Ntakabagambiire ekyakuratsireho, ka mbanze mbagambire oku naagiire omu buheereza bw’obutwire.

Nkazaarwa omuri 1942 aha kirwa Curaçao omuri Caribbean. Tata n’enzaarwa ya Suriname, kwonka akafurukira aha kirwa ekyo ahabw’omurimo. Ntakazairwe, akaba ari omwe aha Bajurizi ba Yehova abaabandize kubatizibwa omuri Curaçao. a Akaba naatwegyesa Baibuli buri saabiiti turi bato, n’obu obumwe twabaire tuba tutarikwenda kwega. Obu naabaire nyine emyaka 14, tata akafurura eka yaitu twaza Suriname kugira ngu abaase kureeberera nyina owaabaire akaikwire.

Ku twahikire Suriname, nkanywana eminyeeto abaabaire baine obweziriki omu kuheereza Yehova. Bakaba nibankiza emyaka mikye kandi bari baapayoniya ab’obutwire. Ku baabaire bagamba ebirungi ebi batungire omu kubuurira, nkaba ndeeba ngu buzima bashemereirwe. Kandi bwanyima y’enteerane, nyowe na banywani bangye tukaba tugaaniira aha biri omu Baibuli obumwe tushutami aheeru turikureeba enyonyoozi. Banywani bangye abo bakampwera kuhika aha kigyendererwa kyangye, eky’okukorera Yehova. Nkabatizibwa nyine emyaka 16. Aha myaka 18, nkaba payoniya w’obutwire.

Nkeega amashomo maingi ndi payoniya, kandi gakampwera munonga omu buheereza bwangye bwona obw’obutwire. Nk’eky’okureeberaho, eishomo ry’okubanza eri naayegire, n’obukuru bw’okutendeka abandi. Obu naaba payoniya, omumiisani orikwetwa Willem van Seijl akaba naanfaho munonga. b Akanyegyesa oku ndikubaasa kuhikiiriza obujunaanizibwa bwangye omu kibiina. Omu bwire obwo, nkaba ntarikumanya ngu nyine kutendekwa. Omwaka ogwakuratsireho nkatooranwa kuba payoniya w’omutaano,  kandi nkatandika kwebembera guruupu ezaabaire ziri omu myanya eyehereire omu kibira kya Suriname. Ka ninsiima okutendekwa oku ab’eishe-emwe baampaire omu bwire obuhikire! Kuruga obwo, ntwire nimbatooreza ntarikweziringa kutendeka abandi.

Eishomo rya kabiri eri naayegire n’obukuru bw’okworobya embeera zangye kwonka omu muringo ogutebeekanisiibwe gye. Aha kutandika kw’okwezi, nyowe na payoniya ow’omutaano mugyenzi wangye tukaba tuhandiika ebirikwetengyesa omu saabiiti ezirikukurataho. Reero, omwe ahariitwe akaba agyenda orugyendo ruraingwa aza omu rurembo kubigura. Tukaba nitukoresa gye esente ezi twabaire nituheebwa buri kwezi, kandi tubariirira gye eby’okukoresa kugira ngu biturabye omu kwezi kwona. Ekintu ku kyabaire kihwaho turi okwo omu kibira, abantu bakye nibo baabaire nibabaasa kutuhwera, beitu obwo baaba bariho. Ahabw’okugira ngu kuruga enyima nkeega kworobya embeera zangye n’okwetebeekanisa gye kikampwera kuta omutima aha buheereza bwangye.

Eishomo rya kashatu eri naayegire n’obukuru bw’okwegyesa abantu omu rurimi rwabo. Nkakura ningamba Orudaaki, Orungyereza, Orupapiamento, n’Orusiranantongo (orurikumanywa nka Siranani), orurimi orurikukira kukoresibwa omuri Suriname. Kwonka, nketegyereza ngu abantu b’omu kibira ekyo nibarahuka kwikiriza amakuru marungi twabuurira omu rurimi rwabo. Nkaba ningumirwa kugamba zimwe aha ndimi ezo, nk’Orusaramakani, orurimu okuhindura amaraka orukugambira ahaiguru nari ahansi. N’obu ruraabe rwangumiire, nkateeraho. Kandi, mbaasize kwegyesa baingi amazima ahabw’okugamba orurimi rwabo.

Kwonka obumwe, nkaba mpemuka ndi kuteeraho kugamba orurimi orwo. Nk’eky’okureeberaho, nkaba niinyenda kubuuza omukazi omwegi wa Baibuli orikugamba Orusaramakani oku yaabaire naayehurira, ahakuba akaba naahurirwa omunda. Kwonka nkahendera mubuurize yaaba yaabaire aine enda! Buzima ekibuuzo ekyo kikamureetera kuhemuka. N’obu ndaabe naabaire ninkora enshobe nk’ezo, butoosha nkaba nteeraho kugamba orurimi rw’abantu ahu naabaire nza kuheereza.

Omuri 1970, nkatooranwa kuba omureeberezi wa saketi. Omu mwaka ogwo nkoreka vidiyo “Visiting the World Headquarters of Jehovah’s Witnesses” guruupu nyingi z’omu kibira ezaabaire ziri omu myanya eyehereire. Kubaasa kuhika ahari guruupu ezo, nyowe n’ab’eishe-emwe abandi tukaba tugyendera omu bwato bw’embaaho bukye buraingwa aha mugyera ogwabaire niguraba omu kibira. Omu bwato bwaitu tukaba tutamu genereeta, tanka y’amajuta ga petiroli, etaara z’okuhemba, na porojekita y’okworekyeraho vidiyo. Ku twabaire tuhikayo, tukaba tubyekorera tubitwara aha kirwa ahu twabaire nitworekyera vidiyo. Eki ndikukira kwijuka aha ngyendo ezo, n’oku abantu b’ebicweka ebyo baabaire nibakunda vidiyo ezo. Nkaba ninshemererwa munonga ahabw’okuhwera abandi kwega ahari Yehova n’ekicweka eky’omu nsi eky’ekibiina kye. Emigisha ei ntungire ndikuheereza Yehova neekirira kimwe byona ebi naayefeerereize.

Okuheereza ntari mu bushwere kukaba kwine ebirungi byakwo, kwonka nkaba nyine ekyetengo ky’okutaaha omu bushwere. N’ahabw’ekyo nkatandika kushaba Yehova butunu kumpwera kutunga omukazi owaabaire naabaasa kugumisiriza embeera z’omu kibira ashemereirwe omu buheereza bw’obutwire. Omu mwaka nka gumwe, nkatandika kuriima Ethel, payoniya ow’omutaano oine omutima gw’okwefeerereza. Kuruga omu buto, Ethel akaba naakunda entumwa Paulo, arikwenda kumutooreza kandi akaba naayendera kimwe kwejumba omu buheereza bw’Ekikristaayo. Tukataaha hamwe omu bushwere Okwamwenda 1971, kandi twatandika kuheereza hamwe omu murimo gwa saketi.

Ahabw’okugira ngu Ethel tarakuriire omu ka y’ebintu bingi, akarahuka kumanyiira obuheereza bwa saketi omu myanya y’ekibira. Nk’eky’okureeberaho, ku naabaire mba niintebeekanisa kutaayaayira ebibiina omu kibira, akaba apakira ebintu bikye. Tukaba twogyeza omu mugyera kandi tuba nimwo twanaabira. Kandi tukamanyiira kurya buri kimwe eki baabaire batuha nka, iguanas, piranhas, nari kyona eki baabaire bahiiga omu kibira nari bakwata omu mugyera. Esohaani ku zaabaire ziba zitariho, tukaba turiira aha ndeere. Ku twabaire tuba tutaine ehuuma, tukaba turiisa engaro. Nyowe na Ethel nitureeba ngu ebi twefeerereize turikuheereza Yehova bihamize omurunga gwaitu ogw’enyabushatu. (Mub. 4:12) Ebirungi ebi tutungire titurikubaasa kubigyeragyeranisa n’ekintu kyona!

Ku twabaire nituruga omu mwanya gumwe ogwehereire nibwo twahikwaho ebi naagamba aha kutandika. Obwato ku bwahikire ahu amaizi gaabaire nigairuka munonga, bukatobera kumara akaanya kakye, ahonaaho bwatuuhuukayo. Ekirungi, tukaba tujwaire ekijwaro ky’okutuhwera kutatobera kandi tukaguma omu bwato. Kwonka obwato bwaitu bukaijuramu amaizi. Eby’okurya ebi twabaire twine omu nyungu tukabishuka omu mugyera, reero twakoresa enyungu kutaha amaizi omu bwato.

 Ahabw’okugira ngu tukanaga eby’okurya byaitu omu maizi, tukatandika kujuba eby’enyanja turikugyenda. Kwonka tihariho eki twakwatsize. N’ahabw’ekyo tukashaba Yehova kutuhwera kutunga eby’okurya by’eizooba eryo. Ku twaherize kushaba, omwe aha b’eishe-emwe akatambika irobo omu maizi kandi yaakwata eky’enyanja kihango ekyabaire nikituhaazya twena bataano ekiro ekyo.

Nyowe na Ethel, bwanyima y’okumara emyaka etaano turikutaayaayira ebibiina, tukatunga omugisha ogu twabaire tuteeteekateekiire, ogw’okuba abazaire. Nkashemererwa ku naakimanyire, n’obu ndaabe naabaire ntarikumanya ekiraabeho omu biro by’omumaisho. Nyowe na Ethel tukaba nitukunda munonga kuguma omu buheereza bw’obutwire nk’oku kirikubaasika. Omuri 1976 tukazaara mutabani waitu Ethniël. Kandi bwanyima y’emyaka ebiri n’ekicweka tukazaara mutabani waitu owa kabiri Giovanni.

Ahabw’okugira ngu hakaba hatariho abareeberezi ba saketi barikumara omuri Suriname, ofiisi y’eitaagi ekanyikiriza kugumizamu niintaayaayira ebibiina kandi turikworora n’abaana baitu. Obu batabani baitu baabaire bakiri bato, bakampa saketi erimu ebibiina bikye. Ekyo kikaba nikimbaasisa kutaayaayira ebibiina kumara saabiiti nkye omu kwezi, reero mbaasa kumara obwire obundi ndi payoniya omu kibiina eki naabaire ndimu. Ethel na batabani bangye bakaba bagyenda naanye ku naabaire mba ntaayaayiire ebibiina ebiri haihi. Kwonka, nkaba ngyenda nyenka ku naabaire mba ntaayaayiire ebibiina ebya hare, nari ngiire omu nteerane empango omu kibira.

Kwonka nkaba mba nyine kwetebeekanisa gye kubaasa kuhikiiriza obujunaanizibwa bwangye bwona. Nkaba mpamya ngu buri saabiiti twagira okwega kwaitu nk’eka. Ku naabaire ntaayaayira ebibiina omu kibira, Ethel akaba aguma omu ka ayegyesa batabani baitu. Emirundi mingi nk’oku kyabaire nikibaasika, tukaba tukora hamwe ebintu nk’eka. Nyowe na Ethel tukaba twejumba omu by’okweshemeza ebirungi n’abaana baitu, nk’emizaano nari tuza omu myanya mirungi eyaabaire eri haihi. Kaingi nkaba mbyama kikyererezi, ndikutebeekanisa ebicweka byangye by’ekibiina. Ahabw’okugira ngu Ethel, n’omukazi w’omutima nk’orikugambwa omu Enfumu 31:15, akaba aimuka kare kugira ngu tushome ekyahandiikirwe ky’eizooba, kandi turye hamwe kyantsya n’abaana baitu batakagiire aha ishomero. Ka nikinshemeza munonga kugira omukazi  orikwefeerereza owaagumire naampwera kuhikiiriza obujunaanizibwa bwangye!

Tukateeraho munonga kuhwera batabani baitu kukunda Yehova n’obuheereza bw’Ekikristaayo. Tukaba nitwenda ngu batabani baitu baze omu buheereza bw’obutwire, kwonka tukaba nitwenda ngu babe nibo baayecweramu. Butoosha tukaba tubagambira oku obuheereza bw’obutwire burikureeta okushemererwa. Tutarikwehuzya oburemeezi bwaitu, tukaba tugamba oku Yehova ahweraire eka yaitu n’emigisha ei atuhaire. Tukateeraho kuhamya ngu batabani baitu baaguma nibamara obwire n’ab’eishe-emwe bagyenzi baabo, abaabaire nibeebembeza okuheereza Yehova.

Yehova akatuha byona ebyabaire nibyetengyesa turikureeberera eka yaitu. Kandi naanye nkaba niinteeraho kuhikiiriza obujunaanizibwa bwangye. Ebi naarabiremu ndi payoniya omu kibira ntakataahire mu bushwere, bikanyegyesa kubiika esente z’okugura eby’okwebaisaho. Kwonka obumwe, tukaba tuba tutaine byona ebirikwetengyesa. Omu bwire obwo, niinyikiriza ngu Yehova akaba ataaha omu nshonga atuhwera. Nk’eky’okureeberaho, emyaka ya 1980 erikuhendera kandi eya 1990 erikutandika, hakabaho obutabanguko omuri Suriname. Omu myaka egyo, kikaba kigumire kutunga ebirikwetengyesa ebikuru. Kwonka nabwo Yehova akatureeberera.—Mat. 6:32.

Yehova atwire naatureeberera kandi atureetaire kugira okushemererwa kwingi n’okumarwa. Abaana baitu n’ebiconco ahariitwe, kandi okubakuza barikuheereza Yehova bukaba buri obujunaanizibwa bw’omuhendo. Kandi twine okushemererwa ahabw’okugira ngu bakacwamu kuza omu buheereza bw’obutwire. Ethniël na Giovanni baagiire omu mashomero g’obuheereza kandi hati nibaheereza n’abakazi baabo aha ofiisi y’eitaagi eya Suriname.

Nyowe na Ethel tukuzire, kwonka tukiri baapayoniya b’omutaano nituheereza Yehova n’obweziriki. Twine bingi by’okukora, nangwa tinkatungire bwire bw’okwega kuziha! Kwonka tihariho ki ndikwefuuza. Ku ndikwijuka eby’enyima, nindeeba ngu okucwamu kuza omu buheereza bw’obutwire nkiri muto kukaba kuri okucwamu okurikukirayo oburungi.