1. Abaheereza ba Ruhanga aba ira bakaba nibaiha nkahi amaani?

 EKIGAMBO kya Ruhanga nikigira ngu abashaija abeesigwa bakaba baine amaani. Kwonka n’owaabaire naakirayo amaani omuribo, butoosha akaba ayeehurira nk’otaine maani. Nk’eky’okureeberaho, obumwe Omugabe Daudi akaba ahurira ahami “nk’ekibungo,” kwonka obumwe akaba ahwa amaani ‘aburaburirwa.’ (Zab. 30:7) Samusooni akaba aine amaani maingi ku yaabaire aba aine omwoyo gwa Ruhanga, kwonka akaba naamanya ngu yaaba ataine amaani agarikuruga ahari Ruhanga, naaba “otaine maani, nk’abandi bantu.” (Bar. 14:5, 6; 16:17) Yehova niwe yaabaire naaha abashaija aba abeesigwa amaani.

2. Ahabw’enki entumwa Paulo yaagizire ngu akaba ari omweremwa kandi aine amaani? (2 Abakorinso 12:9, 10)

² Entumwa Paulo nawe akagira ngu akaba naayenda amaani kuruga ahari Yehova. (Shoma 2 Abakorinso 12:9, 10.) Nka baingi ahariitwe, Paulo akaba aine amagara mabi. (Gal. 4:13, 14) Obumwe akaba naagumirwa kukora ekihikire. (Rom. 7:18, 19) Kandi akaba naakira kwerarikirira atarikumanya ekiraabeho. (2 Kor. 1:8, 9) Kwonka, Paulo ku yaabaire aba omweremwa, akaba agira amaani. Ata shi? Yehova akaba naaha Paulo amaani agarikwetengyesa kandi amugumya.

3. Nituza kugarukamu bibuuzo ki omu kicweka eki?

³ Naitwe Yehova naaturaganisa kutuha amaani. (1 Pet. 5:10) Kwonka kubaasa kutunga amaani ago twine kugira eki twakora. Nk’eky’okureeberaho, ingini neeha motoka amaani g’okugyenda omu maisho. Kwonka, orikuvuga motoka egyo aine kuribata aha muriro gwayo kugira ngu egyende. Nikyo kimwe, Yehova ayeteekateekire kutuha amaani agarikwetengyesa, kwonka twine kugira ebi twakora kubaasa kugasirwa omu maani ge.  Niki eki Yehova atuhaire kutuhwera kugira amaani? Kandi niki eki twine kukora kubaasa kutunga amaani age? Nituza kutunga eby’okugarukamu by’ebibuuzo ebyo turikushwijuma oku Yehova yaahamize abantu bashatu abarikugambwaho omu Baibuli—nabi Yona, Mariamu nyina wa Yesu, n’entumwa Paulo. Nituza n’okureeba oku Yehova arikugumya abaheereza be hati omu miringo niyo emwe.

4. Nitubaasa kutunga tuta amaani kuruga ahari Yehova?

⁴ Okushaba n’omuringo gumwe oku turikubaasa kutunga amaani kuruga ahari Yehova. Yehova naagarukamu okushaba kwaitu arikutuha “amaani agarikukirira kimwe.” (2 Kor. 4:7) Kandi nitutunga amaani twashoma Ekigambo kye tukakiteekateekaho. (Zab. 86:11) Obutumwa bwa Yehova oburi omu Baibuli ‘bwine amaani.’ (Heb. 4:12) Waashaba Yehova kandi okashoma ekigambo kye, noija kutunga amaani agarikwetengyesa kubaasa kugumisiriza, kuguma oshemereirwe, n’okuhikiiriza obujunaanizibwa obugumire. Yetegyereze oku Yehova yaagumize nabi Yona.

5. Ahabw’enki nabi Yona yaabaire aine kugira obumanzi?

⁵ Nabi Yona akaba aine kugira obumanzi. Akaba ahungire obujunaanizibwa obu Yehova yaabaire amuhaire. N’ekyarugiremu, akaba ari haihi kufeera omu ihunga ry’amaani, kandi akata amagara g’abaabaire bari aha meeri egyo omu kabi. Ku baamunagire omu nyanja, eky’enyanja kihango kikamumira. Nooteekateeka Yona akeehurira ata? Mbwenu shi akaba naateekateeka ngu yaaza kufeeramu? Nari ngu Yehova amutsigireho? Buzima Yona akaba ayerarikiriire.

6. Kurugiirira ahari Yona 2:1, 2, 7, niki ekyahweraire Yona kuhama obu yaabaire ari omunda y’eky’enyanja?

⁶ Yona akakora ki kubaasa kutunga amaani obu yaabaire ari wenka omunda y’eky’enyanja? Akashaba Yehova. (Shoma Yona 2:​1, 2, 7.) N’obu Yona atarakozire eki Yehova yaamugambiire, akaba naamanya ngu naija kuhurira okushaba kwe yaayeteisa kandi akamushaba omu bucureezi. Yona akateekateeka n’aha Byahandiikirwe. Ahabw’enki nitugira tutyo? Okushaba kwe okuri omuri Yona eshuura 2, kurimu ebigambo nibyo bimwe nk’ebiri omuri Zaaburi. (Nk’eky’okureeberaho, gyeragyeranisa Yona 2:2, 5 na Zaaburi 69:1; 86:7.) Nikireebwa butunu ngu Yona akaba naamanya gye ebyahandiikirwe ebi. Kandi ku yaabiteekateekireho omu bwire bw’obusaasi, bikamuhamiza ngu Yehova naija kumuhwera. Bwanyima, Yona akagarurwa aha nkungu kandi aha murundi ogu akaba ayeteekateekire kuhikiiriza obujunaanizibwa obu Yehova yaabaire naaza kumuha.—Yon. 2:10–3:4.

7-8. Ow’eishe-emwe omwe owa Taiwan akatunga ata amaani obu yaabaire aine oburemeezi?

⁷ Eky’okureeberaho kya Yona nikibaasa kutuhwera twaba twine oburemeezi butari bumwe na bumwe. Nk’eky’okureeberaho, Zhiming, b ow’eishe-emwe omuri Taiwan, aine endwara z’amaani. Okwongyera ahari ekyo, ab’eka ye nibamuhiiganisa ahabw’okuheereza Yehova. Naatunga amaani kuruga ahari Yehova kurabira omu kushaba n’okweyegyesa. Naagira ati: “Obumwe, ku harikubaho oburemeezi, ninyerarikirira munonga ndemwa kwikaikana kugira ngu nyeyegyese.” Kwonka tarikuhanika. Naayongyeraho ati: “Nimbanza nshaba Yehova, reero njwara eby’omu matu ntandika kuhurikiza ebyeshongoro byaitu by’Obukama. Obumwe, nimbyeshongora omu iraka ry’ahansi kuhitsya naikaikana. Reero ntandika kweyegyesa.”

⁸ Okweyegyesa kukahwera Zhiming kugumisiririza embeera egumire. Nk’eky’okureeberaho, ku yaabaire aherize kushemezibwa,  omushaho akamugira ngu ahabw’okugira ngu aine omubaro mukye gw’obutafaari oburikutukura nikiija kwetengyesa kuteebwamu eshagama. Kwonka, harikuburayo ekiro kimwe akashemezibwa, Zhiming akaba ashomire ebirikukwata ahari munyaanyazi-itwe owaabaire ari omu mbeera nk’eye. Munyaanyazi-itwe ogwo akaba aine omubaro mukye munonga gw’obutafaari oburikutukura waamugyeragyeranisa na Zhiming. Kwonka, akanga kuteebwamu eshagama kandi akakira. Eky’okureeberaho ekyo kikahwera Zhiming kuhama n’okuguma ari omwesigwa.

9. Noobaasa kukora ki waaba oyerarikiriire ahabw’oburemeezi bwawe? (Reeba n’ebishushani.)

⁹ Waaba oine oburemeezi, nooyerarikirira munonga oremwa n’okushaba Yehova? Nari noohurira otarikubaasa kweyegyesa? Manya ngu Yehova naayetegyereza gye embeera ei orikurabamu. N’ahabw’ekyo, gira obwesigye ngu n’obu waakushaba omu bugufu, Yehova naija kukuha kyenyini eki orikwenda. (Efe. 3:20) Waaba oine obusaasi omu nyehurira nari omu mubiri oburikukureetera kugumirwa kushoma nari kwega, teeraho kuhurikiza Baibuli ekwatsirwe omu maraka nari bimwe aha bitabo byaitu. Ekindi ekirikubaasa kukuhwera n’okuhurikiza bimwe aha byeshongoro byaitu nari okureeba vidiyo aha jw.org. Yehova naija kukugumya waamushaba kandi okateeraho kureeba oku arikugarukamu okushaba kwawe kurabira omu by’okurya by’omwoyo ebi atuhaire.

10. Ab’eishe-emwe na banyaanyazi-itwe nibatugumya bata?

¹⁰ Yehova naabaasa kukoresa ab’eishe-emwe na banyaanyazi-itwe abakristaayo kutugumya. Nibabaasa kutuhuumuriza twaba twine oburemeezi nari twaba nitugumirwa kuhikiiriza obujunaanizibwa bugumire. (Kol. 4:10, 11) Nituba nitwenda abanywani na munonga omu bwire ‘bw’ebihikiirizi.’ (Enf. 17:17) Twaba tutaine maani, ab’eishe-emwe bagyenzi baitu nibabaasa kutuhwera kuba gye omu magara, omu nyehurira, n’omu by’omwoyo. Teekateeka aha ku Mariamu nyina wa Yesu yaatungire amaani kuruga aha bandi.

11. Ahabw’enki Mariamu yaabaire aine kugira amaani?

 ¹¹ Mariamu akaba aine kugira amaani g’okukora ebi Yehova arikwenda. Teekateeka oku Mariamu yaayehuriire maraika Gaburieli ku yaamugambiire obujunaanizibwa bwe. Akaba atari mu bushwere, kwonka akaba naija kugira enda. Tihaine eki yaabaire naamanya aha kworora abaana, kwonka akaba aine kworora omwojo owaabaire naija kuba Mesia. Kandi tihaine ou yaabaire ateeraine nawe, mbwenu shi Mariamu akaba naija kushoboororera ata Yosefu owaabaire naamugamba obugyenyi?—Luk. 1:26-33.

12. Kurugiirira ahari Luka 1:39-45, Mariamu akatunga ata amaani agu yaabaire naayenda?

¹² Mariamu akaiha nkahi amaani g’okuhikiiriza obujunaanizibwa obwo obwabaire butari bwa butoosha kandi bugumire? Akahwerwa abandi. Nk’eky’okureeberaho, akashaba Gaburieli kumugambira ebyabaire nibitwarirwa omu bujunaanizibwa obwo. (Luk. 1:34) Bwanyima, akaza “omu nsi y’ebibungo” omuri Buyudaaya kutaayaayira omunyabuzaare we Elizaabeesi. Okutaayaaya okwo kukarugamu ebirungi. Elizaabeesi akasiima Mariamu kandi arikuhwerwa Yehova akagamba obunabi obwabaire nibukwata aha mwana wa Mariamu owaabaire akiri omunda. (Shoma Luka 1:39-45.) Mariamu akagira ngu Yehova akaba “ayorekire amaani n’omukono gwe.” (Luk. 1:46-51) Yehova akagumya Mariamu arikukoresa Gaburieli na Elizaabeesi.

13. Niki ekyabaireho munyaanyazi-itwe owa Bolivia ku yaashabire ab’eishe-emwe na banyaanyazi-itwe obuhwezi?

¹³ Nka Mariamu, noobaasa kutunga amaani kuruga aha b’eishe-emwe bagyenzi baawe. Dasuri, munyaanyazi-itwe ori Bolivia, akaba naayenda amaani nk’ago. Ishe ku yaakyebiirwe bakashanga aine endwara y’amaani kandi bakamuha ekitanda omu irwariro, Dasuri akeehayo kumureeberera. (1 Tim. 5:4) Kwonka ekyo butoosha kikaba kitoorobi. Naagira ati: “Kaingi nkehurira nk’otarikubaasa kugumizamu.” Mbwenu shi akashaba obuhwezi? Eego, kwonka tarakikozire ahonaaho. Naayongyeraho ati: “Nkaba ntarikwenda kuteganisa ab’eishe-emwe. Nkaba ningira ngu, ‘Yehova niwe arikuza kumpa obuhwezi obu ndikwenda.’ Kwonka nketegyereza ngu naacwamu kwetaanisa aha bandi, nimba ndiyo niinteeraho kushoboorora oburemeezi bwangye nyenka.” (Enf. 18:1) Dasuri akahandiikira bamwe ahari banywani be obutumwa arikubashoboororera embeera ye. Dasuri naagira ati: “Ebigambo tibirikubaasa kushoboorora oku Abakristaayo bagyenzi bangye baangumize. Bakareeta eby’okurya omu eirwariro baanshomera ebyahandiikirwe ebirikuhuumuriza. Buzima nikishemeza kumanya ngu tituri twenka. Turi omuka mpango ya Yehova, abari omu ka egyo beeteekateekire kukugumya, kurira naiwe, n’okukuhwera kugumizamu nooheereza Yehova.”

14. Ahabw’enki twine kwikiriza obuhwezi obu abareeberezi barikutuha?

¹⁴ Kandi Yehova naatuha amaani kurabira omu bareeberezi. Abareeberezi n’ebiconco ebi arikukoresa kutugumya n’okuturuhuura. (Isa. 32:1, 2) N’ahabw’ekyo waaba oyerarikiriire, gambira abareeberezi ekirikukwerarikiriza. Kandi baayehayo kukuhwera, ikiriza obuhwezi bwabo. Yehova naabaasa kubakoresa kukugumya.

15. Abakristaayo boona baine matsiko ki ag’omuhendo?

¹⁵ Amatsiko gaitu agarikwegamira ahari Baibuli nigabaasa kutuhwera kugira amaani. (Rom. 4:3, 18-20) Itwe Abakristaayo twine  amatsiko g’omuhendo ag’okutuuraho ebiro byona, yaaba omuri Paradiso aha omu nsi nari omu Bukama bw’omu iguru. Amatsiko ago nigatuhwera kugumisiriza oburemeezi, kubuurira amakuru marungi, n’okuhikiiriza obujunaanizibwa butari bumwe na bumwe omu kibiina. (1 Tes. 1:3) Amatsiko ago gakagumya n’entumwa Paulo.

16. Ahabw’enki entumwa Paulo yaabaire aine kugira amaani?

¹⁶ Paulo akaba aine kugira amaani. Omu baruha ei yaahandiikiire Abakorinso, akeegyeragyeranisa n’ekintu ekikozirwe omu ibumba. Akaba ‘akubirwe,’ ‘ashobeirwe,’ ‘arikuhiiganisibwa,’ kandi ‘aikarirwe.’ Nangwa obumwe amagara ge gakaba gaba gari omu kabi. (2 Kor. 4:8-10) Paulo akahandiika ebigambo ebyo obu yaabaire ari aha rugyendo rwe rwa kashatu orw’obumiisani. Kandi naabaasa kuba yaabaire atarikumanya ngu oburemeezi bwe nibwo bwatandika. Bwanyima abantu bakamuteera, yaakwatwa, emeeri ei yaabaire arimu ekasheenyagurika, kandi yaakomwa.

17. Kurugiirira 2 Abakorinso 4:16-18, Paulo akabaasa ata kugira amaani g’okugumisiriza?

¹⁷ Paulo akabaasa kugira amaani g’okugumisiriza ahabw’okugira ngu akata omutima aha matsiko ge. (Shoma 2 Abakorinso 4:16-18.) Akagambira Abakorinso ngu n’obu ‘omuntu we w’aharuguru yaakuhwaho,’ ekyo tikiraamumaremu amaani. Paulo akata omutima aha biro by’omumaisho. Amatsiko ge g’okutunga amagara agatahwaho omu iguru gakaba gari ‘ag’ekitiinisa kingi munonga’ kukira okubonabona kwona oku yaarabiremu. Paulo ku yaabaire ateekateeka aha matsiko ago, akaba “ahindurwa musya obutoosha.”

18. Amatsiko gahweraire gata Tihomir n’eka ye kuhama?

¹⁸ Amatsiko g’ebiro by’omumaisho nigahwera Tihomir, ow’eishe-emwe omuri Bulgaria, kugira amaani. Emyaka mikye enyima, murumuna we, Zdravko, akafeera omuri butandu. Ekyo kikareetera, Tihomir kugira amaganya mingi. Kubaasa kwemera amaganya, we n’eka ye nibateera akashushani aha kiraabeho aha kuzooka. Naagira ati: “Nitukira kugamba  ahu turaabugane Zdravko, eby’okurya ebi turamutebeekanisize, abu turaayete aha mukoro gw’okumwakiira, n’ebi turaamugambire aha biro by’emperu.” Tihomir naagira ngu okuta omutima aha matsiko ago kihweraire eka yaabo kugumisiriza n’okuguma bategyereize obu Yehova araazoore omurumuna.

19. Noobaasa kukora ki kuhamya amatsiko gaawe g’ebiro by’omumaisho? (Reeba n’ekishushani.)

¹⁹ Noobaasa kuhamya ota amatsiko gaawe? Waaba oine amatsiko g’okutuuraho ebiro byona omu nsi teeraho kushoma ebi Baibuli erikugamba ahari Paradiso kandi obiteekateekaho. (Isa. 25:8; 32:16-18) Teera akashushani oku embeera ziraabe ziri omu nsi ensya. Yereebe oriyo. N’oha ondiijo ou orikureeba? Ni maraka ki agu orikuhurira? Nooyehurira ota? Waaba nooyenda kuteekateeka aha ku Paradiso eraabe neeshusha, reeba ebishushani ebyayo ebiri omu bitabo byaitu nari oreebe vidiyo z’ebyeshongoro nk’ebi: Ensi Ensya Erikwija, Ensi Ensya Eri Haihi, nari Teekateeka aha Bwire. Twaguma nituteekateeka aha nsi ensya, oburemeezi bwaitu nibwija kuba “bukye [kandi] obw’omwanya mukye.” (2 Kor. 4:17) Amatsiko agu Yehova akuhaire nigaija kukuhwera kuhama.

20. Nitubaasa kutunga tuta amaani, n’obu twakuba turi abeeremwa?

²⁰ N’obu twakuba turi abeeremwa, nitubaasa kugira amaani ahabw’okuhwerwa Ruhanga. (Zab. 108:13) Yehova atuhaire ebirikwetengyesa kubaasa kutunga amaani ge. N’ahabw’ekyo waaba nooyenda obuhwezi kuhikiiriza obujunaanizibwa bwawe, kugumisiriza okugyezibwa nari kuguma oine okushemererwa, shaba Yehova kandi osherure obuhabuzi bwe orikweyegyesa. Ikiriza obuhwezi bw’ab’eishe-emwe na banyaanyazi-itwe. Guma oine amatsiko aha biro by’omumaisho. Waakora otyo noija ‘kugumibwa n’obushoboorozi bwona, nk’amaani g’ekitiinisa kya [Ruhanga] oku gari, obone kugumisiriza omuri byona n’okutaruha, oine okushemererwa.’—Kol. 1:11.