1-2. (a) Ahabw’enki abaherize kutaaha omu bushwere baine kwesiga Yehova? (Zaaburi 37:3, 4) (b) Nituza kushwijuma ki omu kicweka eki?

ORI haihi kutaaha omu bushwere, nari nibwo oherize kubutaahamu? Kyaba nikwo kiri, hatariho kubangaanisa oine ekihika ky’okuguma n’omukundwa waawe mushemereirwe. Kwonka, obushwere nabwo bwine oburemeezi bwabwo, kandi nihaba hariho enshonga nkuru z’okucwamu. Omuringo ogu muraakwatemu enshonga ezi, nikwija kukwata aha kushemererwa kwanyu omu myaka eraakurateho. Mwayesiga Yehova, nimwija kucwamu gye, obushwere bwanyu nibwija kuhama, kandi nimwija kushemererwa. Kwonka mwaba mutafiireyo aha miteekateekyere ya Ruhanga, nimwija kutunga oburemeezi, oburaashiishe obushwere bwanyu, bukaburamu okushemererwa.—Shoma Zaaburi 37:3, 4.

² N’obu ekicweka eki kiraabe nikikwata aha baherize kutaaha omu bushwere, nikigamba n’aha mbeera zigumire ezi abari omu bushwere boona barikurabamu. Nikyoreka eki turikubaasa kwegyera aha bashaija n’abakazi abarikugambwaho omu Baibuli. Abantu aba nitubeegyeraho amashomo omu mbeera nyingi, otwariiremu n’obushwere. Nituza n’okureeba eki turikubaasa kwegyera aha bari omu bushwere ab’obunaku obu.

3-4. Abaherize kutaaha omu bushwere nibabaasa kutunga buremeezi ki?

³ Abamwe nibabaasa kuhiga abaherize kutaaha bushwere ngu baine kuba omu mbeera ezi barikweta eza butoosha.  Nk’eky’okureeberaho, abazaire n’abanyabuzaare nibabaasa kugyemesereza abaherize kutaaha omu bushwere kuzaara abaana ahonaaho. Nari abanywani n’abandi bataine bigyendererwa bibi nibabaasa kuhiga abaherize kutaaha omu bushwere kugura enju, ngu reero bagiijuzemu ebintu birungi.

⁴ Abashweraine aba baaba bategyendesereize, okucwamu kwabo nikubaasa kubareetera kugira amabanja maingi. N’ahabw’ekyo, bombi nibabaasa kutandika kukora eshaaha nyingi kushashura amabanja ago. Omurimo gw’okwebaisaho nigubaasa kutaahataaha omu bwire bw’okweyegyesa Baibuli, okuramya kw’eka, n’obuheereza. Nibabaasa n’okwosha enteerane, nari kukora ekirenga kutunga esente ezindi, nari kuhamya ngu baagumya emirimo yaabo. N’ekirikurugamu, nibabaasa kufeerwa emigisha y’okwongyera aha buheereza bwabo.

5. Nooyegyera ki ahari Klaus na Marisa?

⁵ Ebirikubaho nibyoreka ngu okuta omutima aha kutunga ebintu tikirikurugamu okushemererwa. Yetegyereze eki abashweraine Klaus na Marisa baayegire omu nshonga egi. * Aha kutandika kw’obushwere bwabo, bombi bakaba nibakora obutwire, kugira ngu bagire embeera nungi. Kwonka, bakaba nibahurira batamazirwe. Klaus naagira ati: “Tukaba twine ebintu ebirikukira aha birikwetengyesa, kwonka omu by’omwoyo tukaba tutaine bigyendererwa. Okuba ab’amazima, tukaba tugumiirwe kandi twine amaganya.” Obundi naiwe oyetegyereize ngu okuta omutima aha kutunga ebintu by’omubiri tikirikureeta okumarwa. Kyaba nikwo kiri, otahwamu amaani. Yetegyereze eby’okureeberaho by’abandi ebirikubaasa kukuhwera omu nshonga egi. Ka tubanze tureebe eki abashaija barikubaasa kwegyera aha Mugabe Yehoshafaati.

6. Kuhikaana n’Enfumu 3:5, 6, Omugabe Yehoshafaati akasingura ata oburemeezi bw’amaani?

⁶ Abashaija abari omu bushwere, obumwe nimuhurira murengirwe obujunaanizibwa? Kyaba nikwo kiri, nimubaasa kugasirwa omu ky’okureeberaho ky’Omugabe Yehoshafaati. Ahabw’okuba Omugabe akaba aine obujunaanizibwa bw’okureeberera eihanga ryona! Akabaasa kuhikiiriza ata obujunaanizibwa obwo? Yehoshafaati akakora kyona ekirikubaasika kurinda abari ahansi y’obushoboorozi bwe. Akahamya endembo za Yuda kandi yaatebeekanisa n’eihe rihango ery’abaserukare 160,000. (2 Bus. 17:12-19) Bwanyima, Yehoshafaati akatunga oburemeezi bw’amaani. Eihe rihango ery’Abaamoni, Abamoabu, n’abashaija b’omu nshozi za Seiri bakamutiinatiinisa, n’eka ye, n’abantu be. (2 Bus. 20:1, 2) Yehoshafaati akakora ki? Akashaba Yehova obuhwezi n’amaani. Eki kikaba nikihikaana n’obuhabuzi oburi Enfumu 3:5, 6. (Kishome.) Okushaba kwa Yehoshafaati okw’obucureezi, okuri omu 2 Obusingye  20:5-12, nikworeka ngu akaba naayesiga Ishe ow’omu iguru. Yehova akagarukamu ata okushaba kwa Yehoshafaati?

7. Yehova akagarukamu ata okushaba kwa Yehoshafaati?

⁷ Yehova akagamba na Yehoshafaati arikukoresa Omuleevi orikwetwa Yahazieli. Yehova akagira ati: “Muze omu myanya yaanyu, mwemerere kwonka, mureebe oku [Yehova] araabasingurire.” (2 Bus. 20:13-17) Buzima ogu ti muringo gwa butoosha ogw’okurwana! Kwonka, obuhabuzi obu bukaba butarikuruga aha bantu, kureka bukaruga ahari Yehova. Yehoshafaati akeesigira kimwe Yehova, yaakora nk’oku yaagambiirwe. Ku yaagyenzire n’abantu be kubugana eihe eryo, omu maisho tarateireyo abaserukare abarwani, kureka abeeshongozi abataine by’okurwanisa. Yehova tarareebize Yehoshafaati, akasingura eihe ry’abazigu.—2 Bus. 20:18-23.

8. Abashaija nibabaasa kwegyera ki ahari Yehoshafaati?

⁸ Abashaija abari omu bushwere, nimubaasa kwegyera ahari Yehoshafaati. Niiwe mutwe gw’eka, n’ahabw’ekyo nookora munonga kurinda eka yaawe n’okugireeberera. Ebintu byaguma, noobaasa kuteekateeka ngu oine kusingura oburemeezi obwo ahabwawe. Kwonka, yetantare kwesiga amaani gaawe. Kureka, shaba Yehova obuhwezi ori wenka. Kandi, shaba munonga n’omukazi waawe. Tunga obuhabuzi kuruga ahari Yehova orikwega Baibuli, n’ebitabo by’ekibiina kya Yehova, kandi ogyendere aha buhabuzi oburimu. Abamwe nibabaasa kutaikirizana n’obuhabuzi oburikwegamira ahari Baibuli baaba nibacwamu, kandi nibabaasa n’okukugira ngu n’obw’obushema. Nibabaasa kukugambira ngu okugira esente n’ebintu ebi esente zirikugura nibwo burinzi burungi bw’eka yaawe. Kwonka ijuka eky’okureeberaho kya Yehoshafaati. Akeesiga Yehova kandi yaakyoreka omu bigambo. Yehova taratsigireho omushaija ogwo omwesigwa, kandi naitwe tarikwija kututsigaho. (Zab. 37:28; Heb. 13:5) Abashweraine nibabaasa kukora ki kuhamya ngu baaguma hamwe omu bushwere burungi?

9. Nitubaasa kugamba ki ahari Isaaya n’omukazi we?

⁹ Nabi Isaaya n’omukazi we, bakaba nibaheereza hamwe Yehova. Isaaya akaba ari nabi, kandi n’omukazi we nawe naabaasa kuba yaabaire naagamba obunabi, ahakuba akaba naayetwa “nabikazi.” (Isa. 8:1-4) Isaaya n’omukazi we buzima bakaba bataire omutima aha kuramya Yehova hamwe. Ka baateeraireho abari omu bushwere eky’okureeberaho kirungi!

10. Okwega obunabi bwa Baibuli nikuhwera kuta abashweraine kumariirira kuheereza Yehova nk’oku kirikubaasika?

¹⁰ Abashweraine obunaku obu nibabaasa kwebembeza okuheereza Yehova barikukora kyona eki barikubaasa omu kumuheereza. Nibabaasa kwongyera kwesiga Yehova barikwega hamwe obunabi bwa Baibuli, barikureeba oku obutoosha burikuhikiirira. * (Tit. 1:2) Nibabaasa kuteekateeka aha ki barikubaasa kukora kwejumba omu kuhikiiriza obunabi bwa Baibuli obumwe. Nk’eky’okureeberaho, nibabaasa kwejumba omu kuhikiiriza obunabi bwa Yesu oburikugira ngu amakuru marungi nigaija kubuurirwa omu nsi yoona emperu etakaizire. (Mat. 24:14) Abashweraine oku barikwongyera kuhamya ngu obunabi bwa Baibuli buriyo nibuhikiirira,  nikwo barikwongyera kumariirira kuheereza Yehova munonga.

11. Priska na Akula bakakora bintu ki, kandi ahabw’enki?

¹¹ Abayudaaya Priscilla na Aquila bakaba nibatuura omu rurembo rwa Rooma. Bakaba bahuriire amakuru marungi agarikukwata ahari Yesu, kandi bakaba bahindukire Abakristaayo. Hatariho kubangaanisa, bakaba bamazirwe n’embeera zaabo. Kwonka, embeera zaabo zikahinduka obu Omutegyeki orikwetwa Kulaudio yaaragiira Abayudaaya kuruga omuri Rooma. Yetegyereze oku eki kyabaire nikiija kukwata ahari Akula na Priska. Bakaba nibaija kuruga omu mwanya ogu bamanyiriire, bombekye enju ensya, kandi batandikye n’omurimo gwabo ogw’okukora amahema omu mwanya musya. Mbwenu shi okuteganisibwa oku kukaba nikwija kubareetera kwehuzya eby’Obukama? Obundi noomanya eky’okugarukamu ky’ekibuuzo ekyo. Omu ka yaabo ensya omuri Korinso, Akula na Priska bakeegaita aha kibiina eki baashangireyo, barikukora hamwe n’entumwa Paulo kugumya ab’eishe-emwe. Bwanyima, bakaza omu tauni ezindi ezaabaire zitarimu babuurizi baingi. (Byak. 18:18-21; Rom. 16:3-5) Ka bashemereire kuba baatungire okushemererwa hamwe!

12. Ahabw’enki abashweraine baine kutaho ebigyendererwa by’omwoyo?

¹² Abashweraine ab’obunaku obu nibabaasa kutooreza Priska na Akula barikwebembeza eby’Obukama. Okweriima nibwo bwire burungi bw’okugamba aha bigyendererwa. Abashweraine baacwamu hamwe, kandi bakateeraho kuhikiiriza ebigyendererwa byabo hamwe, nibareeba oku omwoyo gurikwera gurikubahwera omu miringo mingi. (Mub. 4:9, 12) Teekateeka aha ky’okureeberaho kya Russell na Elizabeth. Russell naagira ati: “Omu kweriima, tukaguma nitugamba butunu aha bigyendererwa by’omwoyo.” Elizabeth naagira ati: “Tukaba nitugaaniira aha nshonga ezi, kugira ngu bwanyima twaba twine kucwamu, tuhamye ngu ebi turikucwamu tibyaturemesa kuhikiiriza ebigyendererwa byaitu.” Embeera za Russell na Elizabeth  zikababaasisa kuza omuri Micronesia kuheereza ahu ababuurizi barikwendwa munonga.

13. Kurugiirira ahari Zaaburi 28:7, niki ekirikwija kubaho twayesiga Yehova?

¹³ Nka Russell na Elizabeth, abashweraine baingi bacwiremu kumara obwire bwingi omu murimo gw’okubuurira n’okwegyesa barikwetantara ebindi ebirikuhuzya. Abashweraine baataho ebigyendererwa by’okuheereza Yehova, kandi bakakora hamwe kubihikiiriza, niharugamu ebirungi. Nibaija kureeba oku Yehova arikubareeberera, nibaija kwongyera kumwesiga, kandi nibaija kushemererwa buzima.—Shoma Zaaburi 28:7.

14. Entumwa Petero n’omukazi we bakooreka bata ngu nibeesiga okuraganisa okuri omu Matayo 6:25, 31-34?

¹⁴ Abashweraine nibabaasa n’okwegyera aha ntumwa Petero n’omukazi we. Petero kumara ameezi nka mukaga nari omwaka arikukoragana na Yesu, akaba aine kucwamu aha nshonga nkuru. Petero akaba naakora omurimo gw’okujuba eby’enyanja. N’ahabw’ekyo, obu Yesu yaayeta Petero kumukuratira obutwire, Petero akaba aine kuteekateeka aha mbeera y’eka ye. (Luk. 5:1-11) Petero akacwamu kukuratira Yesu omu murimo gwe gw’okubuurira. Akacwamu gye! Kandi twine enshonga nungi kuteekateeka ngu muka Petero akashagika okucwamu kwe. Baibuli neeyoreka ngu bwanyima ya Yesu kuzooka, muka Petero akagyenda nawe kumara obwire. (1 Kor. 9:5) Buzima, eky’okureeberaho kye kirungi nk’omukazi Omukristaayo kikamubaasisa kuhana Abakristaayo abashaija n’abakazi ataine kwekyengyera. (1 Pet. 3:1-7) Buzima, Petero n’omukazi we bakeesiga okuraganisa kwa Yehova ngu abarikwebembeza eby’Obukama naija kubaha eby’okwebaisaho.—Shoma Matayo 6:25, 31-34.

15. Nooyegyera ki ahari Tiago na Esther?

¹⁵ Ku oraabe omazire obwire omu bushwere, noobaasa kwongyera ota kugira ekihika ky’okwongyera aha buheereza bwawe? Omuringo gumwe n’okwetegyereza abandi abari omu bushwere. Nk’eky’okureeberaho, noobaasa kushoma ebicweka omu ebiine omutwe “Bakeehayo Beekundiire.” Ebicweka nk’ebyo bikahwera Tiago na Esther, abashweraine kuruga Brazil, kugira ekyetengo ky’amaani eky’okuheereza ahu ababuurizi barikwendwa munonga. Tiago naashoboorora ati: “Twaba nitushoma oku Yehova ahwereire abaheereza be kumuheereza obunaku obu, naitwe nitureeba omukono gwa Yehova n’oku arikutufaho.” Bwanyima bakaza Paraguay, ahu batwire nibaheereza omu Orupotuguezi kuruga 2014. Esther naagira ati: “Ekyahandiikirwe eki twembi turikukunda n’Abaefeso 3:20. Emirundi mingi, tureebire oku ebigambo ebyo birikuhikiirira omu buheereza bwaitu.” Omu baruha egyo ei Paulo yaahandiikiire Abaefeso, akaraganisa ngu Yehova naija kutuha bingi kukira aha bi turikushaba. Ekiraganiso ekyo ka kihikire!

16. Abashweraine abakiri bato nibabaasa kushaba baahi obuhwezi baaba nibashwijuma ebigyendererwa byabo?

¹⁶ Abashweraine abakiri bato nibabaasa kugasirwa omu ky’okureeberaho ky’abandi abeegire kwesiga Yehova. Abashweraine abamwe nibabaasa kuba bamazire emyaka mingi omu buheereza obw’obutwire. Ahabw’enki otarikubashaba obuhwezi ku oraabe nooyenda kushwijuma ebigyendererwa byawe? Ogu n’omuringo ogundi oku orikubaasa kworeka ngu nooyesiga Yehova. (Enf. 22:17, 19) Abareeberezi nabo nibabaasa kuhwera  abashweraine kutaho ebigyendererwa by’omwoyo.

17. Niki ekyahikire ahari Klaus na Marisa, kandi nitubeegyeraho ki?

¹⁷ Kwonka obumwe, okucwamu kwaitu kwongyera aha buheereza nikubaasa kutagyenda nk’oku tubaire nituteekateeka. Eki nikyo kyahikire ahari Klaus na Marisa, abaagambwaho aha kutandika. Bwanyima y’okumara emyaka eshatu omu bushwere, bakaruga owaabo baaza kuhwera aha murimo gw’okwombeka aha itaagi rya Finland. Kwonka, bakeega ngu bakaba batarikuza kwikirizibwa kugumayo kumara ameezi agarengire ahari mukaaga. Omu kubanza, bakeehurira kubi. Kwonka ahonaaho bwanyima y’ekyo, bakeetwa kuza kwega Oruharabu, kandi hati bashemereirwe nibaheereza omu ihanga eririkukoresa Oruharabu. Marisa naayongyeraho ati: “Ni kitiinisa kuruga omu mbeera ezi omanyiriire reero okeesigira kimwe Yehova. Kwonka ndeebire oku Yehova butoosha atuhaire omugisha omu miringo ei tutarikuteekateeka. Bwanyima y’okuroza ahari eki, nyongyeire kwesigira kimwe Yehova.” Nk’oku eky’okureeberaho eki kirikworeka, noobaasa kuhamya ngu Yehova butoosha naija kukuha emigisha waamwesigira kimwe.

18. Abashweraine nibabaasa kukora ki kugumizamu nibeesiga Yehova?

¹⁸ Obushwere n’ekiconco kuruga ahari Yehova. (Mat. 19:5, 6) Naayenda ngu abashweraine beesiimire omu kiconco ekyo. (Enf. 5:18) Abashweraine abakiri bato, ahabw’enki mutarikushwijuma ebigyendererwa byanyu? Nimukora kyona ekirikubaasika kworeka ngu buzima nimusiima Yehova ahabw’ebiconco ebi abahaire? Mugambire Yehova omu kushaba. Musherure emisingye omu Kigambo kye erikuhikaana n’embeera zaanyu. Reero mukuratire obuhabuzi obu Yehova arikubaha. Nimubaasa kuhamya ngu nimwija kutunga okushemererwa n’emigisha mwaba nimwebembeza okuheereza Yehova omu bushwere bwanyu!