1. Tushemereire kutwara tuta okwikiriza kw’Ekikristaayo?

OKWIKIRIZA kw’Ekikristaayo n’omutwarize gw’omuhendo. Ti bantu boona ngu baine omutwarize ogu. (2 Tes. 3:2) Kwonka, Yehova buri omwe aha baheereza be amuhaire “okwikiriza” okuringaniire. (Rom. 12:3; Gal. 5:22) Boona abaine okwikiriza bashemereire kwesiima.

2, 3. (a) Omuntu oine okwikiriza naabaasa kutunga migisha ki? (b) Hati nituza kushwijuma bibuuzo ki?

² Yesu akagira ngu Tataitwe ow’omu iguru naayeyiriza abantu haihi kurabira omu Mwana we. (Yoh. 6:44, 65) Omuntu weena orikwikiririza omuri Yesu naatunga omugisha gw’okusaasirwa ebibi bye. Kandi eki nikitubaasisa kutunga amatsiko g’okugira omukago murungi na Yehova ebiro byona. (Rom. 6:23) Tukakora ki kubaasa kuba abashemeire kutunga omugisha ogwo? Obu turi abasiisi, eki tushemereire kuba nitutunga n’okufa. (Zab. 103:10) Kwonka Yehova akareeba ngu nitubaasa kukora ebirungi. Arikwihirira aha mbabazi ze, akaigura emitima yaitu kwiriza amakuru marungi. Tukatandika  kwikiririza omuri Yesu twine amatsiko g’okutunga amagara agatahwaho.​—Shoma 1 Yohaana 4:9, 10.

³ Kwonka okwikiriza buzima niki? Nikigarukira aha kumanya emigisha ei Ruhanga atubiikiire? Kandi ekikuru, ni mu miringo ki ei turikubaasa kworekamu okwikiriza kwaitu?

4. Shoboorora ahabw’enki okwikiriza kirikukira aha ki turikumanya omu mutwe.

⁴ Okwikiriza nikukira aha kumanya ekigyendererwa kya Ruhanga. N’amaani agarikuhiga omuntu kutwaza omu muringo ogurikuhikaana n’ekigyendererwa kya Ruhanga. Okwikiririza omu muringo ogu Ruhanga ataireho kujuna abantu nikihiga omuheereza we kubuurira abandi amakuru marungi. Entumwa Paulo akashoboorora ati: “Ku oryatura n’akanwa kaawe oti: Yesu niwe Mukama, waikiriza n’omutima gwawe ku Ruhanga yaamuzoire omu bafu, oryajunwa; ahakuba omutima nigwo omuntu aikiririsa akaheebwa okuhikiirira, kandi akanwa niko ayatuza akaheebwa okujunwa.”​—Rom. 10:9, 10; 2 Kor. 4:13.

5. Ahabw’enki okwikiriza ni kukuru munonga, kandi nitubaasa kukuhamya tuta? Ha eky’okureeberaho.

⁵ Buzima, amatsiko gaitu g’okwija kutunga amagara agatahwaho omu nsi ensya nigegamira aha kugira okwikiriza n’okukurinda kukaguma kuhami. Okurinda okwikiriza kwaitu nikibaasa kugyeragyeranisibwa n’oku ekimera kirikwetenga amaizi. Okutashushana, n’omuti ogukozirwe abantu ogutaine magara, ekimera ekiine amagara nikiguma nikihinduka. Ekimera ekiine amagara nikibaasa kuhonga kyaba kitaine maizi nari nikibaasa kureebeka gye kyaguma nikitunga amabeho butoosha. Ekimera kyaguma kitatungire maizi garikumara, nikirugaho nikifa. Nikyo kimwe n’okwikiriza kwaitu. Nikwija kuhonga kandi nikufa twaba kutarikukufaho. (Luk. 22:32; Heb. 3:12) Okwikiriza kwaitu twakutaho omutima, nikwija kuguma kwine amagara kandi “nikweyongyera munonga” kukura, kandi nikuba ‘okuhikire.’​—2 Tes. 1:3; Tit. 2:2.

6. Ni mu miringo ki ebiri ei Abaheburaayo 11:1 harikushoboorora okwikiriza?

⁶ Oku Baibuli erikushoboorora okwikiriza nikushangwa omu Abaheburaayo 11:1. (Kishome.) Okwikiriza nikwihirira aha bintu by’emiringo ebiri ebi tutarikureeba: (1) “Ebi twineho amatsiko,” ebirikutwariramu ebiraabeho omu biro by’omumaisho ebiraganisiibwe kubaho kwonka ebitakabaireho, nk’emperu y’obubi bwona n’okubaho kw’ensi ensya. (2) Ebi turikuhamiza kimwe “ebitarikureebwa.” Aha, ekigambo ky’Orugriika ekirikuvunuurwa ‘nk’okutumanyisiza kimwe’ nikimanyisa “okuhamiza kimwe” ekintu eki otarikureeba, nk’okubaho kwa Yehova Ruhanga, Yesu Kristo, baamaraika, n’ebirikukorwa Obukama bw’omu iguru. (Heb. 11:3) Nitworeka tuta ngu twine amatsiko omu bintu ebitarikureebwa ebirikugambwaho omu Kigambo kya Ruhanga? Nitukyoreka omu bigambo n’ebikorwa byaitu, kitari ekyo okwikiriza kwaitu nikuba kutahikire.

7. Eky’okureeberaho kya Noa nikituhwera kita kwetegyereza eki kirikumanyisa kugira okwikiriza? (Reeba ekishushani aha kutandika.)

⁷ Abaheburaayo 11:7 nihagamba aha kwikiriza kwa Noa, ahakuba “ku yaahabwirwe Ruhanga aha byabaire bitakabaireho, akamworobera, yaakora emeeri ey’okukiza ab’omu nju ye.” Noa akooreka ngu aine okwikiriza arikwombeka obwato buhango munonga. Hatariho kubanganisa, bataahi be bashemereire kuba baamubuurize ahabw’enki yaabaire naayombeka ekintu kihango kityo. Mbwenu shi Noa akahunama nari yaabagira ati eki tikirikubakwataho? Ngaaha buzima! Okwikiriza kwe kukamuhiga kubuurira aine obumanzi kandi yaarabura bataahi kumanya orubanja oru Ruhanga yaabaire  ariyo naaza kucwera abasiisi. Noa naabaasa kuba yaagarukiremu ebigambo ebi Yehova yaabaire amugambiire: “Mmaririire kumaraho abaine omubiri boona; ahabw’okuba bareeteire ensi kwijura eiraro . . . ndyareeta omwegyemure gw’amaizi, gushwekye ensi okucwekyereza byona ebiine omubiri n’omwitsyo gw’amagara, mbimareho ahansi y’eiguru; ebiri omu nsi byona bife.” Kandi, Noa hatariho kubanganisa akashoboororera abantu oku baabaire nibabaasa kuhonokaho arikugarukamu ekiragiro kya Ruhanga eki: “Oryataaha omu meeri.” N’ahabw’ekyo, Noa akagumizamu yaayoreka ngu aine okwikiriza arikuba “omurangi w’okuhikiirira.”​—Kut. 6:13, 17, 18; 2 Pet. 2:5.

8. Omwegi Yakobo akashoboorora ata amakuru g’okwikiriza?

⁸ Ebaruha ya Yakobo neebaasa kuba yaahandiikirwe bwanyima y’obwire bukye entumwa Paulo aherize kuhandiika eki okwikiriza kurikumanyisa. Nka Paulo, Yakobo nawe akashoboorora ngu aha Bakristaayo abaabuzima okwikiriza tikirikumanyisa ebigambo kwonka, beitu nikitwariramu n’ebikorwa. Yakobo akahandiika ati: “Nyoreka okwikiriza kwawe okutaine kukora; naanye nkworekye okwikiriza kwangye okurikureeberwa omu bi ndikukora.” (Yak. 2:18) Yakobo naagumizamu kworeka entaaniso eri aha gati y’okugamba bugamba  ngu oine okwikiriza n’okworeka ngu oine okwikiriza. Baadaimoni nibaikiriza ngu hariho Ruhanga, kwonka tibarikworeka ngu buzima nibamwikiririzamu. Omu mwanya gw’ekyo, bataine kwikiriza nibakora kuremesa okuhikiirira kw’ebigyendererwa bya Ruhanga. (Yak. 2:19, 20) Okutaana n’ekyo, Yakobo obu yaabaire naagamba aha mushaija wa ira ondiijo owaabaire aine okwikiriza, akabuuza ati: “Torikumanya ngu Abrahamu tatenkuriitwe akaihwaho orubanja ahabw’okukora, obu yaahayo omutabani Isaaka aha itambiro? Waareeba oku okwikiriza kwe kwagyendeire hamwe n’okukora, kandi ahabw’okukora okwikiririza kwe kukahika.” Yakobo kubaasa kuhamya ngu okwikiriza kwine kworekwa omu bikorwa, akoongyeraho ati: “Nk’omubiri ogutarimu mwoyo oku guba gufiire, nikwo n’okwikiriza okutaine kukora kuba kufiire.”​—Yak. 2:21-23, 26.

9, 10. Entumwa Yohaana naatuhwera kwetegyereza obukuru bw’okworeka okwikiriza?

⁹ Bwanyima y’emyaka erengire 30, entumwa Yohaana akahandiika engiri ye n’ezindi ebaruha ishatu. Mbwenu shi nawe akaba naayetegyereza amakuru g’okwikiriza kw’Ekikristaayo nk’abahandiiki ba Baibuli abandi? Okukira aha bahandiiki ba Baibuli abandi, Yohaana akakoresa ekigambo ky’Orugriika ekirikukira kuvunuurwa ‘okwikiriza’ nari okworeka okwikiriza.

¹⁰ Nk’eky’okureeberaho, entumwa Yohaana naashoboorora ati: “Orikwikiriza Omwana aine amagara agatahwaho; kwonka otarikworobera Mwana, taribona magara; kureka ekiniga kya Ruhanga kiguma ahariwe.” (Yoh. 3:36) Okwikiriza kw’Ekikristaayo nikutwariramu okworeka ngu nooyorobera ebiragiro bya Yesu. Yohaana akaba akira kujuriza ebigambo bya Yesu ebirikworeka ngu okworeka okwikiriza n’ekintu ekirikugumizamu.​—Yoh. 3:16; 6:29, 40; 11:25, 26; 14:1, 12.

11. Nitubaasa kworeka tuta ngu nitusiima ahabw’okumanya amazima?

¹¹ Ka nitushemererwa munonga kureeba ngu Yehova akakoresa omwoyo gurikwera kutushuuruurira amazima n’okutubaasisa kwikiririza omu makuru marungi! (Shoma Luka 10:21.) Titushemereire kurekyera aho kwebaza Yehova ahabw’okutweyiriza haihi hamwe n’Omwana we, “owaatandikire okwikiriza kwaitu kandi omuhikiiriza waakwo.” (Heb. 12:2) Kubaasa kworeka okusiima kwaitu ahabw’embabazi ezo, twine kugumizamu nituhamya okwikiriza kwaitu kurabira omu kushaba n’okwega Ekigambo kya Ruhanga.​—Efe. 6:18; 1 Pet. 2:2.

12. Nitubaasa kworeka tuta okwikiriza?

¹² Tushemereire kuguma nitworeka ngu nitwikiririza omu bi Yehova arikuraganisa. Twine kukikora omu miringo ei abandi barikureeba gye. Nk’eky’okureeberaho, nitugumizamu nitubuurira aha Bukama bwa Ruhanga n’okwejumba omu murimo gw’okuhindura abantu abeegi. Kandi nituguma nitukora “gye abantu boona, kwonka okukira munonga abari omu nju y’okwikiriza.” (Gal. 6:10) Kandi nituteeraho munonga kujuura “omuntu owa ira n’emitwarize ye,” turikwerinda ekintu kyona ekirikubaasa kutumaramu amaani omu by’omwoyo.​—Kol. 3:5, 8-10.

13. Okwikiririza omuri Ruhanga ni kikuru kita, kandi nikigyeragyeranisibwa na ki, kandi n’ahabw’enki?

¹³ Baibuli neegira ngu “otarikwikiriza tarikubaasa kushemeza Ruhanga; ahakuba omuntu weena orikwija ahari Ruhanga, ashemereire kwikiriza ku ariho, kandi ku aha ebihembo abamusherura.” (Heb. 11:6) Ekigambo kya Ruhanga nikishoboorora ngu ‘okwikiriza Ruhanga’ ni kimwe aha ‘musingi’ ogurikwetengyesa omuntu kubaasa kuba kandi akagumizamu ari Omukristaayo. (Heb. 6:1) Aha  musingi ogu, Abakristaayo “aha kwikiriza” kwabo baine kwongyeraho emitwarize mirungi kubaasa ‘kwerindira omu kukunda kwa Ruhanga.’​—Shoma 2 Petero 1:5-7; Yud. 20, 21.

14, 15. Okwikiriza waakugyeragyeranisa na rukundo, ni kukuru kuta?

¹⁴ Abahandiiki ba Baibuli bakooreka obukuru bw’okugira okwikiriza barikukugambaho emirundi mingi. Tihariho mutwarize gw’Ekikristaayo ogurikugambwaho munonga nk’okwikiriza. Mbwenu shi eki nikimanyisa ngu okwikiriza nigwo mutwarize gw’Ekikristaayo ogurikukirayo obukuru?

¹⁵ Paulo arikugyeragyeranisa okwikiriza na rukundo, akahandiika ati: “N’obu naakugira okwikiriza kwona, okwakumbaasisa kwihaho enshonzi, kwonka ntaine kukunda, nkaaba ntari kintu.” (1 Kor. 13:2) Yesu akooreka obukuru bw’omutwarize gwa rukundo ya Ruhanga obu yaagarukamu ekibuuzo eki: “Ekiragiro ekikuru omu biragiro ni kiiha?” (Mat. 22:35-40) Rukundo neetwariramu emitwarize y’Ekikristaayo emikuru, otwariiremu okwikiriza. Baibuli neegira okukunda “kwikiriza byona.” Okukunda nikwikiriza byona ebi Ruhanga yaagambire omu Kigambo kye eky’amazima.​—1 Kor. 13:4, 7.

16, 17. Okwikiriza na rukundo nibigambwaho bita hamwe omu Byahandiikirwe, kwonka ekikuru ni kiiha, kandi n’ahabw’enki?

¹⁶ Ahabw’obukuru bw’okwikiriza na rukundo, abahandiiki ba Baibuli bakagamba aha mitwarize egyo emirundi mingi, obumwe barikugigambaho hamwe. Paulo akahiga ab’eishe-emwe kujwara ‘okwikiriza na rukundo nk’eky’okwekingiza omu kifuba.’ (1 Tes. 5:8) Petero akahandiika ati: ‘Ogwo [Yesu] mumukunda, mutakamureebaga, kandi n’obu muraabe mutarikumureeba hati, nimumwikiriza.’ (1 Pet. 1:8) Yakobo akabuuza ab’eishe-emwe bagyenzi be abashukirweho amajuta ati: ‘Abooro omu nsi egi, Ruhanga tarabatooraine kuba abatungi omu kwikiriza, n’okuba abahunguzi b’obukama obu yaaraganiise abarikumukunda?’ (Yak. 2:5) Yohaana akahandiika ati: “Eki nikyo kiragiro [kya Ruhanga], ngu twikirize eiziina ry’Omwana we Yesu Kristo, kandi tukundane nk’oku yaaturagiire.”​—1 Yoh. 3:23.

¹⁷ N’obu okwikiriza kuraabe kuri kukuru, omu biro by’omumaisho ebi Ruhanga arikuraganisa ebi twineho amatsiko byaheza kuhikiirira, titurikwija kwetenga okwikiriza. Kwonka ekyetengo kyaitu eky’okukunda Ruhanga n’abataahi tikirikwija kuhwaho. N’ahabw’ekyo, Paulo akahandiika ati: “Mbwenu ebirikugumaho ni bishatu, okwikiriza, amatsiko n’okukunda; kwonka ekirikukira byona n’okukunda.”​—1 Kor. 13:13.

18, 19. Okwikiriza kw’abaheereza ba Ruhanga kurugiremu ki, kandi n’oha oine kuhimbisibwa ahabw’eki?

¹⁸ Omu bunaku obu, abaheereza ba Yehova nibaikiririza omu Bukama bwa Ruhanga kandi nibabushagika. Eki kirugiremu paradiso y’eby’omwoyo omu nsi yoona erimu abantu abarikurenga obukaikuru munaana. Ogu n’omwanya ogwijwiremu emitwarize ei abantu barikugira ahabw’omwoyo gurikwera nk’obusingye n’obumwe. (Gal. 5:22, 23) Buzima, okwikiriza na rukundo n’emitwarize y’amaani.

¹⁹ Obumwe obu bubaasize kubaho ahabw’obuhwezi bwa Ruhanga. Ashemereire kuhimbisibwa ahabw’okubaasisa eki kubaho. (Isa. 55:13) Buzima, “n’ekiconco kya Ruhanga” ngu tujunwe “ahabw’okwikiriza.” (Efe. 2:8) Paradiso yaitu y’eby’omwoyo neija kugumizamu neehanguha, kandi erikuba nungi kuhitsya obu ensi yoona eraijura abantu abahikiriire, kandi abaine okushemererwa abaraahimbise eiziina rya Ruhanga, Yehova ebiro byona. Ka tugumizemu nitwikiririza omu bi Yehova arikuraganisa!