1-2. (a) Nituza kugarukamu bibuuzo ki? (b) Niki ekirikworeka ngu Yehova aine ekyetengo ky’amaani eky’okutuhwera?

 YEHOVA naabaasa kutuhwera kugira okushemererwa omu buheereza bwaitu n’okwemera oburemeezi. Naatuhwera mu miringo ki? Nitubaasa kugasirwa tuta omu bwijwire omu buhwezi obu Yehova arikutuha? Ebibuuzo ebi nibiza kugarukwamu omu kicweka eki. Kwonka, tutakagarukiremu ebibuuzo ebyo, ka tubanze tushwijume ekibuuzo eki: Buzima Yehova aine ekyetengo ky’amaani ky’okutuhwera?

² Eky’okugarukamu kiri omu kigambo eki entumwa Paulo yaakoreise omu baruha ei yaahandiikiire Abaheburaayo. Paulo akahandiika ati: “[Yehova] niwe muhwezi wangye, tinditiina, omuntu naabaasa kungira ata?” (Heb. 13:6) Kurugiirira aha kucondooza kumwe, amakuru g’ekigambo ‘omuhwezi,’ ekyakoresiibwe omu runyiriri oru, nikimanyisa omuntu orikwiruka kuhwera mugyenzi we orikutaka ngu bamuhwere. Teera akashushani Yehova arikwehuuta kuhwera omuntu oine obusaasi. Ebigambo ebyo buzima nibyoreka ngu Yehova aine ekihika ky’amaani, kandi naaba ayeteekateekire kutuhwera. Yehova yaatuhwera, nitubaasa kugumisiriza oburemeezi twine okushemererwa.

3. Yehova naakoresa miringo ki eshatu kutuhwera kugumisiriza oburemeezi twine okushemererwa?

³ Yehova naatuhwera mu miringo ki kugumisiriza oburemeezi twine okushemererwa? Kubaasa kutunga eky’okugarukamu ka tushwijume ebiri omu kitabo kya Isaaya. Ahabw’enki? Ahakuba obunabi oburikukira obwingi obu Isaaya  yaahandiikire nibukwata n’aha baheereza ba Ruhanga hati. Kandi ekitabo kya Isaaya nikikoresa ebigambo byorobi kugamba ahari Yehova. Nk’eky’okureeberaho, Isaaya eshuura 30 neekoresa ebigambo ebirikutureetera kuteera akashushani kumanya oku Yehova arikutuhwera. Ekyo naakikora (1) arikufayo kuhurira okushaba kwaitu kandi akakugarukamu, (2) arikutuha obuhabuzi, kandi (3) akatuha emigisha hati n’omu biro by’omumaisho. Ka tushwijume gye emiringo eshatu egyo.

4. (a)  Yehova akeeta ata Abayudaaya omu bwire bwa Isaaya, kandi niki eki yaikiriize kubahikaho? (b) Yehova akaha matsiko ki Abayudaaya abaagumire bari abeesigwa? (Isaaya 30:18, 19)

⁴ Omu mishororongo y’okubanza eya Isaaya eshuura 30, Yehova akeeta Abayudaaya “abaana abagomi,” kandi ‘abarikwongyera ekibi aha kindi.’ Akoongyeraho ati: ‘N’eihanga erikugomi, eririkwanga kuhurira ebiragiro bya [Yehova].’ (Isa. 30:1, 9) Ahabw’okugira ngu abantu bakanga kuhurira, Isaaya akagira ngu Yehova akaba naija kureka oburemeezi bubahikyeho. (Isa. 30:5, 17; Yer. 25:8-11) Ekyo nikyo kyabaireho, Abababulooni bakabatwara omu bukwatwa. Kwonka, bamwe aha Bayudaaya abaagumire bari abeesigwa, Isaaya akabagambira obutumwa oburikuha amatsiko. Akabagira ngu izooba rimwe Yehova akaba naija kubagarura owaabo. (Shoma Isaaya 30:18, 19.) Kandi nikyo kyabaireho. Yehova akabaiha omu bukwatwa omuri Babulooni. Kwonka, okucungurwa kwabo kukaba kutarikuza kubaho ahonaaho. Ebigambo ‘[Yehova] ategyereize, ngu abagirire embabazi’ nibyoreka ngu hakaba nihaza kuhinguraho obwire abeesigwa abo kubaasa kucungurwa. Nangwa, Abaisraeli bakamara emyaka 70 omu bukwatwa bwa Babulooni, kandi abaatsigaireho bakaikirizibwa kugaruka Yerusaalemu. (Isa. 10:21; Yer. 29:10) Ku baahikire owaabo, amarira g’obusaasi agu baagizire bari omu bukwatwa gakahinduka amarira g’okushemererwa.

5. Isaaya 30:19 nihatuhamiza ki?

⁵ Hati nitubaasa kuhuumurizibwa ebigambo ebi: “Ku arihurira eiraka ry’okutaka kwawe, taribura kukugirira mbabazi.” (Isa. 30:19) Isaaya naatuhamiza ngu Yehova naahurira okutaka kwaitu ataireho omutima, kandi naija kugira eki yaakora ahonaaho kutuhwera. Isaaya naayongyeraho ati: ‘Ku arikuhurira naagarukamu.’ Ebigambo ebyo nibituhamiza ngu Tataitwe naayendera kimwe kuhwera abarikumushaba, kandi aine ekihika ky’okukikora. Okumanya ekyo nikituhwera kugumisiriza twine okushemererwa.

6. Ebigambo ebiri omuri Isaaya nibyoreka bita ngu Yehova naahurira okushaba kwa buri muheereza we?

⁶ Niki ekindi eki turikwegyera aha mushororongo ogwo aha bikwatiraine n’okushaba? Yehova naafayo kuhurikiza okushaba kwa buri omwe ahariitwe. Ahabw’enki nitugira tutyo? Emishororongo y’okubanza omu Isaaya eshuura 30, neekoresa ekigambo “iwe” kumanyisa baingi ahakuba Yehova naagambira abantu be. Kwonka, omu mushororongo 19 ekigambo “iwe” nikyoreka ngu obutumwa nibukwata ahari buri muntu okwe. Isaaya akakoresa ebigambo ebi: ‘Toraagarukye kurira’, “taribura kukugirira mbabazi”, naaza ‘kukugarukamu.’ Nka ishe w’omwana oine rukundo, Yehova tarikugambira omutabani nari omuhara otarikwehurira gye ngu, “oine kuhama nka mwene sho nari mwene nyoko.” Kureka, naareeba buri omwe okwe kandi naata omutima aha kushaba kwa buri omwe.—Zab. 116:1; Isa. 57:15.

7. Isaaya na Yesu bakagamba ki aha bukuru bw’okuguma nitushaba obutaruha?

 ⁷ Twagambira Yehova enshonga erikutwerarikiriza, naabaasa kutugarukamu ahonaaho arikutuha amaani g’okugumisiriza embeera egyo. Kandi oburemeezi bwaitu bwaba butahwaireho ahonaaho nk’oku turikuteekateeka twine kugumizamu nitushaba Yehova kutuha amaani kubwemera. Kandi nikyo arikutuhiga kukora. Eki nitukireebera omu bigambo bya Isaaya ebi: ‘Mutareka [Yehova] akahuumura.’ (Isa. 62:7) Ekyo nikimanyisa ki? Twine kugumizamu nitushaba oshushe ngu titurikwikiriza Yehova kuhuumura. Ebigambo bya Isaaya nibitwijutsya eby’okureeberaho bya Yesu ebirikukwata aha kushaba ebiri omuri Luka 11:8-10, 13. Omu mishororongo egyo Yesu akatuhiga kushaba obutaruha n’okuguma nitushaba omwoyo gurikwera. Nitubaasa n’okweshengyereza Yehova kutuha obuhabuzi oburikwetengyesa kucwamu gye.

8. Ebigambo ebiri omuri Isaaya 30:20, 21 bikahikiirira bita ira?

⁸ Shoma Isaaya 30:20, 21. Eihe rya Babulooni ku ryataahiriire Yerusaalemu kumara omwaka gumwe n’ekicweka, enaku ei abantu baatungire bakagimanyiira nk’omugaati n’amaizi. Kwonka kurugiirira aha mushororongo 20 na 21, Yehova akaraganisa Abayudaaya ngu baayeteisa kandi bakahindura emitwarize yaabo, naija kubajuna. Isaaya akagamba ahari Yehova ‘nk’Omwegyesa waabo Orikukirayo,’ kandi akagira ngu Yehova naija kubeegyesa oku baine kumuramya omu muringo ogu arikusiima. Ebigambo ebyo bikahikiirira Abayudaaya ku baarekwirwe kuruga omu bukwatwa. Yehova akooreka ngu n’Omwegyesa waabo Orikukirayo, kandi obuhabuzi obu yaabahaire bukabahwera omu kugaruraho okuramya okw’amazima. Naitwe twine omugisha ahakuba Yehova niwe Mwegyesa waitu Orikukirayo.

9. Gumwe aha miringo ei Yehova arikukoresa kutuha obuhabuzi ni guuha?

⁹ Kandi omu mishororongo egyo Isaaya akagira ngu turi nk’abeegi abarikwegyesibwa Yehova omu miringo ebiri. Ogw’okubanza, Isaaya akagira ati: ‘Amaisho gaawe nigaija kuguma nigareeba’ Omwegyesa waawe Orikukirayo. Isaaya naagamba aha Mwegyesa nk’oyemereire omu maisho g’abeegi be. Twine omugisha gw’okwegyesibwa Yehova hati. Yehova naatwegyesa ata? Naakoresa ekibiina kye. Ka nitusiima munonga obuhabuzi burungi obu ekibiina kya Yehova kirikutuha! Obuhabuzi obu turikuheebwa omu nteerane z’ekibiina, enteerane empango, omu bitabo byaitu, puroguraamu  za JW Broadcasting^®, n’emiringo endiijo mingi nibutuhwera kwemera oburemeezi twine okushemererwa.

10. Eiraka rya Ruhanga nirireetwa enyima [yaitu] mu muringo ki?

¹⁰ Isaaya akooreka omuringo gwa kabiri oku Yehova arikutuha obuhabuzi arikugira ati: ‘Amatu gaanyu nigaija kuguma nigahurira ekigambo nikibareetwa enyima.’ Nabi naagamba ahari Yehova nk’omwegyesa otaire omutima aha beegi arikubagyendera enyima arikubooreka omuhanda ogu baine kutoora, kandi arikubaha obuhabuzi. Hati nituhurira eiraka rya Ruhanga ririkureetwa enyima yaitu. Rita shi? Ebigambo bya Ruhanga bikahandiikwa omu Baibuli emyaka mingi enyima. N’ahabw’ekyo, ku turikushoma Baibuli nituba turi nk’abarikuhurira eiraka rya Ruhanga ririkureetwa enyima yaitu.—Isa. 51:4.

11. Twine kukora ki kubaasa kugumisiriza twine okushemererwa, kandi ahabw’enki?

¹¹ Nitubaasa kugasirwa tuta omu bwijwire omu buhabuzi obu Yehova arikutuha kurabira omu Kigambo kye n’omu kibiina kye? Yetegyereze ngu Isaaya akagamba ebintu bibiri. Eky’okubanza, “ogu nigwo muhanda.” Ekya kabiri, “mube nigwo mwahamya,” nari mwatoora. (Isa. 30:21) Okumanya ‘omuhanda’ tikirikumara. Kureka twine n’okugugyenderamu. Nitwega ebi Yehova arikutwenza kurabira omu Kigambo kye nk’oku ekibiina kye kirikukishoboorora. Nitwega n’oku turikubaasa kuta omu nkora ebi turikwega. Kubaasa kugumisiriza twine okushemererwa omu buheereza bwaitu, tushemereire kukora ebintu ebi byombi. Twakora tutyo, nitubaasa kuhamya ngu Yehova naija kutuha emigisha.

12. Kurugiirira ahari Isaaya 30:23-26, Yehova akaba naija kuha ata abantu be migisha?

¹² Shoma Isaaya 30:23-26. Obunabi obu bukahikiirira buta aha Bayudaaya abaagarukire omu nsi ya Israeli barikuruga omu bukwatwa bwa Babulooni? Bakatunga emigisha mingi omu by’omubiri n’omu by’omwoyo. Yehova akaha abantu be omugisha gw’eby’okurya bingi eby’omubiri. Okukira munonga, akabaha eby’okurya bingi eby’omwoyo kubaasa kugaruraho okuramya okw’amazima. Emigisha y’eby’omwoyo ei abantu ba Ruhanga baatungire ekaba neekirira kimwe byona ebi yaabaire yaabahaire enyima. Nk’oku kirikworekwa omu mushororongo 26, Yehova akabahwera kwongyera kwetegyereza eby’omwoyo. (Isa. 60:2) Emigisha ya Yehova ekahwera abaheereza be kugumizamu nibamuheereza baine okushemererwa n’amaani  “ahabw’obunanukye bw’omu mutima.”—Isa. 65:14.

13. Obunabi oburikukwata aha kugaruraho okuramya okw’amazima butwire nibuhikiirira buta?

¹³ Mbwenu shi obunabi bw’okugaruraho okuramya okw’amazima nibutukwataho hati? Eego buzima! Mu muringo ki? Kuruga 1919 Y.A.K., abantu nyamwingi babaasize kuruga omu Babulooni Orukuru, nizo diini zoona ez’ebishuba. Hati bari omu mwanya murungi ogurikukira Ensi Eyaaraganisiibwe Abaisraeli. Bari omu paradiso y’eby’omwoyo. (Isa. 51:3; 66:8) Paradiso y’eby’omwoyo niki?

14. Paradiso y’eby’omwoyo niki, kandi ni baahi abagirimu hati? (Reeba Ebishobooroirwe.)

¹⁴ Kuruga 1919 Y.A.K., entoore batwire bari omu paradiso y’eby’omwoyo. b Bwanyima y’obwire, abaine amatsiko g’okutuura omu nsi, ‘ab’entaama ezindi,’ nabo bataahire omuri paradiso y’eby’omwoyo, kandi nibeesiimira omu migisha mingi ei Yehova arikubaha.—Yoh. 10:16; Isa. 25:6; 65:13.

15. Paradiso y’eby’omwoyo eri nkahi?

¹⁵ Paradiso y’eby’omwoyo eri nkahi hati? Abaheereza ba Yehova bari omu nsi yoona. N’ahabw’ekyo paradiso y’eby’omwoyo ei barimu nayo eri omu nsi yoona. Ekirikumanyisa ngu hoona ahu turi, twaba nitushagika okuramya okw’amazima nitubaasa kuba omu paradiso y’eby’omwoyo.

16. Nitubaasa kugumizamu tuta nitureeba oburungi bwa Paradiso y’eby’omwoyo?

¹⁶ Kubaasa kuguma omu paradiso y’eby’omwoyo, kimwe aha bi twine kukora n’okugumizamu nitworeka ngu nitusiima ekibiina Ekikristaayo omu nsi yoona. Ekyo nitukikora tuta? Turikuta omutima aha birungi, beitu zitari nshobe z’abari omu kibiina. (Yoh. 17:20, 21) Ahabw’enki ekyo kiri kikuru? Teekateeka aha kugyeragyeranisa oku. Twaza omu kibira nitushangamu emiti etarikushushana. Nikyo kimwe, Paradiso y’eby’omwoyo eri omu bibiina, nayo erimu abantu batarikushushana. (Isa. 44:4; 61:3) Nituba twine kuta omutima aha burungi bw’ekibira beitu butari bumogo bw’emiti erikuba eturi haihi. Titwine kwikiriza  obutahikiirira bwaitu n’obw’abandi omu kibiina kuturemesa kureeba oburungi n’obumwe bw’ekibiina Ekikristaayo omu nsi yoona.

17. Buri omwe ahariitwe naabaasa kukora ki kwongyera aha bumwe bw’ekibiina?

¹⁷ Buri omwe naabaasa kukora ki kwongyera aha bumwe obu? Turikuteeraho kurinda obusingye. (Mat. 5:9; Rom. 12:18) Buri murundi ogu orikureetaho obusingye omu kibiina nooyongyera aha burungi bwa paradiso y’eby’omwoyo. Nituguma nitwijuka ngu Yehova niwe arikureeta buri omwe omu paradiso y’eby’omwoyo. (Yoh. 6:44) Teekateeka aha kushemerererwa oku Yehova arikugira yaareeba nituteeraho kugira obusingye n’obumwe n’abaheereza be abu arikutwara nk’ab’omuhendo!—Isa. 26:3; Hag. 2:7.

18. Twine kuguma nituteekateeka ahari ki, kandi ahabw’enki?

¹⁸ Nitubaasa kwongyera kugasirwa tuta omu migisha ei turikutunga ahabw’okuheereza Ruhanga? Turikufayo kuteekateeka aha bi turikwega omu Kigambo kya Ruhanga n’omu bitabo by’ekibiina. Twakikora nikiija kutuhwera kwongyera kugira emitwarize y’Ekikristaayo erikutuhiga ‘kukundana’ omu kibiina. (Rom. 12:10) Twateekateeka aha migisha ei twine hati, nituhamya omukago gwaitu na Yehova. Kandi twateekateeka aha migisha ei Yehova atubiikiire, nituhamya amatsiko gaitu g’okumuheereza ebiro byona. Ebi byona nibiija kwongyera aha kushemererwa kwaitu turikuheereza Yehova hati.

19. (a) Kurugiirira ahari Isaaya 30:18, nitubaasa kugira bwesigye ki? (b) Niki ekiraatuhwere kugumisiriza twine okushemererwa?

¹⁹ Yehova naija kutugirira esaasi ku araabe naacwekyereza ensi egi embi. (Isa. 30:18) Twine obwesigye ngu Yehova, ‘Ruhanga orikucwa emanja z’oburyo’ tarikwija kwikiriza ensi ya Sitaane kurenzya ekiro eki eine kucwekyererezibwaho. (Isa. 25:9) Nitutegyereza na Yehova tugumisiriize obu okucungurwa kwaitu kuraahikye. Ekyo kitakabaireho, ka tumariirire kugumizamu nitusiima omugisha gw’okushaba, okwega Ekigambo kya Ruhanga, n’okukigyenderaho, kandi tuteekateekye n’aha migisha yaitu. Twakora tutyo, Yehova naija kutuhwera kugumisiriza turikumuramya twine okushemererwa.