1, 2. (a) Embeera zikaabaire nizishusha ki ku ogire ngu tihariho Baibuli? (b) Niki ekirikutuhwera kugasirwa omu Kigambo kya Ruhanga?

EMBEERA zikaabaire nizishusha ki ku ogire ngu tihariho Baibuli? Tukaabaire tutaine buhabuzi burungi bw’okutuhabura buri izooba. Tukaabaire tutarikumanya amazima agarikukwata ahari Ruhanga, amagara, n’ebiro by’omumaisho. Kandi tukaabaire tutarikumanya ebi Yehova yaakoreire abantu ebiro bya ira.

² Twine okushemererwa ahabw’okugira ngu tituri mu mbeera mbi nk’egyo. Yehova atuhaire Ekigambo kye Baibuli. Akaraganisa ngu obutumwa bwakyo nibwija kugumaho ebiro byona. Entumwa Petero akajuriza ebiri omu Isaaya 40:8. N’obu omushororongo ogwo guraabe gutarikugamba aha Baibuli butunu, nigukwata aha butumwa bwa Baibuli. (Shoma 1 Petero 1:24, 25.) Nitubaasa kugasirwa munonga omu Baibuli twagishoma omu rurimi rwaitu. Abo abarikukunda Ekigambo kya Ruhanga, eki batwire nibakimanya. Kumara ebyasha bingi, abantu batwire nibateeraho kuvunuura Baibuli n’okugijanjaaza oyihireho okuhakanisibwa n’obundi buremeezi. Yehova naayenda ngu abantu baingi  munonga “bajunwe, bamanyire kimwe amazima.”​—1 Timoseo 2:3, 4.

3. Nituza kushwijuma ki omu kicweka eki? (Reeba ekishushani aha kutandika.)

³ Omu kicweka eki, nituza kureeba oku Ekigambo kya Ruhanga kyagumireho (1) omu kuhinduka kw’endimi, (2) omu kuhinduka kw’eby’obutegyeki ebyahindwire orurimi rw’abantu ba butoosha, (3) n’omu kuhiiganisibwa kw’okuvunuura Baibuli. Okushwijuma enshonga ezi nikiija kutuhwera kita? Nikiija kutuhwera kwongyera kusiima Baibuli n’Owaagihandiikiise.​—Miika 4:2; Abarooma 15:4.

4. (a) Endimi nizihinduka zita haahinguraho obwire? (b) Nitumanya tuta ngu Ruhanga tarikukunda orurimi rumwe kukira ezindi, kandi eki nikikureetera kwehurira ota?

⁴ Haahinguraho obwire, endimi nizihinduka. Ebigambo nibibaasa kuhinduka bimanyise ekindi bitakiine makuru ag’okubanza. Obundi noobaasa kuteekateeka aha bigambo ebimwe omu rurimi oru orikugamba. N’endimi za ira nikwo zaabaire ziri. Oruheburaayo n’Orugriika ezi abantu barikugamba obunaku obu nizitaana n’Oruheburaayo n’Orugriika ezaabaire nizikoresibwa omu kuhandiikwa kwa Baibuli. Abantu baingi tibarikubaasa kwetegyereza Baibuli omu ndimi za ira ezi yaahandiikirwemu, nibenda ezivunwirwe. Abamwe nibateekateeka ngu baayega Oruheburaayo n’Orugriika eza ira, nibaija kwetegyereza gye Baibuli. Kwonka ekyo nikibaasa kutabahwera gye nk’oku barikuteekateeka. * (Reeba obugambo obw’ahansi.) Nitushemererwa kureeba ngu Baibuli nari bimwe aha bitabo byayo bivunwirwe omu ndimi ezirikuhika nka 3,000. Yehova naayenda ngu abantu abarikutuura “omu nsi, amahanga goona, n’enganda zoona, n’endimi” zoona bagasirwe omu Kigambo kye. (Shoma Okushuuruurwa 14:6) Buzima eki nikituhwera kwongyera kwirira haihi na Ruhanga, oine rukundo kandi otarikushoroora.​—Ebyakozirwe 10:34.

5. Niki ekyareeteire envunuura ya King James kuba ey’omugasho?

⁵ Ahabw’okugira ngu endimi nizihinduka, nikikwata n’aha kuvunuura Baibuli. Envunuura eyaabaire eyorobi obu yaashohozibwa, neebaasa kuba etakyetegyerezibwa gye bwanyima y’obwire. Envunuura nk’egi n’eya King James, eyaabandize kushohozibwa omuri 1611. Ekaba emwe aha nvunuura za Baibuli ez’Orungyereza ezaabaire nizikundwa munonga. Ebigambo ebyabaire nibikoresibwa omu nvunuura ya King James bikakoresibwa n’omu rurimi rw’Orungyereza. * (Reeba obugambo obw’ahansi.) Kwonka, envunuura egi ekaba neekoresa eiziina Yehova emirundi mikye. Omu Byahandiikirwe bingi eby’Oruheburaayo ahu eiziina rya Ruhanga ryabaire riri omu kubanza, ekaba neekoresa ekitiinisa “MUKAMA” omu nyuguta empango. Ezaashohoziibwe  bwanyima nazo zikakoresa ekitiinisa “MUKAMA” omu nyuguta empango omu mishororongo emwe omu Byahandiikirwe eby’Orugriika. Omu muringo ogu, envunuura ya King James ekooreka ngu eiziina rya Ruhanga rikaba riri omu bitabo ebi abantu barikweta eby’Endagaano Ensya.

6. Ahabw’enki nitusiima munonga Baibuli eya New World Translation?

⁶ Obu envunuura ya King James yaabanza kushohozibwa, ebigambo by’Orungyereza ebi yaabaire neekoresa bikaba nibireebeka nk’ebiri aha murembe. Kwonka obwire ku bwagumire nibuhinguraho, ebigambo ebimwe bikatandika kureebeka nk’ebihwaire aha murembe, kandi hati bigumire kwetegyereza. Nikyo kyahikire n’aha nvunuura za Baibuli ezindi eza ira omu ndimi ezindi. N’ahabw’ekyo twine okushemererwa ahabw’okugira Baibuli eya New World Translation of the Holy Scriptures, erikukoresa orurimi orw’ebiro ebi. Envunuura egi eriho yoona nari bimwe aha bitabo byayo omu ndimi ezirikurenga 150. Eki nikimanyisa ngu abantu baingi omu nsi hati nibabaasa kushoma Baibuli egi omu rurimi rwabo. Ebigambo ebya hati kandi ebirikwetegyerezibwa gye ebi erikukoresa, nibituhwera kuta obutumwa bwa Ruhanga omu mitima yaitu. (Zaaburi 119:97) Kwonka ekirikureetera New World Translation buzima kuba ey’omutaano n’ahabw’okugira ngu neegarura eiziina rya Ruhanga ahu ryabaire riri omu kubanza.

7, 8. (a) Ahabw’enki Abayudaaya omu kyasha kya kashatu Y.A. baabaire batarikubaasa kwetegyereza Ebyahandiikirwe eby’Oruheburaayo? (b) Septuagint ey’Orugriika niki?

⁷ Empindahinduka z’eby’obutegyeki omu nsi obumwe nizihindura endimi ezi abantu barikugamba. Kwonka Yehova atwire naahamya ngu Baibuli eriho omu ndimi ezi abantu barikubaasa kwetegyereza. Nk’eky’okureeberaho, ebitabo bya Baibuli 39 eby’okubanza bikahandiikwa Abaheburaayo nari Abaisraeli. Omu kubanza nibo baabaire “baakwatsiibwe ebyagambirwe Ruhanga.” (Abarooma 3:1, 2) Omu kubanza bakahandiika ebitabo ebi omu Ruheburaayo nari omu Ruramaika. Kwonka ekyasha kya kashatu Y.A. kirikuza kuhika, Abayudaaya baingi bakaba batakyetegyereza Oruheburaayo. Ahabw’enki? Ahakuba Alegizanda Omukuru ku yaahambire ebicweka bingi eby’ensi, Obutware bw’Abagriika bukajanjaara munonga. N’ekyarugiremu, Orugriika rukahinduka orurimi rwa butoosha omu bicweka ebyabaire nibitegyekwa Bugriika, kandi abantu baingi bakatandika kugamba Orugriika omu mwanya gw’orurimi orwabo. (Danieli 8:5-7, 20, 21) Aba bakaba barimu n’Abayudaaya baingi, n’ahabw’ekyo kikaba nikibagumira kwetegyereza Baibuli omu Ruheburaayo. Eki kikashoboororwa kita?

⁸ Emyaka nka 250 Yesu atakazairwe, ebitabo bitaano eby’okubanza bikavunuurwa omu Rugriika. Bwanyima, Ebyahandiikirwe ebindi eby’Oruheburaayo nabyo bikavunuurwa omu Rugriika. Envunuura egi ekaija kumanywa nka Septuagint ey’Orugriika. Niyo nvunuura y’okubanza ey’Ebyahandiikirwe eby’Oruheburaayo byona ehandiikirwe.

9. (a) Septuagint ey’Orugriika n’envunuura ezindi eza ira zikahwera zita abantu kushoma Ekigambo kya Ruhanga? (b) Ni kyahandiikirwe ki eki orikukunda munonga omu Byahandiikirwe eby’Oruheburaayo?

⁹ Septuagint ey’Orugriika ekabaasisa Abayudaaya abaabaire nibagamba Orugriika kushoma Ebyahandiikirwe eby’Oruheburaayo [Endagaano Eya Ira] omu Rugriika. Noobaasa kuteebereza okushemererwa oku baagizire  kuhurira nari kushoma Ekigambo kya Ruhanga omu rurimi rwabo? Bwanyima, ebitabo bimwe bya Baibuli bikavunuurwa omu ndimi ezaabaire nizikira kukoresibwa nk’Orusiria, Orugosiki, n’Orulaatini. Abantu baingi ku baagumire nibashoma Ekigambo kya Ruhanga kandi bakakyetegyereza, bakeeyongyera kukikunda. Nabo bakaba baine ebyahandiikirwe ebi barikukunda munonga nk’oku naitwe turikukora ebiro ebi. (Shoma Zaaburi 119:162-165.) Buzima, Ekigambo kya Ruhanga kibaasize kugumaho omu kuhinduka kw’eby’obutegyeki n’endimi ez’abantu ba butoosha.

10. Obu John Wycliffe yaabaire akiriho, ahabw’enki abantu baingi baabaire batarikubaasa kushoma Baibuli?

¹⁰ Kumara emyaka, abeebembezi baingi ab’amaani batwire nibazibira abantu kushoma Baibuli. Kwonka abantu abarikutiina Ruhanga tibabaasize kurekyera aho kujanjaaza Baibuli omu bantu boona. Omwe aharibo ni John Wycliffe, owaabaire naatuura omuri England omu kyasha kya 14. Akaba naikiriza ngu buri omwe ashemereire kushoma Baibuli. Obu yaabaire akiriho, abantu baingi omuri England bakaba batakahurirahoga obutumwa bwa Baibuli omu rurimi rwabo. Baibuli zikaba ziri ez’esente nyingi, kandi buri kopi bakaba bagihandiikisa engaro. N’ahabw’ekyo, abantu bakye nibo baabaire baine Baibuli. Kandi, n’abantu baingi bakaba batarikubaasa kushoma. Abo abaabaire nibaza omu makanisa bakaba bahurira Baibuli erikushomwa omu Rulaatini, kwonka orurimi orwo rukaba rukuzire, abantu aba butoosha bakaba batarikurwetegyereza. Yehova akahamya ata ngu abantu baatunga Baibuli omu ndimi zaabo?​—Enfumu 2:1-5.

11. Baibuli ya Wycliffe ekaba eta ey’omugasho?

¹¹ Omuri 1382, John Wycliffe n’abandi bakavunuura Baibuli omu Rungyereza. Baibuli ya Wycliffe ekamanywa munonga omu bwire bw’ababuurizi abaabaire bari abakuratsi be. Abantu abo bakaba nibakunda Baibuli. Bakaba nibagyenda aha bigyere kuruga omu kyaro kuza omu kindi omuri England yoona. Bakaba nibashomera abantu Baibuli kandi babaha na bimwe aha bitabo byayo ebihandiikirwe n’engaro. Omurimo gwabo gukareetera Baibuli kugaruka kumanywa munonga.

12. Abeebembezi b’ediini bakaba nibareeba bata Wycliffe n’omurimo gwe?

 ¹² Abeebembezi b’ediini bakaba nibanga Wycliffe, Baibuli ye, n’abakuratsi be. Bakabahiiganisa kandi baacwekyereza Baibuli za Wycliffe zoona ezi baabaire babona. N’obu Wycliffe yaabaire yaafiire, abeebembezi b’ediini bakamweta omugomi, nari omuzigu w’Ekanisa. Bakatiimba amagufa ge, baagotsya, eiju barinaga omu mugyera Swift. Kwonka abantu baingi bakaba nibenda kushoma Baibuli kandi bakeetegyereza Ekigambo kya Ruhanga, kandi ekanisa eki ekaba etarikubaasa kukiremesa. Bwanyima y’emyaka mingi eyaakuratsireho, abantu omuri Europe n’ebicweka ebindi eby’ensi bakatandika kuvunuura Baibuli n’okuziteera omu ndimi ezi abantu baingi baabaire nibetegyereza.

13. Nitubaasa kugira buhame ki, kandi eki nikihamya kita okwikiriza kwaitu?

¹³ Baibuli ekahandiikisibwa Ruhanga. Kwonka eki tikirikumanyisa ngu omurimo gw’okuvunuura Septuagint, Baibuli eya Wycliffe, eya King James, nari Baibuli ezindi zoona nigwebemberwa Ruhanga butunu. Kureka, ku turikushwijuma oku envunuura ezi zaakozirwe, nikyeyoreka gye ngu nk’oku Yehova yaaraganiise, Ekigambo kye kibaasize kugumaho. Eki nikihamya okwikiriza kwaitu ngu buri kimwe eki Yehova araganiise nikiija kuhikiirira.​—Yoshua 23:14.

14. Ebi turikwega omu Baibuli nibituhwera bita kwongyera kukunda Ruhanga?

¹⁴ Ku turikwega oku Yehova arinzire Ekigambo kye, nitweyongyera kumwikiririzamu n’okumukunda. * (Reeba obugambo obw’ahansi.) Ahabw’enki Yehova yaatuhaire Baibuli kandi akaraganisa kugirinda? N’ahabw’okuba naatukunda kandi naayenda kutwegyesa eby’okutugasira. (Shoma Isaaya 48:17, 18.) Eki nikituhiga kumukunda kandi tukamworobera.​—1 Yohaana 4:19; 5:3.

15. Nituza kugaaniira ahari ki omu kicweka ekirikukurataho?

¹⁵ Nitukunda munonga Ekigambo kya Ruhanga, mbwenu shi nitubaasa kugasirwa tuta omu kweshomesa Baibuli? Nitubaasa kuhwera tuta abu turikushanga omu kubuurira kwetegyereza Baibuli? Ab’eishe-emwe abarikwegyesa omu kibiina nibabaasa kuhamya bata ngu buri kimwe eki barikwegyesa nikyegamira aha Kigambo kya Ruhanga? Nituza kugarukamu ebibuuzo ebi omu kicweka ekirikukurataho.