1, 2. (a) Sulemaani akaheebwa bujunaanizibwa ki obukuru? (b) Niki ekyareeteire Daudi kwerarikirira aha bikwatiraine na Sulemaani?

SULEMAANI akaheebwa obujunaanizibwa bw’omutaano. Yehova akamutoorana kwebembera omurimo gw’okwombeka hekalu omuri Yerusaalemu, ogwabaire nigukirayo obukuru obwire obwo! Hekalu eyaabaire neeza kwombekwa ekaba “eshemereire kuba ey’ekitiinisa,” kandi nungi munonga. Okukira byona, ekaba eri “enju ya” Yehova Ruhanga.​—1 Obusingye 22:1, 5, 9-11.

² Omugabe Daudi akaba naayesiga ngu Ruhanga naija kuhwera Sulemaani. Kwonka Sulemaani akaba ‘akiri muto kandi atakahamire.’ Mbwenu shi akaba naija kugira obumanzi aikirize obujunaanizibwa bw’okwombeka hekalu? Nari shi obuto bwe n’okutamanya bingi bikaba nibiija kumuremesa? Sulemaani okubaasa kusingura, akaba aine kugira obumanzi bw’okukora omurimo ogwo.

3. Sulemaani akeega ki aha bikwatiraine n’obumanzi kuruga ahari ishe?

 ³ Sulemaani aine kuba yaayegire kugira obumanzi kuruga ahari Daudi, ishe. N’obu Daudi yaabaire akiri muto, akarwanisa enyamaishwa ezaabaire nizenda kurya entaama z’eishe. (1 Samueli 17:34, 35) Akooreka n’obumanzi obu yaarwanisa omushaija otendekirwe gye kandi ekikaaka, Goliasi. Arikuhwerwa Ruhanga, Daudi akaita Goliasi n’eibaare ry’enjungu.​—1 Samueli 17:45, 49, 50.

4. Ahabw’enki Sulemaani yaabaire aine kugira obumanzi?

⁴ Nitubaasa kwetegyereza ahabw’enki Daudi yaabaire ahikire kuhiga Sulemaani kugira obumanzi akombeka hekalu. (Shoma 1 Obusingye 28:20.) Kuri Sulemaani ataragizire bumanzi, obwoba bukaba nibuza kumuremesa kutandika omurimo. Kandi ekyo kikaabaire kibi kukira okuremwa kuhikiiriza omurimo.

5. Ahabw’enki twine kugira obumanzi?

⁵ Nka Sulemaani, nitwetenga obuhwezi bwa Yehova kubaasa kugira obumanzi tukakora omurimo ogu arikutuha. N’ahabw’ekyo ka tushwijume eby’okureeberaho bimwe, eby’abo abaayorekire obumanzi ira. Reero tuteekateekye aha ku turikubaasa kworeka obumanzi tukahikiiriza omurimo gwaitu.

6. Niki ekirikukushemeza aha bumanzi bwa Yosefu?

⁶ Yosefu akooreka obumanzi obu muka Potifaari yaamutega ngu ashambane nawe. Kandi aine kuba yaamanyire ngu yaayanga naabaasa kuta amagara ge omu kabi. Kwonka omu mwanya gw’okwikiriza kugwa omu bushambani, akooreka obumanzi yaayanga kubyama nawe.​—Okutandika 39:10, 12.

7. Rahabu akooreka ata obumanzi? (Reeba ekishushani aha kutandika.)

⁷ Ondiijo owaayorekire obumanzi ni Rahabu. Obu Abaisraeli entatsi baaza owe omuri Yeriko, akaba naabaasa kutiina ayangye kubahwera. Kwonka ahabw’okwesiga Yehova, akagira obumanzi yaabashereka, kandi yaabahwera kuhunga. (Yoshua 2:4, 5, 9, 12-16) Rahabu akaba naikiriza ngu Yehova ni Ruhanga owaabuzima, owaabaire naabaasa kuha Abaisraeli ensi egyo. Taratiinire abantu otwariremu n’omugabe wa Yeriko n’abashaija be, kumuremesa kugira eki yaakora. Kwonka akagira obumanzi yaayecungura n’ab’omu ka ye.​—Yoshua 6:22, 23.

8. Obumanzi obu Yesu yaayorekire bukahwera buta entumwa ze?

⁸ Entumwa za Yesu nazo zikooreka obumanzi bw’amaani. Bakaba baareebire obumanzi obu Yesu yaayorekire, kandi eki kikabahwera kumutooreza. (Matayo 8:28-32; Yohaana 2:13-17; 18:3-5) Abasadukaayo ku baateireho kuzibira entumwa kwegyesa ahari Yesu, bakanga kukikora.​—Ebyakozirwe 5:17, 18, 27-29.

9. Ebiri omu 2 Timoseo 1:7 nibituhwera bita kwetegyereza obukomooko bw’obumanzi?

⁹ Yosefu, Rahabu, Yesu, n’entumwa bakaba bamaririire kukora ekihikire. Tibaragizire bumanzi ahabw’okwesiga okubaasa kwabo, kureka bakeesiga Yehova kubahwera. Naitwe  obumwe twaba nitwenda kuba emanzi, twine kwesiga Yehova omu mwanya gw’okweyesiga. (Shoma 2 Timoseo 1:7.) Ka tureebe oku turikubaasa kworeka obumanzi omu myanya ebiri: Omu maka gaitu n’omu kibiina.

10. Ahabw’enki Abakristaayo abato baine kugira obumanzi?

¹⁰ Hariho embeera nyingi ezirikwetengyesa Abakristaayo abato kugira obumanzi kubaasa kuheereza Yehova. Nibabaasa kwegyera ahari Sulemaani owaagizire obumanzi obu yaacwamu ekihikire kwombeka hekalu akagiheza. N’obu eminyeeto bashemereire kugyendera aha buhabuzi bw’abazaire baabo, baine eby’okucwamu ebyabo ebikuru. (Enfumu 27:11) Baine kugira obumanzi baaba nibatoorana abanywani, eby’okweshemeza ebi barayejumbemu, oku baraagume bari abeecumi omu micwe, n’obu barabatizibwe. Baine kugira obumanzi ahabw’okuba nibaba nibangira ebi Sitaane arikukunda, ogwo orikujuma Yehova.

11, 12. (a) Musa akooreka ata obumanzi? (b) Eminyeeto neebaasa kutooreza eta Musa?

¹¹ Kimwe aha bintu ebi eminyeeto eine kucwamu n’ebigyendererwa ebi baarayeteereho. Omu mahanga agamwe, eminyeeto neegyemeserezibwa kuta omutima aha bwegyese bw’ahaiguru n’okutunga omurimo gw’esente nyingi. Kandi omu mahanga agandi eby’entaasya bigumire, kandi eminyeeto nibabaasa kuteekateeka ngu baine kuta omutima aha kukora munonga kuhwera ab’omu maka gaabo. Waaba ori omu mbeera nk’ezi, teekateeka aha ky’okureeberaho kya Musa. Muhara wa Faraho niwe yaamworoire, kandi akaba naabaasa kutaho ekigyendererwa ky’okwija kuba omugaiga nari omuntu ow’amaani. Teekateeka aha kugyemeserezibwa oku arikubaasa kuba yaatungire kuruga omu ka ye eya Misri, abeegyesa be, n’abahabuzi be! Kwonka Musa akagira obumanzi kandi yaacwamu kuguma n’abantu ba Ruhanga. Bwanyima y’okuruga Misri akatsigayo n’obugaiga bwayo, akeesigira kimwe Yehova. (Abaheburaayo 11:24-26) Ekyarugiremu, Yehova akamuha emigisha mingi, kandi naija kumuha endiijo omu biro by’omumaisho.

¹² Eminyeeto baagira obumanzi bakataho ebigyendererwa by’omwoyo kandi bakeebembeza Obukama, Yehova naija kubaha emigisha. Naija kubahwera omu kureeberera amaka gaabo. Omu kyasha ky’okubanza, omunyeeto Timoseo akata omutima aha kuheereza Ruhanga, kandi naiwe noobaasa kukikora. * (Reeba obugambo obw’ahansi.)​—Shoma Abafilipi 2:19-22.

13. Obumanzi bukahwera buta munyaanyazi-itwe omuto kuhikiiriza ebigyendererwa bye?

¹³ Munyaanyazi-itwe omwe omuri Alabama, U.S.A., akaba aine kugira obumanzi kubaasa kutaho ebigyendererwa by’omwoyo. Akahandiika ati: “Kuruga omu buto, buzima nkaba nyine enshoni. Nkaba nintiina kuramutsya abantu aha Kyombeko ky’Obukama, kandi kikaba nikingumira kwiguza aha rwigi rw’omuntu ou ntarikumanya.” Arikuhwerwa abazaire be n’abandi omu kibiina, akabaasa kuhika aha kigyendererwa kye eky’okuba Payoniya ow’obutwire. Naagira ati: “Ensi ya Sitaane neehiga abantu kutaho ebigyendererwa nk’obwegyese bw’ahaiguru, okurangaanwa, esente, n’okugira ebintu bingi.”  Kwonka akeetegyereza ngu abantu baingi tibarikubaasa kutunga ebintu ebi, kandi eki nikibareetera kugira amaganya n’obusaasi. Naayongyera agira ati: “Okuheereza Yehova, kumpwereire kugira okushemererwa okwabuzima n’okumarwa.”

14. Ni ryari obu abazaire Abakristaayo baine kugira obumanzi?

¹⁴ Abazaire Abakristaayo nabo baine kugira obumanzi. Nk’eky’okureeberaho, mukama waawe aha murimo naabaasa kwenda ngu aha izooba ry’okuramya kwawe okw’eka, ery’okubuurira, nari ery’enteerane z’ekibiina, okore eshaaha nyingi kukira ezi orikukora butoosha. Oine kugira obumanzi kubaasa kugambira mukama waawe ngu ngaaha, kandi okateeraho abaana baawe eky’okureeberaho kirungi. Nari obundi abazaire abamwe omu kibiina nibaikiriza abaana baabo kukora ebintu ebi iwe otarikwenda abaana baawe bakore. Abazaire b’abaana abo baakubuuza ahabw’enki nootwaza otyo, noija kugira obumanzi obashoboororere omu muringo gw’ekitiinisa?

15. Ebiri omu Zaaburi 37:25 n’Abaheburaayo 13:5 nibibaasa kuhwera bita abazaire?

¹⁵ Nikyetengyesa obumanzi kubaasa kuhwera abaana baitu kutaho ebigyendererwa by’omwoyo kandi bakabihikiiriza. Nk’eky’okureeberaho, abazaire abamwe nibatiina kuhiga abaana baabo kuba baapayoniya, okuheereza ahu ababuurizi barikwetengwa, kuheereza aha Beseeli, nari kuhwera omu kwombeka Ebyombeko by’Obukama n’eby’enteerane empango. Obundi nibatiina ngu abaana baabo tibarabaase kubareeberera  omu myaka y’abukuru. Kwonka, abazaire abanyabwengye nibooreka obumanzi n’okwikiriza kuhami, ngu Yehova naija kuhikiiriza ebi arikuraganisa. (Shoma Zaaburi 37:25; Abaheburaayo 13:5.) Abazaire abaine obumanzi nk’obu kandi abarikwesiga Yehova, nibahwera abaana baabo kukora nikyo kimwe.​—1 Samueli 1:27, 28; 2 Timoseo 3:14, 15.

16. Abazaire bahwereire bata abaana baabo kutaho ebigyendererwa by’omwoyo, kandi eki kigasiire kita abaana?

¹⁶ Omushaija n’omukazi we omuri United States bakahwera abaana baabo kuta omutima aha kuheereza Yehova. Iba naagira ati: “Abaana baitu batakeegire kugyenda n’okugamba, tukaba tubagambira okushemererwa okuri omu kuba payoniya n’okuheereza ekibiina. Hati eki nikyo bamaririire kukora.” Naayongyeraho ngu ahabw’okugira ngu abaana baabo bataireho ebigyendererwa kandi baabihikiiriza, kibahwereire kurwanisa okwohibwa okuri omu nsi ya Sitaane, reero baata omutima aha kuheereza Yehova. Ow’eishe-emwe ondiijo oine abaana babiri naagira ati: “Abazaire baingi nibakoresa amaani maingi n’ebintu bingi kuhwera abaana baabo kutaho ebigyendererwa omu by’emizaano, eby’okweshemeza, n’eby’obwegyese. Kwonka nikikora amakuru maingi kukoresa amaani n’ebintu kuhwera abaana baitu kutaho ebigyendererwa ebiraabahwere kuguma baine omukago murungi na Yehova. Kitwire nikitureetera okumarwa ahabw’abaana baitu kutaho ebigyendererwa by’omwoyo kandi bakaza omu muhanda ogu turimu.” Noobaasa kuhamya ngu Ruhanga naasiima abazaire abarikuhwera abaana baabo kutaho ebigyendererwa by’omwoyo, kandi bakabihikiiriza.

17. Ha eby’okureeberaho ebirikwetengyesa obumanzi omu kibiina Ekikristaayo.

¹⁷ Twine kuba emanzi n’omu kibiina. Nk’eky’okureeberaho, abareeberezi baine kuba emanzi baaba nibashoboorora enshonga ezirikukwata aha bibi by’amaani, nari baaba nibahwera abu amagara gaabo gari omu kabi abarikwetenga obujanjabi obw’ahonaaho. Abareeberezi abamwe nibaza omu bihome kwegyesa abantu Baibuli nari kugirirayo enteerane. Kandi shi banyaanyazi-itwe abatakagiire mu bushwere? Baine emigisha mingi y’okwongyera aha kuheereza Yehova n’okworeka obumanzi. Nibabaasa kuba baapayoniya, kuza ahu ababuurizi barikwetengwa munonga, kukora n’ekitongore ekirikukora aha by’okwombeka by’ekibiina, n’okuza omu Ishomero ry’Ababuurizi b’Obukama. Abamwe nibeetwa kuza omu Ishomero rya Gileadi.

18. Banyaanyazi-itwe abakuzire nibabaasa kworeka bata obumanzi?

¹⁸ Nitukunda banyaanyazi-itwe abakuru, kandi nitwesiima kuba nabo omu kibiina! N’obu bamwe aharibo batakibaasa kukora bingi omu kuheereza Ruhanga, nabwo nibabaasa kugira obumanzi beejumbe omu murimo. (Shoma Tito 2:3-5.) Nk’eky’okureeberaho, munyaanyazi-itwe okaikwire naaba aine kugira obumanzi abareeberezi baamushaba kugamba na munyaanyazi-itwe omuto aha bikwatiraine n’okujwara gye. Tarikuhera munyaanyazi-itwe ahabw’emyenda ei arikujwara, kwonka omu muringo gw’embabazi naamuhwera kuteekateeka aha ku emyenda ye erikubaasa kukwata aha bandi. (1 Timoseo 2:9, 10) Banyaanyazi-itwe abakuzire baayoreka rukundo omu miringo egi, nibahamya ekibiina.

19. (a) Ab’eishe-emwe ababatiziibwe nibabaasa kugira bata obumanzi? (b) Ebiri omu Abafilipi 2:13 na Abafilipi 4:13 nibibaasa kuhwera bita ab’eishe-emwe kuba emanzi?

 ¹⁹ Ab’eishe-emwe ababatiziibwe nabo baine kworeka obumanzi bakeejumba omu murimo. Baaba beeteekateekire kuba abaheereza nari abareeberezi, ekibiina nikigasirwa munonga. (1 Timoseo 3:1) Kwonka, abamwe nibabaasa kweziringa kukikora. Obundi ow’eishe-emwe akakora enshobe enyima, kandi hati naateekateeka ngu tahikire kuba omuheereza nari omureeberezi. Ow’eishe-emwe ondiijo naabaasa kuteekateeka ngu taine ebirikwetengyesa kubaasa kuheereza. Ku oraabe nooteekateeka otyo, Yehova naabaasa kukuhwera kugira obumanzi. (Shoma Abafilipi 2:13; 4:13.) Teekateeka ahari Musa. Nawe akaba naateekateeka ngu tarikubaasa kukora eki Yehova yaabaire amushabire kukora. (Okuruga 3:11) Kwonka Yehova akamuhwera kuba emanzi n’okukora eki yaabaire aine kukora. Ow’eishe-emwe obatiziibwe naabaasa kugira ata obumanzi nk’obwo? Naabaasa kushaba Yehova obuhwezi kandi ashome Baibuli buri izooba. Naabaasa kuteekateeka aha barikugambwaho omu Baibuli abaayorekire obumanzi. Naabaasa kushaba abareeberezi kumutendeka, kandi ayeheyo kuhwera omu kibiina nk’oku kirikwetengyesa. Nituhiga ab’eishe-emwe boona ababatiziibwe kugira obumanzi kandi bakakora munonga kuhwera ekibiina!

20, 21. (a) Niki eki Daudi yaijukize Sulemaani? (b) Niki eki turikubaasa kugiraho obuhame?

²⁰ Omugabe Daudi akaijutsya Sulemaani ngu Yehova akaba naija kuba ari hamwe nawe, kuhitsya yaaheza kwombeka hekalu. (1 Obusingye 28:20) Hatariho kubanganisa Sulemaani akateekateeka aha bigambo ebyo, kandi taraikiriize obunyeeto bwe n’okutamanya bingi kumuremesa kukora omurimo. Omu mwanya gw’ekyo, akooreka obumanzi bw’amaani, kandi arikuhwerwa Yehova, akaheza kwombeka hekalu mpango munonga omu myaka mushanju n’ekicweka.

²¹ Yehova akahwera Sulemaani, naitwe naabaasa kutuhwera kugira obumanzi n’okuhikiiriza obujunaanizibwa bwaitu, omu maka gaitu n’omu kibiina. (Isaaya 41:10, 13) Twagira obumanzi turikuheereza Yehova, nitubaasa kuhamya ngu naija kutuha omugisha omu biro by’omumaisho. N’ahabw’ekyo, ba emanzi okore omurimo gwa Yehova.