1-2. (a) Abategyeki b’amahanga nibaija kurangirira ki omu bwire butari bwa hare? (b) Ni bibuuzo ki ebiine kugarukwamu?

TEERA akashushani ngu abategyeki b’amahanga baaheza kurangirira ngu “n’obusingye, tihariho kabi.” Nibabaasa kwehimbisa ngu hati ensi erimu obusingye bwingi obutakabahoga. Nibabaasa kwija kwenda kutureetera kuteekateeka ngu hati embeera omu nsi ziri omu buteeka. Kwonka buzima tibarikwija kubaasa kuzibira ekiraakurateho! Ahabw’enki? Kurugiirira aha bunabi bwa Baibuli, ‘okucwekyerera nikwija kubagwaho [kitaraariire], kandi tibarikwija kukira na kakye.’​—1 Tes. 5:3.

² Hariho ebibuuzo bikuru ebiine kugarukwamu: Niki ekirikwija kubaho omu ‘kubonabona kwingi’? Yehova naija kwenda ngu tukore ki omu bwire obwo? Kandi nitubaasa kwetebeekanisa tuta hati kuguma turi abeesigwa omu kubonabona kwingi?​—Mat. 24:21.

3. Kurugiirira aha Okushuuruurwa 17:5, 15-18, Ruhanga naija kucwekyereza ata “Babulooni Orurembo Orukuru”?

³ Shoma Okushuuruurwa 17:5, 15-18. “Babulooni Orurembo Orukuru” nirwija kucwekyerezibwa! Nk’oku kyaba kyagambirwe, abategyeki b’amahanga nibaija kuba batarikubaasa kuzibira ekiraabeho omu kaanya ako. Ahabw’enki? ‘Ahakuba Ruhanga naija kukita omu mitima yaabo ngu bahikiirize enaama ye.’ Naama ki nari kiteekateeko ki? Okucwekyereza ediini zoona ez’ebishuba, otwariiremu Kristendomu. * Ruhanga naija kuta ekiteekateeko  kye omu mitima ‘y’amahembe ikumi’ ‘ag’enyamaishwa erikutukura.’ Amahembe ikumi nigajwekyera gavumenti zoona ezirikushagika ‘enyamaishwa’ nari shi Amahanga Ageteeraine. (Kush. 17:3, 11-13; 18:8) Gavumenti ezi ku ziraayehindukane ediini z’ebishuba, egyo niyo eraabe entandikiro y’okubonabona kwingi. Eki nikiija kutiinisa abantu omu nsi yoona.

4. (a) Abategyeki b’amahanga nibabaasa kwija kwekwatsa ki baaza kutaahirira ediini z’ebishuba? (b) Abaabaire bari omu bibiina by’ediini ezo nibabaasa kwija kukora ki?

⁴ Titurikumanya enshonga ezi abategyeki b’amahanga baraayekwatse kutaahirira Babulooni Orukuru. Nibabaasa kugira ngu ediini nizo zirikuremesa obusingye kubaho, kandi ngu ab’ediini nibakira kwejwanzya omu by’obutegyeki. Nari nibabaasa kugira ngu ebibiina by’ediini ebyo bibaasize kurundaana esente nyingi n’eby’obugaiga bingi. (Kush. 18:3, 7) N’eky’oburyo kuteekateeka ngu okutaahirira oku tikirikumanyisa ngu abari omu diini ezo boona nibaija kucwekyerezibwa. Kureka, abategyeki b’amahanga nibaija kwihaho ebibiina by’ediini. Ebibiina ebyo byaheza kurugaho, abantu abaabaire babirimu nibaija kwetegyereza ngu abeebembezi b’ediini zaabo babareebize, kandi nibabaasa kwija kwehakana ediini ezo.

5. Yehova araganiise ki aha bikwatiraine n’okubonabona kwingi, kandi n’ahabw’enki?

⁵ Baibuli terikworeka obwire obu Babulooni Orukuru ruraamare rurikucwekyerezibwa, kwonka nitumanya ngu okucwekyerera kwarwo tikurikwija kutwara obwire buraingwa. (Kush. 18:10, 21) Yehova araganiise ngu naija kucwa bugufu ebiro by’okubonabona kwingi kugira ngu ‘entoore nari abatoorainwe’ bacungurwe hamwe n’ediini ey’amazima. (Mak. 13:19, 20) Kwonka shi Yehova naija kwenda ngu tukore ki aha gati y’okubonabona kwingi n’orutaro rwa Haramagedoni?

6. Ahabw’enki kitarikumara kuruga omu diini y’ebishuba?

⁶ Nk’oku kigambirweho omu kicweka ekihwaire, Yehova naayenda ngu abarikumuramya beetaanise ahari Babulooni Orukuru. Kwonka, eki nikyetengyesa ekirikukira aha kuruga  omu diini y’ebishuba. Twine kuba tumaririire kuramya Yehova omu kuramya okurikwera. Yetegyereze emiringo ebiri oku turikubaasa kukikora.

7. (a) Nitubaasa kuguma tuta tuhamiire aha mitindo ya Yehova ehikiriire erikukwata aha micwe? (b) Ebiri omu Abaheburaayo 10:24, 25 nibihamiiriza bita obukuru bw’okuteeranira hamwe, na munonga obwire obu?

⁷ Ogw’okubanza, twine kuhamira aha mitindo ya Yehova ehikiriire erikukwata aha micwe. Titurikwenda kugyendera aha micwe n’emitindo y’ensi. Nk’eky’okureeberaho, titurikwikiriza obushambani obw’omuringo gwona, otwariiremu obushwere bw’abarikushushanisa obuhangwa n’endiijo mitwarize y’ebitingwa. (Mat. 19:4, 5; Rom. 1:26, 27) Ogwa kabiri, twine kuguma nituramiza hamwe n’Abakristaayo bagyenzi baitu. Eki nitukikora twaba nitubaasa, yaaba aha Kyombeko ky’Obukama, nari omu maka g’ab’eishe-emwe, nari omu kihama. N’obu haakubaho ki, titurikwija kurekyera aho kuteeranira hamwe kuramya Yehova. Nangwa twine kuteeranira hamwe okukira munonga obu “ekiro ekyo kiri haihi n’okuhika.”​—Shoma Abaheburaayo 10:24, 25.

8. Obutumwa bwaitu nibubaasa kwija kuhinduka buta omu biro by’omumaisho?

⁸ Omu kubonabona kwingi, obutumwa obu turaabe nitubuurira nibubaasa kwija kuhinduka. Hati, nitubuurira amakuru marungi ag’Obukama, kandi nituteeraho kuhindura abantu abeegi. Kwonka omu bwire obwo, nitubaasa kwija kugambira abantu obutumwa obwa butunu oburikugyeragyeranisibwa n’okugwa kw’orubaare. (Kush. 16:21) Nitubaasa kwija kubuurira amakuru g’okucwekyerera kw’ensi egi erikwebemberwa Sitaane. Omu bwire butari bwa hare, nitwija kumanya gye obutumwa obu turaabe nitubuurira n’oku turaabubuurire. Mbwenu shi nitwija kukoresa emiringo niyo emwe nk’ei tutwire nitukoresa omu myaka igana ehingwire kuhikiiriza obuheereza bwaitu? Nari nitwija kukoresa emiringo endiijo? Twine kutegyereza tukareeba. Oku biraabe kwona, nikireebeka nitwija kugira obumanzi bw’okugambira abantu obutumwa bwa Yehova obw’okucwa orubanja!​—Ezk. 2:3-5.

9. Abategyeki b’amahanga nibabaasa kwija kutwaza bata ahabw’obutumwa bwaitu, kwonka twine buhame ki?

⁹ Obutumwa bwaitu nibubaasa kwija kureetera abategyeki b’amahanga kwenda kuturwanisa ngu batwihireho kimwe. Nk’oku turikwesiga Yehova omu buheereza bwaitu hati, n’omu bwire obwo nitwija kumwesiga. Twine obuhame ngu Ruhanga waitu naija kutuha amaani g’okuhikiiriza ekigyendererwa kye.​—Mik. 3:8.

10. Nk’oku kiri omuri Luka 21:25-28, abantu baingi nibaija kutwaza bata ahabw’ebiraabeho omu kubonabona kwingi?

¹⁰ Shoma Luka 21:25-28. Omu bwire bw’okubonabona kwingi, abantu nibaija kugwa omu kahuurukano kureeba ebintu byona ebi barikuteekateeka ngu n’eby’obutwire omu nsi egi byatandika kugwa. Nibaija kuba baine ‘obusaasi,’ bagire obuhinza mutima barikutiina ngu nibabaasa kwitwa omu bwire obwo oburaabe bugumire munonga omu byafaayo by’abantu. (Zef. 1:14, 15) Omu bwire obwo, embeera nizibaasa kwija kugumira buri omwe nangwa n’Abajurizi ba Yehova. Ahabw’okugira ngu nitwija kuba twetaaniise aha b’ensi, nitubaasa kwija kutunga oburemeezi. Nitubaasa kwija kuremwa kutunga ebirikwetengyesa ebimwe.

11. (a) Bwanyima y’okucwekyerera kw’ediini z’ebishuba, ahabw’enki abantu n’abategyeki b’amahanga barikwija kuta omutima aha Bajurizi ba Yehova? (b) Ahabw’enki tutaine kutiina okubonabona kwingi?

¹¹ Abantu abu ediini zaabo ziraabe zicwekyereziibwe nibabaasa kuhitsya obwire bagire ekiniga ahabw’okureeba ediini y’Abajurizi ba Yehova yo ekiriho. Nitubaasa kuteebereza akajagararo akaraabeho, otwariiremu n’ab’amakuru.  Amahanga n’omutegyeki waago Sitaane, nibaija kutwanga ahabw’okugira ngu ediini yaitu niyo eriho yonka. Nibaija kuba baaherize kucwekyereza ediini ezindi zoona omu nsi. N’ahabw’ekyo niitwe barikwija kutaho omutima hati. Omu bwire obwo, ab’amahanga nibaija kwegaita kuba Googi owa Magoogi. * Nibaija kwegaita hamwe bakorese amaani gaabo goona kutaahirira abaheereza ba Yehova. (Ezk. 38:2, 14-16) Nikibaasa kutureetera kwemereza omutima kuteekateeka aha bintu ebi byona ebirikubaasa kwija kubaho, kandi obwo tutarikumanya obushonshorekye bwona oburaatwarirwemu. Kwonka, hariho ekintu kimwe eki twineho obuhame: Titwine kutiina okubonabona kwingi. Yehova naija kutuha eby’okukuratira kubaasa kukiza amagara gaitu. (Zab. 34:19) Nitwija kwemerera tureebe ‘ahaiguru, twimutsye emitwe yaitu’ ahakuba nitwija kumanya ngu ‘okucungurwa kwaitu kuri haihi.’ *

12. ‘Omwambari omwesigwa kandi ow’obwengye’ atwire naatutebeekanisa ata ahabw’ebirikuza kubaho omu biro by’omumaisho?

¹² ‘Omwambari omwesigwa kandi ow’obwengye’ atwire naatutebeekanisa kugira ngu tube abeesigwa omu kubonabona kwingi. (Mat. 24:45) Eki akikozire omu miringo mingi, kwonka kimwe aha ky’okureeberaho nk’ebi, n’enteerane empango ez’ebiro bishatu ezaabaireho kuruga 2016-2018. Omu ntebeekanisa z’enteerane ezo zoona, tukahigwa kwongyera kuhamya emitwarize erikwetengyesa, obu ekiro kya Yehova kiri haihi kuhika. Ka tweyijutsye emitwarize egyo omu bugufu.

13. Nitubaasa kwongyera tuta kuhamira ahari Yehova, kandi ahabw’enki twine kukikora hati?

¹³ Okuhamira ahari Yehova: Omutwe gw’oruteerane oruhango orw’ebiro bishatu orwa 2016 gukaba guri “Guma Ohamiire Ahari Yehova!” Omu ruteerane oru tukeega ngu twaba twine omukago murungi na Yehova, nitwija kuguma tumuhamiireho. Tukaijukibwa ngu nitubaasa kwirira haihi Yehova kurabira omu kushaba n’okweyegyesa Ekigambo kye. Okukora ekyo nikibaasa kutuha amaani g’okusingura okugyezibwa kw’amaani munonga. Obu ensi erikwebemberwa Sitaane eri haihi kucwekyerezibwa, twine amatsiko g’okuhikwaho okugyezibwa kw’amaani munonga kubaasa kuguma tuhamiire ahari Ruhanga n’Obukama bwe. Abantu boona nibabaasa kwija kwenda kuba niitwe baaharana. (2 Pet. 3:3, 4) Nibabaasa kwija kutuharana ahabw’okugira ngu titurikushagika eby’obutegyeki omu nsi egi. Twine kumariirira kuhamira ahari Yehova hati, kugira ngu twije tugume tumuhamiireho omu kubonabona kwingi.

14. (a) Nihaija kubaho mpinduka ki aha bikwatiraine n’ab’eishe-emwe abarikutureeberera omu nsi? (b) Ahabw’enki kirikwija kutwetengyesa kuhamira ahari Yehova omu bwire obwo?

¹⁴ Omu kubonabona kwingi, nihaija kubaho empindahinduka omu b’eishe-emwe abarikureeberera ekicweka eky’omu nsi eky’ekibiina kya Yehova. Okubonabona kwatandika, abashukirweho amajuta boona abaraabe bakiri omu nsi nibaija kurundaanwa batwarwe omu iguru kwejumba omu rutaro rwa Haramagedoni. (Mat. 24:31; Kush. 2:26, 27) Eki nikimanyisa ngu ab’Akakiiko Akareeberezi nibaija kuba batakiri naitwe omu nsi. Kwonka, omutwe muhango gw’abantu nibaija kuguma batebeekanisiibwe gye. Ab’eishe-emwe kuruga omu b’entaama ezindi abaine ebirikwetengyesa, nibaija kugumizamu nibatureeberera. Nikiija kutwetengyesa  kworeka ngu tuhamiire ahari Yehova turikushagika ab’eishe-emwe aba, turikworobera obuhabuzi obu Yehova araabe abahaire. Eki nikiija kutuhwera kuhonokaho!

15. Nitubaasa kuhamya tuta okugumisiriza kwaitu, kandi ahabw’enki ni kikuru kukikora hati?

¹⁵ Okugumisiriza: “Otaruha!” nigwo gwabaire guri omutwe gw’oruteerane oruhango orw’ebiro bishatu orwa 2017. Oruteerane oru rukatuhwera kuhamya okubaasa kwaitu okw’okwemera okugyezibwa. Tukeega ngu titurikugumisiriza obu embeera zirikuba nizitubaasisa bwonka. Nitubaasa kuhamya okugumisiriza kwaitu turikwesiga Yehova. (Rom. 12:12) Titushemereire kwebwa ngu Yesu akaraganisa ati: ‘Orikugumisiriza kuhitsya aha muheru, niwe arikwija kujunwa.’ (Mat. 24:13) Okuraganisa oku nikworeka ngu twine kuguma turi abeesigwa n’obu twakuhikwaho mbeera ki ezigumire. Twagumisiriza buri kugyezibwa hati, nitwija kuhama okubonabona kwingi kutakatandikire.

16. Niki ekirikworeka yaaba turi emanzi, kandi nitubaasa kuhamya tuta obumanzi bwaitu?

¹⁶ Obumanzi: “Gira Obumanzi!” nigwo gwabaire guri omutwe gw’oruteerane oruhango orw’ebiro bishatu orwa 2018. Oruteerane oru rukatwijutsya ngu titurikubaasa kuba emanzi ahabw’okubaasa kwaitu. Nk’okugumisiriza, n’obumanzi nabwo niburuga omu kwesiga Yehova. Nitubaasa kwongyeramu tuta amaani omu kumwesiga? Turikushoma Ekigambo kye buri izooba, kandi tukateekateeka aha ku yaajunire abaheereza be ira. (Zab. 68:20; 2 Pet. 2:9) Ab’amahanga ku baraatutaahirire omu kubonabona kwingi, nikiija kutwetengyesa kuba emanzi n’okwesigira kimwe Yehova okukira obundi bwona. (Zab. 112:7, 8; Heb. 13:6) Twayesiga Yehova hati, nitwija kutunga obumanzi oburikwetengyesa kubaasa kwemera okutaahirira kwa Googi. *

17. Ahabw’enki tutaine kutiina Haramagedoni? (Reeba ekishushani ekiri aha mutwe.)

¹⁷ Nk’oku kigambirweho omu kicweka ekihwaire, baingi ahariitwe kuruga obu twazaarwa tutwire omu biro by’emperu. Kwonka twine n’amatsiko g’okuhonokaho omu kubonabona kwingi. Orutaro rwa Haramagedoni nirwo ruraahenderere kimwe entebeekanisa y’ensi egi embi.  Kwonka, titwine kirikututiinisa kyona. Ahabw’enki? Ahakuba Ruhanga niwe araabe naaturwanirira. (Enf. 1:33; Ezk. 38:18-20; Zek. 14:3) Yehova ku araahe ekiragiro, Yesu Kristo naija kwebembera ihe ry’omu iguru omu rutaro oru. Naija kuba aine abashukirweho amajuta boona na baamaraika. Boona hamwe nibaija kutenga orutaro ahari Sitaane, baadaimoni be, n’abarikushagika Sitaane omu nsi.​—Dan. 12:1; Kush. 6:2; 17:14.

18. (a) Yehova atuhaire buhame ki? (b) Ebiri omu Okushuuruurwa 7:9, 13-17 nibituhwera bita kugira obumanzi aha biro by’omumaisho?

¹⁸ Yehova atuhaire obuhame obu: “Tihariho ky’okurwanisa, eki baaheesire kukurwanisa,” ekirikwija kubaasa kusingura. (Isa. 54:17) ‘Omutwe muhango’ gw’Abajurizi ba Yehova abeesigwa nibaija ‘kuruga omu kubonabona kwingi’ bahuriire! Nibaija kugumizamu n’obuheereza bwabo oburikwera barikuramya Yehova. (Shoma Okushuuruurwa 7:9, 13-17.) Baibuli ka neetuhwera kugira obumanzi ngu nitwija kucungurwa omu biro by’omumaisho! Nitumanya ngu Yehova ‘naarinda abeesigwa.’ (Zab. 31:23) Boona abarikukunda Yehova kandi abarikumuhimbisa nibaija kwesiima kureeba arikujuririra eiziina rye eririkwera.​—Ezk. 38:23.

19. Omu bwire butari bwa hare ebiro byaitu eby’omumaisho nibiija kuba birungi bita?

¹⁹ Teekateeka aha ku 2 Timoseo 3:2-5 erikubaasa kuhandiikwa ku ogire ngu neegamba aha bantu omu nsi ensya eraabe etarimu ebikorwa bya Sitaane. (Reeba akabokusi “ Oku Abantu Barikwija Kuba.”) Ow’eishe-emwe George Gangas, * owaaheereizeho aha Kakiiko Akareeberezi, akashoboorora aha nsi egyo ati: “Ensi ka neija kuba nungi munonga buri omwe yaaba naayeta mugyenzi we ow’eishe-emwe nari munyaanya! Juba noija kutunga omugisha gw’okutuura omu mbeera nsya eziraabe ziri omu nsi. Obwo noija kutuuraho obwire oburikwingana n’obwa Yehova. Twena nitwija kutuuraho ebiro byona.” Ago buzima ka n’amatsiko g’omuhendo!