1. Buri muntu aine kucwamu kukora ki ekirikukirayo oburungi?

KAINGI, ebi abazaire barikucwamu nibikwata aha baana baabo kumara obwire buraingwa. Abazaire baacwamu kubi, nibabaasa kureetera abaana oburemeezi. Kwonka baacwamu gye, nibaha abaana baabo omugisha gw’okugira okushemererwa n’okumarwa. Kwonka abaana nabo baine kucwamu gye. Okucwamu okurikukirayo oburungi n’okuheereza Tataitwe, Yehova ow’omu iguru orikutukunda.​—Zab. 73:28.

2. Yesu n’abazaire be bakacwamu gye bata?

² Abazaire ba Yesu bakaba bamaririire kuhwera abaana baabo kuheereza Yehova, kandi okucwamu kwabo kukooreka eki baabaire nibatwara nka kikuru. (Luk. 2:40, 41, 52) Yesu nawe akacwamu gye kandi kyamubaasisa kuhikiiriza obujunaanizibwa bwe omu kigyendererwa kya Yehova. (Mat. 4:1-10) Yesu akakura yaaba omushaija omunyambabazi, omwesigwa, kandi emanzi, kandi buri muzaire weena orikuheereza Ruhanga akaayenzire kugira omutabani nk’ogwo.

3. Nituza kugarukamu bibuuzo ki omu kicweka eki?

³ Omu kicweka eki, nituza kugarukamu ebibuuzo ebi: Yehova akacwamu gye ata aha bikwatiraine na Yesu? Abazaire Abakristaayo nibabaasa kwegyera ki aha ku abazaire ba Yesu ab’omu nsi baacwiremu? Abakristaayo eminyeeto nibeegyera ki aha ku Yesu yaacwiremu?

4. Yehova akacwamu ata aha nshonga nkuru erikukwata aha Mwana we?

⁴ Yehova akatooranira Yesu abazaire barungi. (Mat. 1:18-23; Luk. 1:26-38) Ebigambo bya Mariamu ebirikuruga aha mutima  ebiri omu Baibuli nibyoreka gye rukundo ei yaabaire ainiire Yehova n’Ekigambo kye. (Luk. 1:46-55) Kandi oku Yosefu yaayorobeire obuhabuzi bwa Yehova nikyoreka ngu akaba naamukunda, kandi arikwenda kumushemeza.​—Mat. 1:24.

5-6. Yehova akaikiriza Omwana we kuraba omu mbeera ki?

⁵ Yetegyereze ngu Yehova taratooraine abazaire abagaiga kworora Yesu. Ekitambo eki Yosefu na Mariamu baahaireyo Yesu aherize kuzaarwa nikyoreka ngu bakaba bari abooro. (Luk. 2:24) Yosefu naabaasa kuba yaabaire aine ibaiziro haihi n’eka ye omuri Nazareesi. Bashemereire kuba baabaire bataine bintu bingi, na munonga eka yaabo ku yaabaire mpango ekabamu abaana nka mushanju.​—Mat. 13:55, 56.

⁶ Obumwe Yehova akarinda Yesu kutahikwaho kabi, kwonka tarazibiire embeera zoona ezigumire kuhika aha Mwana we. (Mat. 2:13-15) Nk’eky’okureeberaho, Yesu akaba aine kwemera abanyabuzaare abaabaire batarikumwikiririzamu. Teekateeka oku kyabaire nikimaramu amaani Yesu kutuura n’abantu omu ka abaabandize kwanga kwikiriza ngu ni Mesia. (Mak. 3:21; Yoh. 7:5) Yesu akaba aine kugumira obusaasi ahabw’okufa kwa Yosefu, ishe owaamworoire. Ekyo nikimanyisa ngu obu Yesu yaabaire ari omutabani omukuru akaba aine kugumizamu n’omurimo gw’eka ogw’obubaizi. (Mak. 6:3) Yesu ku yaagumire naakura, obundi akeega kureeberera eka yoona. Kandi naabaasa kuba yaabaire aine kukora munonga kuhikiiriza obujunaanizibwa obwo. N’ahabw’ekyo akaba naamanya eki kirikumanyisa kuruha bwanyima y’okusiiba nookora.

7. (a) Abashweraine baine kwebuuza bibuuzo ki ebirikubaasa kubahwera omu kworora abaana baabo? (b) Ebiri omu Enfumu 2:1-6 nibibaasa kuhwera bita abazaire kutendeka abaana?

⁷ Abashweraine baaba nibenda kuzaara abaana baine kwebuuza bati: ‘Turi abacureezi, abarikuta omutima aha by’omwoyo abu Yehova arikubaasa kutoorana kureeberera omwereere?’ (Zab. 127:3, 4) Kandi waaba ori omuzaire, yebuuze oti: ‘Ninyegyesa abaana bangye obukuru bw’okukora n’amaani?’ (Mub. 3:12, 13) ‘Ninkora kyona ekirikubaasika kurinda abaana bangye kutahikwaho akabi omu by’omubiri n’omu micwe kuruga omu nsi ya Sitaane egi embi?’ (Enf. 22:3) Torikubaasa  kurinda abaana baawe kutahikwaho embeera zigumire. Ekyo tikirikubaasika. Kwonka noobaasa kugumizamu noobahwera omu muringo gwa rukundo orikubatebeekanisiza embeera zigumire, kandi orikubeegyesa oku baine kusherura obuhabuzi omu Kigambo kya Ruhanga. (Shoma Enfumu 2:1-6.) Nk’eky’okureeberaho, omunyabuzaare yaacwamu kurekyera aho kuheereza Yehova, hwera abaana baawe kwega omu Kigambo kya Ruhanga ahabw’enki ni kikuru kuguma bahamiire ahari Yehova. (Zab. 31:23) Nari waafeerwa omukundwa, yoreka abaana baawe oku Ekigambo kya Ruhanga kirikubaasa kubahuumuriza bakatunga n’obusingye.​—2 Kor. 1:3, 4; 2 Tim. 3:16.

8. Kurugiirira aha Eky’Ebiragiro 6:6, 7, Yosefu na Mariamu bakaba baine kukora ki?

⁸ Abazaire ba Yesu ab’omu nsi bakamuhwera kukura arikusiimwa Ruhanga, barikukuratira obuhabuzi obu Yehova arikuha abazaire. (Shoma Eky’Ebiragiro 6:6, 7.) Yosefu na Mariamu bakaba nibakundira kimwe Yehova, kandi ekikuru kukaba kuri okuhwera abaana baabo kugira rukundo nk’egyo.

9. Yosefu na Mariamu bakacwamu bata omu nshonga ezaabaire ziri nkuru?

⁹ Yosefu na Mariamu bakacwamu kugira entebeekanisa nungi y’eby’omwoyo nk’eka. Hatariho kubangaanisa, buri saabiiti bakaba baza omu nteerane aha sinagogi omuri Nazareesi, n’aha mukoro gw’Okuhingurwaho buri mwaka omuri Yerusaalemu. (Luk. 2:41; 4:16) Omu ngyendo ezo barikuza Yerusaalemu bashemereire kuba baayegyeise Yesu n’abarumuna ebyafaayo by’abaheereza ba Yehova, obundi barikutaayaaya omu myanya erikugambwaho omu Byahandiikirwe. Yosefu na Mariamu ku baagizire abaana abandi, kishemereire kuba kitaraboorobeire kuhamira aha ntebeekanisa yaabo ey’eby’omwoyo. Kwonka yetegyereze emigisha ei baatungire! Ahabw’okugira ngu bakaba nibeebembeza okuramya Yehova, bakareeberera gye eka yaabo omu by’omwoyo.

10. Abazaire Abakristaayo nibeegyera ki ahari Yosefu na Mariamu?

¹⁰ Abazaire abarikuheereza Ruhanga nibeegyera ki ahari Yosefu na Mariamu? Ekirikukirayo obukuru, yoreka abaana baawe omu bigambo n’omu bikorwa ngu n’okundira kimwe Yehova. Yetegyereze ngu ekiconco ekirikukirayo  eki orikubaasa kubaha n’okubahwera kukunda Yehova. Kandi kimwe aha bintu by’omuhendo ebi orikubaasa kubeegyesa n’oku barikubaasa kuguma baine entebeekanisa nungi y’eby’omwoyo ey’okweyegyesa, okushaba, okuza omu nteerane, n’okwejumba omu buheereza. (1 Tim. 6:6) Kwonka, oine kuha abaana baawe eby’omubiri ebirikwetengyesa. (1 Tim. 5:8) Kwonka ijuka ngu omukago murungi ogu abaana baine na Yehova beitu bitari eby’obugaiga, nigwo guraabahwere kuhonokaho aha muheru gw’ensi egi embi reero bakaza omu nsi ensya. *​—Ezk. 7:19; 1 Tim. 4:8.

11. (a) Okwehanangiriza okuri omu 1 Timoseo 6:17-19 nikubaasa kuhwera kuta abazaire kucwamu gye aha bikwatiraine n’okworora abaana baabo? (b) Eka yaanyu neebaasa kutaho bigyendererwa ki, kandi nihabaasa kurugamu birungi ki? (Reeba akabokusi “ Noija Kutaho Bigyendererwa Ki?”)

¹¹ Ka nikishemeza kureeba abazaire baingi Abakristaayo nibateeraho amaka gaabo entebeekanisa nungi z’eby’omwoyo! Nibeejumba hamwe omu kuramya obutoosha. Nibaza omu nteerane z’ekibiina n’empango. Kandi nibeejumba omu kubuurira. Amaka agamwe nigabaasa kwejumba omu kubuurira omu myanya etarikukira kubuurirwamu. Abandi nibarambura Beseeli nari nibashagika emirimo y’okwombeka ebyombeko by’ekibiina. Abarikucwamu kwejumba omu mirimo egi nibeefeerereza esente, kandi nibabaasa n’okugumirwa obumwe. Kwonka emigisha ei barikutunga neebahindura abagaiga omu by’omwoyo. (Shoma 1 Timoseo 6:17-19.) Abaana abarikuba bakuriire omu maka nk’ago nibakira kugumizamu nibakora ebintu birungi ebi baayegyesiibwe, kandi tibarikwefuuza! *​—Enf. 10:22.

12. Yesu ku yaagumire naakura akaba aine kukora ki?

¹² Ishe Yesu ow’omu iguru butoosha akaba naacwamu gye, kandi n’abazaire be ab’omu nsi nabo bakaba nibacwamu kurungi. Kwonka, Yesu ku yaagumire naakura, akaba aine kwecweramu. (Gal. 6:5) Nkaitwe twena, nawe akaba aine obugabe bw’okwecweramu. Akaba naabaasa kucwamu kwebembeza okwesherurira ebye. Omu mwanya gw’ekyo, akacwamu kuguma aine omukago murungi na Yehova. (Yoh. 8:29) Eky’okureeberaho kye nikibaasa kuhwera kita abato obunaku obu?

13. Yesu akacwamu kukora kintu ki ekikuru obu yaabaire akiri muto?

¹³ Obu Yesu yaabaire ari muto, akacwamu kworobera abazaire be. Tarangire kugyendera aha buhabuzi bwabo arikuteekateeka ngu naamanya bingi kubakira. Kureka, ‘akaguma naaboorobera.’ (Luk. 2:51) Hatariho kubangaanisa Yesu akaba naatwara obujunaanizibwa bwe obw’okuba omujigaijo omu ka nka kikuru.  Aine kuba yaafiireyo munonga kwega kubaija kuruga ahari ishe owaamworoire kugira ngu ahwere omu kureeberera eka yaabo.

14. Nitumanya tuta ngu Yesu akaba naayeyegyesa Ekigambo kya Ruhanga?

¹⁴ Abazire ba Yesu baine kuba baamutebeize oku yaazairwe omu muringo gw’eky’okutangaaza, n’ebi abajwekyerwa ba Ruhanga baamugambireho ira. (Luk. 2:8-19, 25-38) Yesu taramazirwe n’ebi baamugambiire byonka, kureka akashwijuma n’Ebyahandiikirwe. Nitumanya tuta ngu Yesu akaba ari omwegi murungi w’Ekigambo kya Ruhanga? Ahakuba obu yaabaire akiri omunyeeto, abeegyesa omuri Yerusaalemu ‘bakatangaarira obwengye bwe n’ebi yaabaire naabagarukamu.’ (Luk. 2:46, 47) Kandi obu Yesu yaabaire aine emyaka 12 yonka, akaba yaaherize kwetungira obuhame ngu Yehova ni Ishe.​—Luk. 2:42, 43, 49.

15. Yesu akooreka ata ngu akacwamu kukora ebi Yehova arikukunda?

¹⁵ Yesu ku yaamanyire omwanya gwe omu ntebeekanisa ya Ruhanga, akacwamu kwikiriza omurimo ogu yaahairwe. (Yoh. 6:38) Akaba naamanya ngu naija kwangwa baingi, kandi ekyo kishemereire kuba kyamureetaire kuteekateeka munonga. Kwonka, nabwo akacwamu kworobera Yehova. Yesu ku yaabatiziibwe omu 29 Y.A.K., akeebembeza okukora ebi Yehova yaabaire naamwenza. (Heb. 10:5-7) Nangwa n’obu yaabaire ariyo naafa ari aha muti, akaguma amaririire kukora ebi Ishe arikukunda.​—Yoh. 19:30.

16. Ni ishomo ki rimwe eri abaana barikubaasa kwegyera ahari Yesu?

¹⁶ Yorobera abazaire baawe. Nka Yosefu na Mariamu, abazaire baawe nabo tibahikiriire. Kandi Yehova ahaire abazaire baawe obujunaanizibwa bw’okukurinda, okukutendeka, n’okukuhabura. Waatwara obuhabuzi bwabo nk’obw’omuhendo, kandi okoorobera obushoboorozi bwabo, noija “kuba gye.”​—Efe. 6:1-4.

17. Kurugiirira aha biri omu Yoshua 24:15, abato baine kwecweramu kukora ki?

¹⁷ Cwamu ou araaheereze. Oine kwetungira obuhame ngu buzima Yehova ariho, n’okumanya ekirikutwarirwa omu bigyendererwa bye, n’oku ebi arikukunda birikukukwataho. (Rom. 12:2) Noija kubaasa kucwamu aha bikwatiraine n’enshonga erikukirayo obukuru, nikwo  kucwamu kuheereza Yehova. (Shoma Yoshua 24:15; Mub. 12:1) Waaguma oine entebeekanisa y’okushoma Baibuli n’okugyega, rukundo ei oyiniire Yehova neija kugumizamu neekura, kandi n’oija n’okwongyera kumwikiririzamu.

18. Abato nibabaasa kucwamu kukora ki, kandi nihaija kurugamu ki?

¹⁸ Cwamu kwebembeza okukora ebi Yehova arikukunda. Ensi egi erikwebemberwa Sitaane neeyegyesa ngu waakoresa etalanta zaawe kwegasira, noija kushemererwa. Kwonka nitumanya ngu abo abarikuta omutima aha kwesherurira eby’obugaiga nibeecumitira “kimwe n’enaku nyingi.” (1 Tim. 6:9, 10) Aha rubaju orundi, waayorobera Yehova okacwamu kwebembeza okukora ebi arikukunda, noija kuba omusinguzi, otwaze n’omuringo gw’obwengye.​—Yos. 1:8.

19. Abazaire bashemereire kwijuka ki?

¹⁹ Abazaire, muteereho kuhwera ab’omu maka gaanyu kuheereza Yehova. Mumwesigye, kandi naija kubahwera kucwamu gye. (Enf. 3:5, 6) Mwijukye ngu ebi murikukora nibiija kukwata munonga aha baana baanyu kukira ebi murikugamba. N’ahabw’ekyo mucwemu gye mubaase kusiimwa Yehova.

20. Ni migisha ki ei abato barikwija kutunga baacwamu kuheereza Yehova?

²⁰ Abato, abazaire baanyu nibabaasa kubahwera kucwamu gye. Kwonka kiri ahariimwe kukora ebiraabareetere kusiimwa Yehova. N’ahabw’ekyo mutooreze Yesu, kandi mucwemu kuheereza Shoimwe ow’omu iguru oine rukundo. Mwakora mutyo, nimwija kugira bingi by’okukora, mutungye okumarwa, n’okushemererwa hati. (1 Tim. 4:16) Kandi omu biro by’omumaisho, nimwija kutunga okushemererwa okurikukirayo!