1. Niki ekirikukuhamiza ngu Ekigambo kya Ruhanga kiine amaani? (Reeba ekishushani aha kutandika.)

ABAHEEREZA ba Ruhanga baine obuhame ngu obutumwa obu yaahaire abantu nari ekigambo kye, “kiine amagara n’amaani.” (Abaheburaayo 4:12) Tureebire oku Baibuli erikukora omu magara gaitu n’omu magara g’abandi. Abamwe batakabaire Abajurizi ba Yehova, bakaba bari abashuma, barikukoresa emibazi y’ekitabura bwongo, nari bari abashambani. Abamwe bakaba nibarangaanwa nari baine esente nyingi kwonka nabwo bakaba nibahurira ngu haine ekirikubaburaho. (Omubuurizi 2:3-11) Nikishemeza kureeba ngu baingi abaabaire bataine matsiko kandi babuzire hati baine amatsiko. Omu Omunaara gw’Omurinzi, nitukira kushoma aha by’okureeberaho nk’ebyo ahansi y’omutwe “Baibuli Neehindura Emitwarize y’Abantu.” Nangwa na bwanyima y’okuba Abakristaayo baine kugumizamu nibahamya omukago gwabo na Yehova barikuhwerwa Baibuli.

2. Amaani g’Ekigambo kya Ruhanga gakahwera gata abantu omu kyasha ky’okubanza?

² Tikirikutangaaza kureeba ngu abantu baingi nibakora  empindahinduka mpango baaheza kwega amazima. N’ab’eishe-emwe na banyaanyazi-itwe abaabaire baine amatsiko g’okuza omu iguru omu kyasha ky’okubanza bakakora empinduka nk’ezi. (Shoma 1 Abakorinso 6:9-11.) Obu Paulo yaabaire naagamba ahari abo abatarikubaasa kuhungura Obukama bwa Ruhanga, akoongyeraho ati: ‘Bamwe omuriimwe mukaba muri nk’abo.’ Ekigambo kya Ruhanga n’omwoyo gurikwera bikahwera abantu abo kuhinduka. Nangwa na bwanyima y’okuhinduka Abakristaayo, abamwe omuribo bakakora enshobe z’amaani ezaasiisire omukago gwabo na Yehova. Nk’eky’okureeberaho, Baibuli neegamba aha w’eishe-emwe omwe owaabaire ashukirweho amajuta owaabingirwe omu kibiina. Bwanyima, akakora empinduka kugira ngu abaase kugaruka omu kibiina Ekikristaayo. (1 Abakorinso 5:1-5; 2 Abakorinso 2:5-8) Nikigaruramu amaani kureeba ngu ab’eishe-emwe na banyaanyazi-itwe babaasize kukora empindahinduka nyingi ahabw’amaani g’Ekigambo kya Ruhanga.

3. Nituza kushwijuma ki omu kicweka eki?

³ Ekigambo kya Ruhanga kiine amaani maingi. Obu Yehova akituhaire, twine kuhamya ngu twakikoresa gye. (2 Timoseo 2:15) Ekicweka eki nikiza kworeka oku turikubaasa kukoresa amaani g’Ekigambo kya Ruhanga (1) omu magara gaitu, (2) omu kubuurira, na twaba (3) nitwegyesa omu kibiina. Ebi turaayegye nibiija kutuhwera kworeka ngu nitusiima kandi ngu nitukunda Tataitwe ow’omu iguru, orikutwegyesa eby’okutugasira.​—Isaaya 48:17.

4. (a) Nitubaasa kukora ki Ekigambo kya Ruhanga kubaasa kutuhwera? (b) Nookora ki kubaasa kutunga obwire bw’okushoma Baibuli?

⁴ Ekigambo kya Ruhanga kubaasa kutuhwera, twine kuguma nitukishoma. Twine kuteeraho kukishoma buri izooba. (Yoshua 1:8) Baingi ahariitwe nituba twine bingi by’okukora buri izooba, kwonka titushemereire kwikiriza ekintu kyona, otwariiremu n’obujunaanizibwa bwaitu kuturemesa kushoma Baibuli. (Shoma Abaefeso 5:15, 16.) Nitubaasa kutunga obwire bw’okushoma Baibuli omu kasheeshe, nari omu ihangwe, nari nyekiro. Nitwikirizana n’omuhandiiki wa Zaaburi owaahandiikire ati: “Eshi nkunda ebiragiro byawe! Nibyo nsiiba ninteekateekaho eizooba ryona.”​—Zaaburi 119:97.

5, 6. (a) Ahabw’enki twine kuteekateeka aha bi turikushoma omu Baibuli? (b) Omuringo murungi gw’okuteekateeka aha bi turikushoma ni guuha? (c) Okushoma Baibuli n’okugiteekateekaho kikuhwereire kita?

⁵ Kwonka, okushoma Baibuli kyonka tikirikumara. Twine kuteekateeka munonga n’obwegyendesereza aha bi twaheza kushoma. (Zaaburi 1:1-3) Twakora tutyo nitwija kubaasa kugyendera aha bwengye bwa Baibuli. Yaaba tushoma Baibuli eziteirwe nari eziri aha byoma byaitu, nitwenda kwikiriza Ekigambo kya Ruhanga kutuhindura kandi kikatuhiga.

⁶ Okuteekateeka aha bi turikushoma nikubaasa kutuhwera kuta? Twaba nitushoma Baibuli, twine kwemereramu tukeebuuza  tuti: ‘Eki kinyegyeise ki ahari Yehova? Ebi ndikushoma ntwire nimbigyenderaho? Ni mpinduka ki ezi nkiine kukora?’ Twateekateeka aha Kigambo kya Ruhanga kandi tukashaba kwetegyereza ebi twashoma, nitwija kwenda kubigyenderaho. Obwo nitwija kureeba oku amaani ga Baibuli garikukora omu magara gaitu.​—2 Abakorinso 10:4, 5.

7. Nitubaasa kukoresa gye tuta Ekigambo kya Ruhanga omu kubuurira?

⁷ Ni kikuru ngu tukorese Ekigambo kya Ruhanga munonga twaba nitubuurira nari nitwegyesa. Ow’eishe-emwe omwe akagira ati: “Ka tugire ngu oriyo noobuurira enju aha nju ori hamwe na Yehova, niiwe orikuguma noogamba nari noohunama aba niwe yaagamba?” Twashomera omuntu omu Baibuli, nituba twikiriza Yehova kugamba nawe. Ekyahandiikirwe ekitoorainwe gye n’eky’amaani munonga kukira ekigambo kyona eki turikubaasa kugamba. (1 Abatesalonika 2:13) Waaba ori omu kubuurira, nooteeraho kushoma omu Baibuli emirundi mingi nk’oku kirikubaasika?

8. Ahabw’enki twine kukora ekirikukira aha kushoma bushoma ebyahandiikirwe omu kubuurira?

⁸ Kwonka, okushomera ekyahandiikirwe ou turikubuurira tikirikumara. Abantu baingi tibarikwetegyereza Baibuli. Nikwo kyabaire kiri omu kyasha ky’okubanza, kandi na hati nikwo kiri. (Abarooma 10:2) Titushemereire kutebeereza ngu ou twabuurira naayetegyereza ekyahandiikirwe eki twashoma. Nitubaasa kumuhwera turikugarukamu ebigambo ebikuru omu kyahandiikirwe reero tushoboorore amakuru gaabyo. Omu muringo ogu, Ekigambo kya Ruhanga nikibaasa kuhika omu biteekateeko by’abantu n’emitima yaabo.​—Shoma Luka 24:32.

9. Ebi turikugamba tutakashomire ekyahandiikirwe nibihwera bita abantu kuha Baibuli ekitiinisa? Ha eky’okureeberaho.

⁹ Ebi turikugamba turikuza kushoma ekyahandiikirwe nabyo nibibaasa kuhwera ou turikubuurira kuha Baibuli ekitiinisa. Nk’eky’okureeberaho, nitubaasa kugira ngu, “ka tureebe eki Omuhangi arikugamba aha nshonga egi.” Nari twaba nitugamba n’omuntu otari Mukristaayo, nitubaasa kugira ngu, “ka tureebe eki Ebihandiiko Ebirikwera birikutugambira.” Twashanga omuntu otarikufayo aha diini, nitubaasa kumubuuza tuti: “Orahuriireho enfumu ya ira egi?” Twaguma nitwijuka ngu buri muntu aine obukomooko bwe n’enyikiriza ye, nitwija kukora kyona eki turikubaasa kukoresa enyanjura ezirikushemeza.​—1 Abakorinso 9:22, 23.

10. (a) Niki ekyahikire aha w’eishe-emwe omwe? (b) Oreebire ota amaani g’Ekigambo kya Ruhanga omu buheereza bwawe?

¹⁰ Baingi bashangire ngu okukoresa Ekigambo kya Ruhanga nikihwera munonga abantu abu turikubuurira. Nk’eky’okureeberaho, ow’eishe-emwe omwe akataayaayira omugurusi owaabaire atwire naashoma magaziini zaitu kumara emyaka mingi. Eizooba rimwe, ow’eishe-emwe ogwo omu mwanya gw’okumuha Omunaara gw’Omurinzi gwonka oguherize kushohora, akacwamu kumushomera ekyahandiikirwe. Akashoma 2 Abakorinso 1:3, 4, aharikugira hati:  “Tataitwe ow’okusaasira, kandi Ruhanga ow’okuhuumuza kwona otuhuumuza omu busaasi bwaitu bwona.” Ebigambo ebi bikakwata munonga aha mugurusi ogu, reero yaashaba ow’eishe-emwe kushoma ebigambo ebyo omurundi ogundi. Omugurusi akagira ngu we n’omukazi we bakaba nibenda kuhuumurizibwa. Ahabw’ekyahandiikirwe eki, akeenda kumanya ebirikukiraho ebirikukwata aha Baibuli. Okukoresa Ekigambo kya Ruhanga omu kubuurira n’eky’omugasho munonga!​—Ebyakozirwe 19:20.

11. Ab’eishe-emwe abarikwegyesa omu kibiina baine bujunaanizibwa ki?

¹¹ Nitukunda kuza omu nteerane zaitu enkye n’empango. Enshonga enkuru erikutureetera kuza omu nteerane ezi, n’okuramya Yehova. Kandi nitugasirwa n’omu bi turikwegayo. Ahabw’enshonga egi, ab’eishe-emwe abarikwegyesa omu maisho g’abandi baine obujunaanizibwa bw’amaani kandi omurimo mukuru. (Yakobo 3:1) Baine kuhamya ngu ebi barikwegyesa nibyegamira aha Kigambo kya Ruhanga. Ku oraabe oine omugisha ogu, noobaasa kukoresa ota amaani g’Ekigambo kya Ruhanga kuhika aha mitima y’abakuhurikiize?

12. Omugambi naabaasa kuhamya ata ngu orubazo rwe nirwegamira aha Byahandiikirwe?

¹² Hamya ngu orubazo rwawe nirwegamira aha Byahandiikirwe. (Yohaana 7:16) Yegyendesereze kureeba ngu omuringo ogu  orikuhamu orubazo, n’eby’okureeberaho ebi orikukoresa tibyashweka ebyahandiikirwe ebi orikushoma. Kandi, ijuka ngu okushoma omu Baibuli tikyo kimwe n’okwegyesa kuruga omu Baibuli. Nangwa waashoma ebyahandiikirwe bingi, abantu tibarikwija kubiijuka. N’ahabw’ekyo, toorana n’obwegyendesereza ebyahandiikirwe ebi orikwenda kukoresa. Twara obwire oshome, oshoboorore, oyorekye enshonga enkuru, oyoreke n’oku birikubaasa kugyenderwaho. (Nehemia 8:8) Orubazo rwaba rwine ekihandiiko eki rurikwegamiraho, teeraho kwega gye ekihandiiko ekyo n’ebyahandiikirwe ebirimu. Teeraho kwetegyereza oku ekihandiiko ekyo kirikukwatana n’ebyahandiikirwe. Reero koresa bimwe aha byahandiikirwe ebi, kwegyesa abantu enshonga eziri omu kihandiiko ekyo. (Noobaasa kushanga obuhabuzi burungi omu kitabo Benefit From Theocratic Ministry School Education omu ishomo rya 21 kuhika aha rya 23.) Kandi ekikuru munonga, shaba Yehova kukuhwera kumanyisa abandi ebiteekateeko bye eby’omuhendo ebiri omu Baibuli.​—Shoma Ezera 7:10; Enfumu 3:13, 14.

13. (a) Munyaanyazi-itwe omwe akakwatwaho ata ekyahandiikirwe kimwe eki yaahuriire omu ruteerane? (b) Oku Baibuli erikukoresibwa omu nteerane kukuhwereire kuta?

¹³ Munyaanyazi-itwe omuri Australia obu yaabaire akiri omwana, akahikwaho ebintu bingi bibi, n’obu bwanyima yaizire akamanya Yehova, nabwo akaba atarikwikiriza  ngu Yehova naamukunda. Omu ruteerane rumwe, akahurira ekyahandiikirwe akyamukwatsireho munonga. Akakiteekateekaho kandi yaakora okucondooza, ekyo kikamureetera kushoma ebyahandiikirwe ebindi omu Baibuli. Obwo nibwo yaahamya ngu Yehova naamukunda. * (Reeba obugambo obw’ahansi.) Orahuriireho ekyahandiikirwe aha ruteerane rw’ekibiina nari oruhango ekyakukwatsireho omu muringo nk’ogwo?​—Nehemia 8:12.

14. Nitubaasa kworeka tuta ngu nitukunda Ekigambo kya Ruhanga kandi ngu nitukitwara nk’eky’omuhendo?

¹⁴ Mbwenu shi titurikushemererwa ahabw’okugira ngu Yehova atuhaire Ekigambo kye Baibuli? Akaraganisa ngu kikaba nikiija kugumaho kandi eki abaasize kukihikiiriza. (1 Petero 1:24, 25) N’ahabw’ekyo twine kushoma Baibuli buri izooba, tukagyendera aha bi turikushomamu, kandi tukabikoresa kuhwera abandi. Twakora tutyo, nitworeka ngu buzima nitukunda Baibuli ey’omuhendo, ngu nitugisiima, kandi okukira munonga ngu nitusiima Owaagihandiikiise Yehova Ruhanga.