Abeegi ba Baibuli kubaasa kuhikiiriza omurimo gw’okubuurira, bakaba baine kuba emanzi. Bakaba nibaija kugambira “ebigambo birungi” abacureezi ‘n’eizooba eri Ruhanga waitu arikwija kuhooreraho enzigu’ abantu ababi.

Ow’eishe-emwe J.  H.  Hoskin, owaabaire naatuura omuri Canada, akabuurira atarikutiina omu bwire bw’okuhakanisibwa. Omu kutandika kwa 1921, akabuurira omwebembezi w’ediini. Ow’eishe-emwe Hoskin akatandika kugaaniira nawe ati: “Ka tuhikaanise ebiteekateeko aha Byahandiikirwe, n’obu turaabe tutaikirizaine aha nshonga ezimwe, nabwo nitubaasa kuhendera tutatongaine.” Kwonka ekyo tikwo kyabaire. Ow’eishe-emwe Hoskin naagira ati: “Tukaba twaheza edakiika nkye turikugaaniira, reero yaateera orwigi munonga, naateekateeka ngu ekirahuri kyarwo kyayatika.”

“Ahabw’enki otarikuza kugaaniira n’abatari Bakristaayo?” nikwo yaankankamiire. Ow’eishe-emwe Hoskin akaguma ahunami, kwonka akagyenda naateekateeka ati: ‘Nawe ka ataine ntaaniso nabo?’

Omwebembezi w’ediini ogwo ku yaabaire naaha orubazo omu kanisa ye eizooba eryakuratsireho, akagamba ebitahikire aha w’eishe-emwe. “Akarabura abakuratsi be, arikubagira ngu ow’eishe-emwe ogwo niwe muntu orikukirayo kubeiha omu tauni yaabo, kandi ngu aine kwitwa” nikwo Ow’eishe-emwe Hoskin yaagizire. Kwonka akagumizamu naabuurira, kandi akagamba n’abantu baingi. Naagira ati: “Okubuurira kukanshemeza munonga. Nangwa n’abantu bakaba baagira bati: ‘Nitumanya ngu ori omuheereza wa Ruhanga!’ kandi bakaba baambuuza yaaba nyine eki ndikwenda kugira ngu baampwere.”

Kubaasa kuhwera abarikusiima kutunguuka, Abeegi ba Baibuli bakata entebeekanisa z’okwega omu magaziini ya Golden Age. * Entebeekanisa egi ekaba erimu ebibuuzo ebi abazaire baine kuhikaanisa ebiteekateeko n’abaana baabo. Ebibuuzo ebi bikahwera munonga abazaire kwegyesa abaana baabo n’okutunga eby’okugarukamu kuruga omu Baibuli.” Ebibuuzo ebimwe, nka “Baibuli erimu ebitabo bingahi?,” bikahwera abaana kumanya amazima goorobi. Ebindi, nka “Buri Mukristaayo owaabuzima shi naija kuhiiganisibwa?,”  ekibuuzo eki kikatebeekanisa abato kuba ababuurizi emanzi.

Entebeekanisa ya Advanced Studies in the Divine Plan of the Ages ekaba erimu ebibuuzo ebindi ebyahweraire Abeegi ba Baibuli kwongyera kumanya gye Baibuli barikutunga eby’okugarukamu kuruga omu kitabo Studies in the Scriptures eky’okubanza. Abantu baingi bakagasirwa omu ntebeekanisa egi, kwonka magaziini ya Golden Age eya Desemba 21, 1921, ekaranga ngu entebeekanisa egi naija kurugaho. Niki ekyareetsireho empinduka egyo ahonaaho?

Abarikwebembera ekibiina bakeetegyereza ngu Abeegi ba Baibuli baine kwega mazima omu muringo ogutebeekanisiibwe gye. Aha muheru, ekitabo Harp of God kikashohozibwa omuri Novemba 1921. Abaatungire ekitabo eki bakatandika kwegyesibwa ebirimu. Entebeekanisa egi ey’okwega ekahwera abashomi kwetegyereza “Ekiragaaniso kya Ruhanga eky’okuha abantu amagara agatahwaho.” Entebeekanisa egi ekaba neekora eta?

Omuntu ku yaabaire atunga ekitabo ekyo, akaba aheebwa na kaada eriho ebi araakore. Saabiiti erikukurataho, akaba aheebwa ebibuuzo ebirikwegamira aha ki ahairwe kukora. Kaada ekaba neehendera n’okushoma okwa saabiiti erikukurataho.

Buri saabiiti kumara saabiiti 12, ekibiina kikaba kiha omwegi kaada nsya. Obwire obwingi ekibiina kikaba kyoherereza kaada ezo ab’emyaka ya bukuru nari abaine embeera ezindi ezirikubaremesa. Nk’eky’okureeberaho, Anna K. Gardner, kuruga Millvale, Pennsylvania, U.S.A., akagira ati: “Obu ekitabo Harp of God kyashohozibwa kikabaasisa mwene maawe Thayle owaabaire aine obumuga kukora bingi, ahabw’okuguma naatunga kaada z’ebibuuzo buri saabiiti.” Bwanyima y’okuheza okwega kwo, bakaba baamutaayaayira kumuhwera kugumizamu naayega.

Aha kuhendera kw’omwaka, Ow’eishe-emwe J. F. Rutherford akooherereza ebibiina byona ebaruha. Akabamanyisa ngu “okubuurira aha Bukama omwaka ogu kuhikire aha bantu baingi, kwarugamu n’ebirungi kukira emyaka endiijo eyenyima.” Arikuranzya omu maisho akongyeraho ati: “Hakiriho bingi by’okukora. Muhige abandi kwija omu buheereza obu oburikwera.” Abeegi ba Baibuli buzima bakakuratira obuhabuzi obu. Omuri 1922 bakabuurira aha Obukama n’obumanzi omu miringo y’omutaano.