1. ‘Ekyetengo kyaitu eky’eby’omwoyo’ niki kandi kiine kakwate ki n’okushemererwa?

 OKUSHEMERERWA okwabuzima tikirikumanyisa okwehurira gye kyonka kumara obwire bukye. Kureka kushemereire kuba okw’obutwire. Kuta shi? Omu Rubazo Rw’aha Rushozi Yesu akagira ngu, baine okushemererwa abarikufayo aha kyetengo kyabo eky’eby’omwoyo. (Mat. 5:3) Yesu akaba naamanya ngu abantu bakahangwa baine ekihika ky’amaani ky’okumanya Omuhangi waabo Yehova Ruhanga, n’okumuramya. Ekyo nikyo ‘kyetengo kyaitu eky’eby’omwoyo.’ Ahabw’okugira ngu Yehova ni Ruhanga ow’okushemererwa abarikumuramya nabo nibabaasa kushemererwa.—1 Tim. 1:11.

2-3. (a) Kurugiirira aha bigambo bya Yesu ni baahi abandi abarikubaasa kutunga okushemererwa? (b) Nituza kugamba ahari ki omu kicweka eki, kandi ahabw’enki nikyetengyesa?

² Mbwenu shi twine kuba omu mbeera nungi kubaasa kushemererwa? Ngaaha. Yesu akagamba aha kintu ekyabaire nikitangaaza omu rubazo rwe. Akagira ngu ‘abarikuganya’, ahabw’okweshinja ahabw’ebibi byabo nari abarikuraba omu mbeera zigumire, nibabaasa kushemererwa. Yesu akagamba nikyo kimwe ahari abo “[abarikuhiiganisibwa] ahabw’okuhikiirira” nari ‘abarikujumwa’ ahabw’okukuratira Kristo. (Mat. 5:4, 10, 11) Kwonka nikibaasika kita kugira okushemererwa omu mbeera nk’ezo?

³ Yesu akaba naatwegyesa ngu titurikutunga okushemererwa ahabw’okuba omu mbeera nungi kureka ahabw’okwigutsa ekyetengo kyaitu eky’eby’omwoyo n’okwirira haihi Ruhanga. (Yak. 4:8) Ekyo nitubaasa kukikora tuta? Omu kicweka eki,  nituza kureeba amadaara ashatu agarikuhitsya aha kushemererwa okwabuzima.

4. Eidaara ery’okubanza eririkuhitsya aha kushemerererwa okwabuzima ni riiha? (Zaaburi 1:1-3)

⁴ EIDAARA 1: Kubaasa kutunga okushemererwa okwabuzima, twine kweriisa omu by’omwoyo. Abantu nibeetenga eby’okurya by’omubiri kubaasa kubaho nikyo kimwe n’enyamaishwa. Kwonka abantu nibo bonka abaine ekyetengo ky’eby’omwoyo. Kandi twine kukigutsya. Niyo nshonga ahabw’enki Yesu yaagizire ngu, ‘omuntu tarikutungwa eby’okurya byonka, kureka n’ekigambo kyona ekirikuruga omu kanwa ka’ Yehova. (Mat. 4:4) N’ahabw’ekyo, titwine kurenzya eizooba tutashomire Ekigambo kya Ruhanga eky’omuhendo, Baibuli. Omuhandiiki wa zaaburi akagira ati: ‘Aine [okushemererwa] omuntu orikushemerererwa ebiragiro bya [Yehova], kandi ebiragiro ebyo, nibyo arikuteekateekaho nyomushana na nyekiro.’—Shoma Zaaburi 1:1-3.

5-6. (a) Nitubaasa kwega ki omu Baibuli? (b) Okushoma Baibuli nikubaasa kutuhwera kuta?

⁵ Yehova naakoresa Baibuli kutuha obuhabuzi bukuru aha ku turikubaasa kugira okushemererwa. Kurabira omu Baibuli nitwega aha kigyendererwa eki atwiniire. Nitwega oku turikubaasa kumwiririra haihi n’eki twine kukora kubaasa kusaasirwa ebibi byaitu. Kandi nitwega aha bi arikuraganisa kutukorera omu biro by’omumaisho. (Yer. 29:11) Amazima aguturikwega omu Baibuli nigatureetera okushemererwa kw’omu mutima.

⁶ Kandi Baibuli erimu obuhabuzi bwingi oburikubaasa kutuhwera butoosha. Twabukuratira nitubaasa kugira okushemererwa. Waagira amaganya ahabw’oburemeezi,  teeraho kushoma Ekigambo kya Yehova kandi okiteekateekeho. Yesu akagira ati: “Baine [okushemererwa] abahurira Ekigambo kya Ruhanga bakakyorobera.”—Luk. 11:28.

7. Noobaasa kwongyera kugasirwa ota gye omu bwire obu orikumara nooshoma Ekigambo kya Ruhanga?

⁷ Waaba nooshoma Ekigambo kya Ruhanga teeraho kuteekateeka aha bi orikushoma. Teekateeka aha ky’okureeberaho eki. Ka tugire ngu omuntu yaateeka eby’okurya ebi orikukunda. Kwonka ahabw’okugira ngu waabirya noorahukiriza nari oine ebi orikuteekateekaho, obura kuhurira obunuzi bwabyo. Bwanyima y’okuheza kurya oyetegyereza ngu kikaabaire kirungi kuri waabirya nooyetwara. Mbwenu shi oraashomireho Baibuli orikurahukiriza okabura kwetegyereza ebi waashoma? N’ahabw’ekyo, waaba nooshoma Baibuli, teera akashushani, teeraho kuhurira amaraka, teekateeka aha myanya, n’aha bi waaheza kushoma. Waakora otyo, noija kwongyera kugira okushemererwa.

8. ‘Omwambari omwesigwa kandi ow’obwengye’ naahikiiriza ata obujunaanizibwa bwe? (Reeba obugambo obw’ahansi.)

⁸ Yesu akatoorana ‘omwambari omwesigwa kandi ow’obwengye’ kutuha eby’okurya by’omwoyo omu bunaku obuhikire, kandi nituriisibwa gye omu by’omwoyo. * (Mat. 24:45) Ebyahandiikirwe nibyo birungo bikuru by’eby’okurya by’omwoyo ebi omwambari omwesigwa arikutuha. (1 Tes. 2:13) Eby’okurya ebyo nibituhwera kumanya emiteekateekyere ya Yehova eri omu Baibuli. Niyo nshonga ahabw’enki nitushoma Omunaara gw’Omurinzi na Awake! n’ebicweka ebiri aha jw.org. Nitutebeekanisa enteerane z’aha gati ya saabiiti n’eza wiikenda. Kandi nitureeba puroguraamu ya buri kwezi aha JW Broadcasting^® yaaba eriho omu rurimi rwaitu. Okweriisa omu by’omwoyo nikituhwera kuhika aha idaara rya kabiri eririkuhitsya aha kushemererwa okwabuzima.

9. Eidaara rya kabiri eririkuhitsya aha kushemererwa okwabuzima ni riiha?

⁹ EIDAARA 2: Kubaasa kutunga okushemererwa okwabuzima, twine kugyendera aha mitindo ya Yehova. Omuhandiiki wa zaaburi akagira ati: “Aine [okushemererwa] omuntu weena orikutiina [Yehova] akagyendera omu mihanda ye.” (Zab. 128:1) Okutiina Yehova nikimanyisa okumuha ekitiinisa turikwetantarira kimwe kukora ebitarikumushemeza. (Enf. 16:6) N’ahabw’ekyo, butoosha nituteeraho kuhamira aha mitindo ya Ruhanga erikukwata aha kihikire n’ekigwire eri omu Baibuli. (2 Kor. 7:1) Nitushemererwa twakora ebi Yehova arikukunda kandi tukeetantara ebi arikwanga.—Zab. 37:27; 97:10; Rom. 12:9.

10. Kurugiirira aha Abarooma 12:2, twine bujunaanizibwa ki?

¹⁰ Shoma Abarooma 12:2. Omuntu naabaasa kuba naamanya ngu Yehova niwe aine obushoboorozi bw’okutaho emitindo y’ekihikire n’ekigwire, kwonka nabwo naaba aine kwikiriza kugyendera aha mitindo egyo. Nk’eky’okureeberaho, omuntu naabaasa kuba naamanya ngu gavumenti eine obushoboorozi bw’okutaho orurengo oru ebiiruka biine kwirukangiiraho aha ruguuto. Kwonka naabaasa kwanga kworobera ekiragiro ekyo. N’ekirikurugamu, nairuka munonga arenga ahu ashemereire kugarukira. Emitwarize yaitu neeyoreka ngu buzima okugyendera aha emitindo ya Yehova nikyo kirikukirayo oburungi. (Enf. 12:28) Daudi nikwo yaabaire naayehurira atyo, obu yaagamba ahari Yehova  ati: ‘Noonyoreka omuhanda gw’amagara, omu maisho gaawe hariho okushemererwa kwingi munonga, omu mukono gwawe gwa buryo harimu ebirikushemeza ebiro byona.’—Zab. 16:11.

11-12. (a) Twaba twine amaganya nari turikwehurira kubi twine kwetantara ki? (b) Ebiri omu Abafilipi 4:8 nibibaasa kutuhwera bita twaba nitutoorana eby’okweshemeza?

¹¹ Twaba twine amaganya nari turikwehurira kubi nitubaasa kwenda kukora ekintu ekiraatuhwere kuruga omu buremeezi bwaitu. Ekyo nikyetegyerezibwa, kwonka twine kwegyendesereza kutakora ekintu eki Yehova arikwanga.—Efe. 5:10-12, 15-17.

¹² Omu baruha ei Paulo yaahandiikiire Abafilipi akahiga Abakristaayo kugumizamu nibata omutima aha bintu ‘eby’oburyo, . . . ebishemeire, . . . ebirikushemeza, [kandi] ebirungi.’ (Shoma Abafilipi 4:8.) N’obu Paulo ataragambire butunu aha nshonga y’eby’okweshemeza, kwonka ebi yaahandiikire nibikwata aha by’okweshemeza ebi turikwejumbamu. Teeraho kukora eki: Ahu oraashange ekigambo “byona” omu mushororongo ogu, omu mwanya gwakyo taho ekigambo “ebyeshongoro,” “vidiyo,” “ebitabo,” nari “emizaano y’aha kompyuta.” Waakikora nikibaasa kukuhwera kumanya ebirikusiimwa Ruhanga n’ebi atarikusiima. Nitwenda kutwaza omu muringo ogurikuhikaana n’emitindo ya Yehova erikukirayo oburungi. (Zab. 119:1-3) N’omutima ogutarikweshinja, noobaasa kuza aha idaara eririkukurataho eririkuhitsya aha kushemererwa okwabuzima.—Ebyakozirwe 23:1.

13. Eidaara rya kashatu eririkuhitsya aha kushemererwa okwabuzima ni riiha? (Yohaana 4:23, 24)

¹³ EIDAARA 3: Hamya ngu nooyebembeza okuramya Yehova. Tushemereire kuramya Yehova ahabw’okugira ngu n’Omuhangi waitu. (Kush. 4:11; 14:6, 7) N’ahabw’ekyo, twine kuteeraho kumuramya omu muringo ogu arikusiima, “omu mwoyo n’omu mazima.” (Shoma Yohaana 4:23, 24.) Nitwenda ngu omwoyo gurikwera gutuhwere kugira ngu okuramya kwaitu kuhikaane n’amazima agari omu Baibuli. Twine kwebembeza okuramya Yehova n’obu twakuba nitutuura ahu omurimo gwaitu gurikuzibirwa nari gwemereziibwe. Obwa hati, ab’eishe-emwe abarikurenga 100 bari omu bihome ahabw’okuheereza Yehova. * Kwonka nabwo, nibateeraho kushaba, kweyegyesa, n’okugambira abandi bashemereirwe ebirikukwata ahari Ruhanga n’Obukama bwe. Twajumwa nari tukahiiganisibwa, nitushemererwa ahabw’okumanya ngu Yehova ari naitwe, kandi ngu naija kutuha emigisha.—Yak. 1:12; 1 Pet. 4:14.

14. Niki ekyahikire aha w’eishe-emwe muto omuri Tajikistan, kandi ahabw’enki?

¹⁴ Ebirikubaho nibyoreka ngu amadaara ashatu agu twaheza kugambaho nigatuhwera kugira okushemererwa, n’obu twakuba turi mu mbeera ki. Yetegyereze ekyahikire ahari Jovidon Bobojonov ow’emyaka 19, kuruga Tajikistan, owaayangire kuza omu mahe. Okwaikumi 4, 2019, bakamukwata ari omuka, baamuta omu kihome kumara ameezi, kandi arikutwarizibwa nk’enkozi y’ebibi. Ekikorwa ekyo ekitari ky’oburingaaniza kikamanywa omu nsi yoona. Nikigambwa ngu bakamuteera ahabw’okwanga kuza omu mahe n’okwanga kujwara yunifoomu y’amahe. Bwanyima y’ekyo, akateebwaho orubanja kandi bakamutwara omu kihome kuhitsya obu omutegyeki w’eihanga eryo  yaamusaasiire, kandi akaragiira ngu bamurekure. Omu mbeera ezo zoona, Jovidon akaguma ari omwesigwa kandi aine okushemererwa. Ekyo kikabaho kita? N’ahabw’okugira ngu butoosha akaba naayeriisa omu by’omwoyo.

15. Jovidon akeeriisa ata omu by’omwoyo obu yaabaire ari omu kihome?

¹⁵ Obu Jovidon yaabaire ari omu kihome akagumizamu naayeriisa omu by’omwoyo, n’obu araabe yaabaire ataine Baibuli nari ebitabo byaitu. Ekyo kikabaasika kita? Ab’eishe-emwe na banyaanyazi-itwe omu kicweka ekyo bakaba baahandiika ekyahandiikirwe ky’eizooba aha nshaho z’eby’okurya ebi baabaire nibamutwarira. Omu muringo ogu, akabaasa kushoma Baibuli buri izooba n’okugiteekateekaho. Bwanyima y’okuruga omu kihome, akaha abatakatungire okugyezibwa kw’amaani obuhabuzi obu: “Ni kikuru kukoresa obugabe bwawe omu bwijwire kwongyera kumanya Yehova orikushoma Ekigambo kye n’ebitabo by’ekibiina.”

16. Jovidon akata omutima ahari ki?

¹⁶ Ow’eishe-emwe akahamira aha mitindo ya Yehova. Omu mwanya gw’okuguma naateekateeka aha bintu bibi, akaguma ataire omutima ahari Yehova n’eki arikutwara  nka kikuru. Jovidon akateekateeka aha burungi bw’ebihangirwe bya Ruhanga. Buri kasheeshe akaba ahurira amaraka g’ebinyonyi birikweshongora. Kandi nyekiro akaba areeba okwezi n’enyonyoozi. Akagira ati: “Ebiconco ebyo kuruga ahari Yehova bikandeetera kugira okushemererwa kandi bikangaruramu amaani.” Twasiima eby’omwoyo n’eby’omubiri ebi Yehova arikutuha, nitugira okushemererwa omu mutima, kandi okushemererwa okwo nikutuhwera kugumisiriza.

17. Ebigambo ebiri omu 1 Petero 1:6, 7 nibibaasa kuhwera bita omuntu ori omu mbeera nk’ei Jovidon yaabaire arimu?

¹⁷ Jovidon akeebembeza n’okuramya Yehova. Akaba naamanya obukuru bw’okuguma ari omwesigwa ahari Ruhanga ow’amazima. Yesu akagira ati: “Oramye [Yehova] Ruhanga waawe, obe niwe waaheereza wenka.” (Luk. 4:8) Abaduumizi b’amahe n’abaserukare bakaba nibenda ngu Jovidon arugye omu diini ye. Omu mwanya gw’ekyo, akaba ashaba Yehova ekiro n’eihangwe kumuhwera kuguma ari omwesigwa, kandi ahami omu kwikiriza. N’obu Jovidon araabe yaatwariziibwe kubi, akaguma ari omwesigwa. N’ekyarugiremu, hati aine okwikiriza kuhami okurikukira oku yaabaire aine atakakwatsirwe, akateerwa, kandi akateebwa omu kihome.—Shoma 1 Petero 1:6, 7.

18. Nitubaasa kuguma tuta twine okushemererwa?

¹⁸ Yehova naamanya ekirikubaasa kutuhwera kugira okushemererwa okwabuzima. Waakuratira amadaara ashatu agu twareeba, noobaasa kushemererwa n’omu mbeera zigumire. Reero naiwe noobaasa kugira oti: ‘Eihanga eri Ruhanga waaryo ari Yehova rihiiriirwe!’—Zab. 144:15.