1. Ahabw’enki twine kwemarira aha kuramya Yehova wenka?

TWINE kwemarira aha kuramya Yehova wenka ahakuba niwe Muhangi waitu owaatuhaire amagara. (Kush. 4:11) Kwonka, hariho akabi. N’obu turaabe nitukunda Yehova kandi turikumuha ekitiinisa, nihabaasa kugira ebyaturemesa kumwemariraho nk’oku kishemereire. Twine kumanya oku ekyo kirikubaasa kubaho. Kwonka, ka tubanze tushwijume bimwe ebirikutwarirwa omu kwemarira aha kuramya Yehova wenka.

2. Kurugiirira aha Okuruga 34:14, nitwija kukora ki twaba twemariire aha kuramya Yehova wenka?

² Omu Baibuli, okwemarira ahari Ruhanga kiine amakuru g’okumukundira kimwe munonga. Twaba twemariire ahari Yehova, nitwija kuba niwe twaramya wenka. Titurikwija kwikiriza omuntu weena nari ekintu kyona kutwara omwanya gwe omu mutima gwaitu.​—Shoma Okuruga 34:14.

3. Ahabw’enki titurikufa ageemarira aha kuramya Yehova?

³ Titurikufa ageemarira aha kuramya Yehova tutaine nshonga ehikire. Ahabw’enki? Ahakuba okwemarira aha kumuramya nikurugiirira aha mazima agarikumukwataho agu twayegire. Tukakunda emitwarize ye mirungi munonga. Nitumanya ebi arikukunda n’ebi arikwanga kandi nitwikirizana nabyo. Nitumanya ekigyendererwa eki atwiniire kandi nitukishagika. Nituhurira twine ekitiinisa ahabw’okutuha omugisha gw’okuba banywani be. (Zab. 25:14) Buri kimwe eki turikwega aha Muhangi waitu nikitwiriza haihi nawe.​—Yak. 4:8.

4. (a) Omuregi naakoresa ki kuturemesa kwemarira gye aha kuramya Yehova? (b) Nituza kugamba ahari ki omu kicweka eki?

 ⁴ Omuregi niwe arikwebembera ensi egi obunaku obu, kandi naakoresa ebigirimu kutushendashenda ahabw’okugira ngu twine ebyetengo by’omubiri n’obweremwa. (Efe. 2:1-3; 1 Yoh. 5:19) Ekigyendererwa kye n’eky’okubaganisamu rukundo yaitu kugira ngu tuteemarira aha kuramya Yehova wenka. Ka tureebe emiringo ebiri ei Sitaane arikubaasa kuba omusinguzi. Ogw’okubanza, naatureetera kwohibwa kusherura eby’obugaiga, kandi ogwa kabiri, naateeraho kutureetera kucwamu kubi aha bikwatiraine n’eby’okweshemeza.

5. Ahabw’enki twine kwetantara okukunda esente?

⁵ Butoosha nituba nitwenda tube twine eby’okurya birikumara, emyenda y’okujwara eshemeire, n’omwanya murungi gw’okuraaramu. Kwonka twine kwetantara kukunda esente. Abantu baingi abari omu nsi erikwebemberwa Sitaane ‘n’abakunzi b’empiiha’ n’ebintu ebi esente zirikugura. (2 Tim. 3:2) Yesu akaba naamanya ngu abakuratsi be nibaija kwohibwa kugirira esente rukundo. “Tihariho omuntu orikubaasa kuheereza abakama babiri,” nikwo Yesu yaagizire, ‘ahakuba naija kwangaho omwe akunde ondi, nari naija kugumira kimwe ahari omwe, agaye ondi. Timurikubaasa kuheereza Ruhanga’ n’eby’obugaiga. (Mat. 6:24) Omuntu orikuramya Yehova kandi akagaruka akamara obwire bwingi arikusherura obugaiga bw’ensi egi, naaba ari nk’orikuteeraho kuheereza abakama babiri. Naaba ateemariire aha kuramya Yehova wenka.

6. Nitubaasa kwega eishomo ki omu bigambo ebi Yesu yaagambiire ekibiina ky’omuri Laodikea?

⁶ Aha kuhendera kw’ekyasha ky’okubanza Y.A.K., ab’ekibiina ky’omuri Laodikea bakeehimbisa bati: “Ndi omutungi, ntungire bingi, tiinyine ki nkyenire.” Kwonka omu maisho ga Yehova na Yesu, bakaba bari ‘enshoberwa, ab’okusaasirwa, abooro, empumi, kandi  bajwaire busha.’ Yesu akabahabura, ti ahabw’okugira ngu bakaba bari abagaiga, beitu ahabw’okugira ngu eby’obugaiga byabo bikaba biriyo nibishiisha omukago ogu baabaire baine na Yehova. (Kush. 3:14-17) Twamanya ngu turiyo nitugira ekyetengo ky’okusherura eby’obugaiga omu mutima gwaitu, twine kugira eki twakora ahonaaho kutereeza emiteekateekyere yaitu. (1 Tim. 6:7, 8) Twaba tutakozire tutyo, omutima gwaitu nigwija kwebaganisamu, kandi Yehova tarikwija kusiima okuramya kwaitu. Ni “Ruhanga ow’eihato” nari orikwenda ngu tube niwe twaramya wenka. (Bir. 4:24) Nitubaasa kuremwa tuta kugira emiteekateekyere eringaniire aha sente?

7-9. Nooyegyera ki aha byahikire aha mureeberezi omwe orikwetwa David?

⁷ Teekateeka ahari David omureeberezi omweziriki orikutuura omuri United States. Naayegambaho nk’omukozi owaabaire ayehaireyo kukorera bakama be. Omu kitongore eki yaabaire naakoramu bakamukuza, kandi akaba naatwarwa nk’okurikukirayo kukora gye omurimo ogwo omu ihanga ryona. “Obwire obwo, nkaba ninteekateeka ngu okutunga ebi byona n’obuhame ngu Yehova naampa emigisha,” David nikwo yaagizire. Kwonka shi buzima bikaba nibiruga ahari Yehova?

⁸ David akatandika kureeba obumanyiso oburikworeka ngu omurimo gwe guriyo nigushiisha omukago gwe na Yehova. Naagira ati: “Omu nteerane n’omu buheereza, nkaba nyeshanga ndikuteekateeka aha buremeezi obu nyine aha murimo. Nkaba nintunga esente nyingi, kwonka nkeyongyera kugira amaganya, kandi obushwere bwangye bukaba burimu emirabanamu.”

⁹ David akeetegyereza ngu aine kushwijuma ebi arikwebembeza. Naagira ati: “Nkamariirira  kutereeza embeera yangye.” David akaba naayenda kuhindura entebeekanisa y’omurimo gwe, kandi akagambira mukama we eki yaabaire naayenda kukora. Hakarugamu ki? David akafeerwa omurimo gwe! Mbwenu shi akatwaza ata? “Eizooba eryakuratsireho, nkaijuza foomu y’okugumizamu ndi payoniya omuhwezi,” nikwo arikugira. David n’omukazi we, nibakora omurimo gw’okuboneza enju z’abandi. Bwanyima, akaba payoniya ow’obutwire, kandi n’omukazi we akaija yaamwegaitaho omu bwapayoniya. Bakacwamu kukora omurimo ogurikugaywa abantu baingi, kwonka omurimo ogu baabaire nibakora tigwo baabaire nibatwara nk’ekintu kikuru. N’obu entaatsya yaabo eraabe yaagarukire ahansi ebicweka ikumi aha ntaasya ey’okubanza, buri kwezi nibatunga esente zirikumara enshohoza yaabo. Nibenda kuta Yehova omu mwanya gw’okubanza, kandi bakireebire butunu ngu naareeberera abarikwebembeza eby’Obukama.​—Mat. 6:31-33.

10. Nitubaasa kurinda tuta omutima gwaitu?

¹⁰ N’obu waakuba oine ebintu bikye nari bingi, oine kurinda omutima gwaitu. Ota shi? Yetantare kukunda eby’obugaiga. Kandi oteebembeza omurimo gwawe gw’okwebaisaho gukaza omu mwanya gw’okuheereza Yehova. Noobaasa kumanya ota yaaba ekyo kiriyo nikikubaho? Noobaasa kwebuuza ebibuuzo nk’ebi: ‘Ninkira kuteekateeka aha murimo naaba ndi omu nteerane nari omu buheereza? Ninkira kwerarikirira yaaba ninyija kuba nyine entaatsya omu biro by’omumaisho? Nyowe n’omukundwa wangye esente n’ebintu nibitureetera oburemeezi? Ninyija kuba nyeteekateekire kukora omurimo ogu abandi barikugaya gwaba nigumbaasisa kutunga obwire burikumara obw’okuheereza Yehova?’ (1 Tim. 6:9-12) Waaba nooshwijuma ebibuuzo ebyo, ijuka ngu Yehova naatukunda kandi naaraganisa abamwemariireho ati: “Tindikutsigaho, kandi tindikuhemukaho na kakye.” Niyo nshonga ahabw’enki entumwa Paulo yaahandiikire ati: “Mutarigira omutima ogurikukunda empiiha.”​—Heb. 13:5, 6.

11. Eby’okweshemeza nibibaasa kukwata bita aha muntu?

¹¹ Yehova naayenda ngu tubeho tushemereirwe, kandi eby’okweshemeza nibibaasa kutuhwera kukora ekyo. Nangwa Ekigambo kya Ruhanga nikigira ngu ‘tihariho ekirikugasira omuntu ekirikukira okurya n’okunywa n’okutunga okushemererwa omu bi arikufeera kubi.’ (Mub. 2:24) Kwonka, eby’okweshemeza ebingi  ebiri omu nsi nibibaasa kutubeera eby’akabi. Nibishiisha emicwe y’abantu, bibareetera kukunda ebintu ebi Ekigambo kya Ruhanga kirikwanga, nari babireeba nk’ebihikire.

12. Kurugiirira aha 1 Abakorinso 10:21, 22, ahabw’enki twine kwegyendesereza omu kutoorana eby’okweshemeza?

¹² Twine kwemarira aha kuramya Yehova wenka, n’ahabw’ekyo titurikubaasa kuriira aha “meeza ya” Yehova “n’aha ya baadaimoni.” (Shoma 1 Abakorinso 10:21, 22.) Okurya hamwe n’omuntu eby’okurya n’akamanyiso k’obunywani. Twatoorana eby’okweshemeza ebirimu obushaarizi, eby’obufumu, eby’obushambani, nari ebindi byetengo bibi n’emiteekateekyere mibi, nituba turi nk’abarikurya hamwe n’abazigu ba Ruhanga. N’ekirikurugamu nituba tutarikwereetera obusaasi twenka, beitu nitushiisha n’omukago gwaitu na Yehova.

13-14. Kurugiirira ahari Yakobo 1:14, 15, ahabw’enki twine kwegyendesereza eby’okweshemeza ebirikwimutsya ebyetengo bibi? Shoboorora.

¹³ Yetegyereze emiringo emwe ei eby’okweshemeza biri nk’eby’okurya ebya butoosha. Waaba noorya, noobaasa kucwamu eby’okurya ebi oraate omu kanwa kaawe. Kwonka waaheza kubita omu kanwa, nibitandika kukorwaho otaine eki orikumanya, kandi ebiriisa ebiri omu by’okurya ebyo nibiza omu mubiri gwawe. Eby’okurya ebirungi nibibaasa kukureetera kugira amagara marungi, kwonka eby’okurya ebibi nibikureetera kunyangarara. Ebirikuruga omu by’okurya nibibaasa kutareebwa omu kiro kimwe, kwonka haahinguraho obwire nibireebwa.

¹⁴ Nikyo kimwe, twaba nitutoorana eby’okweshemeza, nituba twine kucwamu ebi turaate omu biteekateeko byaitu. Kwonka bwanyima y’ekyo, eby’okweshemeza ebyo nibikwata aha miteekateekyere yaitu n’enyehurira zaitu. Eby’okweshemeza ebirungi nibibaasa kuturuhuura, kwonka ebitashemeire nibiija kutuhitsyaho akabi. (Shoma Yakobo 1:14, 15.) Ebirikuruga omu by’okweshemeza ebibi nibibaasa kutareebwa ahonaaho, kwonka bwanyima nibiija bireebwa butunu. Niyo nshonga ahabw’enki Baibuli neerabura eti: ‘Mutabeihwabeihwa; Ruhanga tagaaniizibwa; ahakuba ebi omuntu arikubiba nibyo arikugyesha. Orikubibira omubiri gwe, omuri ogwo mubiri nimwo arikwija kugesha okujunda.’ (Gal. 6:7, 8) Ka ni kikuru kwetantara eby’okweshemeza byona ebirimu ebintu ebi Yehova arikwanga!​—Zab. 97:10.

15. Yehova atuhaire kiconco ki ekirikutugasira munonga?

¹⁵ Abajurizi ba Yehova abaingi nibakunda kureeba JW Broadcasting^®, niyo tiivi yaitu ey’aha mukura. Munyaanyazi-itwe orikwetwa Marilyn akagira ati: “JW Broadcasting empwereire kwongyera kugira emiteekateekyere mirungi, kandi nikiba kitarikunyetengyesa kujoonjoramu ebimwe. Ku ndikuba emboijana nari nkatamwa, ninshangaho orubazo orurikugaruramu amaani nari ekicweka ky’Okuramya kw’Akasheeshe eky’okureeba. Eki nikindeetera kuhurira ndi haihi na Yehova n’ekibiina kye. Entebeekanisa ya JW Broadcasting ehinduriire kimwe amagara gangye.” Noogasirwa omu kiconco eki kuruga ahari Yehova? Kwongyerera aha ntebeekanisa eya buri kwezi, JW Broadcasting neeba eriho eby’amaraka bingi na vidiyo nyingi n’ebyeshongoro ebi orikubaasa kuhurikiza eshaaha yoona.

16-17. Ahabw’enki twine kupima obwire obu turikumara omu by’okweshemeza, kandi nitubaasa kukikora tuta?

¹⁶ Twine kwegyendesereza emiringo y’eby’okweshemeza ebi turikukunda n’obwingi bw’obwire obu turikumara turikweshemeza. Twaba tutegyendesereize, nitubaasa kumara obwire bwingi omu by’okweshemeza kukira obu turikumara nituheereza Yehova. Baingi nibashanga kigumire kupima obwire obu barikumara omu  by’okweshemeza. Munyaanyazi-itwe ow’emyaka 18 orikwetwa Abigail naagira ati: “Okureeba tiivi nikimpwera kuruhuuka bwanyima y’okukora emirimo mingi omu izooba. Kwonka naaba ntegyendesereize, nimbaasa kumara eshaaha nyingi ndikureeba tiivi.” Ow’eishe-emwe muto orikwetwa Samuel naagira ati: “Obumwe ninyeshanga ndikureeba bwavidiyo bugufu aha Intaneeti obutaheza. Nintandika ndikureeba kamwe, ntakimanyire nshanga naahitsya eshaaha ishatu nari ina ndikureeba.”

¹⁷ Noobaasa kupima ota obwire obu orikumara omu by’okweshemeza? Eidaara ry’okubanza n’okumanya obwire obu orikubimaramu. Ahabw’enki otarikuta omu buhandiikye obwire bwa saabiiti emwe? Handiika aha karenda yaawe eshaaha ezi orikumara orikureeba tiivi, okuza aha Intaneeti, n’okuzaana emizaano aha eri aha kyoma kyawe. Waashanga orikubimaramu obwire bwingi, kora entebeekanisa. Ebintu ebikuru ba nibyo waaha obwire bwingi, reero eby’okweshemeza obihe obwire bukye. Ekikuru, shaba Yehova kukuhwera kuhamira aha ntebeekanisa yaawe. Waakora otyo noija kutunga obwire n’amaani kwejumba omu kweyegyesa, omu kuramya kw’eka, omu nteerane z’ekibiina, n’okuheereza Yehova omu kubuurira n’okwegyesa abantu. Obwo noija n’okutunga okushemererwa omu by’okweshemeza ahabw’okugira ngu waata Yehova omu mwanya gw’okubanza.

18-19. Nitubaasa kworeka tuta ngu twemaririire aha kuramya Yehova wenka?

¹⁸ Entumwa Petero bwanyima y’okuhandiika aha mperu y’ensi erikwebemberwa Sitaane n’ensi ensya eri haihi kubaho, akagira ati: “Abarikukundwa, nk’oku mutegyereize ebyo, mwezirikye abashangye mwine obusingye, mutaine ibara ribi n’obu kaakuba akamogo omu maisho ge.” (2 Pet. 3:14) Twakuratira obuhabuzi obwo kandi tukateeraho kuguma turi abeecumi omu micwe n’omu by’omwoyo, nitworeka ngu twemaririire aha kuramya Yehova wenka.

¹⁹ Sitaane n’abarikumushagika nibaija kugumizamu nibatureetera kwohibwa kwebembeza ebyabo. (Luk. 4:13) Kwonka n’obu twakutunga mbeera ki egumire, titurikwija kwikiriza omuntu weena nari ekintu kyona kuza omu mwanya gwa Yehova omu mutima gwaitu. Ka tumariirire kuha Yehova eki ashemereire kuba niwe yaatunga wenka, nikwo okwemarira aha kumuramya!