EKICWEKA EKY’OKWEGA 46
EKYESHONGORO 49 Okushemeza Omutima gwa Yehova
Ab’eishe-emwe—Muriyo Nimukununkirira Kuba Abaheereza?
“Okugaba kuhaisa omugisha okukira okuheebwa.”—BYAK. 20:35.
ENTIMA
Okuhiga ab’eishe-emwe ababatiziibwe kukununkirira kuba abaheereza n’okuhikiiriza ebirikwetengyesa.
1. Entumwa Paulo akaba naareeba ata abaheereza?
ABAHEEREZA nibakora emirimo mikuru omu bibiina. Buzima entumwa Paulo akaba naasiima abashaija aba abeesigwa. Nk’eky’okureeberaho, obu yaahandiikira Abakristaayo omuri Filipi, akaramutsya abaheereza n’abareeberezi.—Fil. 1:1.
2. Ow’eishe-emwe Luis naareeba ata obujunaanizibwa bwe nk’omuheereza?
2 Ab’eishe-emwe baingi abakuzire n’abato nibashemererwa munonga ahabw’okugira ngu n’abaheereza. Nk’eky’okureeberaho, Devan akaba aine emyaka 18 obu yaatooranwa kuba omuheereza. Kandi, ow’eishe-emwe orikwetwa Luis akatooranwa ahikize emyaka 50. Akooreka enyehurira ezi baingi baine obu yaagira ati: “Niingureeba nk’omugisha okukora emirimo y’Abaheereza, okukira munonga ku ndikuteekateeka ahari rukundo ei ekibiina kinyorekire.”
3. Nituza kushwijuma bibuuzo ki?
3 Waaba ori ow’eishe-emwe obatizibwe, kwonka otari muheereza, noobaasa kukitaho nk’ekigyendererwa. Niki ekirikubaasa kukuhiga kukihikaho? Kandi oine kuhikiiriza ki kurugiirira aha Byahandiikirwe? Omu kicweka eki, nituza kushwijuma eby’okugarukamu by’ebibuuzo ebi. Kwonka, ka tubanze tureebe obujunaanizibwa obu omuheereza aine.
OMUHEEREZA AINE BUJUNAANIZIBWA KI?
4. Omuheereza aine bujunaanizibwa ki? (Reeba n’ekishushani.)
4 Omuheereza n’ow’eishe-emwe obatiziibwe orikutooranwa omwoyo gurikwera kuhwera abareeberezi kukora emirimo etari emwe omu kibiina. Abaheereza abamwe nibahamya ngu ababuurizi baine ebitabo, n’omwanya guri kumara gw’okubuuriramu. Abandi nibahwera omu kuboneza Ekyombeko ky’Obukama, n’okukireeberera. Kandi nibahwera n’omu kwakiira abantu, n’okukora aha byoma by’amaraka na vidiyo omu nteerane. Emirimo mingi ei abaheereza barikukora neehwera munonga. Kwonka, abaheereza baine kubanza baaba ab’eby’omwoyo, abarikukunda Yehova, kandi abarikugyendera aha mitindo ye ehikiriire. Ekindi, baine kuba nibakunda munonga ab’eishe-emwe na banyaanyazi-itwe. (Mat. 22:37-39) Ow’eishe-emwe obatiziibwe naabaasa kukununkirira ata okuba omuheereza?
Abaheereza nibatooreza Yesu barikwehayo kuheereza abandi (Reeba akacweka 4)
5. Okukununkirira nikimanyisa ki?
5 Baibuli neeyoreka ebi ab’eishe-emwe barikubaasa kuhikiiriza kutooranwa kuba abaheereza. (1 Tim. 3:8-10, 12, 13) Noobaasa kukununkirira obujunaanizibwa obwo orikweyegyesa Ebyahandiikirwe ebirikworeka ebirikwetengyesa, reero okateeraho kubihikiiriza. Kwonka, oine kubanza waayeshwijuma kumanya ahabw’enki nooyenda kuba omuheereza.
AHABW’ENKI NOOKUNUNKIRIRA KUBA OMUHEEREZA?
6. Niki ekiine kukuhiga kugira eki waakorera ab’eishe-emwe na banyaanyoko? (Matayo 20:28; Reeba n’ekishushani .)
6 Yesu Kristo akatuteeraho eky’okureeberaho kirungi. Akaba naakunda Ishe, n’abantu. Rukundo egyo ekamuhiga kukora munonga, n’okuheereza abandi. (Shoma Matayo 20:28; Yoh 13:5, 14, 15) Waahigwa rukundo, Yehova naija kukuha emigisha, kandi naija kukuhwera kuhika aha kigyendererwa kyawe eky’okuba omuheereza.—1 Kor. 16:14; 1 Pet. 5:5.
Yesu akateeraho entumwa ze eky’okureeberaho aha ku baine kuheereza abandi omu bucureezi omu mwanya gw’okwesherurira emyanya y’ahaiguru (Reeba akacweka 6)
7. Ahabw’enki ow’eishe-emwe aine kwetantara okwetunguura?
7 Omu nsi, abantu nibakira kukunda abantu abarikwetunguura. Kwonka tikwo kiri omu kibiina kya Yehova. Ow’eishe-emwe orikuhigwa rukundo kuheereza abandi nka Yesu, tarikuhayahayanira obujunaanizibwa, nari kwenda kuheebwa ekitiinisa. Omuntu orikwetunguura yaatooranwa kuba omuheereza omu kibiina, naabaasa kwanga kukora emirimo ey’ahansi erikwetengyesa kubaasa kureeberera entaama za Yehova ez’omuhendo. Naabaasa kureeba emirimo egyo nk’etamushemereire. (Yoh. 10:12) Yehova tarikuha omugisha okuteeraho kw’omuntu weena oine amaryo kandi orikwetunguura.—1 Kor. 10:24, 33; 13:4, 5.
8. Yesu akaha entumwa ze buhabuzi ki?
8 Obumwe, n’abanywani ba Yesu abaabuzima bakaba nibakununkirira obujunaanizibwa ahabw’ebigyendererwa bitahikire. Teekateeka aha ki entumwa Yakobo na Yohaana baakozire. Bakashaba Yesu kubaha omwanya gw’omutaano omu Bukama bwe. Yesu tarabasiimire ahabw’eki baakozire. Kureka, akashoboororera entumwa ze 12 ati: ‘Weena orikwenda kuba omukuru omuriimwe, ashemereire kuba omuheereza waanyu, n’orikwenda kuba ow’okubanza omuriimwe, ashemereire kuba omuhuuku wa boona.’ (Mak. 10:35-37, 43, 44) Ab’eishe-emwe abarikukununkirira obujunaanizibwa ahabw’okwenda kuheereza abandi nibaija kuba ab’omuhendo omu kibiina.—1 Tes. 2:8.
NIKI EKIRIKUBAASA KUHAMYA EKYETENGO KYAWE KY’OKUBA OMUHEEREZA?
9. Noobaasa kuhamya ota ekyetengo kyawe ky’okwenda kuba omuheereza?
9 Hatariho kubangaanisa nookunda Yehova kandi nooyenda kuheereza abandi. Kwonka nabwo, noobaasa kuba otaine kyetengo ky’okukora emirimo endiijo erikukorwa abaheereza. Noobaasa kuhamya ota ekyetengo ekyo? Teekateeka aha kushemererwa oku orikubaasa kugira waaheereza ab’eishe-emwe na banyaanyazi-itwe. Yesu akagira ati: “Okugaba kuhaisa [okushemererwa] kukira okuheebwa.” (Byak. 20:35) Nawe akagyendera aha musingye ogwo. Akatunga okushemererwa okwabuzima ahabw’okuheereza abandi, kandi naiwe noobaasa kukugira.
10. Yesu akooreka ata ngu akaba naashemererwa ahabw’okuheereza abandi? (Mako 6:31-34)
10 Teekateeka aha ku Yesu yaayorekire ngu naashemererwa ahabw’okuheereza abandi. (Shoma Mako 6:31-34.) Eizooba rimwe, Yesu n’entumwa ze bakaba baruhire. Bakaba bariyo nibaza omu mwanya gwehereire kuhuumuraho. Kwonka, abantu baingi bakabatangayo barikwenda kwegyesibwa Yesu. Akaba naabaasa kwanga. Ahakuba we n’entumwa ze bakaba bataine n’obwire bw’okurya. Nari Yesu akaba naabaasa kubeegyesa bikye, reero abagambire kugyenda. Kwonka ahabw’okuhigwa rukundo ‘akatandika kubeegyesa bingi.’ Kandi akagumizamu naabeegyesa kuhitsya “omu mwabazyo.” (Mak. 6:35) Ekyo tarakikozire ahabw’okugira ngu akaba aine kukikora, kureka ‘ahabw’okubagirira esaasi.’ Akaba naayenda kubeegyesa ahabw’okubakunda. Yesu akagira okushemererwa kwingi ahabw’okuheereza abandi.
11. Yesu akaheereza ata abantu omu miringo erikureebwa butunu? (Reeba n’ekishushani.)
11 Ku yaabaire naaheereza abandi, akaba akora ekirikukira aha kubeegyesa. Akaba naafayo n’aha byetengo byabo eby’omubiri. Akakora eby’okurya omu muringo gw’eky’okutangaaza, yaabiha abeegi be kubigaburira abantu. (Mak. 6:41) Omu kukora ekyo, akeegyesa abeegi be oku baine kuheereza abandi. Kandi akabooreka ngu eki baakora ni kikuru, nk’emirimo ei abaheereza barikukora. Entumwa ka baine kuba baashemereirwe kukora na Yesu kugaburira abantu eby’okurya omu muringo gw’eky’okutangaaza, kuhitsya obu ‘boona baariire, bakahaaga’! (Mak. 6:42) Amazima gari ngu, ogu tigwo gwabaire guri murundi gwonka obu Yesu yaayebeembeza eby’abandi okukira ebye. Obwire bwona obu yaamazire omu nsi, akabukoresa kuheereza abandi. (Mat. 4:23; 8:16) Yesu akagira okushemererwa n’okumarwa ahabw’okwegyesa abandi n’okufayo aha byetengo byabo. Hatariho kubangaanisa naiwe noija kugira okushemererwa kwingi waakununkirira kuba omuheereza ahabw’okuteyendeza.
Rukundo ei oiniire Yehova n’ekihika ky’okwenda kuheereza abandi nibiija kukuhiga kuhikiiriza obujunaanizibwa bwona obu oraaheebwe omu kibiina (Reeba akacweka 11) a
12. Ahabw’enki tutaine kwereeba nk’abarikukora bikye omu kibiina?
12 Otahwa amaani waaba nooyereeba nk’otaine kubaasa kw’omutaano. Buzima oine emitwarize mingi erikugasira ekibiina. Noobaasa kugasirwa waashaba, kandi okashoma ebi Paulo yaahandiikire omu 1 Abakorinso 12:12-30. Ebigambo bya Paulo nibyoreka butunu ngu nk’abaheereza ba Yehova abandi naiwe ori ow’omuhendo kandi ow’omugasho omu kibiina. Otahwa amaani waaba otakahikiriize ebirikwetengyesa kuba omuheereza. Kureka, noobaasa kukora kyona eki orikubaasa kukoresibwa Yehova n’okuheereza abandi. Gira obwesigye ngu abareeberezi nibaija kureeba okubaasa kwawe, bamanye obujunaanizibwa obu barikubaasa kukuha.—Rom. 12:4-8.
13. Twine kumanya ki aha birikwetengyesa ebi abaheereza baine kuhikiiriza?
13 Teekateeka aha nshonga endiijo ahabw’enki oine kukununkirira okuba omuheereza: Ebirikwetengyesa nibikwata aha Abakristaayo boona. Nangwa, Abakristaayo boona baine kugira omukago murungi na Yehova, bagire okushemererwa okurikuruga omu kuha abandi, kandi babe eky’okureeberaho kirungi omu bi barikukora. Niki kyenyini eki ow’eishe-emwe arikubaasa kukora kuba omuheereza?
OKU ORIKUBAASA KUKUNUNKIRIRA KUBA OMUHEEREZA
14. Nikimanyisa ki okuba ‘omwerinzi’? (1 Timoseo 3:8-10, 12)
14 Ka tushwijume bimwe ebirikwetengyesa ebiri omu 1 Timoseo 3:8-10, 12. (Kishome.) Omuheereza aine kuba ‘omwerinzi.’ Ekigambo ekyo nikibaasa kuvunuurwa “nk’obweziriki, ow’obujunaanizibwa, nari orikuheebwa ekitiinisa.” Eki tikirikumanyisa ngu toine kusheka nari kushemererwa n’abandi. (Mub. 3:1, 4) Kwonka, oine kutwara obujunaanizibwa bwawe nka bukuru. Waaba noomanywa nk’orikwesigwa, kandi orikuhikiiriza obujunaanizibwa bwawe, noija kuheebwa ekitiinisa omu kibiina.
15. Nikimanyisa ki ‘okutagambira habiri n’okuteetenga enshaagi’?
15 ‘Okutagambira habiri’ nikimanyisa okuba ow’amazima kandi orikwesigwa. Noohikiiriza eki orikugamba kandi torikubeiha abandi. (Enf. 3:32) ‘Okuteetenga enshaagi’ nikimanyisa ngu ori ow’amazima omu nshonga z’eby’obushuubuzi n’esente. Torikwija kwihirira aha nkoragana nungi ei oine n’ab’eishe-emwe kubaihaho esente nyingi.
16. (a) Nikimanyisa ki ‘okutanywa viinyo nyingi’? (b) Nikimanyisa ki okugira “omutima ogutarikweshinja”?
16 ‘Okutanywa viinyo nyingi’ nikimanyisa ngu noomanywa nk’omuntu otarikunywa amaarwa maingi. Okugira “omutima ogutarikweshinja” nikimanyisa ngu noogyendera aha mitindo ya Yehova. Kandi n’obu orikuba otahikiriire, nooba oine obusingye oburikuruga omu kugira omukago murungi na Ruhanga.
17. Ow’eishe-emwe naabaasa kworeka ata ngu naayesigwa yaaba ‘naagyezibwa’? (1 Timoseo 3:10; Reeba n’ekishushani.)
17 ‘Okugyezibwa’ nikimanyisa ngu waayorekire ngu noobaasa kuhikiiriza obujunaanizibwa oburikukuheebwa. N’ahabw’ekyo, abareeberezi baakuha obujunaanizibwa, fayo munonga kukuratira obuhabuzi bwabo n’obw’ekibiina. Teeraho kwetegyereza ekirikutwarirwa omu bujunaanizibwa bwawe n’obu oine kubuhikiiriza. Waahikiiriza buri bujunaanizibwa, abandi nibaija kwetegyereza okutunguuka kwawe kandi bakusiime. Abareeberezi, mufeyo kutendeka ab’eishe-emwe ababatiziibwe. (Shoma 1 Timoseo 3:10.) Omu kibiina kyanyu, harimu ab’eishe-emwe ababatiziibwe abaine emyaka 10 kuhika 14 nari abatakagihikize? Baine entebeekanisa nungi y’okweyegyesa? Nibagarukamu omu nteerane butoosha, kandi beejumba omu kubuurira? Ku kiraabe nikwo kiri, mubahe obujunaanizibwa oburikuhikaana n’emyaka yaabo n’embeera zaabo. Mwakora mutyo, ab’eishe-emwe abato nibaija kuba nibagyezibwa. Reero baahika omu myaka y’obushogoyo, nibabaasa kutooranwa kuba abaheereza.
Abareeberezi ‘nibagyeza’ ab’eishe-emwe ababatiziibwe barikubaha obujunaanizibwa (Reeba akacweka 17)
18. Nikimanyisa ki kuba ‘otaine eki orikugaywaho’?
18 ‘Otaine eki orikugaywaho’ nikimanyisa ngu tihariho kibi ky’amaani eki orikugambwaho. Amazima gari ngu, Abakristaayo nibabaasa kugambwaho ebitahikire. Yesu bakamugambaho ebitahikire, kandi akagira ngu abakuratsi be bakaba nibaija kuhikwaho embeera niyo emwe. (Yoh. 15:20) Kwonka, waaguma oine emitwarize eshemeire nk’oku yaakozire, noija kugira eiziina rirungi omu kibiina.—Mat. 11:19.
19. Okugira “omukazi omwe” nikitwariramu ki?
19 Okugira “Omukazi omwe.” Ku oraabe ori omu bushwere, oine kugyendera aha mutindo gwa Yehova ogurikukwata aha bushwere, ey’omushaija kugira omukazi omwe. (Mat. 19:3-9) Ow’eishe-emwe tashemereire kushambana. (Heb. 13:4) Kwonka hariho ekindi ekirikutwarirwamu. Oine kuhamira aha mukazi waawe, orikwetantara kurigira abakazi abandi.—Yob 31:1.
20. Omushaija naabaasa kwebembera gye ata eka ye?
20 ‘[Orikwebembera] gye abaana be n’eka ye.’ Ku oraabe ori omutwe gw’eka, oine kutwara obujunaanizibwa bwawe nka bukuru. Butoosha gira okuramya kw’eka. Butoosha yejumbe omu kubuurira n’omwe aha b’eka yaawe nk’oku orikubaasa. Hwera abaana baawe kugira omukago murungi na Yehova. (Efe. 6:4) Omushaija orikufayo aha ka ye nikyoreka ngu naabaasa kureeberera ekibiina.—Gyeragyeranisa 1 Timoseo 3:5.
21. Noobaasa kukora ki ku oraabe otakabaire muheereza?
21 Ow’eishe-emwe, ku oraabe otakabaire muheereza, nyabura ‘we shaba kandi oshwijume ebiri omu kicweka eki. Yega ebirikwetengyesa kuba omuheereza, kandi oteereho munonga kubihikiiriza. Teekateeka ahari rukundo ei oiniire Yehova n’ab’eishe-emwe bagyenzi baawe. Hamya ekyetengo kyawe ky’okuba omuheereza. (1 Pet. 4:8, 10) Gira okushemererwa okurikuruga omu kuheereza ab’eka yaawe ey’eby’omwoyo. Nitukwendeza emigisha ya Yehova waaba nooteeraho kukununkirira kuba omuheereza.—Fil. 2:13.
EKYESHONGORO 17 ‘Niinyenda’
a ENSHOBOORORA Y’EBISHUSHANI: Ahari bumosho, Yesu naaheereza abeegi omu bucureezi; ahari buryo, omuheereza naahwera ow’eishe-emwe okuzire omu kibiina.
