“MWANGA kurwanisa Bufaransa na Bungyereza, nimuza kwitwa!” nikwo omuserukare w’Abanazi yaagambiire Abajurizi ba Yehova omu Rutaro rw’Ensi Yoona II. N’obu abaserukare ba Nazi baagumire bari haihi, tihariho n’omwe aha b’eishe-emwe abo owaikiriize kuhenda ebiragiro bya Yehova. Ka baayorekire obumanzi! Eky’okureeberaho eki nikyoreka gye oku Abajurizi ba Yehova barikutwara entaro: Nitwanga kwejumba omu ntaro z’ensi. N’obu twakutiinatiinisibwa kwitwa nitwanga kwejumba omu mihondano y’ensi egi.

1. ABANTU BA RUHANGA BAKABA BARI EIHANGA RIMWE

Ira, Yehova akarundaana abantu be baaba eihanga rimwe erya Israeli. Abaisraeli akabeeta ‘abantu be ahabwe abatoorainwe omu mahanga goona.’ (Kur. 19:5) Kandi Ruhanga akabaha omwanya gw’okutuuramu. N’ahabw’ekyo ku yaabaire aragiira Abaisraeli kurwanisa amahanga agandi, bakaba batarwanisa Abaisraeli bagyenzi baabo nari kubaita. *

Hati, abaheereza ba Ruhanga ab’amazima nibaruga “omu mahanga goona n’enganda zoona n’abantu boona n’endimi zoona.” (Kush. 7:9) N’ahabw’ekyo abantu ba Ruhanga baayejumba omu ntaro, nibaba nibarwanisa kandi barikwita ab’eishe-emwe bagyenzi baabo.

 2. YEHOVA NIWE YAABAIRE AIKIRIZA ABAISRAELI KURWANA ENTARO

Ira, Yehova niwe yaabaire naacwamu obu Abaisraeli baraaze kurwana n’enshonga ahabw’enki baine kurwana. Nk’eky’okureeberaho, Ruhanga akaragiira Abaisraeli kurwanisa Abanyakanaani abaabaire nibamanywa ahabw’obushambani oburengyesereize, okuramya ba daimoni, n’okuhayo abaana baabo nk’ebitambo. Yehova akaragiira Abaisraeli kucwekyereza abantu abaabaire nibakora ebintu bibi omu Nsi Eyaaraganisiibwe kugira ngu nabo batabikora. (Lev. 18:24, 25) Bwanyima y’Abaisraeli kuhika omu Nsi Eyaaraganisiibwe, obumwe Ruhanga akaba abaikiriza kurwana entaro kurinda ensi yaabo abazigu. (2 Sam. 5:17-25) Kwonka, tihariho obu Yehova yaikiriize Abaisraeli kwecweramu kuza omu rutaro. Ku baabaire beeragiira kuza kurwana, bakaba bahikwaho akabi.—Kub. 14:41-45; 2 Bus. 35:20-24.

Hati, Yehova tarikwikiriza abantu kurwana entaro. Amahanga nigarwana ahabw’okweyendeza, kwonka Ruhanga tarikukikunda. Nibaza omu ntaro ahabw’okwenda kwekanyisiza ebicweka, eby’obugaiga nari ahabw’enshonga z’eby’obutegyeki. Kandi shi abarikugira ngu nibarwana omu iziina rya Ruhanga kurinda okuramya kwabo nari kwita abazigu ba Ruhanga? Yehova naija kurinda abaheereza be ab’amazima kandi acwekyereze abazigu be omu biro by’omumaisho omu rutaro rwa Haramagedoni. (Kush. 16:14, 16) Omu rutaro orwo, eihe rya Ruhanga niriija kuba ririmu ebihangirwe eby’omu iguru byonka, beitu batari abaheereza be ab’omu nsi.—Kush. 19:11-15.

3. ABAISRAELI BAKABA BAKIZA ABAABAIRE BAIKIRIRIZA OMURI YEHOVA

Ira, eihe ry’Abaisraeli kaingi rikaba rigirira embabazi abaabaire booreka ngu nibaikiririza omuri Ruhanga, kandi baita abaabaire baba bacwerairwe orubanja rw’okufa. Yetegyereza eby’okureeberaho bibiri ebi. Obu Yehova yaaragiira Abaisraeli kucwekyereza Yeriko, bakakiza Rahabu n’ab’omu ka ye ahabw’okwikiriza kwe. (Yos.  2:9-16; 6:16, 17) Bwanyima, orurembo Gibeoni tibararucwekyereize ahabw’okugira ngu Abagibeoni bakooreka ngu nibatiina Ruhanga.—Yos. 9:3-9, 17-19.

Hati, amahanga agarikwejumba omu ntaro nigacwekyereza abaine okwikiriza. Kandi obumwe abantu abataine rubanja nibaitwa amahanga gaaba nigarwana hamwe.

4. ABAISRAELI BAKABA BAINE KUKURATIRA EBIRAGIRO BYA RUHANGA EBY’ENTARO

Ira, Yehova akaba naayenda ngu abaserukare ba Israeli barwane entaro nk’oku yaabaragiire. Nk’eky’okureeberaho, Ruhanga obumwe akaba abagambira kugira ‘obusingye’ n’abazigu baabo. (Bir. 20:10) Kandi, Yehova akaba naayenda ngu abaserukare Abaisraeli n’ensiisira zaabo bagume bari abeecumi omu by’omubiri n’omu micwe. (Bir. 23:9-14) N’obu abaserukare b’amahanga agaabaire gabeehinguririize baabaire bahamba abakazi b’ebicweka ebi baabaire basingwire, Yehova akazibira Abaisraeli kukikora. Bakaba bategyereza kumara okwezi kumwe kubaasa kutaaha omu bushwere n’omukazi enkwatwa.—Bir. 21:10-13.

Hati, amahanga maingi gaine ebiragiro ebirikutegyeka entaro. N’obu ebiragiro ebyo birikuba bigyendereire kurinda abantu ba butoosha, eky’obusaasi, gavumenti ezo tizirikubita omu nkora

5. RUHANGA AKABA ARWANIRIRA EIHANGA RYE

Ira, Yehova akaba arwanirira Abaisraeli, kaingi arikukikora omu muringo gw’eky’okutangaaza. Nk’eky’okureeberaho, akahwera ata Abaisraeli kusingura orurembo Yeriko? Abaisraeli ku baayorobeire Yehova ‘bakateera munonga orwari, orugo rukakumbagara,’ kyababaasisa kusingura orurembo ahonaaho. (Yos. 6:20) Kandi shi bakasingura bata Abaamori? ‘[Yehova] akabateeza emengo z’orubaare [ezaabaire] niziruga omu iguru . . . abaitsirwe orubaare bakakira abu Abaisraeli baitsize rurara.’—Yos. 10:6-11.

ABAKRISTAAYO ABAABUZIMA NIBARINDA OBUSINGYE

Nk’oku twaheza kureeba, embeera yaitu neetaanira kimwe n’ey’Abaisraeli aba ira. Kwonka, ezo tizo nshonga zonka ezirikutureetera kuteejumba omu ntaro. Hariho ezindi. Nk’eky’okureeberaho, Ruhanga akagira ngu omu biro by’emperu, abantu abu arikwegyesa bakaba batarikwija “kwega by’engamba” nari eby’entaro, nari kuzeejumbamu. (Isa. 2:2-4) Kandi, Kristo akagira ngu abakuratsi be ‘ti b’ensi’, bakaba batarikwija kwejumba omu mihondano y’ensi.—Yoh. 15:19.

Hariho ekindi eki Kristo yaagambiire abakuratsi be kukora. Akabagambira kwetantara emiteekateekyere erikubaasa kubareetera kubiika enziika, kugira ekiniga, n’okurwana. (Mat. 5:21, 22) Kandi, akagambira abakuratsi be kurinda obusingye n’okukunda abazigu baabo.—Mat. 5:9, 44.

Ekyo nitubaasa kukikora tuta? Nitubaasa kuba tutarikwejumba omu ntaro, kwonka shi nitubaasa kuba twine ebiteekateeko by’obushaarizi ebirikubaasa kureetaho obutaikirizana n’okwebaganisamu omu kibiina? Ka tugume nituteeraho kweihamu ebiteekateeko nk’ebyo.—Yak. 4:1, 11.

Omu mwanya gw’okwejumba omu ntaro z’amahanga, nituteeraho kureetaho obusingye n’okugirirana rukundo. (Yoh. 13:34, 35) Ka tumariirire kutejwanzya omu ntaro z’ensi egi, tutegyereize obu Yehova aramarireho kimwe entaro zoona.—Zab. 46:9.