NOOGUMIRWA kuhamira aha ntebeekanisa yaawe ey’okweyegyesa obutoosha, nari kugishemerererwamu? Obumwe twena ekyo nikituhikaho. Kwonka teekateeka aha bintu ebindi ebi turikukora butoosha nk’okunaaba. Okunaaba nikutwara obwire n’amaani, kwonka nooyehurira gye ku orikunaaba. Okweyegyesa kuri nk’okunaaba amaizi agarikuruhuura ‘ag’Ekigambo’ kya Ruhanga. (Efe. 5:26) Yetegyereze bimwe aha birikubaasa kukuhwera:

• Kora entebeekanisa. Okweyegyesa ni kimwe aha bintu ebirikukirayo obukuru ebi Omukristaayo ataine kwehuzya. (Fil. 1:10) Kubaasa kukuratira entebeekanisa yaawe nikiba kiri kirungi kugita ahu orikurahuka kugireeba. Nari noobaasa kuta akade omu simu yaawe k’okukwijutsya, obwire bw’okweyegyesa bwaba buri haihi kuhika.

• Toorana obwire oburikuhikaana n’embeera yaawe. Nikikworobera kuguma otaireho omutima waamara obwire buraingwa orikweyegyesa, nari nikikworobera waayeyegyesa omu bicweka kumara obwire bukye bukye? Naiwe orikumanya gye embeera yaawe. N’ahabw’ekyo, hinduramu kuhikaana n’embeera yaawe. Obwire bw’okweyegyesa bwahika kwonka okahurira oine obugara, noobaasa kucwamu kweyegyesa kumara edakiika ikumi. Waakora otyo, noija kuhikiiriza bingi kukira oku orikuteekateeka. Kandi waaba waatandikire noobaasa kugira omuhimbo gw’okwenda kugumizamu.—Fil. 2:13.

• Toorana eby’okwegaho bukiri kare. Obwire bw’okweyegyesa bwahika okatandika kuteekateeka aha ki oraayegyeho nooba nooshiisha obwire. (Efe. 5:16) N’ahabw’ekyo handiika ebicweka nari enshonga ezi orikwenda kwegaho bukiri kare. Waijuka eki orikwenda kwegaho, kihandiikye. Kandi bwanyima ya buri kweyegyesa, noobaasa kuhandiika ebindi ebi orikwenda kwongyera kwegaho.

• Ba oyeteekateekire kukora empinduka. Teeraho kuhindahindura omu ntebeekanisa yaawe, nk’obwire obu orikumara nooyeyegyesa, nari enshonga ezi ocwiremu kwegaho. Ekikuru ti obu orikweyegyesa, obwire obu orikumara orikweyegyesa, nari ebi orikwegaho, kureka n’okweyegyesa obutoosha.

Buzima nitugasirwa twaba twine entebeekanisa y’okweyegyesa obutoosha. Nitwirira haihi Yehova, twega kutwaza omu muringo gw’obwengye, kandi nitwehurira gye.—Yos. 1:8.