1. Baingi nibatwaza bata ku barikuhurira obuhabuzi bw’obwegye? (Enfumu 1:20, 21)

 NITUKIRA kureeba omu mahanga maingi, ababuurizi b’Obukama beemereire aha nguuto ezirikurabwaho abantu baingi barikuha abahinguzi ebitabo. Oreejumbireho omu muringo gw’okubuurira ogu? Kyaba nikwo kiri, noobaasa kuba waateekateekire aha bigambo ebiri omu kitabo ky’Enfumu, ebirikugira ngu obwengye nibweteera omu rweteeraine burikweta abantu kwija kuhurira obuhabuzi bwabo. (Shoma Enfumu 1:20, 21.) Baibuli n’ebitabo byaitu birimu obwengye obuhikire oburikuruga ahari Yehova. Obu nibwo obutumwa obu abantu baine kuhurira kubaasa kuza omu muhanda gw’amagara agatahwaho. Nikitushemeza omuntu yaikiriza kushoma ebitabo byaitu. Kwonka ti boona ngu nibaikiriza. Bamwe tibarikwenda kumanya eki Baibuli erikwegyesa. Abandi nibatusheekyerera. Nibateekateeka ngu Baibuli ekahwa aha murembe. Abandi nibahakanisa ebi Baibuli erikwegyesa aha micwe, barikugira ngu abarikwikiriza ebi erikwegyesa nibacwera abandi orubanja, kandi nibeetwara nk’abahikiriire. Kwonka nabwo, Yehova naagumizamu kuha boona obwengye omu muringo gwa rukundo. Ata shi?

2. Nitubaasa kutunga tuta obwengye obuhikire hati, kwonka abantu abaingi nibacwamu kutwaza bata?

² Yehova naatuha obwengye obuhikire kurabira omu Kigambo kye, Baibuli. Buri omwe naabaasa kutunga ekitabo eki. Kandi shi ebitabo ebirikushoboorora Baibuli? Nitusiima Yehova, ahakuba biriho omu ndimi ezirikurenga omuri 1,000. Abarikuhurira,  ekirikumanyisa abarikubishoma kandi bakagyendera aha bibarikwega, nibagasirwa. Kwonka, abaingi nibacwamu kwehuzya obwengye obuhikire. Baaba nibenda kucwamu, nibeeyesiga nari bahurikiza abantu. Nibabaasa n’okutugaya ahabw’okucwamu kugyendera aha bi Baibuli erikugamba. Ekicweka eki nikiza kworeka ahabw’enki abantu nibatwaza batyo. Ka tubanze tureebe oku turikubaasa kutunga obwengye oburikuruga ahari Yehova.

3. Twine kukora ki kutunga obwengye obuhikire?

³ Obwengye nikimanyisa okukoresa okumanya kucwamu gye. Kwonka, obwengye obuhikire nibutwariramu ekirikukira ekyo. Baibuli neegira eti: “Okutiina [Yehova] nibwo butandikiro bw’obwengye, n’okumanya Orikwera nikwo kwetegyereza.” (Enf. 9:10) N’ahabw’ekyo twaba nitwenda kucwamu aha nshonga nkuru, tushemereire kucwamu ebirikuhikaana n’emiteekateekyere ya Yehova. Ekyo nitubaasa kukikora turikucondooza omu Baibuli n’ebitabo by’ekibiina. Twakora tutyo, nitworeka obwengye obuhikire.—Enf. 2:5-7.

4. Ahabw’enki Yehova niwe wenka orikubaasa kutuha obwengye obuhikire?

⁴ Yehova niwe wenka orikubaasa kutuha obwengye obuhikire. (Rom. 16:27) Ahabw’enki niwe Bukomooko bw’obwengye? Enshonga y’okubanza, niwe Muhangi, naamanya gye kandi naayetegyereza gye ebihangirwe bye. (Zab. 104:24) Eya kabiri, byona ebi Yehova arikukora nibyoreka ngu aine obwengye. (Rom. 11:33) Eya kashatu, obuhabuzi bwa Yehova butoosha nibugasira abarikubugyenderaho. (Enf. 2:10-12) Twaba nitwenda kutunga obwengye obuhikire, twine kwega amazima makuru, kandi tukaikiriza gakatwebembera omu kucwamu kwaitu n’ebi turikukora.

5. Niharugamu ki abantu baayanga Yehova Obukomooko bw’obwengye obuhikire?

⁵ Baingi abu turikubuurira nibaikiriza ngu ebyahangirwe nibireebeka gye, kwonka tibarikwikiriza ngu hariho Omuhangi, kandi nibagira ngu ebintu bikabaho birikuruga omu bindi. Kandi abandi nibaikiririza omuri Ruhanga, kwonka nibareeba emisingye ya Baibuli nk’eyaahwaire aha murembe, reero bacwamu kukora ebi barikwenda. Niki ekirugiremu? Mbwenu shi abantu bari omu mbeera nungi ahabw’okugira ngu nibeesiga obwegye bwabo okukira obwa Ruhanga? Batungire okushemererwa okwabuzima nari amatsiko gahami aha biro by’omumaisho? Ebi turikureeba nibihamya amazima aga: “Tihariho bwengye, nari okwetegyereza, n’obu yaakuba enaama ebirikubaasa kurwanisa [Yehova].” (Enf. 21:30) Ekyo ka nikituhiga kusherura obwengye obuhikire ahari Yehova! Eky’obusaasi, abantu abaingi tibarikukikora. Ahabw’enki?

6. Kurugiirira aha Enfumu 1:22-25, ni baahi abarikwehuzya obwengye obuhikire?

⁶ Baingi nibeehuzya obwengye obuhikire ‘oburikwamuriza omu nguuto.’ Kurugiirira ahari Baibuli, hariho abantu b’emiringo eshatu abarikwanga obwengye bwa Ruhanga: “Abataine bwengye,” “abateezi b’enaku,” ‘n’abashema.’ (Shoma Enfumu 1:22-25.) Ka twetegyereze ebirikureetera abantu abo kwanga obwengye bwa Ruhanga n’oku turikubaasa kwetantara kutwaza nk’abo.

7. Ahabw’enki bamwe nibacwamu kuguma “bataine bwengye”?

⁷ “Abataine bwengye” n’abo abarikwikiriza  byona ebi barikuhurira nari abarikurahuka kubeihwabeihwa. (Enf. 14:15.) Nitukira kubugana abantu nk’abo omu kubuurira. Teekateeka aha bukaikuru bw’abantu abarikuhabisibwa abanyadiini nari abeebembezi ba gavumenti. Bamwe nibatangaara ku barikumanya ngu nibahabisibwa abeebembezi baabo. Kwonka abarikugambwaho omu Enfumu 1:22, nibacwamu kuguma bataine bwengye ahakuba nikyo barikwenda. (Yer. 5:31) Nibakunda kukuratira emiteekateekyere yaabo kandi tibarikwenda kwega eki Baibuli erikwegyesa nari kworobera emitindo yaayo. Baingi bari nk’omukazi omunyadiini omuri Quebec, Canada owaagizire Omujurizi wa Yehova ati: “Omwebembezi waitu w’ediini ku araatuhabise, n’orubanja rwe, ti rwaitu!” Buzima titurikwenda kuba nk’abo abarikwehindura abashema nkana.—Enf. 1:32; 27:12.

8. Niki ekirikubaasa kutuhwera kugira obwengye?

⁸ Ahabw’enshonga ehikire, Baibuli neetuhiga kutaguma tutaine bwengye erikugira eti: “Omu bwengye mube bakuru.” (1 Kor. 14:20) Nitugira obwengye turikugyendera aha misingye ya Baibuli. Mporampora, nitwega oku emisingye egyo erikubaasa kutuhwera kwetantara oburemeezi kandi tukacwamu gye. Ni kikuru kweshwijuma omu nshonga egi. Twaba tutwire nitwega Baibuli kandi turikuza omu nteerane, nitubaasa kwebuuza, ahabw’enki tutakeehaireyo ahari Yehova kandi tukabatizibwa. Kandi shi twaba tubatiziibwe, nitutunguuka omu kubuurira n’okwegyesa amakuru marungi? Ebi turikucwamu nibyoreka ngu nitugyendera aha misingye ya Baibuli? Nitworeka emitwarize y’Ekikristaayo omu ku turikutwariza abandi? Twamanya ahu twine kuhinduramu, ka tuteereho kugyendera aha buhabuzi bwa Yehova, ‘oburikuha obwengye otabwine.’—Zab. 19:7.

9. “Abateezi b’enaku” nibooreka bata ngu nibanga obwengye obuhikire?

⁹ Abantu abandi abarikwanga obwengye oburikuruga ahari Ruhanga ‘n’abateezi b’enaku.’ Nitukira kushanga abantu nk’abo omu kubuurira. Nibakunda kukiniika abandi. (Zab. 123:4) Baibuli ekagira ngu omu biro by’emperu, hakaba nihaija kubaho abarikugaaniiza baingi. (2 Pet. 3:3, 4) Abantu bamwe hati nibatwaza nk’abakwe ba Looti, tibarikuta omutima aha kurabura kwa Ruhanga. (Kut. 19:14) Baingi nibashekyerera abarikworobera emisingye ya Baibuli. Ekirikubareetera kukora ekyo ‘n’okwetenga kwabo okw’okutatiina Ruhanga.’ (Yud. 7, 17, 18) Baibuli neeyoreka ngu abateezi b’enaku baine akakwate n’abeehagwire aha mazima, n’abandi abarikwanga Yehova.

10. Nk’oku kiri omu Zaaburi 1:1, nitubaasa kwetantara tuta kutooreza abateezi b’enaku?

¹⁰ Nitubaasa kwerinda tuta kutooreza abateezi b’enaku? Omuringo gumwe n’okwetantara kukwatanisa n’abarikwetomboita ahari buri kimwe. (Shoma Zaaburi 1:1.) Eki nikimanyisa ngu nitwanga kuhurikiza eby’abeehagwire aha mazima nari kubishoma. Twine kwegyendesereza kugira ngu tutakatandika kubangaanisa ahari Yehova n’obuhabuzi obu turikutunga kurabira omu kibiina kye. Kubaasa kwetantara ekyo, twine kwebuuza tuti: ‘Ninkira kwetomboita twatunga obuhabuzi busya nari enyetegyereza nsya? Nyine omuze gw’okusherura enshobe omu bareeberezi?’ Twareka emitwarize egyo ahonaaho, Yehova naija kutusiima.—Enf. 3:34, 35.

11. ‘Abashema’ nibareeba bata emitindo ya Yehova erikukwata aha micwe?

¹¹ Abantu abandi abarikwanga obwengye ‘n’abashema.’ Nibeetwa abashema ahakuba  nibanga kugyendera aha biragiro bya Ruhanga ebirikukwata aha micwe. Nibakora ebi barikureeba ngu bihikire. (Enf. 12:15) Abantu nk’abo nibanga Yehova Obukomooko bw’obwengye. (Zab. 53:1) Twaba nitubuurira, nibatuhakanisiza kimwe ahabw’okugira ngu nituha ekitiinisa emisingye ya Baibuli. Kwonka obuhabuzi bwabo tiburikubaasa kutugasira. Baibuli neegira eti: “Obwengye n’obw’ahaiguru, omushema tarikubaasa kubuhika, aha irembo, ahu abantu bateeraniire, tateerezaho.” (Enf. 24:7) Omushema tarikubaasa kuha obuhabuzi bw’obwengye. Niyo nshonga ahabw’enki Yehova naaturabura ngu ‘turugye aha mushema’!—Enf. 14:7.

12. Niki ekiraatuhwere kutatwaza nk’abashema?

¹² Okutashushana n’abo abarikwanga obuhabuzi bwa Ruhanga, nituteeraho kukunda emitindo ye yoona otwariiremu n’ey’emicwe. Nitubaasa kuhamya rukundo egyo turikugyeragyeranisa ebirikurugamu twamworobera nari twamugomera. Teekateeka aha buremeezi obu abantu barikwereetera ahabw’okwanga nkana obuhabuzi bwa Yehova obw’obwengye. Bwanyima, oyetegyereze oku orikugasirwa ahabw’okworobera Ruhanga.—Zab. 32:8, 10.

13. Mbwenu shi Yehova naatugyema kworobera obuhabuzi bwe obw’obwengye?

¹³ Yehova naaha buri omwe omugisha gw’okuhurira obwengye bwe, kwonka tarikugyema muntu weena kubwikiriza. Kureka, naayoreka ekirikuhika ahari abo abarikwanga obwengye bwe. (Enf. 1:29-32) Abarikucwamu kwanga kworobera Yehova nibaija kushaarura ebirikuruga omu ‘mitwarize yaabo.’ Bwanyima nibagira amaganya, oburemeezi, kandi bahendera bacwekyereziibwe. Kwonka, abarikuhurira obuhabuzi bwa Yehova obw’obwengye kandi bakabugyenderaho, nibaragaanisibwa bati: ‘Weena orikumpurira naija kutuura buhooro, agume agaramisiriize, ataine kabi aku arikutiina.’—Enf. 1:33.

14-15. Nitwegyera ki aha Enfumu 4:23?

¹⁴ Butoosha nitugasirwa twagyendera aha bwengye oburikuruga ahari Ruhanga. Nk’oku twaheza kureeba, kyorobi kutunga obuhabuzi bwa Yehova. Nk’eky’okureeberaho, ekitabo ky’Enfumu kirimu obuhabuzi obu Yehova arikutuha, oburikutugasira ebiro byona twabugyenderaho. Ka tureebe eby’okureeberaho bina ebirikworeka obuhabuzi bw’obwengye obwo.

¹⁵ Rinda omutima gwawe ogw’akamanyiso. Baibuli neegira eti: “Rinda omutima gwawe okukira ebindi byona ebi orikurinda, ahakuba nigwo gurugwamu enshuro z’amagara.” (Enf. 4:23) Teekateeka aha ki turikukora kurinda omutima ogwa butoosha. Niturya eby’okurya eby’ekiriisa, nitumanyiiza omubiri ekirikumara, kandi nitwetantara emize  mibi. Nitukora nikyo kimwe kurinda omutima gwaitu ogw’akamanyiso. Buri izooba nitushoma Ekigambo kya Ruhanga. Nitutebeekanisiza enteerane z’Ekikristaayo, tuzizamu, kandi tuzejumbamu. Butoosha nituguma nitwejumba omu buheereza twine omujinya. Kandi nitwerinda kugira emize mibi turikwetantara ebirikubaasa kushiisha ebiteekateeko byaitu, nk’eby’okweshemeza ebitashemeire n’emikago mibi.

16. Ahabw’enki Enfumu 23:4, 5 erikutuhwera hati?

¹⁶ Marwa n’ebi oine. Baibuli neeturabura eti: “Otarigwa ahaiguru noosherura eitungo. . . . Ku origumyaho amaisho, ribura, ahabw’okuba ahonaaho rigira amapapa, riguruka nk’empungu erikuza ahaiguru.” (Enf. 23:4, 5) Eby’obugaiga nibirahuka kuhwaho. Kwonka hati, abagaiga n’abooro bataire omutima aha kubisherura. Ahabw’okwemarira aha kusherura eby’obugaiga nibatwaza omu muringo ogurikushiisha eiziina ryabo, emikago yaabo, nangwa n’amagara gaabo. (Enf. 28:20; 1 Tim. 6:9, 10) Kwonka, obwengye nibutuhwera kugira emiteekateekyere eringaniire aha sente. Eki nikituhwera kutagira omururu, kureka nituguma tushemereirwe kandi tumazirwe n’ebi twine.—Mub. 7:12.

17. Nitubaasa kutunga tuta “orurimi rw’omunyabwengye,” orurikugambwaho omu Enfumu 12:18?

¹⁷ Teekateeka otakagambire. Twaba tutegyendesereize, ebigambo byaitu nibibaasa kureetaho akabi k’amaani. Baibuli neegira eti: “Hariho orahukiiriza ebigambo, ebirikucumita nka rurara, kwonka orurimi rw’omunyabwengye rutamba.” (Enf. 12:18) Nitugira emikago mirungi twayetantara kugambuura abandi. (Enf. 20:19) Ebigambo byaitu kubaasa kuhumuriza abandi omu mwanya gw’okubasaasa, twine kwijuza emitima yaitu obwengye oburi omu Kigambo kya Ruhanga. (Luk. 6:45) Twateekateeka aha ki Baibuli erikugamba, ebigambo byaitu nibibaasa kuba ‘nk’enshuro y’obwengye’ erikuruhuura abandi.—Enf. 18:4.

18. Okugyendera aha Enfumu 24:6 nikibaasa kutuhwera kita kuba abasinguzi omu kubuurira n’okwegyesa?

¹⁸ Kuratira obuhabuzi. Baibuli neetuhabura eti: “Ahakuba oshemereire kuhurura, nooyebemberwa  obwengye, kandi ahu abahi b’obwengye baingi bari, habaho obusinguzi.” (Enf. 24:6) Yetegyereze oku okugyendera aha musingye ogu kirikubaasa kutuhwera kuba abasinguzi omu murimo gwaitu gw’okubuurira n’okwegyesa. Omu mwanya gw’okuhikiiriza omurimo ogwo omu muringo gwaitu, nituteeraho kukuratira obuhabuzi obu turikuheebwa. Nitutunga obuhabuzi bw’obwengye omu nteerane z’Ekikristaayo, ahu abahi b’obwengye barikuha embazo n’eby’okureeberaho kututendeka. Kandi, ekibiina kya Yehova nikituha eby’okukoresa birungi nk’ebitabo na vidiyo ebirikubaasa kuhwera abantu kwetegyereza Baibuli. Oriyo nooyega kukoresa gye ebikoreso ebi?.

19. Nootwara ota obwengye obu Yehova arikutuha? (Enfumu 3:13-18)

¹⁹ Shoma Enfumu 3:13-18. Nitusiima munonga obuhabuzi burungi oburi omu Kigambo kya Ruhanga. Tukaabaire turi nkahi kuri tutaine obuhabuzi obwo? Omu kicweka eki, twareeba eby’okureeberaho by’obwengye oburikukora oburi omu kitabo ky’Enfumu. Nangwa, Ebyahandiikirwe byona birimu obuhabuzi bw’obwengye oburikuruga ahari Yehova. Ka tumariirire butoosha kugyendera aha bwengye obu Yehova arikutuha. Oku ensi erikureeba obwengye obwo ti kikuru ahariitwe, twine obuhame ngu abarikuhamira aha bwengye nibeetwa abashemereirwe.