EBYAFAAYO
Nkacwamu Gye Yehova Yaampa Emigisha
Gukaba guri omwaka gwa 1939, obu twaimuka nyekiro omu itumbi tukavuga kumara eshaaha nk’emwe tukaza omu tauni nkye eya Joplin omuri southwestern Missouri, U.S.A. Tukatandika kuta zaaturakiti ahansi y’orwigi rwa buri nju y’omu kicweka ekyo. Ahonaaho ku twaherize, tukagaruka omu motoka twaza kubugana abandi. Bukaba bwaseesire. Kwonka ahabw’enki eizooba eryo twagiire kubuurira omu itumbi, kandi tukagaruka ahonaaho? Ninyija kubagambira bwanyima.
NKAZAARWA 1934. Abazaire bangye, Fred na Edna Molohan, bakaba bari Abeegi ba Baibuli (Abajurizi ba Yehova) kumara emyaka 20. Nimbasiima ahabw’okunyegyesa kukunda Yehova. Tukaba nitutuura omuri Parsons, etauni nkye omuri Kansas. Haihi buri omwe omu kibiina kyaitu akaba ashukirweho amajuta. Butoosha eka yaitu ekaba eza omu nteerane n’omu kubuurira. Orwamukaaga omu ihangwe tukaba tubuurira aha ruguuto, hati eki turikumanya nk’okubuurira omu myanya erimu abantu. Obumwe tukaba turuha, kwonka tata akaba atugurira ayisi kuriimu twaheza kubuurira.
Ekibiina kyaitu kikaba kiine ekicweka kihango ky’okubuurira ekyabaire nikitwariramu etauni nkye nyingi na zaafaamu. Omu mwanya gw’okutuha esente twaheza kubaha bitabo, abamwe bakaba batuha aha bi baine nka doodo, amahuri (agu baaheza kwiha omu kyari), nari enkoko zihuriire. Tata akaba yaahaireyo esente z’ebitabo, n’ahabw’ekyo eby’okurya ebyo nibyo twabaire turyaho omuka.
KAMPEYINI Z’OKUBUURIRA
Abazaire bangye bakaba baine ekyoma ekiriho embazo ez’okukoresa omu kubuurira. Nkaba ndi muto ntarikubaasa kukikoresa nyenka, kwonka nkaba ninkunda kuhwera abazaire bangye kuteeraho beegi ba Baibuli n’abandi embazo z’ow’eishe-emwe Rutherford.
Ndi na tata na maawe aha motoka yaitu erikurangirira obutumwa
Tata akata omuzindaaro muhango aha motoka ye ey’ekika kya Ford eya 1936, reero yaagihindura emotoka y’okurangiirira obutumwa. Ekaba neetuhwera munonga omu kubuurira. Tukaba tubanza kuteera ebyeshongoro kubaasa kureetera abantu kuhurikiza, bwanyima tutaho orubazo rw’omu Baibuli. Bwanyima y’ekyo abarikwenda kumanya ebirikukiraho tukaba tubaha ebitabo.
Omu tauni nkye ya Cherryvale, Kansas, tata akaba avuga emotoka ye agitwara omu paaka ahu abantu baingi baabaire baahuumurira aha Sande. Bwanyima, poriisi ekaija yaamuragiira kutwara emotoka ye aheeru ya paaka. Akagitwara aha ruguuto oruri haihi
na paaka kugira ngu abantu b’omu paaka bagume nibahurira gye embazo. Kikaba nikinshemeza kubuurira na tata, na mukuru wangye, Jerry, omu bwire nk’obwo.Omu myaka egyo, tukaba tugira kampeyini z’okubuurira omu bicweka ahu abantu barikuhakanisa omurimo gwaitu. Nk’oku naaba naagambire omu kutandika, tukaba twimuka nyekiro omu itumbi reero tuta zaaturakiti, nari ebitabo ahansi y’enyigi omu maka g’abantu. Bwanyima, twena tukaba tuteeranira aheeru y’orurembo kureeba yaaba haine ou poriisi yaakwata.
Omuringo gw’okubuurira ogundi ogwabaire nigushemeza n’ogw’okujwara ebipande ebiriho obutumwa. Tukaba tubijwara reero tugyendagyenda omu rurembo rwona. Ninyijuka obu ab’eishe-emwe baaraba omu tauni yaitu bajwaire ebipande ebiriho ebigambo ebi: “Ediini n’Omutego Kandi eky’Obushuubuzi.” Bakatandikira aha kwaitu barikugyenda orugyendo rwa mahiro nk’emwe barikuraba omu tauni reero bagaruka omuka. Ekirungi, tihaine waabazibiire kandi baingi bakaba nibenda kumanya ekiriyo nikigyenda omu maisho.
ENTEERANE EMPANGO OBU NAABAIRE NKIRI MUTO
Eka yaitu ekaba neekira kuza Texas omu nteerane empango. Tata akaba naakorera ekitongore ky’egaari y’omwika, n’ahabw’ekyo tukaba tutashashura twaba nituza omu nteerane empango nari kutaayaayira abanyabuzaare. Maarimi orikwetwa, Fred Wismar, n’omukazi we, Eulalie, bakaba nibatuura omuri Temple, Texas. Maarimi akeega amazima omu myaka ya 1900 akiri muto, yaabatizibwa, kandi yaagambiraho beene nyina, na nyina ebi yaabaire naayega. Ab’eishe-emwe ab’omuri Texas bakaba nibamanya gye Fred ahabw’okugira ngu akaba ari omureeberezi wa zooni (hati orikwetwa omureeberezi orikutaayaayira ebibiina). Akaba ari omunyambabazi, arikushemererwa, omweziriki, kandi akambeera eky’okureeberaho kirungi.
Omu gwa 1941, tukagyendera omu gaari y’omwika kuza St. Louis, Missouri, aha ruteerane oruhango. Abato boona bakeetwa kushutama omu myanya y’omu maisho kuhurira orubazo rw’Ow’eishe-emwe Rutherford orwabaire rwine omutwe “Abaana b’Obukama.” Bwanyima y’orubazo rwe, twena abato 15,000 tukatunga ekiconco. Ow’eishe-emwe Rutherford n’abaabaire nibamuhwera bakatuha ekitabo kisya ekyabaire kiine omutwe Abaana.
Omu Kwakana 1943, tukaza aha Ruteerane Oruhango orwabaire rwine omutwe “Gira Eki Waakora” omuri Coffeyville, Kansas. Aha ruteerane orwo, tukatunga ekirango ngu ebibiina byona nibiija kutandika kugira eishomero risya, niryo Eishomero ry’Obuheereza. Tukatunga n’ekitabo ekiine amashomo 52 eky’okukoresa omu ishomero eryo. Bwanyima omu mwaka ogwo, nkaha orubazo rwangye rw’okubanza. Oruteerane orwo rukaba orw’omutaano ahariinye ahabw’okuba nyowe n’abandi, tukabatizibwa omu maizi garikufukirira omu kidiba ky’omu faamu.
NKABA NIINYENDA KUHEEREZA AHA BESEELI
Nkaheza emishomo omu gwa 1951, kandi nkaba nyine kucwamu eki ndaakore. Murumuna wangye Jerry akaba yaaheereizeho aha Beseeli. Buzima naanye nkaba niinyenda kuheereza aha Beseeli, n’ahabw’ekyo nkaijuza foomu y’okuzayo. Ahonaaho bwanyima, nkeetwa kandi naatandika kuheereza aha Beseeli Okwakashatu 10, 1952. Oku kukaba kuri okucwamu kurungi okumpwereire kwongyera kuheereza gye Yehova.
Nkaba nyine amatsiko g’okukora omu iteerero ry’ebitabo kuhwera omu kushohoza magaziini n’ebindi bitabo by’ekibiina. Kwonka tindatungire mugisha ogwo. Omu mwanya gw’ekyo, nkashabwa kukora nk’omugabuzi, kandi bwanyima naakora omu kiyungu. Nkakunda omurimo ogu kandi nkeega bingi. Tukaba nitwihaihana omu kiyungu, n’ahabw’ekyo nkaba mpumuraho omu ihangwe. Nkaba ninkira kuza omu raiburare ey’aha Beseeli reero nkoresa ebitabo bingi ebirimu kweyegyesa. Eki kikampwera kuhamya okwikiriza kwangye n’okugira omukago murungi na Yehova. Nkongyera kumariirira kuheereza Yehova aha Beseeli nk’oku ndikubaasa. Jerry akaba arugire aha Beseeli omuri 1949 ataahire omu bushwere na Patricia, kwonka bakaba nibatuura haihi na Brooklyn, kandi bakangaruramu amaani obu naabaire nkiri musya aha Beseeli.
Bwanyima y’akaire kakye mpikire aha Beseeli, ab’eishe-emwe bakatandika kusherura
ab’okwongyera aha Babeseeli ab’okuha embazo. Ab’eishe-emwe abu baatooraine bakaheebwa obujunaanizibwa bw’okutaayaayira ebibiina ebiri hare na Brooklyn nka mahiro 200. Bakaba baha embazo, kandi baabuurira n’ab’eishe-emwe. Nkaba ndi omwe aha baatoorainwe. Nkatandika kuzayo kuha embazo kwonka nkaba nyine obwoba. Omu bwire obwo orubazo rwa boona rukaba nirumara shaaha emwe. Nkaba ngyendera omu gaari y’omwika kubaasa kuhikayo. Ninyijuka ekyabaireho Sande emwe omu ihangwe omu bwire bw’obutiti bw’amaani omuri 1954. Nkakwata egaari y’omwika kugaruka omuri New York kandi nkaba nshemereire kuhika aha Beseeli omu mwabazyo. Kwonka omu kugaruka, hakabaho eihunga ry’omuyaga gw’amaani n’ebirika. Ingini z’egaari y’omwika zikafa kandi nkahika omuri New York shaaha ikumi n’emwe z’akasheeshe Orwokubanza. Nkaza omu gaari y’omwika erikuraba omu muhanda ogw’ahansi kuza Brooklyn naahika ndikuza omu kiyungu. Nkahikayo nkyerereirwe kandi nduhire ahakuba tindagwejegyeire ekiro kyona. Kwonka okushemererwa oku naabaire nyine ahabw’okuheereza Abakristaayo bagyenzi bangye abasya baingi, kukaba nikukirira kimwe okwefeerereza kwona oku naakozire.Ndi omu situdiyo ya WBBR
Emyaka yangye y’okubanza aha Beseeli, nkatandika n’okwejumba omu puroguraamu erikukwata aha Baibuli buri saabiiti aha radiyo WBBR. Situdiyo ekaba eri omuri kaanyinaibiri y’ekyombeko 124 Columbia Heights. Ow’eishe-emwe Alexander H. Macmillan, owaabaire aheereize emyaka mingi aha Beseeli, akaba naakira kwejumba omu puroguraamu z’aha radiyo egyo. Tukaba nitukira kumweta Ow’eishe-emwe Mac. Itwe eminyeeto akatuteeraho eky’okureeberaho kirungi aha Beseeli, ahakuba akaguma ari omwesigwa n’obu araabe yaatungire oburemeezi bwingi.
Tukaba nitukoresa obupapura obu kurangirira WBBR
Omuri 1958, obuheereza bwangye bukahinduka naatandika kukora aha nshonga z’abeegi b’Eishomero rya Gileadi. Nkaba mpwera abeegi aba kutunga ebihandiiko ebirikwetengyesa baaba nibaza kuheereza nk’abamiisani, kandi nkaba ntebeekanisa n’oku baragyende ahu barikuza kuheereza. Okugyendera omu nyonyi obwire obwo kikaba nikitwara esente nyingi, n’ahabw’ekyo abarikuza omu mahanga ga Africa na Asia bakaba bagyendera aha meeri z’emigugu. Ku haahingwireho emyaka, abamiisani bakatandika kukoresa enyonyi ahakuba emihendo ekatuuba okukira ira.
Ndiyo nintebeekanisa dipuloma z’okuha abeegi ba Gileadi
OKUZA OMU NTEERANE EMPANGO
Omuri 1960, nkatebeekanisa enyonyi ezi twapangiise kuruga omuri United States, kuza Buraaya omuri 1961 aha nteerane empango ezirikubamu ab’amahanga agandi. Kandi nkaza omu rumwe aha nteerane ezi omuri Hamburg, Germany. Bwanyima y’oruteerane, nyowe n’Ababeseeli abandi bashatu tukapangisa emotoka kuruga omuri Germany kuza Italy reero twataayaayira ofiisi y’eitaagi ey’omuri Rome. Tukagumizamu twaza France, twacwekanisa enshozi za Pyrenees, twaza omuri Spain, ahu omurimo gwaitu gw’okubuurira gwabaire gutarikwikirizibwa. Tukabaasa kuha ab’eishe-emwe b’omuri Barcelona ebitabo, ebi twabaire tushembire gye birikureebeka nk’ebiconco. Tukashemererwa munonga kubareeba! Ku twarugireyo, tukaza Amsterdam reero twakwata enyonyi twagaruka New York.
Omuri 1962, nkaheebwa obujunaanizibwa bw’okutebeekanisa eby’engyenda z’ab’eishe-emwe 583
abaabaire nibaza omu nteerane empango ezaabaire niziza kubaho omu myanya etari emwe n’emwe omu nsi yoona. Oruteerane oru orwabaireho omuri 1963 rukaba rwine omutwe “Amakuru Marungi ag’Ebiro Byona.” Ab’eishe-emwe aba bakaba nibaza omu nteerane omuri Buraaya, Asia, South Pacific, n’omuri Honolulu, Hawaii, reero bahendere na Pasadena, omuri California. Bakaba nibaza kutaayaaya n’omuri Lebanon na Jordan kureeba ebicweka ebirikugambwaho omu Baibuli. Nyowe n’ab’eishe-emwe abu naabaire ninkora nabo tukaba tutebeekanisa enyonyi ezi baraagyenderemu, oburaaro n’ebihandiiko ebirikwetengyesa.OW’OKUGYENDA NAWE OMUSYA
Omwaka gwa 1963 gukaba guri mukuru munonga ahabw’enshonga endiijo. Omu kwa Mukaaga 29, nkataaha omu bushwere na Lila Rogers kuruga omuri Missouri, owaizire aha Beseeli omuri 1960. Bwanyima ya saabiiti emwe tuherize kugaitwa, tukagyenda hamwe kurambura omu mahanga nka Greece, Egypt, na Lebanon. Okuruga aho tukatemba enyonyi twaza omuri Jordan. Kwonka ahabw’okugira ngu omurimo gwaitu gw’okubuurira gukaba guzibiirwe okwo, ab’obushoboorozi bakaba batarikwikiriza Abajurizi ba Yehova kuza omu ihanga eryo. N’ahabw’ekyo tukaba tutarikumanya ekiraabeho twahikayo. Teekateeka oku twashemereirwe ku twareebire ab’eishe-emwe beemereire ahu barikwakiirira abantu baine ekipande ekirikugira kiti: “Nitubaakiira Abajurizi ba Yehova”! Tukashemererwa munonga kutaayaaya omu myanya erikugambwaho omu Baibuli ahu Abrahamu, Isaaka, na Yakobo baabaire nibatuura, n’ahu Yesu n’entumwa ze baabuuriire, n’ahu Obukristaayo bwatandikiire reero bukajanjaara “okuhitsya aha muheru gw’ensi.”—Ebyakozirwe 13:47.
Kumara emyaka 55, Lila atwire naanshagika omu buheereza bwaitu bwona. Tukataayaayira amahanga nka Spain na Portugal emirundi mingi ahu omurimo gwaitu gwabaire gutarikwikirizibwa. Tukabaasa kugumya ab’eishe-emwe turikubatwarira ebitabo n’ebindi ebi baabaire nibeetenga. Kandi tukataayaayira n’ab’eishe-emwe abaabaire abari omu kihome kya Cádiz, omuri Spain. Kikanshemeza munonga okuha ab’eishe-emwe abo orubazo rw’okubagumya.
Ndi na Patricia na Jerry Molohan turikuza aha Ruteerane Oruhango “Obusingye omu Nsi” omuri 1969
Kuruga omu 1963, mbaasize kutebeekanisa eby’engyenda ahabw’enteerane empango ezaabaire nizibaho omu Africa, Australia, Central, South America, Europe, omu bicweka by’oburugwa-izooba, Hawaii, New Zealand, na Puerto Rico. Nyowe na Lila tutungire omugisha gw’okuza omu nteerane empango, ezi tutarikubaasa kwebwa nk’orwabaireho omuri Warsaw, Poland, omu gwa 1989. Ab’eishe-emwe kuruga Russia bakabaasa kwija aha ruteerane orwo oruhango. Kandi nirwo rwabaire ruri oruteerane rwabo orw’okubanza kuzamu! Tukareeba ab’eishe-emwe na banyaanyazi-itwe abaizire aha ruteerane abaabaire bamazire emyaka mingi omu kihome ahabw’okwikiriza kwabo omuri Soviet Union.
Obuheereza obundi obwandeteire okushemererwa n’okutaayaayira Ababeseeli n’abamiisani omu nsi yoona kubagumya. Okutaayaaya kwaitu nk’okwo okw’aha muheru, tukaza South Korea twareeba ab’eishe-emwe 50 abaabaire abari omu kihome kya Suwon. Bakaba baine emiteekateekyere mirungi kandi baine ekihika ky’okugaruka kuheereza Yehova bataine kirikubaremesa. Okubareeba kikatugumya munonga!—Abarooma 1:11, 12.
OKWEYONGYERA KW’ABABUURIZI NIKUREETA OKUSHEMERERWA
Ndeebire oku Yehova ahaire abaheereza be emigisha emyaka egi yoona. Obu naabatizibwa omuri 1943, ababuurizi bakaba bari 100,000. Hati hariho ababuurizi 8,000,000 abarikuheereza Yehova omu mahanga 240. Obweziriki bw’abeegi ba Gileadi buhwereire munonga omu kweyongyera oku. Tutungire okushemererwa okukorera hamwe n’abamiisani aba n’okubahwera kuhika omu mwanya ei barikuza kuheerezamu.
Nyine okushemererwa ahabw’okugira ngu obu naabaire nkiri muto, nkacwamu kuheereza Yehova, kandi naijuza foomu y’okuza aha Beseeli. Yehova ampaire emigisha emyaka egi yoona. Oyihireho okuheereza aha Beseeli, nyowe na Lila twine okushemererwa ahabw’okubuurira n’ebibiina bingi by’omuri Brooklyn kumara emyaka erengire 50 kandi tutungire n’abanywani baingi abaabuzima.
Na hati ninkiheereza aha Beseeli kandi Lila naakinshagika buri izooba. N’obu ndaabe nyine emyaka erikurenga 84, ninshemererwa kureeba ngu ninkibaasa kugira eki naakora nk’okuhwera aha bikwatiraine n’amabaruha aha ofiisi y’eitaagi.
Ndi na Lila obunaku obu
Buzima ka n’omugisha kuba omu kibiina kya Yehova n’okureeba okuhikiirira kw’ebigambo ebiri omu Malaki 3:18 ebirikugira biti: “Muryagaruka mumanye kutaanisa abahikiriire n’ababi, abarikukorera Ruhanga n’abatarikukorera Ruhanga.” Buri izooba nitureeba ensi ya Sitaane neeyeyongyera kuba mbi, kandi abantu tibaine matsiko n’okushemererwa. Kwonka abo abarikukunda Yehova baine okushemererwa n’amatsiko gahami aha biro by’omumaisho, n’omu biro ebi eby’akabi kaingi. Buzima n’omugisha gw’amaani okubuurira abandi amakuru marungi! (Matayo 24:14) Juba Obukama bwa Ruhanga nibwija kuhindura ensi egi embi ebe Paradiso. Buzima twiniire ekihika eizooba eryo! Reero, buri omwe omu nsi naija kugira amagara marungi n’okushemererwa.