1, 2. (a) Ni murimo ki ogu Yesu yaabaire naatwara nka mukuru, kandi ahabw’enki? (b) Twine kukora ki kuba abasinguzi omu ‘kukora hamwe na Ruhanga’?

YESU KRISTO akabanza kuba omubaizi kandi bwanyima yaaba omubuurizi. (Mako 6:3; Abarooma 15:8) Akakora gye emirimo egi yombi. Obu yaabaire ari omubaizi, akeega kukoresa gye ebikoreso by’ababaizi kukora ebibaizirwe birungi. Obu yaabaire ari omubuurizi, ahabw’okumanya gye Ebyahandiikirwe akahwera abantu ba butoosha kwetegyereza amazima agari omu Kigambo kya Ruhanga. (Matayo 7:28; Luka 24:32, 45) Obu Yesu yaabaire aine emyaka 30, akarekyera aho obubaizi yaaba omubuurizi, ahakuba akaba naamanya ngu ogu nigwo murimo ogurikukirayo obukuru ogu arikubaasa kukora. Akagira ngu Ruhanga akamutuma omu nsi kubuurira amakuru marungi g’Obukama. (Matayo 20:28; Luka 3:23; 4:43) Yesu akeebembeza omurimo gw’okubuurira amakuru marungi, kandi akaba naayenda ngu n’abandi bakore nikyo kimwe.​—Matayo 9:35-38.

² Baingi ahariitwe tituri babaizi, kwonka twena turi ababuurizi abarikwegyesa abandi amakuru marungi. Omurimo ogu ni mukuru munonga ahakuba na Ruhanga naagwejumbamu. Nangwa, nitwetwa ‘abakozi abarikukora hamwe na Ruhanga.’  (1 Abakorinso 3:9; 2 Abakorinso 6:4) Nitwikirizana n’omuhandiiki wa Zaaburi owaagizire ati: “Okutwarira hamwe ekigambo kyawe kyona gaba amazima.” (Zaaburi 119:159, 160) Ekigambo kya Yehova n’amazima. Niyo nshonga ahabw’enki nitwenda kuhamya ngu nitumanya ‘kushoboorora gye ekigambo ky’amazima’ omu kubuurira. (Shoma 2 Timoseo 2:15.) N’ahabw’ekyo nituguma nituteeraho kuba abahangu omu kukoresa Baibuli, ekikoreso kikuru omu kwegyesa abandi ebirikukwata ahari Yehova, Yesu, n’Obukama. Ekibiina kya Yehova kubaasa kutuhwera kuba abasinguzi omu kubuurira, kituhaire ebikoreso ebindi, kandi nabyo twine kwega kubikoresa. Ebi n’ebikoreso eby’Okukoresa omu Kwegyesa.

3. Tushemereire kuta omutima ahari ki, kandi Ebyakozirwe 13:48 nihatuhwera hata kukora eki?

³ Noobaasa kwebuuza ahabw’enki nitubyeta eby’Okukoresa omu Kwegyesa bitari eby’Okukoresa omu Kubuurira. N’ahabw’okuba “okubuurira” nikimanyisa okugambira abantu obutumwa, kwonka “okwegyesa” nikimanyisa okushoboorora obutumwa obwo kugira ngu beetegyereze ebi baagambirwa reero babigyendereho. Omu bwire bukye obutsigaireyo emperu ekahika, twine kuta omutima aha kutandika abeegi ba Baibuli kandi tukabeegyesa amazima bakaba abeegi ba Kristo. Eki nikimanyisa ngu twine kuba abeeziriki omu kusherura abo abarikwenda kutunga amagara agatahwaho, kandi tubahwere kutandika kuheereza Yehova.​—Shoma Ebyakozirwe 13:44-48.

4. Nitubaasa kusherura tuta abarikwenda kutunga amagara agatahwaho?

⁴ Nitubaasa kusherura tuta abarikwenda kutunga amagara agatahwaho? Abakristaayo b’omu kyasha ky’okubanza bakaba baine kubuurira kubaasa kutunga abantu nk’abo. Yesu akagambira abeegi be ati: “Tauni yoona nari ekirorero kyona, omu muritaaha, mubanze musherure omuntu waamwo oshemereire.” (Matayo 10:11) Naitwe hati twine kukora nikyo kimwe. Kwonka, abantu baaba batari b’amazima, baine amaryo, nari batarikufayo ahari Ruhanga, titushemereire kuteekateeka ngu nibaija kuhurikiza amakuru marungi. Nitusherura abantu abarikugamba amazima, abacureezi, kandi abarikwenda kwega ebirikukwata ahari Yehova. Nitubaasa kugyeragyeranisa omurimo gwaitu gw’okusherura abantu n’ogwa Yesu ogw’obubaizi. Atakakozire kibaizirwe kyona, nk’orwigi, omugamba, nari ekindi kyona, akaba abanza asherura emiti mirungi. Bwanyima akaba akoresa ebikoreso bye, n’okumanya kwe kukora ekibaizirwe. Omu muringo nigwo gumwe obunaku obu, twine kubanza twasherura abantu abacureezi, reero tukorese ebikoreso byaitu n’obukoryo obu twine kubahwera kuba abeegi ba Yesu.​—Matayo 28:19, 20.

5. Twine kumanya ki aha bikwatiraine n’ebi Turikukoresa omu Kwegyesa? Ha eky’okureeberaho. (Reeba ekishushani aha kutandika.)

⁵ Waaba oine eby’okukoresa, buri kikoreso nikiba kiine omurimo gwakyo ogw’omutaano. Nk’eky’okureeberaho, teekateeka aha bikoreso ebi Yesu yaakoreise obu yaabaire ari omubaizi. * (Reeba obugambo obw’ahansi.) Akaba aine ebikoreso eby’okupima, okuraanda, okutema nari okushara, okufumura, n’eby’okumuhwera kukwatanisa hamwe embaaho. Nikyo kimwe, buri kikoreso aha bi Turikukoresa omu Kwegyesa kiine omurimo gwakyo ogw’omutaano. N’ahabw’ekyo ka tureebe oku twine kukoresa ebikoreso bikuru ebi.

6, 7. (a) Iwe obaasize kukoresa ota kaada za jw.org? (b) Ahabw’enki nitukoresa obupapura bw’okweta abantu omu nteerane?

⁶ Kaada za jw.org. Kaada ezi tiziri mpango kwonka nizikora gye omu kuhwera abantu kutumanya, n’okumanya omukura gwaitu jw.org. Baaza aha mukura gwaitu, nibabaasa kumanya bingi ebirikutukwataho kandi bashabe n’okwegyesibwa Baibuli. Abantu abarikurenga 400,000 bashabire kwegyesibwa Baibuli kurabira ahari jw.org, kandi abandi baingi nibashaba buri izooba. Noobaasa kuguma noogyendaho na kaada nkye buri izooba, reero ozikorese waaba noogaaniira n’abantu.

⁷ Obupapura bw’okweta abantu. Akapapura k’okweta abantu omu nteerane nikagira kati: “Nooyetwa kwegyesibwa Baibuli Abajurizi ba Yehova.” Reero nikoongyeraho ngu noobaasa kukora eki “omu nteerane zaitu” nari “orikwegyesibwa omuntu.” N’ahabw’ekyo akapapura aka nikahwera abantu kutumanya kandi keeta abaine ekyetengo ky’eby’omwoyo kwija ngu tubahwere kwega Baibuli. (Matayo 5:3) Kwonka, abantu nibaakiirwa kwija omu nteerane zaitu yaaba nibaikiriza kwega Baibuli nari nibanga. Baija omu nteerane zaitu, nibareeba ngu hariho ebintu bingi ebi barikubaasa kwega omu Baibuli.

8. Ahabw’enki ni kikuru abantu nangwa kwija omuri rumwe aha nteerane zaitu? Ha eky’okureeberaho.

⁸ Ni kikuru ngu tugume nitweta abantu kwija omu nteerane zaitu nangwa n’obu baakwija omurundi gumwe. Ahabw’enki? Ahakuba ku barikwija, nibareeba ngu Abajurizi ba Yehova nibeegyesa amazima ga Baibuli, kandi ngu nibahwera abantu kumanya Ruhanga, eki ediini z’ebishuba zitarikukora. (Isaaya 65:13) Nk’eky’okureeberaho, Ray na Linda abari hamwe omu bushwere omuri United States bakareeba entaaniso egi emyaka mikye enyima. Bakaba nibaikiririza omuri Ruhanga kandi bakaba nibenda kwongyera kumumanya gye. N’ahabw’ekyo bakacwamu kuza omu makanisa goona agari omu rurembo rwabo, kandi bakaba nibasherura ebintu bibiri kubaasa kwegaita ahari omwe aharizo. Eky’okubanza, bakaba baine kugira eki baayega omu kanisa egyo, ekya kabiri, abari omu kanisa egyo bakaba baine kuba nibajwara gye kworeka ngu n’abaheereza ba Ruhanga. Eki kikabatwarira emyaka mingi ahabw’okugira ngu orurembo rwabo rukaba rurimu amakanisa maingi. Kwonka tihariho kanisa n’emwe ei baatungiremu eki barikwenda. Tihaine eki baabaire beegamu, kandi abantu b’amakanisa ago bakaba nibajwara omu muringo gutarikuhaisa ekitiinisa. Bwanyima y’okuza omu kanisa erikuhererukayo aha zi baabaire bahandiikire, Linda akaza aha murimo kandi Ray yaagaruka omuka. Ku yaabaire naagaruka omuka, akavuga emotoka yaaza aha Kyombeko ky’Obukama. Akagira ati: ‘Ka nfe gazayo ndeebe ekirikubayo.’ Buzima ebi yaabaire naayenda byona niyo yaabishangire! Buri omwe aha Kyombeko ky’Obukama akaba naatwaza omu muringo gw’embabazi na rukundo, kandi ajwaire gye munonga. Ray akashutama omu ntebe ez’omu maisho kandi akakunda ebi yaayegire! Eki nikitwijutsya oku Paulo yaagambire aha muntu orikwija omu ruteerane omurundi gw’okubanza reero akagira ati: “Buzima kwo Ruhanga ari omuriimwe.” (1 Abakorinso 14:23-25) Bwanyima, Ray akaguma naija omu nteerane buri Sande. Akatandika n’okwija omu buri ruteerane orw’aha gati ya saabiiti. Linda nawe akatandika kwija omu nteerane,  n’obu baraabe baabaire baahikire omu myaka 70, bakeega Baibuli kandi baabatizibwa.

9, 10. (a) Ahabw’enki turakiti zoorobi kukoresa? (b) Shoboorora oku orikubaasa kukoresa turakiti Obukama bwa Ruhanga Niki?

⁹ Turakiti. Twine turakiti munaana ezi turikukoresa. Zoorobi kukoresa, kandi nizikora gye omu kutandika kugaaniira n’abantu. Kuruga obu turakiti y’okubanza aharizo yaashohozibwa 2013, hateirwe obuhumbi nka butaano obwa turakiti ezi! Turakiti ezi zoona zitebeekanisiibwe omu muringo gumwe. N’ahabw’ekyo waayega kukoresaho emwe, nikikworobera kukoresa n’ezindi! Noobaasa kukoresa ota turakiti kutandika kugaaniira n’omuntu?

¹⁰ Shana obundi nooyenda kukoresa turakiti Obukama bwa Ruhanga Niki? Yoreka omuntu ekibuuzo ekiri aha mutwe gwa turakiti reero omubuuze oti: “Nooteekateeka ngu Obukama bwa Ruhanga Niki? Mbwenu shi noogira ngu . . . ?” Bwanyima mubuuze aha by’okugarukamu bishatu eki arikubaasa kutooranaho. Omu mwanya gw’okugira ngu eky’okugarukamu kye kihikire nari kigwire, igura omunda ya turakiti omworekye ahansi y’omutwe “Eki Baibuli Erikwegyesa” reero mushome ebyahandiikirwe ebiriho, nka Danieli 2:44 na Isaaya 9:6. Bwanyima y’okugaaniira kwanyu, buuza ekibuuzo ekiri enyima ya turakiti ahansi y’omutwe, “Eky’okuteekateekaho”: “Ni mbeera ki eziraabeho omu nsi Obukama bwa Ruhanga ku buraabe nibutegyeka?” Noobaasa kugarukamu ekibuuzo ekyo waagarukayo omurundi ogundi. Mwagaruka kureebana, noobaasa kukoresa eishomo rya 7 ery’akatabo Amakuru Marungi Kuruga Ahari Ruhanga!, kamwe aha by’okukoresa kutandika kwegyesa abantu Baibuli.

11. Magaziini zaitu zitebeekanisiibwe kukora ki, kandi niki eki twine kubanza kumanya?

¹¹ Magaziini. Omunaara gw’Omurinzi na Awake! nizo magaziini ezirikukirayo kuteerwa n’okuvunuurwa omu nsi! Ahabw’okugira ngu abantu baingi omu mahanga gatari gamwe nibashoma magaziini ezi, emitwe yaazo neeba neegamba aha bintu ebirikushemeza abantu buri hamwe. Tushemereire kukoresa magaziini ezi kuhwera abantu kuta omutima aha bintu bikuru obunaku obu. Kwonka, twine kubanza kumanya abu magaziini zigyendereire kuhwera.

12. (a) Awake! etebeekanisiibwe kuhwera baahi, kandi eine kigyendererwa ki? (b) Otungire birungi ki omu kukoresa Awake!?

¹² Awake! etebeekanisiibwe kuhwera abantu abarikumanya bikye ahari Baibuli nari abataine ki barikugimanyaho. Nibabaasa kuba bataine ki barikumanya aha nyegyesa z’Ekikristaayo, batarikwesiga diini, nari batarikuteekateeka ngu Baibuli neebaasa kubahwera. Ekigyendererwa kimwe kikuru ekya Awake! n’okuhamiza omushomi ngu Ruhanga ariho. (Abarooma 1:20; Abaheburaayo 11:6) Kandi neehwera n’abashomi kwikiriza ngu Baibuli buzima ‘n’ekigambo kya Ruhanga.’ (1 Abatesalonika 2:13) Awake! ez’omwaka 2018 ziine emitwe egi: “The Way of Happiness,” “12 Secrets of Successful Families,” na “Help for Those Who Grieve.”

13. (a) Omunaara gw’Omurinzi ogw’okukoresa omu kubuurira gutebeekanisiibwe kuhwera baahi? (b) Otungire birungi ki omu kukoresa Omunaara gw’Omurinzi omu kubuurira?

¹³ Ekigyendererwa ky’Omunaara gw’Omurinzi  ogw’okukoresa omu kubuurira n’okuhwera abantu abarikukunda Ruhanga na Baibuli kumanya enyegyesa za Baibuli. Nibabaasa kuba baine ebi barikumanya ebirikukwata aha Baibuli, kwonka nibabaasa kuba batarikumanya buzima eki erikwegyesa. (Abarooma 10:2; 1 Timoseo 2:3, 4) Eminaara y’Omurinzi eya 2018 neegarukamu ebibuuzo ebi: “Baibuli Neekikora na Hati?,” “Niki Ekiraabeho omu Biro by’Omumaisho?,” na “Ruhanga Naakufaho?”

14. (a) Vidiyo ina eziri omu by’Okukoresa byaitu zitebeekanisiibwe kukora ki? (b) Ni birungi ki ebi otungire omu kworeka abantu vidiyo ezi?

¹⁴ Vidiyo. Obu Yesu yaabaire ari omu nsi, ababaizi bakaba baine ebikoreso by’emikono byonka. Kwonka hati, ababaizi baine n’ebikoreso ebirikukoresibwa amashanyarazi, nk’emishumeeno, eby’okufumura, n’eraanda. Twaba nitubuurira hati, okwongyera aha bitabo ebiteirwe, twine na vidiyo nungi ez’okworeka abantu. Ina aharizo ziri omu by’Okukoresa byaitu: Ahabw’enki Oshemereire Kwega Baibuli?, Niki Ekirikutwarirwa omu Kwegyesibwa Baibuli?, Niki Ekirikukorerwa aha Kyombeko ky’Obukama?, na Jehovah’s Witnesses​—Who Are We? Vidiyo engufu nizibaasa kutahitsya edakiika ibiri, kandi nizikora gye aha murundi gw’okubanza kugaaniira n’omuntu. Endaingwaho nizibaasa kukoresibwa twagarukayo kutaayaayira abantu n’abo abaine obwire bwingi. Vidiyo ezi nizikora gye ahabw’okuba nizibaasa kuhiga abantu kwega Baibuli n’okwija omu nteerane.

15. Abantu baareeba vidiyo zaitu omu rurimi rwabo nibabaasa kukwatwaho bata? Ha eby’okureeberaho.

¹⁵ Nk’eky’okureeberaho munyaanyazi-itwe akabugana omukazi owaafurukire kuruga omuri Micronesia ou orurimi rwe rw’okubanza rwabaire ruri Oruyapese. Munyaanyazi-itwe akamworeka vidiyo Ahabw’enki Oshemereire Kwega Baibuli? omu Ruyapese. Vidiyo ku yaatandikire, omukazi akagira ati: “Oru n’orurimi rwangye. Tindikubaasa kukiikiriza! Kurugiirira aha ngamba ye naaruga aha kirwa ky’owaitu. Naagamba orurimi rwangye!” Bwanyima y’ekyo, akagira ngu akaba naaza kushoma, kandi areebe buri kimwe ekiri aha mukura gwaitu jw.org omu rurimi rwe. (Gyeragyeranisa na Ebyakozirwe 2:8, 11.) Eky’okureeberaho ekindi n’ekya munyaanyazi-itwe ow’omuri United States ou mwihwa we arikutuura omu ihanga erindi. Akamwoherereza endagiriro erikumutwara aha vidiyo egi omu rurimi rwe. Akareeba vidiyo egi reero yaamwoherereza obutumwa arikugira ati: “Ekicweka ekirikworeka ngu omubi niwe arikutegyeka ensi nikyo kinkwatsireho munonga. Nshabire kurabira aha mukura kwegyesibwa Baibuli.” Eki nikishemeza munonga ahakuba naatuura omu ihanga ahu omurimo gwaitu gutarikwikirizibwa!

16. Shoboorora omugasho gwa burocuwa ishatu ezi: (a) Hurikiza Ruhanga Obone Kugumaho Ebiro Byona. (b) Amakuru Marungi Kuruga Ahari Ruhanga! (c) Ni Baahi Abarikukora Ebi Ruhanga Akunda Obunaku Obu?

¹⁶ Burocuwa. Nitubaasa kwegyesa tuta omuntu otarikubaasa kushoma gye nari twaba tutaine kitabo omu rurimi rwe? Nitubaasa kukoresa burocuwa Hurikiza Ruhanga Obone Kugumaho Ebiro Byona. * (Reeba obugambo obw’ahansi.) Eky’okukoresa kirungi omu kutandika kwegyesa abantu Baibuli ni  burocuwa Amakuru Marungi Kuruga Ahari Ruhanga! Noobaasa kworeka omuntu amashomo 14 agari enyima reero omubuuze eishomo eri yaakunda. Reero otandikye kumwegyesa omu ishomo eryo. Waakoreiseho omuringo ogu waaba ogarukireyo aha bantu? Burocuwa ya kashatu eri omu by’okukoresa byaitu eine omutwe Ni Baahi Abarikukora Ebi Ruhanga Akunda Obunaku Obu? Etebeekanisiibwe kutuhwera kwegyesa abeegi ba Baibuli kumanya ekibiina kyaitu. Kubaasa kwega kukoresa gye burocuwa egi ahari buri mwegi wa Baibuli, reeba Obuheereza Bwaitu n’Oku Turikutwaza​—Akatabo k’Okukoresa aka Maaci 2017.

17. (a) Buri katabo aku turikukoresa omu kwegyesa kaine kigyendererwa ki? (b) Boona abarikubatizibwa baine kukora ki, kandi n’ahabw’enki?

¹⁷ Ebitabo. Waatandika kwegyesa omuntu Baibuli orikukoresa burocuwa, eshaaha yoona noobaasa kumuhindura mutandikye kwega akatabo Niki Eki Turikwega omu Baibuli? Ekikoreso eki nikibaasa kuhwera omuntu kwega ebirikukiraho aha nyegyesa ezirikutandikirwaho. Omwegi yaaba naatunguuka reero akaheza akatabo aka, noobaasa kugumizamu omwegyese omu katabo Mwerindire omu Kukunda kwa Ruhanga. Akatabo aka nikaija kuhwera omwegi kugyendera aha misingye ya Baibuli butoosha. Ijuka ngu nangwa n’obu yaakubatizibwa, naaba aine kugumizamu naayega kuhitsya yaaheza obutabo bwombi. Eki nikiija kumuhwera kwongyera kwikiririza omuri Yehova n’okuguma amuhamiireho.​—Shoma Abakolosai 2:6, 7.

18. (a) Ebiri omu 1 Timoseo 4:16 nibihiga abarikwegyesa amazima kukora ki, kandi niharugamu ki? (b) Nituba twine kigyendererwa ki twaba nitukoresa eby’Okukoresa omu Kwegyesa?

¹⁸ Itwe Abajurizi ba Yehova, twine obujunaanizibwa bw’okwegyesa abantu ‘ekigambo ky’amazima g’engiri,’ ekirikubaasa kubahitsya aha kutunga amagara agatahwaho. (Abakolosai 1:5; shoma 1 Timoseo 4:16.) Kutuhwera kukora eki, twine eby’Okukoresa omu Kwegyesa ebi turikwetenga. (Reeba akabokisi “ Eby’okukoresa omu Kwegyesa.”) Ka tuteereho kukoresa gye ebikoreso ebi nk’oku turikubaasa. Buri omwe ahariitwe naabaasa kucwamu eki araakorese n’obu araakikorese. Kwonka ekigyendererwa kyaitu ti kugyenda nitugaba ebitabo, kandi titurikwenda kuha ebitabo byaitu abantu abatarikukunda obutumwa bwaitu. Ekigyendererwa kyaitu n’okuhwera abacureezi, ab’amazima, abarikwenda kumanya Ruhanga, kandi abaine ekyetengo ky’okutunga amagara agatahwaho, kuba abeegi ba Yesu.​—Ebyakozirwe 13:48; Matayo 28:19, 20.