1. Yehova akeeyoreka ata Musa omu muringo gw’omutaano, kandi ahabw’enki eki ni kikuru?

EIZOOBA rimwe, Ruhanga arikuranga eiziina rye n’emwe aha mitwarize ye, akeeyoreka Musa. Yehova akaba naabaasa kugamba munonga aha maani ge nari obwengye bwe, kwonka omu mwanya gw’ekyo akabanza kugamba aha mbabazi n’esaasi ze. (Shoma Okuruga 34:5-7.) Musa akaba naayenda kumanya yaaba Yehova naija kumushagika. N’ahabw’ekyo Yehova akahamiiriza emitwarize eyaabaire neeyoreka ngu naayenda kuhwera abaheereza be. (Okuruga 33:13) Nikikureetera kwehurira ota kumanya ngu Yehova naatufaho munonga? Ekicweka eki nikiza kugamba munonga aha saasi, ekirikumanyisa okusaasibwa abarikuba nibabonabona n’okugira ekyetengo ky’okwenda kubahwera.

2, 3. (a) Niki ekirikworeka ngu n’ekya butoosha abantu kugira esaasi? (b) Ahabw’enki oshemereire kwenda kumanya eki Baibuli erikugamba aha kugirira abandi esaasi?

² Yehova aine esaasi kandi abantu bakahangwa omu kishushani kye. N’ahabw’ekyo n’ekya butoosha aha bantu kufayo aha bandi. Nangwa n’abo abatarikumanya Yehova nibakira kugirira abandi esaasi. (Okutandika 1:27) Baibuli neegamba aha bantu  abaayorekire ngu baine omutwarize gw’esaasi. Nk’eky’okureeberaho, obu Sulemaani yaabaire naayenda kumanya nyina w’omwana, akagyeza abakazi babiri abaabaire nibamurwanira arikuragiira ngu omwana bamutememu ebicweka bibiri. Nyina omwana akasaasibwa munonga omwana we, n’ahabw’ekyo akeeshengyereza omugabe ngu omukazi owa kabiri abe niwe yaatwara omwana. (1 Abagabe 3:23-27) Eky’okureeberaho ekindi eky’esaasi n’ekya muhara wa Faraho. Ku yaatorotoire Musa akiri omwereere, akamanya ngu akaba ari Omuheburaayo owaabaire ashemereire kwitwa. Kwonka “akamugirira esaasi,” yaacwamu kumworora nka mutabani we.​—Okuruga 2:5, 6.

³ Ahabw’enki twine kwongyera kwega aha saasi? N’ahabw’okuba Yehova naayenda ngu tumutooroze. (Abaefeso 5:1) N’obu turaabe twahangirwe turikubaasa kugirira abandi esaasi, turi abatahikiriire kandi nitukira kweyendeza. Obumwe nikiba kitoorobi kucwamu yaaba twine kuhwera abandi nari twine kwefaho twenka. Niki ekirikubaasa kutuhwera kwongyera kufayo aha bandi? Okubanza, ka tureebe oku Yehova n’abandi boorekire esaasi. Reero bwanyima, nituza kureeba oku turikubaasa kugira esaasi nk’eza Ruhanga n’enshonga ahabw’enki kiri kirungi kukikora.

4. (a) Ahabw’enki Yehova yaayohereize baamaraika omuri Sodoma? (b) Nitubaasa kwegyera ki aha byahikire aha ka ya Looti?

⁴ Omu Baibuli Yehova naagambwaho emirundi mingi arikugirira abandi esaasi. Nk’eky’okureeberaho, teekateeka eki yaakoreire Looti. Akaba ari omushaija orikukora ebihikire “owaabaire ashobeirwe” ahabw’emicwe mibi y’abashambani abaabaire bari omu Sodoma na Gomora. Abantu b’omu ndembo ezo bakaba batarikuha Yehova ekitiinisa, kandi Yehova akacwamu ngu bacwekyerezibwe. (2 Petero 2:7, 8) Yehova akoohereza baamaraika kugambira Looti ngu endembo ibiri Sodoma na Gomora niziza kucwekyerezibwa, kandi ngu Looti aine kuhunga. Baibuli neegira eti: “Kwonka [Looti] yaaguma naayeziringa; abashaija abo nikwo kumukwata omukono, n’omukono gw’omukazi we, n’emikono ya bahara be bombi, bakamushohoza aheeru y’orurembo, nk’oku [Yehova] yaamusaasiire.” (Okutandika 19:16) Nk’oku Yehova yaayetegyereize embeera za Looti, nitubaasa kuhamya ngu naayetegyereza oburemeezi obu turikurabamu.​—Isaaya 63:7-9; Yakobo 5:11; 2 Petero 2:9.

5. Ekigambo kya Ruhanga nikitwegyesa kita kugirira abandi esaasi?

⁵ Yehova ayegyeise abantu be kugirira abandi esaasi. Teekateeka ahari bimwe aha biragiro ebi yaahaire Abaisraeli. Omuntu ku yaabaire aba naabanja ondiijo, yaayenda akaba atwara ekijwaro ky’ogwo ou arikubanja nk’omusingo kuhamya ngu ou arikubanja naija kumushashura. (Okuruga 22:26, 27.) Kwonka akaba aine kugarurayo ekijwaro ky’ou arikubanja eizooba ritakarengire kugira ngu akyeshweke nyekiro atagate. Omuntu  owaabaire aba ataine saasi obumwe akaba ayanga kugarura ekijwaro ekyo, kwonka Yehova akeegyesa abantu be kugirira abandi esaasi. Omusingye oguri omu kiragiro eki nigutwegyesa ki? Titushemereire kwehuzya ebyetengo by’Omukristaayo mugyenzi waitu. Twaba nitubaasa kuhwera ow’eishe-emwe nari munyaanyazi-itwe orikubonabona, twine kuteeraho kukikora.​—Abakolosai 3:12; Yakobo 2:15, 16; shoma 1 Yohaana 3:17.

6. Nitwegyera ki aha saasi ezi Yehova yaabaire ainiire Abaisraeli abasiisi?

⁶ Yehova akagirira Abaisraeli esaasi n’obu baraabe baabaire nibamugomera barikukora ebibi. Nitushoma ngu Yehova “Ruhanga wa baishenkurubo akaba atuura naabatumaho entumwa ze, ahabw’okugirira abantu be, n’obutaaho bwe esaasi.” (2 Obusingye 36:15) Omu muringo nigwo gumwe, twine n’okugirira esaasi abo abatakamanyire Yehova kwonka abarikubaasa kweteisa bakaba banywani be. Yehova tarikwenda muntu weena kucwekyerezibwa omu bwire bw’okucwerwa orubanja oburi haihi kuhika. (2 Petero 3:9) N’ahabw’ekyo obu hakiriyo obwire, nitwenda kugambira buri omwe obutumwa bwa Ruhanga obw’okurabura, kandi tuhwere baingi nk’oku kirikubaasika kugasirwa omu saasi ze.

7, 8. Ahabw’enki eka emwe yaakireebire gye ngu Yehova akabagirira esaasi?

⁷ Obunaku obu, abaheereza ba Yehova baingi bagasiirwe omu saasi za Yehova. Nk’eky’okureeberaho, omu myaka ya 1990 omuri Bosnia, enganda nyingi zikaba nizirwana kandi zirikwitana. Eka emwe eyaabaire neetuurayo ekaba erimu omwojo w’emyaka 12 ou turaayete Milan. Omwojo ogwo Milan, mwene ishe, abazaire be, n’Abajurizi ba Yehova abandi bakaba bari omu baasi barikuruga Bosnia barikuza Serbia. Bakaba nibaza omu ruteerane oruhango, kandi abazaire ba Milan bakaba nibenda kubatizibwa aha ruteerane orwo. Aha nsharo, abaserukare abamwe bakareeba ngu eka egyo ekaba neeruga omu ruganda orundi, batyo baabaiha omu baasi. Reero bakareka ab’eishe-emwe abandi abaabaire bari omu baasi kugumizamu omu rugyendo rwabo. Abaserukare bakanga kurekura eka egyo kumara ebiro bibiri. Aha muheru, omuserukare omukuru omu mwanya ogwo akabuuza mukama we eki yaabaire aine kukorera eka egyo. Eka egyo ekaba eriho aho erikuhurira ebi mukama w’omuserukare ogwo yaagarukiremu. Akagira ati: “Batware aheeru obateere amasasi!”

⁸ Abaserukare ku baabaire nibagaaniira, abantu babiri abu baabaire batarikumanya bakaija baahika aha ka egyo. Bakabagambira omu kihama ngu nabo n’Abajurizi ba Yehova, kandi ngu ab’eishe-emwe abu baabaire bari nabo omu baasi nibo baabagambiire ekibaireho. Ab’eishe-emwe abo babiri bakagambira Milan na mwene ishe kuza omu motoka yaabo kwambuka kuza obuseeri bw’ensharo ahabw’okuba abaserukare bakaba batarikushwijuma ebipapura by’abaana. Bwanyima ab’eishe-emwe abo bakagambira abazaire kwetoorora enyima y’akaju aku baabaire nibashwijumiramu ebipapura reero bababugane obuseeri. Milan akatiina munonga akaba atarikumanya yaaba aine kusheka nari kurira. Abazaire be bakabuuza bati: “Nimuteekateeka ngu nibaza kutureka tugyende bugyenda?” Kwonka ku baatandikire kugyenda, okaba nooshusha ngu abaserukare tibarikubareeba. Milan na mwene ishe bakabugana n’abazaire baabo obuseeri bw’ensharo, baagyenda baaza  aha ruteerane oruhango. Bakaba batarikubangaanisa ngu Yehova yaagarukamu okushaba kwabo! Kuruga omu Baibuli nitumanya ngu obumwe Yehova tarikurinda abantu be butunu omu muringo nk’ogu. (Ebyakozirwe 7:58-60) Milan akagamba oku yaayehuriire, akagira ati: “Nooshusha oti baamaraika bakahumya amaisho g’abaserukare kandi Yehova akatucungura.”​—Zaaburi 97:10.

9. Yesu akeehurira ata ku yaareebire abantu baingi abaabaire bamukuratiire? (Reeba ekishushani aha kutandika.)

⁹ Yesu nawe n’eky’okureeberaho kirungi eky’okugirira abandi esaasi. Akasaasibwa abantu ahakuba akareeba “baburaburiirwe, bashobeirwe nk’entaama ezitaine muriisa.” Mbwenu shi akakora ki? Akatandika “kubeegyesa bingi.” (Matayo 9:36; shoma Mako 6:34.) Okutaana n’ekyo, Abafarisaayo bakaba bataine saasi, kandi bakaba batarikwenda kuhwera abantu. (Matayo 12:9-14; 23:4; Yohaana 7:49) Nka Yesu, oine ekyetengo ky’amaani eky’okwenda kuhwera abantu n’okubeegyesa ebirikukwata ahari Yehova?

10, 11. Mbwenu shi butoosha nikiba kihikire kugirira abandi esaasi? Shoboorora.

¹⁰ Eki tikirikumanyisa ngu tushemereire kufa gagirira abandi esaasi. Nk’eky’okureeberaho, Omugabe Saulo naabaasa kuba yaateekateekire ngu akaba naayoreka esaasi obu yayanga kwita Agagi, owaabaire ari omugabe w’Abamaleki abazigu b’abantu ba Ruhanga. Saulo akanga kwita amatungo g’Abamaleki. Kwonka Yehova akaba agambiire Saulo ngu aite Abamaleki n’amatungo gaabo. Ahabw’obugomi bwa Saulo, Yehova akamwanga. (1 Samueli 15:3, 9, 15) Yehova n’omucwi w’emanja ohikiriire. Naabaasa kushoma emitima y’abantu, kandi naamanya obu tutashemereire kugirira abandi esaasi. (Okutonzya 2:17; Ezekieli 5:11) Obwire butari bwa hare naija kucwera orubanja boona abarikwanga kumworobera. (2 Abatesalonika 1:6-10) Obwo nibwija kuba butari bwire bwa Yehova obw’okugirira ababi esaasi. Kwonka ku araacwekyereze ababi, naija kuba yaagirira esaasi abahikiriire arikubajuna.

¹¹ Kandi buzima, ti murimo gwaitu kucwamu yaaba abantu nibaija kucungurwa nari kucwekyerezibwa. Omu mwanya gw’ekyo, twine kukora kyona ekirikubaasika kuhwera abantu hati. Ni miringo ki ei turikubaasa kugiriramu abandi esaasi? Aha hariho emiringo emwe.

12. Noobaasa kworeka ota esaasi omu kukoragana n’abandi?

¹² Hwera omu mbeera eza buri izooba. Yehova naayenda ngu Abakristaayo bagirire esaasi bataahi baabo n’ab’eishe-emwe. (Yohaana 13:34, 35; 1 Petero 3:8) Gamwe aha makuru g’ekigambo esaasi “n’okubonabona hamwe.” Omuntu oine esaasi naateeraho kuruhuura abandi, obundi arikuhwera abarikubonabona. N’ahabw’ekyo tushemereire kusherura emiringo y’okuhweramu abandi, obundi turikwehayo kugira emirimo ei twabakorera nari kwikiriza bakatutuma.​—Matayo 7:12.

13. Abajurizi ba Yehova nibakora ki bwanyima y’okubaho ebihikiirizi?

 ¹³ Hwera abahikirweho ebihikiirizi. Twareeba abandi nibabonabona ahabw’ebihikiirizi, nituba nitwenda kubagirira esaasi. Abajurizi ba Yehova nibamanywa ahabw’okuhwera abandi omu bwire nk’obwo. (1 Petero 2:17) Nk’eky’okureeberaho, munyaanyazi-itwe kuruga Japan akaba naatuura omu kicweka ekyasiisirwe omutsitsa na tsunami omu 2011. Akagira ngu “akagarurwamu amaani kandi yaahumurizibwa” ku yaareebire abaarugire omu bicweka bitari bimwe na bimwe ebya Japan n’omu mahanga agandi abaizire kuhunduuza amaka g’abantu n’Ebyombeko by’Obukama. Akongyeraho ati: “Eki kikampwera kureeba ngu Yehova naafayo. Kandi n’ab’eishe-emwe nibakundana buzima. Ab’eishe-emwe na banyaanyazi-itwe omu nsi yoona nibatushabira.”

14. Noobaasa kuhwera ota abarwaire n’ab’emyaka ya bukuru?

¹⁴ Hwera abarwaire n’ab’emyaka ya bukuru. Twareeba abantu nibabonabona ahabw’okurwara na bukuru, nitubasaasibwa. Twine ekihika ky’okureeba oburemeezi obu nibuhwaho, n’ahabw’ekyo nitushaba ngu Obukama bwa Ruhanga bwije. Kwonka ekyo kitakabaireho, nitukora kyona eki turikubaasa kuhwera abarwaire n’ab’emyaka ya bukuru. Omuhandiiki omwe akahandiika ngu eizooba rimwe nyina okaikwire owaabaire arwaire endwara y’obwongo, akashiisha omu myenda ye. Ku yaabaire naateeraho kweboneza, ekide ky’aha rwigi rwe kyagamba.  Abajurizi ba Yehova babiri abaabaire nibakira kumutaayaayira nibo baabaire bariho. Banyaanyazi-itwe abo bakashaba kumuhwera. Omukazi ogwo akagira ati: “Nikihemurana kwonka eego mumpwere.” Banyaanyazi-itwe bakamuhwera kweboneza. Bwanyima bakamuteekyera ekikopo kya chai baagumaho nawe. Omutabani akasiima munonga kandi yaagira ngu Abajurizi ba Yehova “nibakora ebi barikwegyesa.” Mbwenu shi esaasi ezi oyiniire abarwaire n’ab’emyaka ya bukuru nizikuhiga kukora kyona eki orikubaasa kubahwera?​—Abafilipi 2:3, 4.

15. Omurimo gwaitu gw’okubuurira niguhwera guta abandi?

¹⁵ Hwera abantu kumanya Yehova. Omuringo murungi gw’okuhwera abantu n’okubeegyesa ebirikukwata ahari Ruhanga n’Obukama bwe. Omuringo ogundi n’okubahwera kureeba ahabw’enki okworobera emitindo ya Yehova kiri eky’oburungi bwabo. (Isaaya 48:17, 18) Okubuurira n’omuringo murungi gw’okuha Yehova ekitiinisa n’okugirira abandi esaasi. Noobaasa kwongyera aha buheereza bwawe?​—1 Timoseo 2:3, 4.

16. Nitugasirwa tuta twagirira abandi esaasi?

¹⁶ Abahangu abarikukora aha ndwara z’emitwe nibagira ngu okugirira abandi esaasi nikubaasa kukureetera kugira amagara marungi n’okugira emikago mirungi n’abandi. Waahwera abo abarikubonabona, noija kushemererwa, ogire amatsiko, otuubye aha ihamba, kandi otuubye n’aha kugira emiteekateekyere mibi. Okugirira abandi esaasi ni kirungi ahariiwe. (Abaefeso 4:31, 32) Rukundo yaatuhiga kuhwera abandi, nitugira omuntu w’omunda omurungi ahakuba nitumanya ngu nitukora eki Yehova arikutwenza. Esaasi niziija kutuhwera kuba abazaire barungi, kugira obushwere burungi, n’abanywani barungi. Okwongyera ahari ekyo, abantu abarikugirira abandi esaasi nabo nibatunga obuhwezi baaba nibabwenda.​—Shoma Matayo 5:7; Luka 6:38.

17. Ahabw’enki oine kugirira abandi esaasi?

¹⁷ N’obu okworeka esaasi kiraabe kiri kirungi ahariitwe, enshonga ahabw’enki nitugirira abandi esaasi n’ahabw’okwenda kutooreza Yehova kandi tukamuhaisa ekitiinisa. Niwe bukomooko bwa rukundo n’esaasi. (Enfumu 14:31) Naatuteeraho eky’okureeberaho kirungi. Mbwenu ka tuteereho kukora kyona ekirikubaasika kutooreza Ruhanga turikugirira abandi esaasi. Reero nitwija kwirira haihi n’ab’eishe-emwe na banyaanyazi-itwe, kandi tugire omukago murungi n’abantu bataahi baitu.​—Abagalatia 6:10; 1 Yohaana 4:16.