1, 2. (a) Empindahinduka ezirikubaho kitaraariire nizibaasa kutukwataho zita? (Reeba ekishushani aha kutandika.) (b) Kurugiirira ahari Zaaburi 131, niki ekirikubaasa kutuhwera kugira obusingye?

BWANYIMA ya Lloyd na Alexandra kuheereza aha Beseeli kumara emyaka erengire 25, bakashabwa kuba baapayoniya. Omu kubanza, bakaguubwa kubi. Lloyd naagira ati: “Nkaba ninteekateeka ngu obuheereza bwangye aha Beseeli nibwo abantu barikumanyiraho. Omu biteekateeko nketegyereza ahabw’enki empinduka yaabaireho, kwonka saabiiti ezaakuratsireho n’ameezi agaakuratsireho, nkaba ninyehurira nk’otakikundwa.” Obumwe Lloyd akaba agira emiteekateekyere mirungi aha mpinduka, obundi agira amaganya.

² Obumwe n’obumwe, nihaija kuguma nihabaho empindahinduka ezi tutarikuteekateeka ngu niziza kubaho, kandi obumwe nizibaasa kutureetera okwerarikirira n’amaganya. (Enfumu  12:25) Empindahinduka zaaba zigumire kwikiriza, nari kworobera, nitubaasa kukora ki kuguma twikaikaine? (Shoma Zaaburi 131:1-3.) Ka tureebe oku abaheereza ba Yehova aba ira n’ab’obunaku obu babaasize kuguma baine obusingye haabaho empindahinduka kitaraariire.

3. Embeera ya Yosefu ekahinduka eta ahonaaho?

³ Teekateeka aha ky’okureeberaho kya Yosefu. Yakobo akaba naakunda Yosefu kukira abaana be abandi boona. Eki kikareetera beene ishe kumugirira eihari ry’amaani. Obu Yosefu yaabaire aine emyaka 17, bakamuguza omu buhuuku. (Okutandika 37:2-4, 23-28) Kumara emyaka 13, akabonabonera omuri Misri nk’omuhuuku, n’obu yaabaire ari omu kihome. Yosefu akaba ari hare na ishe, ou yaabaire naakunda munonga. Embeera ye ekaba neebaasa kumureetera kwehwa amatsiko n’okugira ekiniga, kwonka tikwo kyabaire. Niki ekyamuhwereire?

4. (a) Yosefu akakora ki obu yaabaire ari omu kihome? (b) Yehova akagarukamu ata okushaba kwa Yosefu?

⁴ Obu Yosefu yaabaire naabonabona omu kihome, ashemereire kuba yaataire omutima aha ku Yehova yaabaire naamuhwera. (Okutandika 39:21; Zaaburi 105:17-19) Kandi obundi naabaasa kuba yaateekateekire aha birooto by’obunabi ebi yaarootsire akiri muto reero ekyo kikamuhamiza ngu Yehova ari nawe. (Okutandika 37:5-11) Naabaasa kuba yaabaire naashaba emirundi mingi arikugambira Yehova ekiri aha mutima gwe. (Zaaburi 145:18) Kandi Yehova akagarukamu okushaba kwa Yosefu arikumuha obuhame ngu naija ‘kuguma nawe’ n’obu haakubaho ki.​—Ebyakozirwe 7:9, 10. * (Reeba obugambo obw’ahansi.)

5. “Obusingye bwa Ruhanga” nibubaasa kutuhwera buta kumariirira kuheereza Yehova?

⁵ N’obu embeera yaitu yaakuba egumire eta, nitubaasa kutunga “obusingye bwa Ruhanga” oburikurinda ebiteekateeko byaitu tukaguma twine obugwagye. (Shoma Abafilipi 4:6, 7.) Twagira okwerarikirira n’amaganya, “obusingye bwa Ruhanga” nibubaasa kutuhwera kugumizamu nitumuheereza tutarikuruha. Ka twegye aha b’eishe-emwe na banyaanyazi-itwe ababaasize kuraba omu mbeera egi.

6, 7. Okushaba nikubaasa kutuhwera kuta kugaruka kugira obusingye? Ha eky’okureeberaho.

⁶ Obu Ryan na Juliette baamanya ngu obwire bwabo bw’okuba baapayoniya ab’omutaano buhwaireyo, bakahwa amaani. Ryan naagira ati: “Ahonaaho tukakigambira Yehova omu kushaba. Tukamanya ngu hati twine omugisha gw’omutaano kworeka ngu nitumwesiga. Baingi omu kibiina kyaitu bakaba bari basya omu mazima, tukashaba Yehova kutuhwera kutaho eky’okureeberaho kirungi eky’okwikiriza.”

⁷ Yehova akagarukamu ata okushaba kwabo? Ryan naagira ati: “Ahonaaho bwanyima y’okushaba, enyehurira mbi n’emiteekateekyere egwire ebi twabaire twine omu kubanza bikaturugamu. Obusingye bwa Ruhanga bukarinda emitima yaitu n’ebiteekateeko byaitu. Tukamanya ngu nitubaasa kuguma turi  ab’omugasho ahari Yehova twaguma twine emiteekateekyere mirungi.”

8-10. (a) Omwoyo gurikwera nigubaasa kutuhwera guta kusingura okwerarikirira? (b) Yehova naabaasa kutuhwera ata twata omutima aha kumuheereza?

⁸ Omwoyo gurikwera nigubaasa kutuhwera kugira obugwagye, n’okwijuka ekyahandiikirwe ekiraatuhwere kwetegyereza eki buzima twine kutwara nka kikuru. (Shoma Yohaana 14:26, 27.) Yetegyereze ekyahikire ahari Philip na Mary, omushaija n’omukazi we abaabaire bamazire emyaka nka 25 aha Beseeli. Omu meezi ana, baanyinabo bombi n’omunyabuzaare ondiijo bakafa, kandi bakaba baine kureeberera ishe wa Mary, oine endwara y’okuhuurukana.

⁹ Philip naagira ati: “Obumwe nkaba nindeeba ngu ninyemera embeera, kwonka haine ekyabaire nikiburaho. Omu kicweka kimwe ky’Omunaara gw’Omurinzi nkashomamu ebiri omu Abakolosai 1:11. N’amazima nkaba ningumisiriza, kwonka butari omu bwijwire. Nkaba nyine ‘kugumisiriza omuri byona ntarikuruha, kandi nyine okushemererwa.’ Ekyahandiikirwe eki kikanyijutsya ngu okushemererwa kwangye tikurikwegamira aha mbeera zangye, kureka aha ku omwoyo gwa Ruhanga gurikumpwera.”

¹⁰ Ahabw’okugira ngu Philip na Mary bakaguma bataire omutima aha kuheereza Yehova, akabaha emigisha omu miringo mingi. Obwire bukye barugire aha Beseeli, bombi bakatunga abeegi ba Baibuli abarikutunguuka, kandi abaabaire nibenda kwega omurundi ogurengire ahari gumwe buri saabiiti. Mary naagira ati: “Bakaba nibatureetera okushemererwa kandi nigwo muringo ogu Yehova yaabaire naatugambira ngu buri kimwe nikiza kuba gye.”

11, 12. (a) Yosefu akaha ata Yehova ah’okwihirira kumuha emigisha? (b) Yehova akashuumbuusha ata Yosefu ahabw’okugumisiriza kwe?

¹¹ Embeera zaahinduka ahonaaho, nitubaasa kwerarikirira munonga tugume nituteekateeka aha buremeezi bwaitu bwonka. Ekyo kikaba nikibaasa kuhika ahari Yosefu. Kwonka omu mwanya gw’ekyo, akacwamu kukora eki yaabaire naabaasa omu mbeera ye. Nk’oku yaabaire ari omweziriki arikukorera Potifaari, akaguma ari omweziriki n’omu kihome arikukora buri murimo ogu mukuru w’abarinzi b’ekihome yaabaire amuha gwona.​—Okutandika 39:21-23.

¹² Eizooba rimwe, Yosefu akaheebwa obujunaanizibwa bw’okureeberera babiri abu yaabaire akomirwe nabo abaabaire nibaheereza omu kikaari kya Faraho. Yosefu akabatwariza  gye, kandi abashaija aba tibaratiinire kumugambira okwerarikirira kwabo n’ebirooto ebi baabaire barootsire nyekiro. (Okutandika 40:5-8) Yosefu akaba atarikumanya ekiraarugyemu, kwonka okugaaniira okwo bwanyima kukamuhitsya aha kutunga obugabe. Bwanyima y’emyaka ebiri, akarekurwa yaaruga omu kihome, yaaba omutegyeki rugambwa omuri Misri. Faraho niwe wenka owaabaire naakiza Yosefu obushoboorozi omuri Misri!​—Okutandika 41:1, 14-16, 39-41.

13. Omu mbeera zoona ezi turikuba turimu, nitubaasa kuha tuta Yehova ah’okwihirira kutuha emigisha?

¹³ Naitwe nka Yosefu, nitubaasa kweshanga omu mbeera ezi tutarikubaasa kuzibira. Kwonka twagumisiriza kandi tukakora kyona eki turikubaasa, Yehova naija kutuha emigisha. (Zaaburi 37:5) Nangwa n’obu twakuba tushobeirwe kandi twerarikiriire, “titurikuhwa matsiko.” (2 Abakorinso 4:8) Yehova naija kuba ari naitwe, na munonga twahamira aha buheereza bwaitu.

14-16. Filipo akooreka ata ngu ahamiire aha buheereza bwe n’obu embeera ze zaabaire zihinduka?

¹⁴ Omwegi wa Yesu Filipo akataho eky’okureeberaho kirungi omu kuguma ataire omutima aha buheereza bwe n’obu haabaireho empinduka. Hariho obu yaabaire aine obuheereza busya omuri Yerusaalemu. (Ebyakozirwe 6:1-6) Bwanyima buri kimwe kikahinduka. Bwanyima ya Stefano kwitwa, Abakristaayo bakahiiganisibwa munonga baahunga omuri Yerusaalemu. Ahabw’okugira ngu Filipo akaba naayenda kugumizamu naayejumbira kimwe omu kuheereza Yehova, akaza omuri Samaria, ei abantu baabaire nibenda kuhurira amakuru marungi.​—Matayo 10:5; Ebyakozirwe 8:1, 5.

¹⁵ Filipo akaba ayeteekateekire kwebemberwa omwoyo gurikwera kuza ahu Yehova arikwenda ngu aze. N’ahabw’ekyo Yehova akamukoresa kubuurira omu myanya ei abantu baabaire batakahuriire amakuru marungi. Abayudaaya baingi bakaba nibagaya Abasamaria, kandi barikubatwariza kubi. Kwonka Filipo akaba atarikushoroora, kandi akababuurira amakuru marungi. Kandi Abasamaria bakamuhurikiza “n’omutima gumwe”!​—Ebyakozirwe 8:6-8.

¹⁶ Ekyakuratsireho, omwoyo gwa Ruhanga gukahabura Filipo kuza kubuurira omuri Azooto na Kaisarea endembo ezaabaire zirimu Abanyamahanga baingi. (Ebyakozirwe 8:39, 40) Embeera ze zikagaruka zaahinduka. Akatuura omu kicweka ekyo yaagira eka. Kwonka n’obu embeera za Filipo zaabaire zihinduka, akaba aguma naayejumbira kimwe omu buheereza bwe, kandi Yehova akaguma  naamuha emigisha n’ab’omu ka ye.​—Ebyakozirwe 21:8, 9.

17, 18. Embeera zaitu zaahinduka, okwejumbira kimwe omu buheereza nikiija kutuhwera kita?

¹⁷ Baingi abari omu buheereza obw’obutwire nibagira ngu okwejumbira kimwe omu buheereza nikibahwera kuguma baine okushemererwa n’emiteekateekyere mirungi n’obu embeera zaabo zaakuhinduka. Nk’eky’okureeberaho, obu ow’eishe-emwe Osborne n’omukazi we Polite baaruga aha Beseeli omuri South Africa, bakaba nibateekateeka ngu nikiija kworoba kutunga omurimo gw’okukora obwire bukye n’ah’okuraara. Kwonka Osborne naagira ati: “Eky’obusaasi, tituratungire omurimo gw’okukora ahonaaho nk’oku twabaire nituteekateeka.” Polite naagira ati: “Tukamara ameezi ashatu tutakatungire murimo, kandi tukaba tutaine sente ezi tubiikire. Embeera buzima zikaba zigumire.”

¹⁸ Niki ekyahwereire Osborne na Polite omu bwire bw’amaganya obu? Osborne naagira ati: “Okubuurira n’ab’omu kibiina kikatuhwera munonga kutahuga n’okuguma twine emiteekateekyere mirungi.” Omu mwanya gw’okushutama omuka barikwerarikirira, bakacwamu kwejumbira kimwe omu buheereza. Okukora eki kikabareetera okushemererwa kwingi! Kandi Osborne naayongyeraho ati: “Tukasherura emirimo buri hamwe, kandi tukarugaho twatunga eky’okukora.”

19-21. (a) Niki ekiraatuhwere kuguma twine obusingye? (b) Nitubaasa kugasirwa tuta twaikiriza empindahinduka?

¹⁹ Nk’oku twareeba, twaguma turi abeeziriki omu mbeera zoona ezi turimu, kandi tukeesigira kimwe Yehova, nitwija kuguma twine obusingye n’obu haakubaho ki. (Shoma Miika 7:7.) Haahinguraho obwire, nitubaasa kwetegyereza ngu tutungire emigisha mingi y’eby’omwoyo ahabw’okwikiriza empindahinduka. Polite naashoboorora ngu okuruga aha Beseeli akaza omu buheereza obundi kimwegyeise eki kirikumanyisa buzima kwesiga Yehova, n’obu embeera zaakuba nizireebeka  nk’ezigumire. Naagira ati: “omukago gwangye nawe gweyongyeire kuhama.”

²⁰ Mary, owaagambwaho omu kubanza, na hati akiri payoniya kandi naakireeberera ishe okuzire. Naagira ati: “Nyegire ngu naagira okwerarikirira, nyine kwemereza ebi ndikukora nkashaba, reero nkaikaikana. Okureka enshonga omu mikono ya Yehova nikyo kintu kikuru eki nyegire, kandi eki nikiija kwetengyesa munonga omu biro by’omumaisho.”

²¹ Lloyd na Alexandra abaaba baagambirweho nibaikiriza ngu empindahinduka zikagyeza okwikiriza kwabo omu miringo ei baabaire batarikuteekateeka. Kwonka hati nibareeba oku okugyezibwa oku kubahwereire. Hati nibamanya ngu okwikiriza kwabo kuhami kubaasa kubahwera baaba baine oburemeezi, kandi nibareeba ngu bari abantu abashemeire.

22. Twakora kyona ekirikubaasika omu mbeera ezi turimu, nitubaasa kugira buhame ki?

²² Omu busingye obu, embeera zaitu nizibaasa kuhinduka ahonaaho. Nitubaasa kuza omu buheereza obundi, nitubaasa kurwara, nari kyetengyese kureeberera ab’eka yaitu omu muringo musya. Kwonka kyona ekiraabeho, gira obuhame ngu Yehova naakufaho, kandi naija kukuhwera omu bwire obuhikire. (Abaheburaayo 4:16; 1 Petero 5:6, 7) Beitu ekyo kitakabaireho, kora kyona eki orikubaasa omu mbeera ei orimu. Shaba Tataitwe ow’omu iguru, Yehova, kandi omwesigire kimwe. Omu muringo ogu, n’obu embeera zaawe zaakuhinduka zita, noija kuguma oine obusingye oburikuruga ahari Yehova.