1. Okwerinda nikimanyisa ki? (2 Timoseo 4:5)

 TWAHIKWAHO oburemeezi, obwesigye bwaitu omuri Yehova n’ekibiina kye nibubaasa kugyezibwa. Nitubaasa kusingura tuta oburemeezi obwo? Twine kwerinda kandi tukaguma nitureeba, tuhamire omu kwikiriza. (Shoma 2 Timoseo 4:5.) Nitwerinda twaguma twikaikaine, twine emiteekateekyere mirungi, kandi tukateeraho kureeba enshonga nk’oku Yehova arikuzireeba. Twakora ekyo, enyehurira zaitu tiziraategyeke ebiteekateeko byaitu.

2. Nituza kugamba ahari ki omu kicweka eki?

² Omu kicweka eky’enyima, tureebire oburemeezi bw’emiringo eshatu oburikubaasa kutuhikaho kuruga aheeru y’ekibiina. Omu kicweka eki, nituza kureeba obundi bushatu kuruga omu kibiina, oburikubaasa kugyeza okuhamira kwaitu ahari Yehova. Nibwo obu, (1) Omukristaayo mugyenzi waitu yaatutwariza kubi, (2) twahanwa, na (3) twaba nitugumirwa kumanyiira empinduka z’ekibiina. Nitubaasa kwerinda tuta kandi tukaguma tuhamiire ahari Yehova n’ekibiina kye twahikwaho oburemeezi nk’obwo?

3. Niki ekirikubaasa kubaho Omukristaayo mugyenzi waitu yaatutwariza kubi?

³ Omukristaayo mugyenzi waawe, obundi oine obujunaazibwa araakutwariizeho kubi? Naabaasa kuba yaabaire atagyendereire kukugwisa kubi. (Rom. 3:23; Yak. 3:2) Kwonka, ebikorwa bye nibibaasa kuba byakureeteire kwehurira kubi.  Noobaasa kuba waabuzirwe oturo ahabw’ekyabaireho. Noobaasa kuba waayebuurize oti: ‘Ow’eishe-emwe ku araabe naabaasa kuntwariza ati, buzima eki n’ekibiina kya Ruhanga?’ Sitaane naayenda ngu twehurire tutyo. (2 Kor. 2:11) Enyehurira nk’ezo nizibaasa kutureetera kwetaanisa ahari Yehova n’ekibiina kye. Mbwenu shi ow’eishe-emwe nari munyaanyazi-itwe yaatutwariza kubi, nitubaasa kwerinda tuta kandi tukeetantara kugira emiteekateekyere etahikire?

4. Yosefu akeerinda ata obu yaatwarizibwa kubi, kandi nitubaasa kumwegyeraho ki? (Okutandika 50:19-21)

⁴ Otarahuka kugira ekiniga. Obu Yosefu yaabaire ari omutsigazi, bakuru be bakamutwariza kubi. Bakamwanga, kandi bamwe ahariibo bakaba nibenda kumwita. (Kut. 37:4, 18-22) Bwanyima, bakamuguza omu buhuuku. N’ekyarugiremu, Yosefu akatunga oburemeezi bw’amaani kumara emyaka nka 13. Yosefu naabaasa kuba yaayebuurize yaaba buzima Yehova naamukunda. Omu bwire obwo naabaasa kuba yaateekateekire ngu Yehova amutsigireho. Kwonka Yosefu taragizire kiniga. Kureka, akeerinda yaaguma aikaikaine. N’obu yaabaire naabaasa kweshashuza arikutwariza kubi beene ishe tarakikozire, kureka akooreka ngu naabakunda, kandi ngu akabasaasira. (Kut. 45:4, 5) Yosefu akabaasa kutwaza atyo ahakuba akaba aine emiteekateekyere mirungi. Omu mwanya gw’okuta omutima aha buremeezi bwe, akaguta aha kigyendererwa kya Yehova ekikuru. (Shoma Okutandika 50:19-21.) Eki nitukyegyeraho ki? Waatwarizibwa kubi, otagirira Yehova ekiniga nari okateekateeka ngu akutsigireho. Kureka, teekateeka aha ku arikukuhwera kwemera oburemeezi. Ekindi, abandi bakutwariza kubi, shweka obutahikiirira bwabo na rukundo.—1 Pet. 4:8.

5. Miqueas akeerinda ata ku yaatwariziibwe kubi?

⁵ Teekateeka aha kyahikire aha mureeberezi omwe kuruga South America orikwetwa Miqueas. b Naijuka obu yaabaire naateekateeka ngu ab’eishe-emwe abaine obujunaanizibwa bamutwariize kubi. Naagira ati: “Nkaba ntakagirahoga amaganya nk’ago. Nkeerarikirira munonga. Nkaba ntarikubaasa kugwejegyera nyekiro, kandi nkaba ndira ntaine kihwera.” Kwonka nabwo, Miqueas akaguma naayerinda kandi akateeraho kutegyeka enyehurira ze. Akashaba Yehova emirundi mingi kumuha omwoyo gurikwera n’amaani g’okugumisiriza. Kandi akasherura obuhabuzi omu bitabo by’ekibiina obwabaire nibubaasa kumuhwera. Eky’okwega? Waaba nooteekateeka ngu ow’eishe-emwe nari munyaanyako yaakutwariza kubi, guma oikaikaine kandi oteereho kutegyeka enyehurira zaawe. Noobaasa kutamanya ekyareetera omuntu ogwo kugamba nari kutwaza atyo. N’ahabw’ekyo shaba Yehova kukuhwera kureeba enshonga nk’oku omuntu ogwo arikuzireeba. Waakora otyo nikibaasa kukuhwera kwetegyereza ngu ow’eishe-emwe nari munyaanyoko tagyendereire kukukora kubi kandi kikuhwere kwehuzya enshonga. (Enf. 19:11) Ijuka ngu Yehova naayetegyereza gye embeera yaawe, kandi naija kukuha amaani agarikwetengyesa kugumisiriza.—2 Bus. 16:9; Mub. 5:8.

6. Ahabw’enki ni kikuru kureeba okuhanwa nk’okurikworeka ngu Yehova naatukunda? (Abaheburaayo 12:5, 6, 11)

⁶ Okuhanwa nikubaasa kureetera omuntu kwehurira kubi. Kwonka twata omutima aha nyehurira zaitu, nitubaasa kwehuzya  okuhanwa oku twaheebwa, tuteekateekye ngu kwaba kutarikwetengyesa. N’ekirikurugamu, nitubaasa kutareeba okuhanwa nk’omuringo ogu Yehova arikworekamu ngu naatukunda. (Shoma Abaheburaayo 12:5, 6, 11.) Kandi twikiriza kutegyekwa enyehurira zaitu, nituha Sitaane ahokwihirira kushiisha ebiteekateeko byaitu. Naayenda ngu twehuzye okuhanwa kandi ekibi munonga naayenda ngu twetaanise ahari Yehova n’ekibina kye. Ku oraabe ohanirwe, noobaasa kurinda ota emiteekateekyere yaawe?

7. (a) Nk’oku kirikworekwa omu kishushani, Petero ku yaikiriize okuhanwa, Yehova akamukoresa ata? (b) Niki eki orikwegyera ahari Petero?

⁷ Ikiriza okuhanwa kandi okore empinduka ezirikwetengyesa. Emirundi mingi Yesu akahanira Petero omu maisho g’entumwa ezindi. (Mak. 8:33; Luk. 22:31-34) Petero naabaasa kuba yaayehurire kubi. Kwonka, akaguma ahamiire ahari Yesu. Akaikiriza kuhanwa kandi yaayegyera aha nshobe ze. N’ekyarugiremu, Yehova akaha Petero emigisha ahabw’okuguma ari omwesigwa, kandi yaamuha obujunaanizibwa bukuru omu kibiina. (Yoh. 21:15-17; Byak. 10:24-33; 1 Pet. 1:1) Niki eki turikwegyera ahari Petero? Twikiriza kuhanwa kandi tukakora empinduka ezirikwetengyesa tutataire omutima aha nyehurira zaitu, nitugasirwa kandi n’abandi nibagasirwa. Twakora tutyo, nitwongyera kuba ab’omugasho ahari Yehova n’aha b’eishe-emwe.

8-9. Bernardo ku yaahanirwe akabanza kutwaza ata, kwonka niki ekyamuhweraire kuhindura emiteekateekyere ye?

⁸ Teekateeka aha kyahikire aha w’eishe-emwe Bernardo, owa Mozambique. Akaihwaho obujunaanizibwa bw’okuba omureeberezi. Bernardo akeehurira ata omu kubanza? Naagira ati: “Nkagira ekiniga ahakuba tindakunzire okuhanwa oku naahairwe.” Akaba naata omutima aha ki abandi omu kibiina baabaire nibamuteekateekaho. Naikiriza ati: “Kinkatwarira ameezi kwikiriza okuhanwa okwo, n’okugaruka kwesiga Yehova n’ekibiina kye.” Niki ekyahweraire Bernardo kugira emiteekateekyere mirungi aha kuhanwa?

⁹ Bernardo akahindura omu miteekateekyere ye. Naashoboorora ati: “Obu naabaire ndi omureeberezi nkaba ninkoresa Abaheburaayo 12:7 kuhwera abandi kugira emiteekateekyere mirungi baahanwa Yehova.  N’ahabw’ekyo nk’ebuuza nti: ‘Ni baahi abaine kugyendera aha kyahandiikirwe eki?’ N’abaheereza ba Yehova boona, otwariiremu naanye.” Bwanyima Bernardo akateeraho kugaruka kwesiga Yehova n’ekibiina kye. Akoongyera kugyendera aha ntebeekanisa ye y’okushoma Baibuli n’okugiteekateekaho munonga. N’obu araabe yaayehurire kubi aha ku ab’eishe-emwe na banyaanya baabaire nibamureeba, akaba naabuurira nabo, kandi ayejumba n’omu nteerane z’ekibiina. Bwanyima, Bernardo akagaruka yaaba omureeberezi. Nka Bernardo, waahanwa, yetantare kuta omutima aha birikubaasa kubaho, ikiriza obuhabuzi, kandi okore empinduka ezirikwetengyesa. c (Enf. 8:33; 22:4) Waakora otyo, noobaasa kugira obwesigye ngu Yehova naija kukuha emigisha ahabw’okuguma omuhamiireho n’ekibiina kye.

10. Ni mpinduka ki eyaabaireho omu Abaisraeli erikubaasa kuba yaagyerize obwesigwa bw’emitwe y’amaka?

¹⁰ Empinduka ezirikubaho omu kibiina nizibaasa kugyeza okuhamira kwaitu ahari Yehova. Twaba tutegyendesereize nizibaasa kutureetera kuruga ahari Yehova. Nk’eky’okureeberaho, teekateeka aha ku empinduka ezaabaireho omu Biragiro bya Musa zaakwatsire aha Abaisraeli. Ebiragiro bitakateirweho, emitwe y’amaka bakaba nibakora emirimo y’obunyamurwa. Bakaba nibombeka amatabiro, kandi bahayo ebitambo ahari Yehova ahabw’amaka gaabo. (Kut. 8:20, 21; 12:7; 26:25; 35:1, 6, 7; Yob. 1:5) Kwonka ebiragiro ku byateirweho, emitwe y’amaka babaka batarikwikirizibwa kukora ekyo. Yehova akatoorana abanyamurwa omu ka y’Arooni kuba nibo baaguma nibahayo ebitambo. Bwanyima y’empinduka egyo kuteebwaho, omutwe gw’eka owaabaire atari w’oruganda rw’Aroona ku yaabaire akora nk’omunyamurwa akaba aitwa. d (Lev. 17:3-6, 8, 9) Mbwenu shi empinduka egyo neebaasa kuba niyo yaareeteire Koora, Dasani, Abiraamu, n’abeebembezi 250 kuhakanisa Musa na Arooni? (Kub. 16:1-3) Titurikumanya. Kyona ekyabaireho, Koora n’abagyenzi be bakaremwa kuguma bahamiire ahari Yehova. Noobaasa kukora ki empinduka ezirikubaho omu kibiina zaakugyeza kutahamira ahari Yehova?

11. Niki eki turikwegyera ahari bamwe Abakohasi?

¹¹ Shagikira kimwe empinduka z’ekibiina. Abakohasi obu baabaire bari omu ihamba, bakaba baine obujunaanizibwa bukuru. Abaisraeli ku baabaire batandika orugyendo, Abakohasi abamwe bakaba beekorera eshanduukye y’endagaano babebembera. (Kub. 3:29, 31; 10:33; Yos. 3:2-4) Obwo ka bwabaire buri obujunaanizibwa bw’omutaano! Kwonka, hakabaho empinduka Abaisraeli kubaahikire omu Nsi Eyaaraganisiibwe. Kikaba kitakyetengyesa kuguma nibakiriza Eshanduukye. N’ahabw’ekyo obu Sulemaani yaagiire kuba omugabe, bamwe aha Bakohasi bakaba baahairwe obujunaanizibwa bw’okweshongora, abamwe bari abakumiirizi b’amarembo, kandi abandi barikureeberera amabiikiro. (1 Bus. 6:31-33; 26:1, 24) Tihariho ekirikworeka ngu Abakohasi bakeetomboita nari ngu bakashaba kuheebwa obujunaanizibwa oburikukirayo ahabw’okugira ngu omu kubanza bakaba baine obujunaanizibwa bw’omutaano.  Eky’okwega? Nitushagika empinduka ezirikubaho omu kibiina n’omutima gwaitu gwona n’obu zaakuba nizikwata aha bujunaanizibwa bwaitu. Gira okushemererwa omu bujunaanizibwa bwona obu oraaheebwe. Ijuka ngu obujunaanizibwa obu oine tibwo burikukuhindura ow’omuhendo ahari Yehova. Yehova naakusiima ahabw’okworoba okukira obujunaanizibwa obu oine.—1 Sam. 15:22.

12. Zaina akeehurira ata ku yaarugire aha Beseeli?

¹² Teekateeka aha ky’okureeberaho kya munyaanyazi-itwe Zaina, kuruga omuri Middle East, ou obuheereza bwe bwahindwirwe. Bwanyima y’okuheereza aha Beseeli emyaka 23 akaruga omu buheereza obwo. Naagira ati: “Obuheereza bwangye ku bwahindukire nkatunga ekyekaango. Nkeereeba nk’otaine mugasho, kandi nkaguma ninyebuuza nti: ‘Nkozire nshobe ki?’” Eky’obusaasi, ab’eishe-emwe omu kibiina bakoongyera aha busaasi bwe barikumugira bati: “Kuri noogira ngu obaire nookora gye, ekibiina kibaire kitaraikirize ngu orugyeyo.” Zaina akamara obwire arikwehurira kubi kandi arikurira buri kiro. Kwonka naagira ati: “Tindabangaaniise aha kibiina kya Yehova, nari ahari rukundo ei anyiniire.” Zaina akabaasa kurinda ata emiteekateekyere ye?

13. Zaina akakora ki kubaasa kusingura emiteekateekyere etahikire?

¹³ Zaina akabaasa kusingura emiteekateekyere ye etahikire. Ata shi? Akashoma ebicweka ebiri omu bitabo byaitu ebirikukwata aha mbeera nk’eye. Ekicweka “Noobaasa Kusingura Okwehurira Kubi!” omu Watchtower eya Febwari 1, 2001, kikamuhwera munonga. Ekicweka ekyo nikishoboorora oku Mako omuhandiiki wa Baibuli yaayehurire obu obujunaanizibwa bwe bwahinduka. Zaina naijuka ngu, “eky’okureeberaho kya Mako kikamuhwera kurekyera aho kwehurira kubi.” Kandi Zaina akaguma haihi na banywani be. Tareetaaniise aha bandi, nari kuta omutima aha nyehurira ze. Aketegyereza ngu omwoyo gwa Yehova nigukorera omu kibiina kye, kandi ngu abareeberezi nibamufaho munonga. Ekindi, akeetegyereza ngu ekibiina kya Ruhanga nikicwamu ebihikire kugira ngu omurimo gwa Yehova gubaase kukorwa gye.

14. Vlado akagumirwa kumanyiira mpiduka ki y’ekibiina, kwonka niki ekyamuhweraire?

¹⁴ Vlado, omureeberezi oine emyaka 73 kuruga Slovenia, akeehurira kubi ekibiina kye  ku baakigaitsire n’ekindi, kandi Ekyombeko ky’Obukama kyabo kikakingwa. Naagira ati: “Tindetegyereize ahabw’enki baakingire Ekyombeko ky’Obukama ekyo ekyabaire nikireebeka gye. Nkeehurira kubi ahakuba nibwo twabaire tuherize kukihunduuza. Ndi omubaizi kandi nkaba mperize kutamu ebintu bisya. Kandi, okuza omu mwanya ogundi kikaba nikyetengyesa kukora empinduka ezaabaire zitoorobi ahariitwe ababuurizi abakuzire.” Niki ekyahweraire Vlado kushagika empinduka egyo? Naashoboorora ati: “Okushagika empinduka ezirikukorwa ekibiina kya Yehova butoosha nikurugamu ebirungi. Empinduka ezo nizitutebeekanisiza empinduka z’amaani eziraabeho omu biro by’omumaisho.” Noogumirwa kumanyiira empinduka ezirikubaho ekibiina kyawe baakigaita n’ekindi nari obujunaanizibwa bwawe bwahinduka? Gira obwesigye ngu Yehova naayetegyereza oku orikwehurira. Waashagika empinduka ezo kandi okaguma ohamiire ahari Yehova n’ekibiina kye eki arikukoresa, noija kutunga emigisha.—Zab. 18:25.

15. Nitubaasa kwerinda tuta twahikwaho oburemeezi kuruga omu kibiina?

¹⁵ Obu emperu y’obusingye obu erikwirira haihi, twine kumanya ngu nitubaasa kuhikwaho oburemeezi kuruga omu kibiina. Oburemeezi obwo nibubaasa kugyeza okuhamira kwaitu ahari Yehova. N’ahabw’ekyo twine kwerinda. Omukristaayo mugyenzi waawe yaakutwariza kubi, otarahuka kugira ekiniga. Waahanwa, otata omutima aha nyehurira zaawe, kureka ikiriza obuhabuzi okore empinduka ezirikwetengyesa. Kandi ekibiina kya Yehova kyakora empinduka ezirikukukwataho, zishagike n’omutima gwawe gwona kandi oyorobere obuhabuzi.

16. Noobaasa kuguma ota ori omwesigwa ahari Yehova n’ekibiina kye?

¹⁶ Noobaasa kuguma nooyesiga Yehova n’ekibiina kye obwesigwa bwawe bwagyezibwa. Kwonka, kubaasa kukora ekyo, oine kwerinda ekirikumanyisa okuguma oikaikaine, orikuteekateeka gye, n’okureeba enshonga nk’oku Yehova arikuzireeba. Teeraho kushoma aha barikugambwaho omu Baibuli abaasingwire oburemeezi nk’obwo, kandi oteekateekye aha bi orikubeegyeraho. Shaba Yehova kukuhwera. Oteeshoroora aha kibiina. Waakora otyo, Sitaane tarikwija kubaasa kukutaanisa ahari Yehova n’ekibiina kye.—Yak. 4:7.