1-2. Ni mu miringo ki oku twena turikukwatwaho obutari buringaaniza?

 YESU akagamba aha mufaakazi owaagumire naayeshengyereza omuramuzi kutwarizibwa omu buringaaniza. Hatariho kubangaanisa, abeegi ba Yesu abaingi bakeetegyereza ebi yaagambire ahakuba omu bwire obwo abantu ba butoosha bakaba nibatwarizibwa kubi. (Luk. 18:​1-5) Naitwe nitumwetegyereza ahakuba turatwariziibweho omu muringo gutari gw’oburingaaniza.

² Obunaku obu, okushoroora, okutaingana, n’okutuuntuzibwa bikanyire, n’ahabw’ekyo tikirikututangaaza twatwarizibwa kubi. (Mub. 5:8) Kwonka ow’eishe-emwe nari munyaanyazi-itwe yaatutwariza kubi, nitubaasa kushaasha munonga. Amazima gari ngu, ab’eishe-emwe bagyenzi baitu tibarikutuhakanisa, kureka n’ahabw’obutahikiirira. Nitubaasa kwegyera bingi aha ku Yesu yaatwarize obu abahakanisa baamutwariza omu muringo gutari gw’oburingaaniza. Twaba nitubaasa kugumisiriza abahakanisa abarikututwariza kubi, nitubaasa kugumisiririza ab’eishe-emwe bagyenzi baitu n’okukiraho. Yehova naayehurira ata abari omu kibiina n’aheeru yaakyo baatutwariza omu muringo gutari gw’oburingaaniza?

3. Ahabw’enki turikubaasa kugira ngu Yehova naafayo aha ku abandi barikutwariza abaheereza be?

³ Yehova naafayo munonga aha ku turikutwarizibwa. ‘Naakunda eby’oburyo.’ (Zab. 37:28) Yesu akatuhamiza ngu omu bwire obuhikire, Yehova naija kurahuka kureetaho  oburingaaniza. (Luk. 18:​7, 8) Kandi juba naija kumaraho okubonabona kwaitu kwona, n’obutari buringaaniza bwona.—Zab. 72:​1, 2.

4. Yehova naatuhwera ata obunaku obu?

⁴ Yehova naatuhwera kugumisiriza obutari buringaaniza, obwo tutegyereize obu haraabeho ebikorwa by’okuhikiirira. (2 Pet. 3:13) Naatwegyesa kutwaza omu muringo gw’obwengye twahikwaho obutari buringaaniza. Akatuha Omwana we kutworeka eki turikubaasa kukora twatwarizibwa tutyo. Kandi naatuha obuhabuzi obundi obu turikubaasa kugyenderaho.

YEGYENDESEREZE OKU ORIKUTWAZA WAAHIKWAHO OBUTARI BURINGAANIZA

5. Ahabw’enki twine kwegyendesereza oku turikutwaza twahikwaho obutari buringaaniza?

⁵ Obutari buringaaniza nibubaasa kutureetera kugira amaganya n’obusaasi. (Mub. 7:7) Abaheereza ba Yehova abeesigwa, nka Yobu na Habakuuki nabo bakeehurira batyo. (Yob. 6:​2, 3; Hab. 1:​1-3) N’obu kiraabe kiri ekya butoosha kwehurira tutyo, twine kwegyendesereza kugira ngu tutatwaza omu muringo gw’obushema.

6. Abusalomu nitumwegyeraho ki? (Reeba n’ekishushani.)

⁶ Twatwarizibwa omu muringo gutari gw’oburingaaniza nitubaasa kwenda kuhoora enzigu. Okutwaza omu muringo ogwo nikibaasa kureetera embeera kwongyera kusiisikara. Teekateeka aha ky’okureeberaho kya Abusalomu mutabani w’Omugabe Daudi. Akagira ekiniga kingi obu Amunooni mutabani wa muka ishe yaahamba munyaanya Tamari. Kurugiirira aha Biragiro bya Musa, Amunooni akaba aine kwitwa ahabw’eki yaakozire. (Lev. 20:17) N’obu Abusalomu yaabaire ahikire kugira ekiniga, akaba ataine kwehoorera enzigu.—2 Sam. 13:​20-23, 28, 29.

7. Omu kubanza, omuhandiiki wa zaaburi akakwatwaho ata obutari buringaaniza?

⁷ Twareeba abarikutwaza kubi batarikufubirwa, nitubaasa kuteekateeka ngu tikirikugasha kukora ekihikire. Teekateeka aha muhandiiki wa zaaburi owaareebire ababi bari gye kukira abahikiriire. Akagira ati: ‘Ababi nibo bagira obusingye obutoosha.’ (Zab. 73:12) Akeehurira kubi ahabw’obutari buringaaniza obu yaareebire, yaabura kuta omutima aha birungi ebiri omu kuheereza Yehova,  arikugira ati: “Ku naateekateekire oku ndaashoborokyerwe ekyo, kikandusya, kyandema.” (Zab. 73:​14, 16) Nangwa akagira ati: “Kwonka nyowe, ebigyere byangye bikaba byatereire, nkaba ndi haihi kugwa.” (Zab. 73:2) Eki nikyo kyahikire aha w’eishe-emwe ou turaayete Alberto.

8. Ow’eishe-emwe akakwatwaho ata obutari buringaaniza?

⁸ Alberto akabeihererwa ngu akaiba esente z’ekibiina. N’ekyarugiremu, akaihwaho obujunaanizibwa bwe kandi abaakimanyire omu kibiina bakaba batakimuha ekitiinisa. Naagira ati: “Nkeehurira kubi, naagira ekiniga, kandi naayetamwa.” Akaikiriza enyehurira ze kushiisha entebeekanisa ye y’eby’omwoyo, kandi yaamara emyaka etaano atarikubuurira. Eky’okureeberaho ekyo nikyoreka ekirikubaasa kubaho twagira ekiniga kingi ahabw’obutari buringaaniza.

GUMISIRIZA OBUTARI BURINGAANIZA NKA YESU

9. Yesu akagumisiriza obutari buringaaniza bwa muringo ki? (Reeba n’ekishushani.)

⁹ Yesu akatuteeraho eky’okureeberaho oku twine kugumisiriza obutari buringaaniza. Teekateeka aha ku yaatwariziibwe kubi abanyabuzaare be n’abandi. Abanyabuzaare  be bakamugira ngu agwire eiraro, abeebembezi b’ediini bakagira ngu naakoragana na baadaimoni, kandi abaserukare Abarooma bakamukiniika, baamuteera, kandi bwanyima baamwita. (Mak. 3:​21, 22; 14:55; 15:​16-20, 35-37) Kwonka, Yesu akagumisiriza obutari buringaaniza obwo, omu mwanya gw’okuhoora enzigu. Nitubaasa kwegyera ki aha ky’okureeberaho kye?

10. Yesu akagumisiriza ata obutari buringaaniza? (1 Petero 2:​21-23)

¹⁰ Shoma 1 Petero 2:​21-23. a Yesu akatuteeraho eky’okureeberaho kirungi aha ku turikubaasa kugumisiriza obutari buringaaniza. Akaba naamanya obu aine kuhunama nari kugamba. (Mat. 26:​62-64) Ku baabaire baamugambaho ebitahikire akaba ahunama. (Mat. 11:19) Kwonka ku yaabaire acwamu kugamba, akaba atajuma abarikumuhiiganisa nari kubatiinatiinisa. Omu mwanya gw’okwehoorera enzigu “akeehayo ahari ogwo ocwa emanja z’amazima.” Yesu akaba naamanya ngu omuringo ogu Yehova arikureebamu enshonga nigwo gurikukirayo obukuru. Kandi akaba aine obwesigye ngu Yehova naija kushoboorora obutari buringaaniza omu bwire obuhikire.

11. Ni miringo ki emwe oku turikubaasa kwerinda omu migambire yaitu? (Reeba n’ebishushani.)

¹¹ Nitubaasa kutooreza Yesu turikwerinda omu migambire yaitu twatwarizibwa omu muringo gutari gw’oburingaaniza. Obumwe nitubaasa kubwehuzya, nari tugume tuhunami kwetantara kureetera embeera kwongyera kuba mbi. (Mub. 3:7; Yak.  1:​19, 20) Obundi nikibaasa kutwetengyesa kujuririra amazima nari kugamba twareeba abandi nibatwarizibwa kubi. (Byak. 6:​1, 2) Kwonka twacwamu kugamba, twine kuteeraho kukikora omu muringo gw’ekitiinisa, kandi tukaguma twikaikaine.—1 Pet. 3:15. b

12. Nitubaasa kwehayo tuta ahari ‘ogwo orikucwa emanja z’amazima’?

¹² Naitwe nitubaasa kutooreza Yesu turikwehayo ahari ‘ogwo orikucwa emanja z’amazima.’ Abandi baatugambaho ebitahikire nari baatutwariza kubi, twine kugira obwesigye ngu Yehova naamanya amazima. Okugira obwesigye obwo nikituhwera kugumisiriza ahakuba nituba nitumanya ngu Yehova naija kushoboorora enshonga. Twayesiga Yehova, nitwetantara okugira ekiniga n’okubiika enziika omu mutima gwaitu. Enyehurira nk’ezo nizibaasa kutureetera kukora ekitahikire, kutashemererwa, kandi zishiishe omukago gwaitu na Yehova.—Zab. 37:8.

13. Niki ekiraatuhwere kugumizamu nitugumisiriza obutari buringaaniza?

¹³ Amazima gari ngu, titurikubaasa kutooreza Yesu omu muringo oguhikiriire. Obumwe, nitubaasa kukora nari tugambe ebirikutureetera kwefuuza. (Yak. 3:2) Kandi obutari buringaaniza nibubaasa kutureetera kuguma twine obusaasi omu nyehurira n’aha mubiri. Waaba nikwo orikwehurira otyo, gira obwesigye ngu Yehova naamanya embeera ezi orikurabamu. Kandi Yesu, owaahikirweho obutari buringaaniza naayetegyereza oku orikwehurira. (Heb. 4:​15, 16) Okwongyera aha ky’okureeberaho ky’Omwana we, Yehova naatuha obuhabuzi obundi oburikutuhwera kwemera obutari buringaaniza. Ka tushwijume emishororongo ebiri eri omu kitabo kya Abarooma erikubaasa kutuhwera.

‘MUREKYERE EKINIGA RUHANGA’

14. Nikimanyisa ki ‘okurekyera ekiniga Ruhanga’? (Abarooma 12:19)

¹⁴ Shoma Abarooma 12:19. Entumwa Paulo akahiga Abakristaayo ‘kurekyera ekiniga Ruhanga.’ Ekyo nitukikora turikucwamu kwikiriza Ruhanga kuba niwe yaareetaho oburingaaniza omu bwire bwe kandi omu muringo gwe. Ow’eishe-emwe orikwetwa John ku yaatwariziibwe kubi, akagira ati: “Nkaba nyine kusingura ekyaka ky’okwenda kutereeza enshonga omu muringo gwangye. Ebiri omu Abarooma 12:19 bikampwera kutegyereza Yehova.”

15. Ahabw’enki ni kikuru kutegyereza Yehova kushoboorora enshonga?

¹⁵ Nitugasirwa twategyereza Yehova kushoboorora enshonga. Twakora tutyo, tituraagire amaganya agarikuruga omu kuteeraho kutereeza embeera ahabwaitu. Yehova naayenda kutuhwera. Ari nk’orikugira ngu, ‘Obutari buringaaniza mubundekyere; ninyija kubushoboorora.’ Kandi naaraganisa ati: ‘Niinye ndikwija kuzimuura.’ Twikiriza ekyo titurikuguma n’ekiniga, kureka nitugira obwesigye ngu Yehova naija kushoboorora gye enshonga kutukira. Ekyo nikyo kyahweraire John, owaaba yaagambirweho. Akagira ati: “Naategyereza Yehova, naija kutereeza embeera kunkira.”

“EKIBI OKISINGUZE EKIRUNGI”

16-17. Okushaba nikubaasa kutuhwera kuta kugumizamu nitusinguza ekibi ekirungi? (Abarooma 12:21)

¹⁶ Shoma Abarooma 12:21. Paulo akahiga Abakristaayo ‘ekibi kukisinguza ekirungi.’  Yesu omu Rubazo rwe rw’aha Rushozi akagira ati: “Mukunde abazigu baanyu, kandi mushabire n’abarikubahiiga.” (Mat. 5:44) Ekyo nikyo yaakozire. Nitubaasa kuba turaateekateekire aha busaasi obu Yesu yaagizire obu abaserukare Abarooma baamuteera emisimaari aha muti. Titurikubaasa kwetegyereza gye obusaasi, okuhemuka, n’obutari buringaaniza obu yaagumisiririize.

¹⁷ Yesu tarasingwirwe obutari buringaaniza obwamuhikireho. Omu mwanya gw’okukyeena abaserukare abo, akabashabira ati: “Taata, obasaasire, ahakuba tibarikumanya ki barikukora.” (Luk. 23:34) Twashabira abarikututwariza kubi, nikituhwera kutabagirira enziika n’ekiniga, kandi nikitubaasisa kuhindura omuringo ogu turikubareebamu.

18. Okushaba kukahwera kuta Alberto na John kugumisiriza obutari buringaaniza?

¹⁸ Okushaba kukahwera ab’eishe-emwe babiri abaagambwaho omu kicweka eki kugumisiriza obutari buringaaniza. Alberto naagira ati: “Nkashabira ab’eishe-emwe abaantwariize omu muringo gutari gw’oburingaaniza. Nkashaba Yehova emirundi mingi kumpwera kukyehuzya.” Ekirungi, Alberto hati naaheereza Yehova omu bwesigwa. John naagira ati: “Emirundi mingi nkashabira ow’eishe-emwe owaangwisize kubi. Okushaba okwo kukampwera kutamugirira ekiniga, kutamucwera orubanja, n’okugira obusingye bw’omu biteekateeko.”

19. Twine kugumizamu nitukora ki kuhitsya aha mperu y’obusingye obu? (1 Petero 3:​8, 9)

¹⁹ Titurikubaasa kumanya obutari buringaaniza oburikubaasa kutuhikaho, entebeekanisa y’obusingye obu etakahendeire. Kyona ekiraabeho, ka tugumizemu nitushaba Yehova kutuhwera! Kandi ka tumariirire kugumizamu nitugyendera aha misingye ya Baibuli, turikutwaza nka Yesu. Twakora tutyo, nitubaasa kuhamiza kimwe ngu Yehova naija kutuha omugisha.—Shoma 1 Petero 3:​8, 9.