1, 2. (a) Amatsiko g’Abakristaayo abaabuzima nigataana gata aha gu abantu b’ensi ya Sitaane baine? (b) Nituza kushwijuma bibuuzo ki ebikuru?

ABAKRISTAAYO ab’amazima ka baine amatsiko g’omutaano! Abashukirweho amajuta nari ‘ab’entaama ezindi,’ twena twine amatsiko g’okureeba ekigyendererwa kya Ruhanga nikihikiirira kandi eiziina rye Yehova niryezibwa. (Yoh. 10:16; Mat. 6:9, 10) Ebyo n’ebintu bikuru munonga ebi twiniire ekihika. Ekindi eki twiniire ekihika n’okutunga amagara agatahwaho, bamwe omu ‘iguru erisya’ kandi abandi omu ‘nsi ensya.’ (2 Pet. 3:13) Kwonka ekyo kitakabaireho, nitumanya ngu Yehova naija kugumizamu naayebembera abaheereza be kandi naabashagika omu biro ebi eby’emperu.

² Abo abarikushagika ensi ya Sitaane n’abo haine amatsiko agu baine, kwonka nibaba batarikuhamya yaaba ebi baineho amatsiko nibiija kuhikiirira. Nk’eky’okureeberaho, obukaikuru bw’abantu abarikuteera zaara nibabaasa kugira amatsiko ngu nibaija kusingura, kwonka nibaba bataine buhame. Kwonka, okwikiriza okwabuzima, ‘nikuhamiza kimwe’ amatsiko agu Abakristaayo baine. (Heb. 11:1) Noobaasa kwebuuza ngu amatsiko nigabaasa kuba gata agaabuzima? Kandi okugira okwikiriza kuhami nikirugamu birungi ki?

3. Okwikiriza kw’Abakristaayo nikwegamira aha mazima ki?

 ³ Okwikiriza ti mutwarize ogu abantu abatahikiriire barikuzaarwa nagwo; kandi omuntu tarikugugira bugira. Omuntu kubaasa kugira okwikiriza, aine kwikiriza omwoyo gurikwera kumwebembera omu mutima gwe. (Gal. 5:22) Baibuli terikugira ngu Yehova aine okwikiriza nari ngu naakwetenga. Ahabw’okugira ngu Yehova n’ow’obushoboorozi bwona kandi aine obwengye oburikukirayo, tihaine ekirikubaasa kumuremesa kuhikiiriza ekigyendererwa kye. Tataitwe ow’omu iguru naahamiza kimwe ngu ebi araganiise nibaija kuhikiirira, kandi naabireeba nk’ebyahikiriire. N’ahabw’ekyo, naagira ati: “Kyahwa,” nari bihikiriire! (Shoma Okushuuruurwa 21:3-6.) Abakristaayo baine okwikiriza ahabw’okumanya ngu Yehova ni “Ruhanga omwesigwa,” orikuhikiiriza ebi arikuraganisa.​—Bir. 7:9.

4. Abaheereza ba Ruhanga aba ira bakaba baine matsiko ki?

⁴ Eshuura 11 y’ekitabo ky’Abaheburaayo neegamba aha maziina 16 ag’abashaija n’abakazi abaabaire baine okwikiriza. Owaahandiikire ekitabo ekyo akabagambaho n’abandi baingi ‘nk’abahamiibwe ahabw’okwikiriza kwabo.’ (Heb. 11:39) Boona bakaba ‘nibahamiza kimwe’ ngu Ruhanga naija kuhikiiriza ekiraganiso kye eky’okutaho “oruzaaro” rw’okucwekyereza Sitaane n’okuhikiiriza ekigyendererwa kya Yehova eky’okubanza. (Kut. 3:15) Abaheereza ba Yehova abo abeesigwa bakafa Yesu Kristo oruzaaro orwabaire ruraganisiibwe, atakaizire mu nsi kutaho omuhanda gw’okutunga amagara agatahwaho omu iguru. (Gal. 3:16) Kwonka nitusiima Yehova ahabw’ebiraganiso bye ebitarikubaasa kuremwa, ahakuba boona nibaija kuzooka kutunga amagara agahikiriire omu paradiso omu nsi.​—Zab. 37:11; Isa. 26:19; Hos. 13:14.

5, 6. Abrahamu n’ab’eka ye bakata amatsiko gaabo ahari ki, kandi bakahamya bata okwikiriza kwabo? (Reeba ekishushani aha kutandika.)

⁵ Abaheburaayo 11:13 nihagamba aha baheereza ba Yehova abeesigwa abaabaire bariho Obukristaayo butakatandikire: “Abo boona bakafa bakiri omu kwikiriza, batakahairwe bi baaraganisiibwe; kwonka bakaba babireebera hare, baabyesiimira.” Omwe ahari bo akaba ari Abrahamu. Mbwenu shi akaguma naijuka amatsiko ngu abantu nibaija kutunga amagara agatahwaho kurabira “ruzaaro” orwaraganisiibwe? Yesu akagarukamu ekibuuzo ekyo obu yaagarukamu abaabaire nibamuhakanisa ati: “Shoimwe Abrahamu akashemererwa aine ekihika ky’okureeba ekiro kyangye; ku yaakireebire, yaayesiima munonga.” (Yoh. 8:56) Nikyo kimwe na Saara, Isaaka, Yakobo, n’abandi baingi abaagumire bataire amatsiko gaabo aha Bukama obwabaire nibwija kubaho, ‘obwine emisingi, obu Ruhanga yaagyezire, kandi akoombeka.’​—Heb. 11:8-11.

⁶ Abrahamu n’ab’eka ye bakahamya bata okwikiriza kwabo? Obumwe, Ruhanga akaba agamba nabo arikukoresa baamaraika, okworekwa, ebirooto, nari bakaba bashoma ebihandiiko bya ira ebirikwesigwa. Kandi ekikuru munonga, tibarayebirwe ebi baabaire beegire, kureka bakatwara ebiraganiso n’ebiragiro bya Ruhanga nka bikuru kandi baaguma nibabiteekateekaho. Ahabw’okugira ngu abashaija n’abakazi abo bakaba batarikubanganisa aha matsiko gaabo, bakaba beeteekateekire kugumisiriza oburemeezi bwona bakaguma bahamiire ahari Ruhanga.

7. Yehova atuhaire ki kutuhwera kuhamya okwikiriza kwaitu, kandi tushemereire kubikoresa tuta?

⁷ Yehova atuhaire Ekigambo kye Baibuli kutuhwera kuhamya okwikiriza kwaitu. Kubaasa kutunga okushemererwa n’obusinguzi twine kushoma Ekigambo kya Ruhanga butoosha. (Zab. 1:1-3; shoma Ebyakozirwe 17:11.) Reero, nk’abaheereza ba Yehova aba ira, twine kukuguma nituteekateeka aha biraganiso bya Ruhanga kandi tukamworobera turikukora ebi arikukunda. Yehova  atuhaire n’eby’okurya bingi eby’omwoyo arikukoresa ‘omwambari omwesigwa kandi ow’obwengye.’ (Mat. 24:45) Eki nikimanyisa ngu, twakoresa gye eby’okurya ebi eby’omwoyo ebi Yehova atuhaire, nitwija kuba nk’abaheereza be aba ira abeesigwa abaabaire ‘nibahamiza kimwe’ amatsiko gaabo g’Obukama.

8. Okushaba nikubaasa kuhamya kuta okwikiriza kwaitu?

⁸ Okushaba nakwo kukahwera munonga Abajurizi ba Yehova abaabaire bariho Obukristaayo butakatandikire kuhamya okwikiriza kwabo. Ruhanga ku yaabaire agarukamu okushaba kwabo, bakaba beeyongyera kuhama omu kwikiriza. (Neh. 1:4, 11; Zab. 34:4, 15, 17; Dan. 9:19-21) Naitwe, nitubaasa kugambira Yehova ebirikutwerarikiriza, turikumanya ngu naatuhurira kandi naatuhwera kugumisiriza twine okushemererwa. Kandi okushaba kwaitu kwagarukwamu, nitwija kuhama omu kwikiriza. (Shoma 1 Yohaana 5:14, 15.) Obu okwikiriza kuri gumwe aha mitwarize y’omwoyo gurikwera, twine ‘kuguma nitushaba’ omwoyo gwa Ruhanga, nk’oku Yesu yaatuhigire kukora.​—Luk. 11:9, 13.

9. Oyihire okweshabira, ni baahi abandi abu twine kuta omu kushaba kwaitu?

⁹ Kwonka okushaba kwaitu tikushemereire kugarukira aha kushaba Ruhanga obuhwezi kwonka. Ahakuba, “eby’okutangaaza” ebi Yehova atukoreire “ni bingi, tibirikubaasa kubarwa” nitubaasa kubimusiimira kandi tumwebaze buri izooba! (Zab. 40:5) Kandi omu kushaba kwaitu tushemereire kwijuka “abari omu bihome, nk’ababohirwe nabo.” Kandi twine kushabira ab’eishe-emwe bagyenzi baitu omu nsi yoona, okukira munonga abo ‘abarikutwebembera.’ Buzima nituhurira twakwatwaho Yehova ku arikugarukamu okushaba kwaitu!​—Heb. 13:3, 7.

10. Ni baahi aha baheereza ba Ruhanga abaagumire bari abeesigwa, kandi niki ekyabahaire obumanzi bw’okukora ekyo?

¹⁰ Omu Abaheburaayo eshuura 11, entumwa Paulo naagamba aha kugyezibwa oku abaheereza ba Ruhanga abataragambirwe maziina gaabo baagumisiriize. Nk’eky’okureeberaho, naagamba aha bakazi abaabaire baine okwikiriza abaafeereirwe abaana baabo kwonka bakabatunga kurabira omu kuzooka. Kandi naagamba n’abandi abaabaire “batarikwenda kurekurwa, ngu nyentsya babone kuheebwa okuzooka okurikukira oburungi.” (Heb. 11:35) N’obu turaabe tutarikumanya abu Paulo yaabaire naagambaho, abamwe, nka Nabosi na Zekaria, bakateerwa amabaare baitwa ahabw’okworobera Ruhanga n’okukora ebi arikukunda. (1 Bag. 21:3, 15; 2 Bus. 24:20, 21) Danieli na bagyenzi be bakaba nibabaasa kwikiriza kurekurwa barikwanga kuguma bari abeesigwa. Omu mwanya gw’ekyo, ahabw’okugira ngu bakaba nibaikiririza omu maani ga Ruhanga, gakababaasisa ‘okwigara eminwa y’entare’ hamwe ‘n’okuraaza ekibabo ky’omuriro.’​—Heb. 11:33, 34; Dan. 3:16-18, 20, 28; 6:13, 16, 21-23.

11. Baanabi abamwe bakagumisiriza kugyezibwa ki ahabw’okugira okwikiriza?

¹¹ Ahabw’okwikiriza kwabo, baanabi nka Mikaaya na Yeremia “bakashekyererwa . . . baatebwa omu bihome.” Abandi, nka Eliya, ‘bakazengyerera omu mahamba n’omu nshozi, nibaraara omu maaya n’omu biina omu itaka.’ Boona bakagumisiriza ahabw’okugira ngu bakaba ‘nibahamiza kimwe ebi baineho amatsiko.’​—Heb. 11:1, 36-38; 1 Bag. 18:13; 22:24-27; Yer. 20:1, 2; 28:10, 11; 32:2.

12. N’oha owaatuteereireho eky’okureeberaho kirungi eky’okugumisiriza okugyezibwa, kandi niki ekyamuhwereire kukikora?

¹² Bwanyima y’okugamba aha bashaija n’abakazi abaabaire baine okwikiriza, Paulo akagamba aha ky’okureeberaho kikuru munonga, ekya Mukama waitu Yesu Kristo. Abaheburaayo 12:2 nihagira hati: “Ahabw’okushemererwa okwatairwe omu maisho ge, akagaya enshoni zaagwo [omuti], kandi hati ashutami aha rubaju rwa buryo rw’ekitebe ky’obukama bwa Ruhanga.” Buzima, twine ‘kuteekateeka’ aha ky’okureeberaho kya  Yesu eky’okwikiriza twaba nitugyezibwa. (Shoma Abaheburaayo 12:3.) Nka Yesu, Abakristaayo ab’omu kyasha ky’okubanza, nk’omwegi Antipa, bakahamira aha kwikiriza kwabo baaguma bari abeesigwa. (Kush. 2:13) Bakaba nibaija kuzooka kutunga amagara agatahwaho omu iguru “okuzooka okurikukira oburungi” oku abashaija aba ira baabaire bategyereize. (Heb. 11:35) Bwanyima y’Obukama kuteebwaho omu 1914, boona abashukirweho amajuta abeesigwa, abaabaire bagwejegyeire omu kufa, baakagaruka baaba abahuriire baatunga amagara omu iguru kutegyeka na Yesu.​—Kush. 20:4.

13, 14. Ni kugyezibwa ki oku Rudolf Graichen yaatungire, kandi niki ekyamuhwereire kukugumisiriza?

¹³ Abaheereza ba Ruhanga baingi nibatooreza eky’okureeberaho kya Yesu barikuguma baine amatsiko kandi batarikwikiriza oburemeezi kutuubya okwikiriza kwabo. Teekateeka aha ky’okureeberaho kya Rudolf Graichen, owaazaarairwe omuri Germany omuri 1925. Obu yaabaire ari muto, abazaire be bakaba bahanika omu nju yaabo ebishushani by’ebirikugabwaho omu Baibuli. Akagira ati: “Ekishushani kimwe, kikaba nikyoreka omushega guri n’omwana gw’entaama, engwe  eri n’omwana gw’embuzi, enyana eri n’entare, byona biri omu busingye, birikufunywa omwana muto. . . . Ebishushani ebyo bikampwera kuguma niinyijuka.” (Isa. 11:6-9) N’obu Rudolf araabe yaamazire emyaka mingi arikuhiiganisibwa abaserukare ba Nazi n’Abakomunisiti omuri Germany ey’oburugwa-izooba, akaguma aine okwikiriza kuhami omu paradiso.

¹⁴ Rudolf akagumira okundi okugyezibwa kwingi. Nyina akaitwa endwara y’amatojo kampu ya Ravensbrück. Ishe akata omukono aha kihandiiko ngu takiri omwe aha Bajurizi ba Yehova. Kwonka Rudolf akaguma aine okwikiriza kuhami. Rudolf bwanyima y’okurekurwa omu kihome, akaba omureeberezi orikutaayaayira ebibiina yaaheereza aine okushemererwa kandi akeetwa kuza omu ishomero rya Gileadi. Akabaho omumiisani yaaheereza omuri Chile, nabwo yaaheerezayo nk’omureeberezi orikutaayaayira ebibiina. Kwonka okugyezibwa kwa Rudolf kukaba kutakahweire. Bwanyima y’omwaka gumwe aherize kutaatsya Patsy, omumiisani mugyenzi we, omwana waabo w’omwishiki akafa. Bwanyima y’ekyo, omukazi we omukundwa, owaabaire aine emyaka 43 y’obukuru yonka, nawe akafa. Rudolf akagumisiriza oburemeezi obwo bwona, kandi n’obu araabe yaabaire ari omugurusi aine amaani makye, akaba naaheereza nka payoniya w’obutwire kandi omureeberezi omu kibiina obu ebyafaayo bye byagambwaho omu Watchtower ey’Okwamunaana 1, 1997, aha orupapura 20-25. ^[1]

15. Ni baahi aha Bajurizi ba Yehova ababaasize kuguma bashemereirwe omu kuhiiganisibwa?

¹⁵ Abajurizi ba Yehova nibaguma bashemereirwe kandi baine amatsiko n’obu baakuba nibahiiganisibwa munonga. Nk’eky’okureeberaho, baingi aha b’eishe-emwe bagyenzi baitu bari omu kihome omuri Eritrea, Singapore, na South Korea, kandi baingi aharibo nibabatura okworobera ebigambo bya Yesu eby’okutakwata rurara. (Mat. 26:52) Aharibo harimu Isaac, Negede, na Paulos, abatwire omu kihome omu Eritrea kumara emyaka erengire 20! N’obu ab’eishe-emwe baraabe babaremeise kutunga obugabe bw’okushwera n’okuba n’abazaire baabo abakaikwire kandi barikutwarizibwa kubi, bagumire bari abeesigwa. Okuguma bashemereirwe aha maisho nk’oku mwabareebire aha mukura gwaitu jw.org, nikyoreka gye ngu okwikiriza kwabo kuhami. Nangwa n’abarinzi b’ekihome hati nibabaha ekitiinisa.

16. Okwikiriza kuhami nikubaasa kukurinda kuta?

¹⁶ Abajurizi ba Yehova abarikukira obwingi tibakahikirweho okuhiiganisibwa kw’amaani. Baine ebindi ebirikugyeza okwikiriza kwabo. Baingi bagumisiriize obworo, entaro z’enganda nari ebihikiirizi. Abandi bari nka Musa n’abaheereza ba Ruhanga abandi aba ira kandi babaasize kwefeerereza ebi abantu omu nsi barikutwara nka bikuru. Nibateeraho kwetantara okwohibwa kugira eby’obutungi bingi, n’okweyendeza. Niki ekirikubabaasisa kukora eki? Ni rukundo ei bainiire Yehova n’okwikiriza kuhami oku baine omu kiraganiso kya Yehova eky’okumaraho obutari buringaaniza n’eky’okubaha amagara agatahwaho omu nsi ensya.​—Shoma Zaaburi 37:5, 7, 9, 29.

17. Niki eki omaririire kukora, kandi omu kicweka ekirikukurataho nitwija kugamba ahari ki?

¹⁷ Omu kicweka eki, twareeba oku okuteekateeka aha biraganiso bya Ruhanga n’okushaba butoosha birikubaasa kutuhwera kuguma twine okwikiriza kuhami. Kandi ekyo, nikiija kutuhwera kugumisiriza ebirikugyeza okwikiriza kwaitu, kandi tukaguma ‘tuhamiize kimwe ebi twineho amatsiko.’ Kwonka oku Baibuli erikushoboorora aha kwikiriza nikitwariramu bingi, kandi nitwija kubireeba omu kicweka ekirikukurataho.