1. Nitumanya tuta ngu omurimo gw’okuhindura abantu abeegi nigujuna amagara?

OKUHINDURA abantu abeegi n’omurimo ogurikujuna amagara! Eki nitukimanya tuta? Obu Yesu yaaha ekiragiro ekiri omuri Matayo 28:19, 20, akagira ati: “Mugyende, . . . muhindure abantu abeegi nimubabatiza.” Mbwenu shi okubatizibwa ni kukuru kuta? Omuntu weena orikwenda kujunwa aine kubatizibwa. Orikuza kubatizibwa aine kuba naikiriza ngu okujunwa nikubaasika ahabw’okugira ngu Yesu akafa yaatubeera ekitambo kandi yaazooka. Niyo nshonga ahabw’enki entumwa Petero yaagambiire Abakristaayo bagyenzi be ngu ‘okubatizibwa hati nikubajuna ahabw’okuzooka kwa Yesu Kristo.’ (1 Pet. 3:21) N’ahabw’ekyo omwegi yaabatizibwa, naaza omu muhanda gw’okujunwa.

2. Twine kuba beegyesa ba muringo ki kurugiirira ahari 2 Timoseo 4:1, 2?

² Kubaasa kuhindura abantu abeegi, twine kwega obukoryo ‘bw’okwegyesa.’ (Shoma 2 Timoseo 4:1, 2.) Ahabw’enki? Ahakuba Yesu akaturagiira ati: “Mugyende, . . . muhindure abantu abeegi nimubabatiza.” Entumwa Paulo akagira ngu “ogumizemu” omu murimo ogwo, ‘omu kukora otyo, noija kwejuna kandi ojune n’abarikukuhurikiza.’ N’ahabw’ekyo ahabw’enshonga nungi, Paulo akagira ati: ‘Oyerinde omu bi orikwegyesa’ nari omu myegyeseze yaawe. (1 Tim. 4:16) Obu omurimo gw’okuhindura abantu abeegi gwine akakwate n’okwegyesa, nitwenda ngu emyegyeseze yaitu ebe eri mirungi.

3. Omu kicweka eki, nituza kushwijuma ki aha bikwatiraine n’okwegyesa abeegi ba Baibuli?

³ Butoosha nitwegyesa abantu nyamwingi amazima agarikushangwa omu Baibuli. Kwonka nk’oku ekicweka ekihwaire kyorekire,  nitwenda kumanya oku turikubaasa kuhwera baingi aharibo kuba abeegi ba Yesu Kristo ababatiziibwe. Omu kicweka eki, nituza kureeba ebintu ebindi bitaano ebi buri mwegyesa aine kukora kuhwera omwegi kutunguuka akahika aha kubatizibwa.

4. Ahabw’enki omwegyesa aine kugira omutwarize gw’okwerinda yaaba naayegyesa omwegi wa Baibuli? (Reeba obugambo obw’ahansi.)

⁴ Nitukunda ebi turikwegyesa ebiri omu Kigambo kya Ruhanga. N’ahabw’ekyo nitubaasa kwohibwa kugamba bingi aha bi turikukunda. Kwonka, yaaba n’okwebembera Okwega Omunaara gw’Omurinzi, Okwega Baibuli okw’Ekibiina, nari okwegyesa omuntu Baibuli, orikwebembera tashemereire kugamba bingi. Kubaasa kureka Baibuli ekaba niyo yaakora omu kwegyesa, omwegyesa aine kugira omutwarize gw’okwerinda atarikuteeraho kushoboorora buri kimwe eki arikumanya aha kyahandiikirwe nari enshonga. * (Yoh. 16:12) Gyeragyeranisa ebi waabaire noomanya omu Baibuli obu waabatizibwa n’ebi orikumanya hati. Obundi obu waabatizibwa, okaba nooyetegyereza enyegyesa nkuru ezirikutandikirwaho zonka. (Heb. 6:1) Kikutwariire emyaka kwega ebi orikumanya hati, n’ahabw’ekyo otateeraho kwegyesa omwegi buri kimwe omurundi gumwe.

5. (a) Kuhikaana na 1 Abatesalonika 2:13, nituba nitwenda ngu omwegi wa Baibuli ayetegyereze ki omu kwega kwe? (b) Nitubaasa kuhiga tuta omwegi kugamba aha bintu ebi arikwega?

⁵ Nitwenda ngu omwegi ayetegyereze ngu ebi arikwega nibiruga omu Kigambo eki Ruhanga yaahandiikiise. (Shoma 1 Abatesalonika 2:13.) Ekyo nitubaasa kukikora tuta? Higa omwegi kugambira abandi aha bi arikwega. Omu mwanya gw’okuguma nooshoboororera omwegi ebyahandiikirwe, mushabe kukushoboororera ebimwe. Hwera omwegi kureeba oku Ekigambo kya Ruhanga kirikumukwataho we nk’omuntu. Mubuuze ebibuuzo ebirikumuhwera kurahuka kureeba eky’okugarukamu n’okugamba oku arikuteekateeka n’oku arikwehurira aha byahandiikirwe ebi arikushoma. (Luk. 10:25-28) Nk’eky’okureeberaho, mubuuze oti: “Ekyahandiikirwe eki kikuhwereire kureeba ota gumwe aha mitwarize ya Yehova?” “Noobaasa kugasirwa ota omu mazima aga kuruga omu Baibuli?” “Ebi waaheza kwega nibikukwataho bita?” (Enf. 20:5) Ekikuru ti bwingi bw’ebintu ebi omwegi arikumanya, kureka oku arikukunda ebi arikumanya n’oku arikubigyenderaho.

6. Ahabw’enki kirikubaasa kuba kirungi kugyenda aha mwegi wa Baibuli oine omwegyesa orikumanya kwegyesa gye?

⁶ Waaba nooyegyesa omuntu Baibuli, hariho  obu orikugyenda n’ababuurizi abarikumanya kwegyesa gye? Ku oraabe noobatwara, noobaasa kubabuuza oku barikureeba emyegyeseze yaawe n’oku orikukoresa gye Baibuli omu kwegyesa kwawe. Oine kuba ori omucureezi waaba ori ow’okuboneza obukoryo bwawe bw’okwegyesa. (Gyeragyeranisa Ebyakozirwe 18:24-26.) Bwanyima, buuza omubuurizi ogwo ku araabe naateekateeka ngu omwegi naayetegyereza amazima. Noobaasa n’okumushaba kwegyesa omuntu ou orikwegyesa Baibuli waaba nooza kuba otariho kumara saabiiti emwe nari n’okukiraho. Eki nikiija kureetera omwegi kugumizamu naayega butoosha, kandi nikiija kworeka omwegi obukuru bw’okwega kwe. Toshemereire kuteekateeka ngu ogu n’omwegi “waawe,” kandi ngu tihariho ondiijo orikubaasa kumwegyesa. Kasita nooba nooyendeza omwegi ebirungi, kugira ngu abaase kugumizamu naatunguuka omu kwega amazima.

7. Niki ekiraahwere omwegi kugirira ekihika ebi arikwega?

⁷ Omwegi aine kureeba ngu oine omuhimbo, kandi ngu oine n’obuhame aha mazima ga Baibuli. (1 Tes. 1:5) Obwo ekyo nikibaasa kumureetera kugira ekihika aha bi arikwega. Kyaba nikibaasika, mugambire oku okugyendera aha misingye ya Baibuli kikuhwereire. Reero naija kureeba ngu Baibuli erimu obuhabuzi oburikubaasa kumugasira.

8. Noobaasa kukora ki kuhwera omwegi wa Baibuli, kandi ahabw’enki nikyetengyesa kukikora?

⁸ Waaba nooyegyesa omwegi, mugambire eby’okureeberaho eby’abantu abaabaire baine oburemeezi nk’obwe reero bakabusingura. Waaba nooza kumwegyesa noobaasa kugyenda n’omwe aha b’omu kibiina ou eky’okureeberaho kye kirikubaasa kumugasira. Nari noobaasa kushanga eby’okureeberaho ebirikugaruramu amaani aha jw.org omu bicweka ebikurataine “Baibuli Neehindura Emitwarize y’Abantu.” * Ebicweka nk’ebyo na vidiyo nibiija kuhwera omwegi wa Baibuli kureeba oku kiri eky’obwengye we kugyendera aha misingye ya Baibuli.

9. Noobaasa kuhiga ota omwegi kugambiraho ab’eka ye na banywani be aha bi arikwega?

⁹ Omwegi yaaba ari omu bushwere, omukundwa we nawe naayega Baibuli? Kyaba tikwo kiri, mwete nawe abeegaiteho. Higa ou orikwegyesa kugambiraho ab’eka ye na banywani be aha bi arikwega. (Yoh. 1:40-45) Mu muringo ki? Noobaasa kumubuuza oti: “Amazima  aga noobaasa kugashoboororera ota ab’eka yaawe?” nari “Noobaasa kukoresa kyahandiikirwe ki kuhamiza munywani waawe?” Omu muringo ogu, noija kuba nootendeka omwegi nawe kuba omwegyesa. Bwanyima yaahitsya ebirikwetengyesa naabaasa kutandika kwejumba omu kubuurira nk’omubuurizi otabatiziibwe. Noobaasa kubuuza omwegi ku araabe naamanya omuntu weena orikwenda kwega Baibuli. Ku araabe aine ou arikumanya, gamba nawe ahonaaho omushabe kumwegyesa Baibuli. Mworekye vidiyo Niki Ekirikutwarirwa omu Kwegyesibwa Baibuli? *

10. Nk’oku kiri omu 1 Abatesalonika 2:7, 8, orikwegyesa omwegi wa Baibuli naabaasa kutooreza ata Paulo?

¹⁰ Abeegyesa baine kworeka ngu buzima nibafayo aha bu barikwegyesa. Bareebe nk’abarikwija kuba bakuru baawe, nari barumuna baawe, nari banyaanyako ab’eby’omwoyo. (Shoma 1 Abatesalonika 2:7, 8.) Tikirikuboorobera kwecwa ahari banywani baabo ab’omu nsi, kukora empindahinduka kuheereza Yehova. Twine kubahwera kutunga abanywani abaabuzima omu kibiina. Ba munywani w’omwegi, orikumara obwire nawe butari obu orikuba noomwegyesa Baibuli bwonka, beitu n’omu bwire obundi. Okuteera esimu, okwohereza obutumwa, nari okutaayaaya akaire kakye nikubaasa kworeka abeegi ngu noobafaho.

11. Nitwenda ngu abeegi ba Baibuli batungye ki omu kibiina, kandi ahabw’enki?

¹¹ Hariho engamba ngu: “Nikitwara ekyaro kyona kworora omwana.” Kwonka itwe nitubaasa kugira ngu: “Nikitwara ekibiina kyona kuhindura omuntu omwegi wa Yesu.” Niyo nshonga ahabw’enki abeegyesa barungi, abeegi ba Baibuli nibabanjurira abandi omu kibiina abarikubaasa kubahwera kutunguuka. Obwo abeegi nibabaasa kushashaanuka n’abaheereza ba Ruhanga, abarikubaasa kubashagika omu by’omwoyo n’omu nyehurira. Nitwenda ngu buri omwe areebe ngu ekibiina nk’eka ye ey’eby’omwoyo. Nitwenda ngu omwegi akunde eka yaitu y’Ekikristaayo ey’eishe-emwe. Reero obwo nikiija kumworobera kurekyera aho kukwatanisa n’abantu abatarikumuhwera kukunda Yehova. (Enf. 13:20) Banywani be ab’okubanza baamwanga, naija kumanya ngu naabaasa kutunga abanywani abaabuzima omu kibiina kya Yehova.​—Mak. 10:29, 30; 1 Pet. 4:4.

12. Ahabw’enki twine kugaaniira n’omwegi aha kwehayo kw’Ekikristaayo n’okubatizibwa?

¹² Gamba butunu aha kwehayo kw’Ekikristaayo n’okubatizibwa. Kasita ekigyendererwa  kyaitu ky’okwegyesa abantu Baibuli n’okubahwera kuba abeegi ba Yesu ababatiziibwe. Ameezi makye orikwegyesa omuntu Baibuli otarikwosha, na munonga yaatandika kwija omu nteerane, omwegi aine kumanya ngu ekigyendererwa ky’okumwegyesa Baibuli n’okumuhwera kutandika kuheereza Yehova akaba omwe aha Bajurizi be.

13. Ni ntambwe ki ezi omwegi arikuteera kubaasa kutunguuka kuhika aha kubatizibwa?

¹³ Omwegi wa Baibuli ow’amazima yaateera orutambwe rumwe-rumwe, naabaasa kuhika aha kigyendererwa ky’okubatizibwa! Okubanza, omwegi aine kumanya Yehova akamukunda, kandi akamwikiririzamu. (Yoh. 3:16; 17:3) Bwanyima omwegi naagira omukago murungi na Yehova, reero atandika kukwatanisa n’ekibiina. (Heb. 10:24, 25; Yak. 4:8) Aha muheru, naayetantara ebikorwa bibi kandi ayeteisa ebibi bye. (Byak. 3:19) Kandi okwikiriza kwe nikumuhiga kubagana amakuru marungi n’abandi. (2 Kor. 4:13) Reero bwanyima naayehayo ahari Yehova, kandi ayoreka okwehayo kwe arikubatizibwa. (1 Pet. 3:21; 4:2) Eryo ka n’eizooba ry’okushemererwa erya buri omwe! Omwegi yaateera buri rutambwe kuhika aha kigyendererwa kye, musiime kandi omuhigye kugumizamu naatunguuka arikugyendera omu muhanda oguhikire.

14. Omwegyesa naabaasa kushwijuma ata okutunguuka kw’omwegi?

¹⁴ Twine kuba abagumisiriza twaba nituhwera omwegi kutunguuka kuhika aha kwehayo n’okubatizibwa. Haahinguraho obwire, twine kucondooza kumanya yaaba aine ekyetengo ky’okuheereza Yehova Ruhanga. Nooreeba obumanyiso oburikworeka ngu omwegi naateeraho kworobera ebi Yesu yaaragiire? Nari naayenda kwega bwega enshonga eziri omu Baibuli?

15. Omwegyesa aine kureeba bumanyiso ki oburikworeka ngu omwegi ariyo naatunguuka?

¹⁵ Guma nooshwijuma okutunguuka oku omwegi arikukora. Nk’eky’okureeberaho, naayoreka enyehurira ze yaaba naakunda Yehova? Naashaba Yehova? (Zab. 116:1, 2) Naakunda kushoma Baibuli? (Zab. 119:97) Naaza omu nteerane atarikwosha? (Zab. 22:22) Akozire empindahinduka ezirikwetengyesa omu mitwarize ye? (Zab. 119:112) Yaatandikire kugambira ab’eka ye n’abanywani ebi arikwega? (Zab. 9:1) Ekikuru munonga, naayenda kuba omwe aha Bajurizi ba Yehova? (Zab. 40:8) Omwegi yaaba  atarikukora empindahinduka ezi, omu bwengye teeraho kumanya ahabw’enki, reero ogaaniire nawe aha nshonga egi omu muringo gw’embabazi kwonka ogwa butunu. *

16. Niki ekirikubaasa kworeka ngu twine kurekyera aho kwegyesa omuntu Baibuli?

¹⁶ Buri kuhinguraho bwire, shwijuma oreebe yaaba oine kugumizamu nooyegyesa omuntu. Yebuuze oti: ‘Mbwenu shi omwegi tarikutebeekanisiza okwega kwe? Taine kihika ky’okuza omu nteerane? Kandi shi akiine emize mibi? Mbwenu shi akiri omu diini y’ebishuba?’ Waagarukamu ebibuuzo ebyo ngu eego, okugumizamu noomwegyesa nikiba kiri nk’okwegyesa omuntu okuziha kwonka atarikwenda kuza omu maizi! Omwegi yaaba atarikusiima ebi arikwega, kandi atarikwenda kukora empindahinduka, mbwenu shi ahabw’enki oine kugumizamu noomwegyesa?

17. Kurugiirira ahari 1 Timoseo 4:16, abeegyesa ba Baibuli boona baine kukora ki?

¹⁷ Obujunaanizibwa bwaitu bw’okuhindura abantu abeegi nitubutwara nka bukuru, kandi nitwenda kuhwera abeegi ba Baibuli kutunguuka kuhika aha kubatizibwa. Niyo nshonga ahabw’enki twine kureka Baibuli ekakora ogwayo omu kwegyesa, kandi tukeegyesa twine omuhimbo n’obuhame. Twine kuhiga omwegi kugira abanywani omu kibiina. Kandi twine kuguma nituhamiiriza enshonga y’okwehayo n’okubatizibwa, butoosha turikushwijuma entunguuka y’omwegi. (Reeba akabokusi aha rupapura 13, “ Eki Abeegyesa Baine Kukora Kuhwera Abeegi Kuhika aha Kubatizibwa.”) Nitushemererwa kureeba ngu nitubaasa kwejumba omu murimo ogu ogurikujuna amagara! Ka tumariirire kukora kyona ekirikubaasika kwegyesa abeegi ba Baibuli abarikutunguuka kuhika aha kubatizibwa.