1. Niki ekirikubaasa kubaho kandi twine bwesigye ki?

 NITUMANYA ngu nitwija kuhakanisibwa omu murimo gwaitu gw’okubuurira. Kandi nikubaasa kweyongyera omu biro by’omumaisho. (Dan. 11:44; 2 Tim. 3:12; Kush. 16:21) Kwonka, twine obwesigye ngu Yehova naija kutuha obuhwezi oburikwetengyesa. Ahabw’enki? Yehova atwire naahwera abaheereza be kuhikiiriza obuheereza bwabo n’obu bwakuba bugumire. Ka tureebe bimwe ebyahikire ahari nabi Ezekieli owaabuuriire Abayudaaya abaabaire bari omu bukwatwa omuri Babulooni.

2. Abantu abu Ezekieli yaabaire aine kubuurira Yehova akabeeta ata, kandi nituza kushwijuma ki omu kicweka eki? (Ezekieli 2:3-6)

² Ekicweka eki Ezekieli yaabaire naabuuriramu kikaba kirimu bantu ba muringo ki? Yehova akabeeta abantu ‘abanyarubwa,’ ‘abaine emitima egangaire,’ kandi ‘abagomi.’ Bakaba nibacumita nk’amahwa kandi baine obushegu nka skoropio. Tikirikutangaaza kureeba ngu Yehova akagambira Ezekieli emirundi mingi ati: “Otatiina”! (Shoma Ezekieli 2:3-6.) Ezekieli akabaasa kukora omurimo gwe gw’okubuurira ahabw’okugira ngu (1) Yehova niwe yaamutumire, (2) omwoyo gurikwera gukamuha amaani, kandi (3) ebigambo bya Ruhanga bikahamya okwikiriza kwe. Ebintu bishatu ebi bikahwera bita Ezekieli? Kandi nibituhwera bita hati?

3. Ni bigambo ki ebirikubaasa kuba byagumize Ezekieli, kandi Yehova akamuhamiza ata ngu naaza kumushagika?

³ Yehova akagambira Ezekieli ati: “Ninkutuma.”(Ezk. 2:3, 4)  Ebigambo ebyo biine kuba byagumize Ezekieli. Ahabw’enki? Aine kuba yaijukire ngu Yehova akakoresa ebigambo nk’ebyo obu yaatuma baanabi be, Musa na Isaaya. (Kur. 3:10; Isa. 6:8) Kandi Ezekieli akaba naamanya oku Yehova yaahweraire baanabi abo kusingura oburemeezi obu baatungire. N’ahabw’ekyo Yehova ku yaagambiire Ezekieli kabiri ati: “Ninkutuma,” Ezekieli akahamiza kimwe ngu Yehova naija kumushagika. Ekindi, ebigambo ngu: “Ekigambo kya [Yehova] kyanyijaho” biri omu kitabo kya Ezekieli emirundi mingi. (Ezk. 3:16) Kandi ebigambo, “bwanyima ekigambo kya [Yehova] kyanyijaho” nabyo birimu emirundi mingi. (Ezk. 6:1) Buzima, Ezekieli akahamya ngu Yehova akaba amutumire. Ahabw’okugira ngu Ezekieli akaba ari mutabani w’omunyamurwa, ishe naabaasa kuba yaamugambiire oku Yehova yaabaire naahamiza baanabi be ngu naaza kubahwera. Yehova akagambira Isaaka, Yakobo, na Yeremia ebigambo ebi: “Ndi hamwe naiwe.”—Kut. 26:24; 28:15; Yer. 1:8.

4. Ni bigambo ki ebirikubaasa kuba byahweraire Ezekieli?

⁴ Abaisraeli bakaba nibaija kutwaza bata baahurira obutumwa bwa Ezekieli? Yehova akagira ati: “Ab’enju ya Israeli tibarikwija kukuhurira.” (Ezk. 3:7) Abantu okwanga kuhurira Ezekieli, bakaba baangire kuhurira Yehova. Ebigambo ebyo bikahamiza Ezekieli ngu abantu baayanga kumuhurira tikirikumanyisa ngu akaba aremirwe kuhikiiriza omurimo gwe nka nabi. Kandi Yehova akahamiza Ezekieli ngu obutumwa bw’okucwa orubanja ku buraahikiirire, abantu nibaija kumanya “ku nabi abaire abarimu.” (Ezk. 2:5; 33:33) Hatariho kubangaanisa ebigambo ebyo bikaha Ezekieli amaani agaabaire nigetengyesa kuhikiiriza obuheereza bwe.

5. Kurugiirira ahari Isaaya 44:8, niki ekirikutuha amaani?

⁵ Naitwe nitugira amaani ahabw’okumanya ngu Yehova niwe arikututuma. Naatuha ekitiinisa arikutweta abajurizi be. (Isa. 43:10) Obwo ka n’obujunaanizibwa bw’omutaano! Nk’oku Yehova yaagambiire Ezekieli ati: “Otatiina,” naitwe naatuhiga ati: “Mutahahaaza omutima.” Ahabw’enki tutashemereire kutiina abarikutuhakanisa? Nka Ezekieli, tutumirwe Yehova kandi naatushagika.—Shoma Isaaya 44:8.

6. (a) Yehova naatuhamiza ata ngu naaza kutushagika? (b) Niki ekirikutuhuumuriza kandi kikatugumya?

⁶ Yehova naatuhamiza ngu naaza kutushagika. Nk’eky’okureeberaho, Yehova atakagambire ebigambo ebi: “Muri baakareebi,” akagira ati: ‘Ku oriraba omu maizi, ninyija kuba nkwine, ku oriraba omu migyera, terikutwara, ku origyendera omu muriro, torisya, n’ebirimi byagwo tibirikubabura.’ (Isa. 43:2) Twaba nituhikiiriza obuheereza bwaitu, obumwe nituhikwaho oburemeezi oburi nk’omwegyemure gw’amaizi nari oburi nk’omuriro. N’obu kiraabe kiri kityo, ahabw’obuhwezi bwa Yehova nitugumizamu nitubuurira. (Isa. 41:13) Nk’omu bwire bwa nabi Ezekieli, abantu baingi hati nibanga obutumwa bwaitu. Nituguma nitwijuka ngu baayanga obutumwa bwaitu tikirikumanyisa ngu tituri babuurizi barungi. Nikitugaruramu amaani kandi kituhuumuriza kumanya ngu Yehova naatusiima twaguma turi abeesigwa turikubuurira obutumwa bwe. Entumwa Paulo akagira ati: ‘Buri omwe naija kuheebwa ebihembo nk’omurimo gwe oku guriba guri.’ (1 Kor. 3:8; 4:1, 2) Munyaanyazi-itwe omazire obwire buraingwa ari payoniya naagira ati: “Nikindeetera okushemererwa kumanya ngu Yehova naasiima okuteeraho kwaitu.”

7. Ezekieli akaba ayehurira ata ku yaabaire ateekateeka aha kworekwa oku yaareebire? (Reeba ekishushani ekiri aha kipampagare.)

⁷ Ezekieli akareeba oku omwoyo gwa Ruhanga gwine amaani. Omu kworekwa, akareeba omwoyo gurikwera gurikuhwera ebihangirwe by’omwoyo kandi gurikugyendesa ekigaari kihango. (Ezk. 1:20, 21) Ezekieli akatwaza ata? Akahandiika ebyabaireho arikugira ati: “Ku naakireebire, naagwa ahansi njuumaire.” Ezekieli akatangaara munonga yaagwa ahansi. (Ezk. 1:28) Ezekieli ku yaabaire ateekateeka aha kworekwa okwo, kikaba kimuhamiza ngu omwoyo gurikwera nigwija kumuhwera kuhikiiriza obuheereza bwe.

8-9. (a) Hakabaho ki Yehova ku yaaragiire Ezekieli kwemerera? (b) Yehova akoongyera ata kuha Ezekieli amaani kuhikiiriza obuheereza bwe obwabaire bugumire?

⁸ Yehova akaragiira Ezekieli ati: “Mwana w’omuntu, imuka oyemerere, ngambe naiwe.” Ebigambo ebyo bikareetera Ezekieli kugira amaani, agaabaire nigetengyesa kwimuka. Ezekieli akahandiika ati: ‘Omwoyo gwantaahamu, gwanyemereza.’ (Ezk. 2:1, 2) Omu buheereza bwa Ezekieli bwona, akaba naayebemberwa “omukono” gwa Ruhanga, nigwo mwoyo gurikwera. (Ezk. 3:22; 8:1; 33:22; 37:1; 40:1) Omwoyo gwa Ruhanga gukaha Ezekieli amaani ahabw’obujunaanizibwa obu yaahairwe obw’okubuurira abantu abaabaire “baine obuso bugumire n’emitima egangaire.” (Ezk. 3:7) Yehova akagambira Ezekieli: “Ngangaize aha maisho gaawe, ngu habone kugangaarira ahaabo, n’obuso bwawe kugangaarira obwabo. Naahindura obuso bwawe nk’arimaasi [nari daimandi], bugume okukira eibaare ry’enkangabuye. Otatiina kandi otahahaazibwa emireebekyere yaabo.” (Ezk. 3:8, 9) Yehova akaba ari nk’orikugambira Ezekieli  ati: ‘Otaikiriza obugangaazi bw’abantu kukumaramu amaani. Ninza kukuha amaani.’

⁹ Bwanyima y’ebyo, omwoyo gwa Ruhanga gukatwara Ezekieli omu kicweka eki yaabaire aine kubuurira. “Omukono gwa [Yehova] gukaba gungumize,” nikwo Ezekieli yaahandiikire. Nabi akamara saabiiti emwe arikuteeraho kwetegyereza obutumwa obu yaabaire aine kubuurira kugira ngu abubuurire aine omuhimbo. (Ezk. 3:14, 15) Kandi Yehova akamugambira kuza omu ruhita ahu ‘omwoyo gwamutaahiiremu.’ (Ezk. 3:23, 24) Ezekieli akaba ayetebeekaniise kutandika obuheereza bwe.

10. Niki ekirikubaasa kutuhwera kuhikiiriza obuheereza bwaitu, kandi ahabw’enki?

¹⁰ Ni buhwezi ki oburikwetengyesa kubaasa kuhikiiriza omurimo gwaitu gw’okubuurira? Kubaasa kugarukamu ekibuuzo ekyo, teekateeka aha byahikire ahari Ezekieli. Atakatandikire okubuurira, omwoyo gwa Ruhanga gukamuha amaani agaabaire nigetengyesa. Nka Ezekieli, hati titurikubaasa kuhikiiriza omurimo gwaitu gw’okubuurira tutaine buhwezi bw’omwoyo gwa Ruhanga. Ahabw’enki? Ahakuba Sitaane naateeraho kuturemesa kuhikiiriza omurimo gwaitu gw’okubuurira. (Kush. 12:17) Abantu baingi nibateekateeka ngu Sitaane aine amaani maingi ngu titurikubaasa kumusingura. Kwonka turiyo nitumusingura kurabira omu murimo gw’okubuurira! (Kush. 12:9-11) Tuta shi? Twayejumba omu buheereza, nitworeka ngu titurikutiina okukangakanga kwa Sitaane. Buri murundi ogu turikubuurira nitusingura Sitaane. Mbwenu shi nitubaasa kugira ngu niki ekirikutubaasisa kuhikiiriza omurimo gwaitu gw’okubuurira n’obu turaabe nituhakanisibwa? N’ahabw’okugira ngu twine omwoyo gurikwera kandi nitusiimwa Yehova.—Mat. 5:10-12; 1 Pet. 4:14.

11. Omwoyo gwa Ruhanga nigutuhwera guta, kandi nitubaasa kukora ki kugutunga?

¹¹ Okumanya ngu Yehova akagaangaaza aha maisho n’obuso bwa Ezekieli omu muringo  gw’akamanyiso nikituha buhame ki obundi? Omwoyo gwa Ruhanga nigubaasa kutuhwera kugira amaani agarikwingana n’oburemeezi bwona obu turikutunga omu buheereza bwaitu. (2 Kor. 4:7-9) Mbwenu shi nitubaasa kukora ki kuguma nitutunga obuhwezi bw’omwoyo gurikwera? Twine kuguma nitushaba Yehova, kandi tukeesiga ngu naaza kugutuha. Yesu akeegyesa entumwa ze ati: “Mushabe, . . . musherure, . . . mwiguze.” Kandi, Yehova naija kuha ‘omwoyo gurikwera abo abarikumushaba.’—Luk. 11:9, 13; Byak. 1:14; 2:4.

12. Kurugiirira ahari Ezekieli 2:9–3:3, omuzingo gukaruga nkahi kandi gukaba gurimu ki?

¹² Ezekieli taraatungire maani ahabw’omwoyo gwa Ruhanga gwonka, kureka n’ahabw’ebigambo bye. Omu kworekwa, Ezekieli akareeba omukono gukwaitse omuzingo. (Shoma Ezekieli 2:9–3:3.) Omuzingo ogwo gukaruga nkahi? Gukaba gurimu ki? Gukahwera guta Ezekieli? Ka tureebe. Omuzingo gukaruga aha kitebe kya Ruhanga. Yehova naabaasa kuba yaakoreise omwe ahari baamaraika bana abu Ezekieli yaabaire areebire kumuha omuzingo. (Ezk. 1:8; 10:7, 20) Omuzingo gukaba gurimu ebigambo bya Ruhanga, eby’obutumwa bw’okucwa orubanja obu yaabaire aine kugambira abagomi abaabaire bari omu bukwatwa. (Ezk. 2:7) Obutumwa obu bukaba buhandiikirwe aha mbaju zombi z’omuzingo.

13. Yehova akagambira Ezekieli kukorera ki omuzingo, kandi ahabw’enki gwanuzire?

¹³ Yehova akagambira nabi kurya omuzingo kandi ‘agwijuze omu nda [ye].’ Ezekieli akooroba yaarya omuzingo gwona. Okworekwa okwo kukaba nikumanyisa ki? Ezekieli akaba aine kwetegyereza gye obutumwa obu yaabaire naaza kugamba. Akabwetegyereza gye bwamuhika aha mutima bwakwata n’aha nyehurira ze. Hariho ekintu kirikutangaaza ekyabaireho. Ezekieli akeetegyereza ngu omuzingo gukaba ‘nigunuriira nk’obwoki.’ (Ezk. 3:3) Ahabw’enki? Ezekieli, akareeba obujunaanizibwa bw’okujwekyera Yehova nk’obunuzire nari oburikushemeza. (Zab. 19:8-11) Akashemererwa munonga ngu Yehova akaba amwikirize kuheereza nka nabi we.

14. Niki ekyahweraire Ezekieli kwetebeekanisiza obuheereza bwe?

¹⁴ Bwanyima, Yehova akagira Ezekieli ati: “Ebigambo byangye byona, ebi naaza kukugambira, obitaasye omu mutima gwawe, kandi obihurire.” (Ezk. 3:10) Obuhabuzi obwo obu Yehova yaahaire Ezekieli bukaba nibumanyisa ngu aine kuguma naijuka byona ebiri omu muzingo ogwo kandi abiteekateekeho. Ezekieli ku yaakozire atyo okwikiriza kwe kukahama. Kandi akamanya obutumwa bw’amaani obu yaabaire aine kugambira abantu. (Ezk. 3:11) Ezekieli okwetegyereza gye obutumwa bwa Ruhanga kandi akabwikiriza, kikamuhwera kwetebeekanisa kuhikiiriza gye obuheereza bwe.—Gyeragyeranisa Zaaburi 19:14.

15. Niki eki twine kuta omu mutima gwaitu kubaasa kugumisiriza?

¹⁵ Kubaasa kugumisiriza omu buheereza bwaitu naitwe twine kwikiriza ebigambo bya Ruhanga bikahamya okwikiriza kwaitu. Twine kuta omu mitima yaitu byona ebi Yehova arikutugambira. Hati Yehova naagamba naitwe arikukoresa Ekigambo kye Baibuli. Nitubaasa kukora ki kuhamya ngu Ekigambo kya Ruhanga kyaguma nikikwata aha biteekateeko byaitu, enyehurira zaitu, n’ebi tumaririire kukora?

16. Twine kukora ki, Ekigambo kya Ruhanga kubaasa kuhika aha mutima gwaitu?

 ¹⁶ Nk’oku turikugira amaani twarya eby’okurya kandi enda ekabicwanyagura, okwikiriza kwaitu nikuhama twayeyegyesa Ekigambo kya Ruhanga kandi tukakiteekateekaho. Nituguma nitwijuka eki turikwegyera aha muzingo. Yehova naayenda ngu Ekigambo kye ‘tukiijuze omu nda [zaitu],’ ekirikumanyisa ngu twine kukyetegyereza gye. Nitubaasa kukora ekyo turikushaba, tukashoma, kandi tukateekateeka. Eky’okubanza, nitushaba kutebeekanisa emitima yaitu kwikiriza ebiteekateeko bya Ruhanga. Bwanyima nitushoma Baibuli. Reero, nitwemereramu kuteekateeka aha bi twaheza kushoma. Ekirikurugamu niki? Oku turikwongyera kuteekateeka nikwo turikwongyera kwetegyereza gye Ekigambo kye.

17. Ahabw’enki ni kikuru kuteekateeka aha bi turikushoma omu Baibuli?

¹⁷ Ahabw’enki ni kikuru kushoma Baibuli kandi tukateekateeka aha bi twashoma? Twakikora nitutunga amaani agarikwetengyesa kubuurira obutumwa bw’Obukama hati, kandi omu biro by’omumaisho nitwija kubaasa kugamba obutumwa bw’okucwa orubanja. Kandi, twateekateeka aha mitwarize ya Yehova, omukago gwaitu nawe nigwongyera kuhama. N’ekirikurugamu, nitwija kunurirwa, nari nitugira obunanukye bw’omu mutima n’okumarwa.—Zab. 119:103.

18. Abantu omu kicweka kyaitu nibaija kwijuka ki, kandi ahabw’enki?

¹⁸ Okutashushana na Ezekieli, itwe tituri baanabi. Kwonka nabwo, tumariirire kugumizamu nitugamba obutumwa bwa Yehova oburi omu Kigambo kye okuhitsya obu omurimo gw’okubuurira guraahikiirizibwe nk’oku arikwenda. Obwire bw’okucwa orubanja ku baraahikye, abantu omu kicweka kyaitu tibaraagire ngu tibararabwirwe, nari ngu Ruhanga akabeehuzya. (Ezk. 3:19; 18:23) Kureka, nibaija kwijuka ngu obutumwa obu twababuuriire bukaba niburuga ahari Ruhanga.

19. Niki ekiraatuhwere kugira amaani g’okuhikiiriza obuheereza bwaitu?

¹⁹ Niki ekiraatuhwere kugira amaani g’okuhikiiriza obuheereza bwaitu? N’ebintu bishatu ebyahweraire Ezekieli. Nitugumizamu turikubuurira ahakuba nitumanya ngu tutumirwe Yehova, omwoyo gurikwera nigutuha amaani, kandi ebigambo bya Ruhanga nibihamya okwikiriza kwaitu. Ahabw’obuhwezi bwa Yehova, nitubaasa kuhikiiriza obuheereza bwaitu, kandi tugumisirize “kuhitsya aha muheru.”—Mat. 24:13.