1. Nitumanya tuta ngu Yehova naayenda kutwirira haihi?

 YEHOVA naatuhiga kumwirira haihi. (Yak. 4:8) Naayenda kuba Ruhanga waitu, Tataitwe, kandi Munywani waitu. Naagarukamu okushaba kwaitu, kandi naatuhwera twaba twine oburemeezi. Naakoresa ekibiina kye kutwegyesa n’okuturinda. Kwonka twine kukora ki kubaasa kwirira haihi Yehova?

2. Nitubaasa kwirira haihi tuta Yehova?

² Nitubaasa kwirira haihi Yehova turikumushaba, turikushoma Ekigambo kye kandi tukakiteekateekaho. Twakora tutyo, nitwongyera kumukunda n’okumusiima. Ekyo nikituhiga kumworobera n’okumuhimbisa nk’oku kishemereire. (Kush. 4:11) Ku turikwongyera kumanya Yehova nitwongyera kumwesiga n’ekibiina kye eki arikukoresa kutuha obuhwezi.

3. Omuregi naateeraho ata kututaanisa ahari Yehova, kwonka niki ekiraatuhwere kumuhamiraho n’ekibiina kye? (Zaaburi 31:13, 14)

³ Kwonka, Omuregi naateeraho kututaanisa ahari Yehova na munonga twahikwaho emirabanamu. Eki naakikora ata? Arikuteeraho mporampora kutuubya obwesigye bwaitu omuri Yehova n’ekibiina kye. Kwonka nitubaasa kwangira obukoryo bwe. Okwikiriza kwaitu n’obwesigye bwaitu omuri Yehova byaba bihami, nitwija kuguma tumuhamiireho n’ekibiina kye.—Shoma Zaaburi 31:13, 14.

4. Nituza kugamba ahari ki omu kicweka eki?

⁴ Omu kicweka eki, nituza kugamba aha bintu bishatu eby’aheeru y’ekibiina ebirikubaasa kutuubya obwesigye bwaitu omuri Yehova n’ekibiina kye. Ebintu ebi nibibaasa kututaanisa  bita ahari Yehova? Kandi nitubaasa kukora ki kusingura emitego ya Sitaane?

5. Oburemeezi nibubaasa kutuubya buta obwesigye bwaitu omuri Yehova n’ekibiina kye?

⁵ Obumwe, nituhikwaho oburemeezi nk’okuhiiganisibwa ab’eka yaitu nari okufeerwa omurimo. Embeera nk’ezi nizibaasa kututaanisa zita ahari Yehova kandi zikatuubya obwesigye obu twine omu kibiina kye? Twagumisiriza oburemeezi kumara obwire buraingwa nitubaasa kwehwa amatsiko kandi twehurire kubi. Sitaane naakoresa embeera ezo kutureetera kubangaanisa yaaba Yehova naatukunda. Omuregi naayenda tuteekateeke ngu okubonabona kwaitu nikureetwa Yehova n’ekibiina kye. Ekyo nikyo kyahikire aha Baisraeli bamwe omuri Misri. Omu kubanza bakaba nibaikiriza ngu Yehova atooraine Musa na Arooni kubacungura kuruga omu buhuuku. (Kur. 4:29-31) Kwonka, Faraho ku yaagumize embeera zaabo, bakeetomboitera Musa na Arooni ahabw’oburemeezi bwabo barikubagira bati: “Niimwe mureeteire Faraho n’abashaija be kutwangira kimwe, n’okukwata rurara kutwita.” (Kur. 5:19-21) Bakata orubanja aha baheereza ba Ruhanga abeesigwa. Ka kyabaire eky’obusaasi! Ku oraabe otwire noogumisiriza oburemeezi kumara obwire buraingwa, noobaasa kuguma ota ohamize obwesigye bwawe omuri Yehova n’ekibiina kye?

6. Niki eki turikwegyera ahari nabi Habakuuki aha bikwatiraine n’okugumisiriza oburemeezi? (Habakuuki 3:17-19)

⁶ Shaba Yehova orikumugambira byona ebikuri aha mutima, kandi ogire obwesigye ngu naaza kukuhwera. Nabi Habakuuki akahikwaho oburemeezi bwingi. Hariho obu yaabangaanisa yaaba Yehova naamufaho. N’ahabw’ekyo akagambira Yehova omu kushaba oku yaabaire naayehurira. Akagira ati: ‘Ai [Yehova], ninyija kuhitsya hi okukutakira, okanga kumpurira? . . . Ahabw’enki noondeebesa ebitahikire n’eby’eitima?’ (Hab. 1:2, 3) Yehova akagarukamu okushaba kw’omuheereza we ogwo omwesigwa. (Hab. 2:2, 3) Habakuuki ku yaateekateekire aha bikorwa bya Yehova eby’okujuna akagaruka yaagira okushemererwa. Akahamiza kimwe ngu Yehova naamufaho kandi naaza kumuhwera kwemera oburemeezi bwona. (Shoma Habakuuki 3:17-19.) Ekyo nitukyegyeraho ki? Waaba oine oburemeezi shaba Yehova kandi omugambire oku orikwehurira. Kandi gira obwesigye ngu naaza kukuhwera. Waakora otyo, noobaasa kugira obwesigye ngu Yehova naaza kukuha amaani agarikwetengyesa kugumisiriza. Kandi waareeba oku arikukuhwera, okwikiriza kwawe nikwongyera kuhama.

7. Omunyabuzaare wa Shirley akateeraho kumureetera kugira miteekateekyere ki, kandi niki ekyamuhweraire kuguma naayesiga Yehova?

⁷ Hamira aha ntebeekanisa yaawe y’eby’omwoyo. Yetegyereze oku eki kyahweraire munyaanyazi-itwe Shirley, owa Papua New Guinea, obu yaabaire aine oburemeezi. b Eka ya Shirley bakaba bari abooro, kandi obumwe barikugumirwa kutunga eby’okurya birikumara. Omunyabuzaare akateeraho kumureetera kutuubya obwesigye bwe omuri Yehova. Akagira ati: “Noogira ngu omwoyo gwa Ruhanga ogurikwera nigukuhwera, kwonka obuhwezi bwagwo burahi? Mukiri abooro. Nimushiisha obwire bwanyu murikubuurira.” Shirley naagira ati: “Nkeebuuza nti: ‘Ruhanga buzima naatufaho nari tarikutufaho?’ Ahonaaho nkashaba Yehova kandi  naamugambira byona ebyabaire nibinyerarikiriza. Nkaguma ninshoma Baibuli n’ebitabo byaitu, ndikubuurira kandi ndikuza n’omu nteerane.” Omu bwire bukye, Shirley akeetegyereza ngu Yehova akaba naareeberera eka yaabo. Bakaba batakaburwaga by’okurya kandi bakaba baine okushemerererwa. Naagira ati: “Nkareeba ngu Yehova akaba naagarukamu okushaba kwangye.” (1 Tim. 6:6-8) Waahamira aha ntebeekanisa yaawe y’eby’omwoyo, naiwe torikwija kwikiriza oburemeezi nari okubangaanisa kukutaanisa na Yehova.

8. Niki ekirikubaasa kuhika aha b’eishe-emwe abaine obujunaanizibwa omu kibiina kya Yehova?

⁸ Abazigu baitu nibakoresa amakuru n’emikura y’empurizana kugamba ebitahikire aha b’eishe-emwe abaine obujunaanizibwa omu kibiina kya Yehova. (Zab. 31:13) Ab’eishe-emwe abamwe bakwatsirwe kandi bateebwaho emanja. Omu kyasha ky’okubanza Abakristaayo bakatunga oburemeezi nk’obwo obu entumwa Paulo yaateebwaho orubanja rutahikire kandi akakomwa. Bakatwaza bata?

9. Abakristaayo abamwe bakatwaza bata, entumwa Paulo ku yaakomirwe?

⁹ Omu kyasha ky’okubanza Abakristaayo abamwe bakarekyera aho kushagika entumwa Paulo, obu yaabaire akomiirwe omuri Rooma. (2 Tim. 1:8, 15) Ahabw’enki? Mbwenu shi bakakwatwa enshoni ahabw’okugira ngu abantu bakaba nibareeba Paulo nk’enkozi y’ebibi? (2 Tim. 2:8, 9) Nari bakagira obwoba, baatiina ngu nabo bakaba nibaza kuhiiganisibwa? Yaaba baayekwatsize nshonga ki, teekateeka oku Paulo aine kuba yaayehuriire. Akaba agumisiriize oburemeezi bwingi, kandi ataire n’amagara ge omu kabi ahabwabo. (Byak. 20:18-21; 2 Kor. 1:8) Titurikwenda kuba nk’abo abaatsigireho Paulo omu bwire obu yaabaire naayenda obuhwezi bwabo! Twine kuguma nitwijuka ki ab’eishe-emwe abaine obujunaanizibwa omu kibiina bahiiganisibwa?

10. Tushemereire kwijuka ki ab’eishe-emwe abaine obujunaanizibwa bahiiganisibwa, kandi ahabw’enki?

 ¹⁰ Ijuka ahabw’enki nituhiiganisibwa, n’orikukureetaho. 2 Timoseo 3:12 nihagira hati: “Abamaririire kumara ebiro by’amagara gaabo byona omuri Yesu nibatiina Ruhanga” nibaija kuhiiganisibwa. N’ahabw’ekyo tikishemereire kututangaaza Sitaane yaata omutima aha kuhiiganisa ab’eishe-emwe abaine obujunaanizibwa. Naayenda ngu abaremese kuguma bari abeesigwa kandi abatiinatiinise.—1 Pet. 5:8.

11. Nitwegyera ki ahari Onesifooro? (2 Timoseo 1:16-18)

¹¹ Gumizamu nooshagika ab’eishe-emwe kandi ogume obahamiireho. (Shoma 2 Timoseo 1:16-18.) Onesifooro Omukristaayo w’omu kyasha ky’okubanza akatwaza omu muringo gw’omutaano obu Paulo yaabaire akomirwe. “Taraitsirwe nshoni ahabw’enjegyere” za Paulo. Kureka, Onesifooro akasherura Paulo, kandi ku yaamuboine akateeraho kumuhwera. Omu kukora ekyo, akooga amagara ge. Ekyo nitukyegyeraho ki? Titwine kwikiriza okutiina abantu kuturemesa kushagika ab’eishe-emwe abarikuhiiganisibwa. Kureka, tubajuririre kandi tubahwere. (Enf. 17:17) Nibenda rukundo yaitu n’obushagiki bwaitu.

12. Nitwegyera ki aha b’eishe-emwe na banyaanyazi-itwe omuri Russia?

¹² Yetegyereze oku ab’eishe-emwe na ba-nyaanyazi-itwe omuri Russia barikuhwera bagyenzi baabo abari omu bihome. Bamwe ku barikutwarwa omu kooti ab’eishe-emwe baingi nibazayo kubashagika. Ekyo nitukyegyeraho ki? Ab’eishe-emwe abaine obujunaanizibwa baagambwaho ebitahikire, baakomwa, nari bakahiiganisibwa, tutatiina. Tubashabire, tufeyo aha b’amaka gaabo kandi tusherure emiringo endiijo oku turikubaasa kubashagika.—Byak. 12:5; 2 Kor. 1:10, 11.

13. Okujumwa nikubaasa kutuubya kuta obwesigye bwaitu omuri Yehova n’ekibiina kye?

¹³ Abanyabuzaare baitu abatari mu mazima, abu turikukora nabo, nari abu turikushoma nabo nibabaasa kutujuma ahabw’okubuurira nari ahabw’okworobera emitindo ya Yehova ey’emicwe. (1 Pet. 4:4) Nibabaasa kugira bati: “Iwe niinkukunda, kwonka ediini yaawe eine amaremesa kandi ehweire aha murembe.” Abamwe nibatucwera orubanja ngu titurikukwatanisa n’ababingirwe omu kibiina barikugira bati: “Nimubaasa kugira muta ngu nimukunda abantu?” Ebigambo nk’ebyo nibibaasa kutureetera kubangaanisa. Nitubaasa kutandika kwebuuza tuti: ‘Mbwenu shi Yehova naatushaba kukora ebi tutarikubaasa? Ekibiina kye nikitaho amaremesa?’ Waaba ori omu mbeera nk’egyo, noobaasa kuguma ota ohamiire ahari Yehova n’ekibiina kye?

14. Twine kutwaza tuta twajumwa ahabw’okuhamira aha mitindo ya Yehova? (Zaaburi 119:50-52)

¹⁴ Mariirira kuhamira aha mitindo ya Yehova. Yobu akaguma ahamiire aha mitindo ya Yehova n’obu araabe yaajumirwe. Omwe ahari banywani ba Yobu ab’ebishobobo akateeraho kumureetera kuteekateeka ngu Ruhanga akaba atarikufayo yaaba Yobu ahamira aha mitindo ye nari atagihamiraho. (Yob. 4:17, 18; 22:3) Kwonka Yobu akanga kwikiriza ebishuba nk’ebyo. Akaba naamanya ngu emitindo ya Yehova erikukwata aha kihikire n’ekigwire n’ey’oburyo kandi akaba amaririire kugihamiraho. Taraikiriize abandi kumuremesa kuguma ari omwesigwa. (Yob. 27:5, 6) Eki nitukyegyeraho ki? Otaikiriza okujumwa  kukureetera kubangaanisa emitindo ya Yehova. Teekateeka aha bi orabiremu. Toreebire emirundi mingi ngu emitindo ya Yehova ehikire kandi neekugasira? Mariirira kushagika ekibiina kya Yehova n’emitindo ye. Waakora otyo, tihariho okujumwa okuraabaase kukutaanisa na Yehova.—Shoma Zaaburi 119:50-52.

15. Ahabw’enki Brizit yaajumirwe?

¹⁵ Teekateeka aha byahikire ahari mu-nyaanyazi-itwe Brizit, owa India. Ab’eka ye bakamujuma ahabw’okwikiriza kwe. Bwanyima y’obwire bukye aherize kubatizibwa omuri 1997, iba owaabaire atari mu mazima akafeerwa omurimo gwe. N’ahabw’ekyo, iba akacwamu kutwara, Brizit na bahara baabo, kutuura n’abazaire be abaabaire bari omu rurembo orundi. Kwonka Brizit akaba naija kuhikwaho oburemeezi obundi bwingi. Ahabw’okugira ngu iba akaba ataine murimo, akaba aine kukora buri izooba, kubaasa kushagika eka ye. Kandi, ekibiina ekyabaire kiri haihi nabo kikaba kiri nka mahiro 220. Ab’eka ya iba bakamuhiiganisa ahabw’okwikiriza kwe. Embeera zikeeyongyera kuguma kyabeetengyesa kurugayo. Eky’obusaasi, iba akafa kitaraariire. Bwanyima, omuhara ow’emyaka 12 akaitwa ekookoro. Kandi abanyabuzaare ba Brizit bakamutaho orubanja ahabwa byona ebyabaireho. Bakagira ngu kuri yaabaire atari Mujurizi wa Yehova ebyo byona bikaba bitarikwija kubaho. Kwonka nabwo akaguma naayesiga Yehova kandi yaaguma ahamiire n’aha kibiina kye.

16. Brizit akatunga migisha ki ahabw’okuhamira ahari Yehova n’ekibiina kye?

¹⁶ Ahabw’okugira ngu Brizit akaba naatuura hare n’ekibiina, omureeberezi wa saketi akamuhiga kubuurira omu kicweka eki yaabaire naatuuramu n’okugirira enteerane omu ka ye. Omu kubanza, akeereeba nk’otaraabaase. Kwonka akakuratira obuhabuzi obu ow’eishe-emwe yaamuhaire. Akabuurira abandi amakuru marungi, yaakorera enteerane omu ka ye, kandi yaataho n’obwire bw’okugira okuramya kw’eka n’abahara. Niki ekyarugiremu?  Brizit akabaasa kutandika kwegyesa abantu baingi Baibuli, kandi baingi aharibo bakabatizibwa. Omu 2005 akaba payoniya ow’obutwire. Akatunga emigisha ahabw’okuguma ahamiire ahari Yehova n’ekibiina kye. Abahara nibaheereza Yehova omu bwesigwa, kandi omu kicweka ekyo hariyo ebibiina bibiri hati! Brizit naahamiza kimwe ngu Yehova niwe yaamuhaire amaani g’okwemera oburemeezi n’okujumwa ab’eka ye.

17. Tushemereire kumariirira kukora ki?

¹⁷ Sitaane naayenda twikirize ngu Yehova naatutsigaho twaba twine oburemeezi, kandi ngu twaguma tuhamiire aha kibiina kye embeera zaitu nizeeyongyera kuguma. Sitaane naayenda ngu tugire obwoba ab’eishe-emwe abaine obujunaanizibwa baagambwaho ebitahikire, baahiiganisibwa, nari baakomwa. Kandi naakoresa okujuma arikwenda ngu turekyere aho kwesiga emitindo ya Yehova n’ekibiina kye. Kwonka, nitumanya gye obukoryo bwe obu arikukoresa, kandi tarikubaasa kutuhabisa. (2 Kor. 2:11) Mariirira kwangira ebishuba bya Sitaane, kandi ogume ohamiire ahari Yehova n’emitindo ye. Ijuka ngu Yehova tarikwija kukutsigaho. (Zab. 28:7) N’ahabw’ekyo, otaikiriza ekintu kyona kukutaanisa na Yehova!—Rom. 8:35-39.

18. Nituza kugamba ahari ki omu kicweka ekirikukurataho?

¹⁸ Omu kicweka eki, twagamba aha bureemezi oburikubaasa kutuhikaho kuruga aheeru y’ekibiina. Kwonka obwesigye bwaitu omuri Yehova n’ekibiina kye nibubaasa kugyezibwa na twahikwaho oburemeezi kuruga omu kibiina. Oburemeezi obwo nitubaasa kubusingura tuta? Nituza kugamba aha nshonga egyo omu kicweka ekirikukurataho.