1-2. (a) Gavumenti ezimwe nizihiiganisa zita abaheereza aba Yehova, kwonka bo nibatwaza bata? (b) Ahabw’enki nitubaasa kugira okushemererwa n’obu twakuba nituhiiganisibwa? (Gamba n’aha kishushani ekiri aha kipampagare.)

 HATI, omurimo gwaitu niguzibirwa nari gwemereziibwe omu mahanga agarikurenga 30 omu nsi yoona. Omu mahanga agamwe ago, ab’obushoboorozi bataire ab’eishe-emwe na banyaanyazi-itwe omu bihome. Ahabwa nshonga ki? Kurugiirira ahari Yehova teriho. Nibaturwa okushoma Baibuli n’okugyega, okugambira abandi ebi barikwikiriza, n’okuza omu nteerane n’Abakristaayo bagyenzi baabo. Kandi nibanga kwejumba omu by’obutegyeki. Abaheereza ba Ruhanga n’obu baraabe nibahiiganisibwa munonga, nibaguma bari abeesigwa, * kandi bamuhamiireho. Buzima nibashemererwa ahabw’okukora ekyo!

² Noobaasa kuba oreebire ebishushani bya bamwe aha b’eishe-emwe abo emanzi barikumwenya. Baine okushemererwa ahabw’okumanya ngu Yehova naabasiima ahabw’okuguma abari abeesigwa ahariiwe. (1 Bus. 29:17a) Yesu akagira ati: ‘Baine [okushemererwa abarikuhiiganisibwa] ahabw’okuhikiirira . . . Mushemererwe, mwesiime munonga, ahabw’okuba ebihembo byanyu ni bingi.’—Mat. 5:10-12.

3. Nk’oku kirikworekwa omu Ebyakozirwe 4:19, 20, entumwa omu kyasha ky’okubanza bakatwaza bata ku baahiiganisiibwe, kandi ahabw’enki baatwarize batyo?

³ Ab’eishe-emwe na banyaanyazi-itwe nibahikwaho ebi entumwa omu kyasha ky’okubanza baagumisiriize obu baabaire nibahiiganisibwa ahabw’okubuurira ahari Yesu. Kaingi, abaramuzi b’eicwero ry’emanja ery’Abayudaaya ‘baakabeehanangiriza kutagaruka kugamba omu iziina rya Yesu.’ (Byak. 4:18; 5:27, 28, 40) Entumwa bakatwaza bata? (Shoma Ebyakozirwe 4:19, 20.) Bakaba nibamanya ngu orikukirayo obushoboorozi niwe yaabaire ‘abaragiire kubuurira abantu, n’okuhamya’ ebya Kristo. (Byak. 10:42) N’ahabw’ekyo Petero, na Yohaana, abaabaire bajwekyeire entumwa ezindi, bakagira ngu bakaba baine kworobera Ruhanga okukira abaramuzi abo, kandi ngu bakaba batarikwija kurekyera aho kugamba ahari Yesu. Bakaba bari nk’abarikubuuza abaramuzi abo bati: ‘Nimwenda kugira ngu ebiragiro byanyu nibikira ebya Ruhanga?’

4. Nk’oku kirikworekwa omu Ebyakozirwe 5:27-29, entumwa bakateeraho Abakristaayo boona ky’okureeberaho ki, kandi nitubaasa kubatooreza tuta?

⁴ Entumwa bakataho eky’okureeberaho kirungi ‘barikworobera Ruhanga okukira abantu,’ kandi Abakristaayo boona ab’amazima batwire nibabatooreza. (Shoma Ebyakozirwe 5:27-29.) Bwanyima y’entumwa kuteerwa ahabw’okuguma bari abeesigwa, bakaruga omu maisho g’eishengyero, ‘bashemereirwe ahabw’okuheebwa ekitiinisa eky’okuhemurwa nibaturwa eiziina rya Yesu,’ kandi baagumizamu nibabuurira.—Byak. 5:40-42.

5. Ni bibuuzo ki ebi twine kugarukamu?

⁵ Oku entumwa baatwarize nikureetaho ebibuuzo bimwe. Nk’eky’okureeberaho, okucwamu kwabo kworobera Ruhanga omu mwanya gw’abantu nikuhikaana kuta n’ekiragiro ekiri omu Baibuli ekirikugira ngu ‘tworobere abakama abarikutegyeka’? (Rom. 13:1) Nitubaasa kworobera tuta “abategyeki n’abaine obushoboorozi,” nk’oku entumwa Paulo yaagizire, kandi tukaguma turi abeesigwa ahari Ruhanga nk’Omutegyeki orikukirayo?—Tit. 3:1.

6. (a) “Abakama abarikutegyeka” abarikugambwaho omu Abarooma 13:1 ni baahi, kandi twine kubatwariza tuta? (b) Niki eki abategyeki boona baine?

⁶ Shoma Abarooma 13:1. Omu mushororongo ogu, ebigambo “abakama abarikutegyeka” nibimanyisa abantu abaine obushoboorozi aha bandi. Abakristaayo baine kworobera abeebembezi abo. Abategyeki aba nibarinda obuteeka, nibahamya ngu ebiragiro byakuratirwa, kandi obumwe nibarwanirira abantu ba Yehova. (Kush. 12:16) N’ahabw’ekyo, twine kuha emishoro, kandi tukabaha ekitiinisa ekibashemereire. (Rom. 13:7) Kwonka, gavumenti z’ensi egi, ziine obushoboorozi ahakuba Yehova akiziikiriize kubugira. Eki Yesu akakihamya gye obu yaabaire naabuuzibwa Omutegyeki wa Rooma Pontio Pilaato. Obu Pilaato yaagira ngu aine obushoboorozi bw’okurekura Yesu nari kumwita, Yesu akamugira ati: “Tokungizireho bushoboorozi, kuri otarabuhairwe okuruga omu iguru.” (Yoh. 19:11) Nka Pilaato, abategyeki boona baine obushoboorozi buringaniire.

7. Ni ryari obu tutaine kworobera abategyeki, kandi twine kwijuka ki?

⁷ Abakristaayo niboorobera gavumenti z’abantu, ebiragiro byazo byaba bitarikuhakanisa ebya Ruhanga. Kwonka titurikuboorobera baatushaba kukora ebi Ruhanga arikwanga nari baatuzibira kukora ebi Ruhanga arikwenda ngu tukore. Nk’eky’okureeberaho, nibabaasa kugira ngu abatsigazi baze omu mahe. * Nari nibabaasa kutuzibira kukoresa Baibuli yaitu, ebitabo byaitu, kubuurira n’okuramiza hamwe. Abategyeki baakoresa kubi obushoboorozi bwabo, barikuhiiganisa abeegi ba Kristo, nibajunaanwa ahari Ruhanga. Ahakuba Yehova naaba naabareeba!—Mub. 5:8.

8. Yehova naataana ata aha “bakama abarikutegyeka”?

⁸ Ekigambo “abakama” nikimanyisa ngu “abaine amaani, n’emyanya y’ahaiguru.” Kwonka ekyo tikirikumanyisa ngu nibo “barikukizayo amaani n’omwanya gw’ahaiguru ogurikukirayo.” Ebigambo ebyo nibishoboorora amakuru g’ebigambo ebindi ‘rukira boona.’ N’obu gavumenti z’abantu ziraabe nizeetwa “abakama abarikutegyeka,” hariho obushoboorozi obundi oburikukirirayo kimwe. Ekitiinisa ‘Rukira Boona’ ekirikugambwaho emirundi ena omu Baibuli nikiheebwa Yehova Ruhanga wenka.—Dan. 7:18, 22, 25, 27.

9. Nabi Danieli akareeba ki omu kworekwa?

⁹ Nabi Danieli akoorekwa ebintu ebirikworeka gye ngu Yehova niwe aine obushoboorozi oburikukirayo. Omu kubanza Danieli akareeba enyamaishwa mpango erikujwekyera obutegyeki kirimaani obwa ira n’oburiho hati, Babulooni, Bumeedi na Buperesi, Bugriika, na Rooma, obwarugiremu Bungyereza na Amerika oburiho hati. (Dan. 7:1-3, 17) Bwanyima Danieli akareeba Yehova Ruhanga ashutami aha kitebe ky’obukama. (Dan. 7:9, 10) Eki nabi ogwo omwesigwa yaayorekirwe bwanyima, nikirabura abategyeki hati.

10. Kurugiirira ahari Danieli 7:13, 14, 27, ni baahi abu Yehova yaahaire obushoboorozi, kandi ekyo nikyoreka ki?

¹⁰ Shoma Danieli 7:13, 14, 27. Ruhanga naagambwaho nk’orikwiha obushoboorozi bwona ahari gavumenti z’abantu akabuha ababushemereire kandi abaine amaani maingi. Nibo baahi? Ni Yesu Kristo “orikushusha omwana w’omuntu,” ‘n’abarikwera ba Rukira Boona,’ 144,000 abaraategyeke “okuhitsya ryari na ryari.” (Dan. 7:18) Buzima, Yehova ni ‘Rukira Boona’ ahakuba niwe aine obushoboorozi bw’okukora ekyo.

11. Danieli akahandiika ki ekindi ekirikworeka ngu Yehova aine obushoboorozi oburikukira obw’amahanga?

 ¹¹ Eki Danieli yaareebire omu kworekwa kiine akakwate n’ebi yaabaire yaagambire. Danieli akagira ngu, ‘Ruhanga ow’omu iguru, niwe arikwihaho obugabe, akataho obundi.’ Akoongyeraho ati: ‘Orikukira Boona niwe arikutegyeka obugabe bw’abantu, kandi akabugabira ou arikwenda.’ (Dan. 2:19-21; 4:17) Haine obu Yehova araihireho nari akataho abategyeki? Eego buzima!

12. Ha eky’okureeberaho ekirikworeka oku ira Yehova yaihire abagabe omu butegyeki. (Reeba ekishushani.)

¹² Yehova ayorekire butunu ngu aine obushoboorozi oburikukira ‘obw’abakama abarikutegyeka.’ Teekateeka aha by’okureeberaho bishatu ebi. Faraho owa Misri akahindura abaheereza ba Yehova abahuuku kandi yaayanga kubarekura. Kwonka Ruhanga akabacungura kandi yaacwekyereza Faraho omu Nyanja Erikutukura. (Kur. 14:26-28; Zab. 136:15) Omugabe Belishaza owa Babulooni akatebeekanisa obugyenyi ‘yaayetunguura, yaagomera Mukama w’eiguru’ kandi ‘yaahimbisa baaruhanga b’efeeza, n’ab’ezaabu’ omu mwanya gw’okuhimbisa Yehova. (Dan. 5:22, 23) Kwonka Ruhanga akacureeza omushaija omunyamaryo ogwo. “Ekyo kiro,” Belishaza akaitwa kandi obugabe bwe bwaheebwa Abameedi n’Abaperesi. (Dan. 5:28, 30, 31) Omugabe Heroode Aguripa I owa Palestine akaita entumwa Yakobo, kandi yaata entumwa Petero omu kihome arikwenda kumwita. Kwonka Yehova akaremesa Heroode kuhikiiriza ekigyendererwa kye. ‘Maraika wa [Yehova] akamuteera’ yaafa.—Byak. 12:1-5, 21-23.

13. Ha eky’okureeberaho ekirikworeka oku Yehova yaasingwire abagabe abaabaire beegaitsire hamwe.

¹³ Kandi Yehova ayorekire ngu aine obushoboorozi oburikukira obw’abategyeki boona bagaitsirwe hamwe. Akarwanirira Abaisraeli yaabahwera kusingura abagabe 31 Abakanaani abaabaire beegaitsire hamwe, kandi baayegaruriza ekicweka kihango ky’Ensi Eyaaraganisiibwe. (Yos. 11:4-6, 20; 12:1, 7, 24) Kandi Yehova akabaasisa Abaisraeli kusingura Omugabe Benihadadi n’abandi bagabe 32 ba Siria abaarwaniise Abaisraeli.—1 Bag. 20:1, 26-29.

14-15. (a) Omugabe Nebukadeneeza n’Omugabe Dario bakagamba ki aha bushoboorozi bwa Yehova bw’okutegyeka? (b) Omuhandiiki wa zaaburi akagamba ki ahari Yehova n’eihanga rye?

¹⁴ Emirundi mingi, Yehova ayorekire ngu  ni Rukira Boona. Omugabe Nebukadeneeza owa Babulooni akeehimbisa ‘ahabw‘amaani g’obushoboorozi bwe n’ekitiinisa ky’obukuru bwe’ omu mwanya gw’okwecureeza akooreka ngu Yehova niwe ahikire kuhimbisibwa, n’ahabw’ekyo Yehova akamugwisa eiraro. Nebukadeneeza ku yaagarukiremu obwengye, akahimbisa “Rukira Boona” kandi akamanya ngu ‘obutegyeki bwe n’obutegyeki obutarikuhwaho.’ Akoongyeraho ati: ‘Tihariho orikubaasa kumuteera aha mukono.’ (Dan. 4:30, 33-35) Obwesigwa bwa Danieli ahari Yehova ku bwagyeziibwe kandi akamucungura kuruga omu kiina ky’entare, Omugabe Dario akaragiira ati: ‘Abantu b’omu bugabe bwangye bwona bagume bateteme omu maisho ga Ruhanga wa Danieli, bamutiine, ahakuba niwe Ruhanga ohuriire orikugumaho ebiro byona; obugabe bwe tiburihwerekyerezibwa, n’obutegyeki bwe nibwija kuhika aha mperu.’—Dan. 6:7-10, 19-22, 26, 27.

¹⁵ Omuhandiiki wa zaaburi akagira ati: ‘[Yehova] naahindura busha enaama mbi z’amahanga, azibira ebi abantu barikuteekateeka kukora.’ Akoongyeraho ati: ‘Riine [okushemererwa] eihanga eri [Yehova] ari Ruhanga waaryo, abantu abu atooraine kuba obuhunguzi bwe.’ (Zab. 33:10, 12) Ka twine enshonga nungi, ahabw’enki twine kuguma turi abeesigwa ahari Yehova!

16. Nitubaasa kugira bwesigye ki aha bikwatiraine ‘n’okubonabona kwingi,’ kandi ahabw’enki? (Reeba ekishushani.)

¹⁶ Twaheza kureeba ebi Yehova yaakozire ira. Niki eki twine kugirira ekihika omu biro by’omumaisho? Nitubaasa kugira obwesigye ngu Yehova naaza kujuna abaheereza be abeesigwa omu ‘kubonabona kwingi.’ (Mat. 24:21; Dan. 12:1) Ekyo naaza kukikora amahanga agaraabe geegaitsire hamwe, agarikumanywa nka Googi owa Magoogi, ku garaataahirire abaheereza be abeesigwa omu nsi yoona. N’obu ekigombe ky’Amahanga Ageeteeraine kiraabe kirimu amahanga 193, tikirikwija  kubaasa kwehanga ahari Rukira Boona n’eihe rye ery’omu iguru. Yehova naaraganisa ati: ‘[Niinyija] kworeka obukuru bwangye n’okwera kwangye, kandi nyemanyise omu maisho g’amahanga maingi. Haza obwo nibwo baraamanye ku ndi [Yehova].’—Ezk. 38:14-16, 23; Zab. 46:10.

17. Baibuli neegamba ki ekiraahikye aha bagabe b’ensi n’abaraagume bari abeesigwa ahari Yehova?

¹⁷ Okutaahirira kwa Googi nikuza kureetera Yehova kureetaho orutaro rwa Haramagedoni obu araacwekyereze ‘abagabe b’ensi zoona.’ (Kush. 16:14, 16; 19:19-21) Kwonka, ‘ab’emitima egororokire nibo baraatuure omu nsi, n’abeesigwa bakagigumamu.’—Enf. 2:21.

18. Abakristaayo baingi ab’amazima beekundiire babaasize kukora ki, kandi ahabw’enki? (Danieli 3:28)

¹⁸ Kumara ebyasha bingi, Abakristaayo baingi ab’amazima beefeerereize obugabe bwabo baayoga n’amagara gaabo ahabwa rukundo ei bainiire Yehova Omutegyeki Orikukirayo. Nibamariirira kuguma bari abeesigwa nk’Abaheburaayo bashatu abaacungwirwe kuruga omu kikoomi ky’omuriro ahabw’okuguma bahamiire ahari Rukira Boona.—Shoma Danieli 3:28.

19. Yehova naija kwihirira ahari ki kucwera abantu orubanja, kandi twine kukora ki hati?

¹⁹ Daudi omuhandiiki wa zaaburi akahandiika aha bukuru bw’okuguma turi abeesigwa ahari Ruhanga ati: “[Yehova] acwera amahanga emanja; ai [Yehova], oncwere orubanja nk’okuhikiirira kwangye oku kuri, n’amazima agari omuriinye oku gari.” (Zab. 7:8) Kandi akoongyeraho ati: “Okuhikiirira [n’obwesigwa] bindinde.” (Zab. 25:21) Ka n’eky’oburungi bwaitu kuguma turi abeesigwa ahari Yehova kandi tukamuhamiraho n’obu haakubaho ki! Reero naitwe nitwija kwehurira nk’omuhandiiki wa zaaburi owaagizire ati: ‘Baine [okushemererwa abarikuguma bari abeesigwa, ahari Yehova] bakagyendera omu kutegyekwa ebiragiro bye.’—Zab. 119:1