Victor akaza kutuura omuri Canada. Bwanyima y’okushoma ekicweka ky’Omunaara gw’Omurinzi ekirikukwata aha bwegyese bw’ahaiguru, ateekateeka aha kwega kwe. Omu mwanya gw’okuza aha yunivasite akaza omu itendekyero ry’emikono. Naagira ati: “Kikambaasisa kurahuka kutunga omurimo n’okukora eki naabaire nyiniire ekihika kukora, okuba payoniya.” Bwanyima, Victor akataatsya Caroline, reero bataayaaya omuri Cameroon. Ku baataayaayiire ofiisi y’eitaagi, bakahigwa kuteekateeka aha kuheereza omuri Cameroon. Victor naagira ati: “Tukaba tutaine ekirikutureetera kwanga, kandi ahabw’okugira ngu tukaba twayorobize embeera zaitu, tukaikiriza okwetwa okwo.” N’obu Caroline araabe yaabaire aine amagara mabi, bakagumizamu n’okucwamu kwabo baafuruka.

Victor na Caroline bakaba baapayoniya ab’obutwire kugira ngu babaase kuhwera abantu abaine ekihika ky’amaani eky’okwenda kumanya amazima. Kumara akaire bakaba nibakoresa esente ezi baabaire babiikire. Bwanyima y’ekyo, bakakora ameezi makye omuri Canada, kyababaasisa kugaruka Cameroon reero baagumizamu bari baapayoniya. Bakatunga migisha ki? Bakaza omu Ishomero ry’Ababuurizi b’Obukama, baaba baapayoniya ab’omutaano, kandi hati nibahwera omu kwombeka. Victor naagira ati: “Okutsigaho embeera zaitu nungi kitubaasiise kutunga obushagiki bwa Yehova.”

Omu 2002, Alain, owaabaire ari omwegi aha yunivasite omuri Germany, akashoma turakiti Youths​—What Will You Do With Your Life? Obutumwa bwayo bukamuhiga kutaho ebigyendererwa bisya. Omu 2006, akaza omu Ishomero ry’Okutendeka Abaheereza n’Abareeberezi kandi yaayoherezibwa Cameroon, owaabo.

Omuri Cameroon, Alain akatunga omurimo gw’okukora obwire bukye. Bwanyima akatunga omurimo ogundi ogw’esente nyingi, kwonka akaba naayerarikirira ngu tarikwija kutunga obwire burikumara kwejumba omu buheereza. N’ahabw’ekyo ku yaayetsirwe kuba payoniya w’omutaano, akaikiriza atarikweziringa. Bakama be bakamwongyeza omushaara, kwonka akahamira aha kucwamu kwe. Bwanyima, Alain akataatsya Stéphanie, owaabaire yaatwireho omuri France emyaka mingi. Akatunga buremeezi ki ku yaagarukire Cameroon?

Stéphanie naagira ati: “Nkaguma nindwararwara kandi naagira n’efumbi, kwonka nkatunga obujanjabi naaba gye.” Bakatunga ebihembo ahabw’okugumisiriza kwabo. Alain naagira ati: “Ku twagiire kubuurira omu kyaro kya Katé,  tukashangayo abantu baingi abarikwenda kwega Baibuli. Bwanyima, tukabaasa kwegyesa bamwe turikukoresa esimu. Babiri aharibo bakabatizibwa, kandi bakatandikayo guruupu.” Stéphanie naayongyeraho ati: “Tihariho ekirikureeta okushemererwa kwingi nk’okuhwera abantu kuhika aha kwehayo ahari Yehova. Ahabw’okuheereza aha, tutungire okushemererwa oku emirundi mingi.” Hati, Alain na Stéphanie nibataayaayira ebibiina.

Gisèle akabatizibwa obu yaabaire naayega obushaho omuri Italy. Akakunda emituurire y’ow’eishe-emwe n’omukazi we baapayoniya abaamwegyeise Baibuli, kandi nawe akaba naayenda kwongyera aha buheereza bwe. N’ahabw’ekyo Gisèle akaba payoniya ari hakye kuhendera emishomo ye.

Gisèle akaba aine ekihika ky’okwongyera aha buheereza bwe yaaheza kugaruka Cameroon, kwonka haine ebyabaire nibimwerarikiriza. Naagira ati: “Nkaba nyine kufeerwa obutuuzi bwangye omuri Italy, kutsigaho banywani bangye, n’abanyabuzaare abarikutuura omuri Italy.” Kwonka nabwo, omu Kwakataano 2016, Gisèle akafuruka yaagaruka Cameroon. Ku haahingwireho obwire, akataatsya Léonce, kandi ofiisi y’eitaagi eya Cameroon ekabaikiriza kuza kuheereza omu tauni eya Ayos, ahu ababuurizi b’Obukama baabaire nibetengwa munonga.

Embeera zikaba kiri zita omuri Ayos? Gisèle naagira ati: “Kaingi amashanyarazi gakaba nigarugaho kumara saabiiti ezirengire ahari emwe, reero esimu zaitu zihwaho omuriro. Obwire obwingi, zikaba ziba zitariho. Nkeega kuteekyesa enku, kandi tukaba tugyenda na kahuuba kutaha amaizi nyekiro twine tooci obu hatariyo bantu baingi.” Bakabaasa kwemera bata embeera egyo? Gisèle naagira ati: “Omwoyo gurikwera, enkunzi yangye orikunshagika, okugarurwamu amaani n’obuhwezi bw’esente obu abanyabuzaare n’abanywani baitu baabaire nibatuha bikatuhwera kubaho.”

Mbwenu shi Gisèle ashemereirwe ahabw’okugaruka omu ihanga ry’obuzaarwa? “Eego! Ataine kubangaanisa kwona,” nikwo arikugira. “Tukabanza kugumirwa twagira n’enyehurira z’okutamwa, kwonka ku twabirabiremu, nyowe na ibanyi tukareeba ngu tukakora eki twabaire twine kukora. Nitwesiga Yehova kandi hati twongyeire kumwirira haihi.” Léonce na Gisèle bakaza omu Ishomero ry’Ababuurizi b’Obukama, kandi hati nibaheereza nka baapayoniya ab’omutaano.

Nk’abajubi b’eby’enyanja abarikujuba ahatarikushushana kutunga eby’enyanja bingi, abo abarikugaruka owaabo nibeefeerereza beekundiire kuhwera abarikukunda amakuru g’Obukama. Hatariho kubangaanisa Yehova naija kuguma naijuka ababuurizi aba abeeziriki ahabw’okukunda eiziina rye. (Neh. 5:19; Heb. 6:10) Waaba nootuura omu ihanga erindi kandi eihanga rwawe ry’obuzaarwa riine ababuurizi bakye ab’Obukama, noobaasa kugarukayo kuhwera? Waakikora, noija kutunga emigisha mingi.​—Enf. 10:22.