ORIKUTEEBEREZA aha mbeera y’obwire naayetegyereza ekishushani ekirikukwata aha mbeera y’obwire. Reero areeba ngu nihaija kubaho eihunga ry’akabi omu mwanya ogurikutuurwamu abantu baingi. Ahabw’okufayo aha burinzi bw’abantu, naakora kyona ekirikubaasika kubarabura bukiri kare.

Omu muringo nigwo gumwe, Yehova hati naarabura boona omu nsi aha ‘ihunga’ ry’akabi kukirira kimwe okurabura kw’abarikuteebereza aha bwire. Naarabura ata abantu? Kandi ahabw’enki turikubaasa kuhamya ngu naaha abantu obwire burikumara kubaasa kukuratira okurabura? Okutunga eby’okugarukamu, ka tubanze twetegyereze okurabura kwa Yehova okwa ira.

Ira, Yehova akaha okurabura kw’emiringo mingi aha ‘ihunga,’ nari okucwerwa orubanja kw’abaabaire nibagomera ebiragiro bye bakigyendereire. (Enf. 10:25; Yer. 30:23) Buri murundi, akaba amanyisa abantu bukiri kare eki baine kukora kuhikaana n’ekigyendererwa kye. (2 Bag. 17:12-15; Neh. 9:29, 30) Kubaasa kuhiga abantu kukora ekihikire, akaba akoresa abaheereza be abeesigwa ab’omu nsi kugamba obunabi bw’okucwa orubanja n’okuhwera abantu kugyendera aha kurabura okwo batarikweziringa.​—Amo. 3:7.

Nk’eky’okureeberaho, Yehova akakoresa Noa omuheereza we omwesigwa. Kumara emyaka mingi, Noa taratiinire kurabura abantu enshambani kandi enshaarizi aha Mwegyemure ogwabaire nigwija kubaho omu nsi yoona. (Kut. 6:9-13, 17) Kandi akabagambira eki baine kukora kubaasa kuhonokaho, n’ahabw’ekyo naayetwa omubuurizi “w’okuhikiirira.”​—2 Pet. 2:5.

N’obu Noa yaateireho kurabura abantu Omwegyemure gutakabaireho, baingi tibaramuhurikiize. Bakooreka ngu tibaine kwikiriza. Ekyarugiremu, bakafa Omwegyemure ku gwaizire ‘gukabatwara boona.’ (Mat. 24:39; Heb. 11:7) Okucwekyerezibwa kuri haihi kuhika, bakaba bataine rwekwatso yoona ngu tibaratungire okurabura kuruga ahari Ruhanga.

Obumwe, Yehova akaba arabura harikuburayo akaire kakye “eihunga” ry’okucwa orubanja ritakatandikire. Kwonka nabwo, akaba ahamya ngu abantu baaheebwa obwire burikumara kukora empinduka. Nk’eky’okureeberaho, akaha okurabura, Ebiheneso Ikumi ebyahikire ahari Misri bitakabaireho. Teekateeka aha bu Yehova yaayohereza Musa na Arooni, kurabura Faraho n’abaheereza be aha kiheneso kya mushanju ekirikukwata aha kugwa kw’orubaare. Mbwenu shi obu orubaare rwabaire niruza kutandika bwasheesha, Ruhanga akabaha obwire burikumara obw’okuhunga orubaare kandi bakasherura obwegamo? Baibuli neegira eti: “Bwanyima weena owaatiinire ekigambo” kya Yehova ‘aha baheereza ba Faraho, akahungiza abairu be n’amatungo ge omu maju.’ (Kur. 9:18-21) Buzima, Yehova akabarabura kare, reero abaahurikiize bakooroba ahonaaho bakakira ekiheneso ekyo.

Faraho n’abaheereza be nabo bakaraburwa kare ekiheneso kya ikumi kitakabaireho. Kwonka, bo bakaba abashema baayehuzya okurabura oku baatungire. (Kur. 4:22, 23) N’ekyarugiremu, bakareeba batabani baabo emijigaijo barikufa. Ka kyabaire eky’obusaasi! (Kur. 11:4-10; 12:29) Mbwenu shi bakaba nibabaasa kugira eki baakora obwire butakahwaireyo? Eego! Musa ahonaaho akarabura Abaisraeli aha kiheneso kya ikumi, kandi yaabagambira n’eki baine kukora kugira ngu ab’omu maka gaabo batahikwaho akabi. (Kur. 12:21-28) Ni bangahi abaayorobeire okurabura  okwo? Nikiteeberezibwa ngu, abantu obukaikuru bushatu otwariiremu Abaisraeli, ‘n’omutwe muhango’ gw’Abanyamisri n’abandi abatari Baisraeli, bakakira ebiheneso ebyo reero baaruga Misri.​—Kur. 12:38.

Eby’okureeberaho ebi nibyoreka ngu butoosha Yehova akaba ahamya ngu abantu baatunga omugisha gw’okworobera okurabura. (Bir. 32:4) Niki ekyabaire nikihiga Yehova kutwaza atyo? Entumwa Petero akashoboorora ngu Yehova ‘tarikwenda muntu weena kuhwerekyerera, kureka naayenda ngu boona bahikye aha kweteisa.’ (2 Pet. 3:9) Buzima, Ruhanga akaba naayoreka ngu naafayo aha bantu. Akaba naayenda ngu beeteise kandi boorobere okurabura kwe okucwa orubanja kutakahikire.​—Isa. 48:17, 18; Rom. 2:4.

Na hati, abantu baine kworobera okurabura kukuru okurikugyenda omu maisho omu nsi yoona. Obu Yesu yaabaire ari omu nsi, akarabura ngu obusingye obu nibwija kucwekyerezibwa omu ‘kubonabona kwingi.’ (Mat. 24:21) Aha bikwatiraine n’okucwa orubanja okwo, akagamba obunabi oburikworeka byenyine ebi abakuratsi be baabaire nibaija kuhurira kandi bakareeba obwire obwo buri haihi kuhika. Yesu akagamba ebintu bikuru ebi turikureeba nibibaho omu nsi yoona obunaku obu.​—Mat. 24:3-12; Luk. 21:10-13.

Okuhikaana n’obunabi obwo, Yehova naahiga buri omwe hati kucwamu kumuheereza n’okumworobera. Naayenda ngu boona abarikumworobera batungye amagara marungi n’emigisha omu biro by’omumaisho omu nsi ensya. (2 Pet. 3:13) Kubaasa kuhwera abantu kugira okwikiriza kuhami omu bi Yehova arikuraganisa, abahaire obutumwa oburaakize amagara gaabo nigo “amakuru marungi g’obukama,” ogu Yesu yaagizire ngu nigaija kubuurirwa ‘omu nsi yoona’ okuba obujurizi aha mahanga goona. (Mat. 24:14) Ruhanga atebeekaniise abarikumuramya ab’amazima kubuurira obutumwa bwe omu mahanga nka 240. Yehova naayenda ngu abantu nyamwingi boorobere okurabura kwe kandi bahungye “eihunga” eririkwija ery’okucwa orubanja oruhikiriire.​—Zef. 1:14, 15; 2:2, 3.

Titurikubaasa kwebuuza yaaba Yehova naaha abantu obwire burikumara kworobera okurabura kwe. Obuhame nibworeka ngu atwire naakikora. Kureka ekibuuzo ekikuru kiri ngu: Abantu nibaija kworobera okurabura kwa Ruhanga ekiro ekyo kitakahikire? Itwe abaheereza ba Ruhanga ka tugumizemu nituhwera baingi nk’oku kirikubaasika kuhonokaho aha mperu y’obusingye obu!