1922—Emyaka Igana Ehingwire
“RUHANGA . . . otuha okusingura ahabwa . . . Yesu Kristo.” (1 Kor. 15:57, Baibuli eya King James) Ekyahandiikirwe ekyo eky’omwaka 1922, kikahamiza Abeegi ba Baibuli ngu baaguma bari abeesigwa nibaija kutunga emigisha. Omu mwaka ogwo, Yehova akashumbuusha ababuurizi abo abeeziriki. Akabaha emigisha ku baatandikire kuteera ebitabo ebyabo n’okukoresa radiyo kujanjaaza amazima g’Obukama. Reero omuri 1922, kikareebwa butunu ngu Yehova akaba naashagika abantu be. Abeegi ba Baibuli bakabaasa kugira oruteerane oruhango orw’ebyafaayo orwabaire omuri Cedar Point, Ohio, U.S.A. Ebyabaire aha ruteerane orwo bikakwata aha kibiina kya Yehova n’okuhitsya hati.
“EKITEEKATEEKO KIRUNGI”
Ababuurizi ku baayeyongyeire, ebitabo bikaba bitakimara. Ab’eishe-emwe aha Beseeli eya Brooklyn bakaba nibashohoza magaziini, kwonka barikukoresa ebitongore ebindi kuteera ebitabo. Ekitongore ekyo kikamara ameezi maingi kirikushohoza ebitabo bitarikumara, n’ahabw’ekyo Ow’eishe-emwe Rutherford akabuuza Robert Martin owaabaire naayebembera okuteera ebitabo, yaaba twabaire nitubaasa kweteerera ebitabo.
Eiteerero ry’ebitabo ahari Concord Street Brooklyn, New York
Ow’eishe-emwe Martin akagira ngu ekyo kikaba kiri “ekiteekateeko kirungi,” “ekyabaire nikimanyisa okugira ebyoma ebyaitu eby’okushohoza ebitabo.” Ab’eishe-emwe bakapangisa omwanya ahari 18 Concord Street omuri Brooklyn, kandi baatunga ebyoma ebyabaire nibyetengyesa.
Tikiraashemeize buri omwe ab’eishe-emwe ku baatandikire kweshohoreza ebitabo. Owaabaire naakurira ekitongore ekyabaire nikituteerera ebitabo ku yaataayaayire aha iteerero erisya, akagira ati: “Mwine ebyoma ebirikukirayo oburungi by’okuteera ebitabo, kwonka tihariho n’omwe omuriimwe orikubaasa kubikoresa. Nibiza kufa omu meezi mukaaga gonka.”
Ow’eishe-emwe Martin akagira ngu, “n’obu ebigambo ebyo byabaire biri nk’ebihikire, tukaba nitumanya ngu Yehova naaza kutuhwera nka butoosha.” Kandi kwo akabahwera. Omu bwire bukye bakatandika kushohoza ebitabo 2,000 buri izooba.
Abarikukora omu iteerero ry’ebitabo beemereire aha rubaju rw’ebyoma
OKUHIKA BAINGI KURABIRA AHA RADIYO
Okwongyera aha kweshohoreza ebitabo, abantu ba Yehova bakatandika kukoresa radiyo nk’omuringo musya gw’okujanjaaza amakuru marungi. Sande omu ihangwe, Okwakabiri 26, 1922, Ow’eishe-emwe Rutherford akagambira aha radiyo omurundi gw’okubanza. Akaha orubazo, “Obukaikuru bw’Abantu Abariho Hati Tibarikwija Kufa” aha radiyo erikwetwa KOG omuri Los Angeles, California, U.S.A.
Abantu nka 25,000 bakahurira puroguraamu. Bamwe bakahandiika ebaruha z’okumusiima ahabw’orubazo orwo. Emwe aha baruha ezo ekahandiikwa Willard Ashford, kuruga Santa Ana, California. Akasiima Ow’eishe-emwe Rutherford ahabw’orubazo “rurungi kandi orwabaire nirushemeza.” Akoongyeraho ati: “Ku ogire ngu toraagambiire aha radiyo tukaba tutarikwija kukuhurira ahabw’okugira abarwaire bashatu omu nju, n’obu waakugambiire omu kyombeko ekiri haihi naitwe.”
Kandi saabiiti ezaakuratsireho bakatebeekanisa puroguraamu ezindi. Omwaka 1922 gurikuza kuhendera, ekibiina kikateebereza ngu “abantu nka 300,000 bakahurira obutumwa kurabira aha radiyo.”
Amabaruha n’ebyagambirwe, bikahiga Abeegi ba Baibuli kumariirira kwombeka radiyo omuri Staten Island, haihi na Beseeli ya Brooklyn. Emyaka eyaakuratsireho, Abeegi ba Baibuli bakaba nibaija kukoresa radiyo WBBR, kujanjaaza amakuru g’Obukama omu myanya mingi.
“ADV”
Omunaara gw’Omurinzi ogw’Okwamukaaga 15, 1922, gukarangirira ngu nihaza kubaho oruteerane oruhango omuri Cedar Point, Ohio, kuruga Seputemba 5 kuhika 13, 1922. Abeegi ba Baibuli bakashemererwa munonga ku baahikire omuri Cedar Point.
Omu rubazo rw’okubanza, Ow’eishe-emwe Rutherford akagira ati: “Nyine obwesigye ngu, Mukama naaza . . . kuha omugisha oruteerane oru, kandi ruhe obujurizi omu nsi yoona nk’oku kitakabahoga.” Abaahaire embazo aha ruteerane orwo bakahiga abantu kwejumba omu murimo gw’okubuurira.
Abantu nyamwingi bari aha ruteerane oruhango omuri Cedar Point, Ohio, 1922
Aha Rwakataano, Seputemba 8, abantu nka 8,000 bakaija aha ruteerane, baine ekihika ky’okuhurira orubazo rw’Ow’eishe-emwe Rutherford. Bakaba nibateekateeka ngu naaza kushoboorora amakuru g’enyuguta “ADV,” ezaabaire ziri ahari kaada zaabo. Ku baabaire bashutami, bakeetegyereza ngu hakaba hariho omwenda guzingire ahaiguru ya puratifoomu. Arthur Claus, owaabaire aizire aha ruteerane orwo kuruga Tulsa, Oklahoma, U.S.A., akashutama ahu yaabaire naabaasa kuhurira gye, ahakuba omu bwire obwo bakaba bataine byoma by’okutunguura amaraka.
“Tukaba tutaire omutima ahari buri kigambo”
Kubaasa kuhamya ngu tihaine ekyahuzya abantu, ceyamaani akaranga ngu abaraakyerererwe tibaraikirizibwe kutaahamu Ow’eishe-emwe Rutherford yaaba naaha orubazo. Shaaha ishatu n’ekicweka z’akasheeshe, Ow’eishe-emwe Rutherford akatandika kuha orubazo arikujuriza ebigambo bya Yesu ebiri omuri Matayo 4:17 ebirikugira biti: “Obukama bw’omu iguru bwiriire haihi.” (Baibuli eya King James) Obu yaabaire naagamba oku abantu baabaire nibaija kuhurira ebirikukwata aha Bukama, akagira ati: “Yesu akagira ngu akaba naija kwejumba omu kushaaruura abantu be omu bwire bw’okubaho kwe kandi arundaane abantu abeesigwa.”
Ow’eishe-emwe Claus, owaabaire ashutami omu maisho, akagira ati: “Tukaba tutaire omutima ahari buri kigambo.” Kwonka ahonaaho, akarwara yaashohora. Claus akaba atarikwenda kushohora, ahakuba akaba naamanya ngu taraikiriziibwe kugaruka kutaahamu.
Omu dakiika nkye, akatandika kwehurira gye. Akagira ngu ku yaabaire naagaruka omu kishaayi, akahurira abantu nibateera omu ngaro. Akagira ekihika ky’amaani! Akacwamu kukora kyona ekyabaire nikibaasika yaatemba ahaiguru, kubaasa kuhurira ekicweka ky’orubazo orwo nyamurungi ekyabaire kitsigaireyo. Ow’eishe-emwe Claus, owaabaire aine emyaka 23, akabona ah’okutembera kuza ahaiguru. Ku yaahikire ahaiguru, akeetegyereza ngu “akaba naabaasa kuhurira gye.”
Kwonka Arthur tiwe yaabaire ari ahaiguru wenka. Akashangayo bamwe ahari banywani be. Omwe aharibo, Frank Johnson, akamuhika yaamubuuza ati: “Oine akasyo akaine obwogi?”
“Eego, nkaine,” nikwo Arthur yaamugarukiremu.
Frank akamugira ati: “Ekyo nikyo twaba nitushaba.” “Nooreeba omwenda ogwo oguzingire? N’ekipande, kihanikirwe aha misumaari egi. Hurikiza gye Omuramuzi. * Ku araagire ngu, ‘n’ahabw’ekyo murangye, murangye,’ oshare obuguha buna obu.”
N’ahabw’ekyo, Arthur akakwata akasyo omu ngaro ari n’abandi baategyereza akamanyiso. Omu bwire bukye, Ow’eishe-emwe Rutherford akahika aha kicweka kikuru ky’orubazo. Aine omuhimbo n’okushemererwa, akagamba n’eiraka rihango ati: “Mube abajurizi ba mukama abeesigwa kandi abaabuzima. Mugyende murwane mashaija kuhitsya obu Babulooni yoona eraabe eitongo. Mubuurire obutumwa buri hamwe. Ensi eine kumanya ngu Yehova ni Ruhanga, kandi Yesu Kristo niwe Mugabe w’abagabe kandi Mukama w’abakama. Eri n’eizooba rikuru omu byafaayo. Mureebe, Omugabe naategyeka! Niimwe mutoorainwe kuranga ebirikumukwataho. N’ahabw’ekyo murangye, murangye, murangye, Omugabe n’Obugabe bwe!”
Arthur akagira ngu we n’ab’eishe-emwe abandi bakashara emiguha reero ekipande kyayezingurura. Kuhikaana n’enyuguta z’Orungyereza “ADV,” ekipande kikaba nikigira ngu, “Murangye Omugabe n’Obukama bwe.”
“OMURIMO OGURIKUKIRAYO OBUKURU”
Oruteerane orwabaire Cedar Point rukahwera ab’eishe-emwe kuta omutima aha murimo mukuru gw’okubuurira aha Bukama, kandi abaabaire baine omutima gw’okuheereza beekundiire bakagwejumbamu. Payoniya kuruga Oklahoma, U.S.A., akahandiika ati: “Disiturikiti ei twabaire nitubuuriramu ekaba erimu ebirombe, kandi abantu baayo bakaba bari abooro.” Akagira ngu obumwe abantu ku baabaire bahurira obutumwa oburi omu magaziini eya Golden Age, “bakaba barira.” Akahendera arikugira ati: “Gukaba guri omugisha gw’amaani kubahuumuriza.”
Abeegi ba Baibuli abo bakeetegyereza obukuru bw’ebigambo bya Yesu ebiri omuri Luka 10:2 ebirikugira biti: “Eby’okugyesha ni bingi, kwonka abagyesi ni bakye.” Omwaka gurikuhendera, bakaba bamaririire kurangirira obutumwa bw’Obukama omu nsi yoona okukira ira.
^ Ow’eishe-emwe Rutherford obumwe bakaba nibamweta “omuramuzi” ahabw’okugira ngu akakoraho nk’omuramuzi w’omutaano omuri Missouri, U.S.A.
