1. Maraika naagamba ki, kandi ebi arikugamba nibitukwataho bita?

 KU OGIRE ngu maraika niwe arikugamba naiwe, okaahurikiize ebi arikukugambira? Obunaku obu, maraika naagamba ‘n’amahanga goona n’enganda zoona n’endimi n’abantu.’ Niki eki arikugamba? Naagira ati: “Mutiine Ruhanga, mumuhe ekitiinisa . . . Muramye Ogwo owaahangire eiguru n’ensi.” (Kush. 14:6, 7) Yehova niwe Ruhanga wenka ou buri omwe ashemereire kuramya. Ka nikitushemeza kureeba ngu Yehova atuhaire omugisha gw’omuhendo kumuramiza omu hekalu enkuru ey’eby’omwoyo!

2. Hekalu enkuru ey’eby’omwoyo niki? (Reeba akabokusi “ Eki Etarikumanyisa.”)

² Hekalu ey’eby’omwoyo niki, kandi ebirikugishoboorora nitubaasa kubishanga nkahi? Eki ti kyombeko, kureka n’entebeekanisa ya Yehova ey’okumuramya omu muringo ogu arikusiima turikwegamira aha kitambo kya Yesu. Entumwa Paulo akashoboorora entebeekanisa egi omu baruha ei yaahandiikiire Abakristaayo Abaheburaayo ab’ekyasha ky’okubanza abaabaire nibatuura Buyudaaya. b

3-4. Ahabw’enki Paulo yaahandiikiire Abakristaayo Abaheburaayo abaabaire nibatuura Buyudaaya, kandi akabahwera ata?

³ Ahabw’enki Paulo yaahandiikiire Abakristaayo Abaheburaayo ab’omuri Buyudaaya? Obundi, ahabw’enshonga nka ibiri nkuru. Ey’okubanza, kubagumya. Baingi aharibo bakaba bakuriire omu diini y’Ekiyudaaya. Obundi abeebembezi b’ediini egyo bakaba nibabajuma ahabw’okuhinduka Abakristaayo.  Ahabw’enki? Ahabw’okugira ngu Abakristaayo bakaba bataine hekalu nungi y’okuramizamu, eitambiro ry’okutambiraho ebitambo n’abanyamurwa b’okubaheereza. Eki nikibaasa kuba kyareetaire abeegi ba Yesu kuhwamu amaani kandi kikatuubya okwikiriza kwabo. (Heb. 2:1; 3:12, 14) Bamwe nibabaasa kuba baagyerizeho kugaruka omu diini y’Ekiyudaaya.

⁴ Eya kabiri, Paulo akagambira Abakristaayo Abaheburaayo ngu bakaba batarikuteeraho kwetegyereza gye enyegyesa nsya, nibyo ‘by’okurya bigumire’ ebiri omu Kigambo kya Ruhanga. (Heb. 5:11-14) Baingi bakaba nibakikuratira Ebiragiro bya Musa. Paulo akagira ngu ebitambo ebyabaire nibiheebwayo nk’oku kirikworekwa omu Biragiro bikaba bitarikureetera abantu kwihwaho ekibi. N’ahabw’ekyo, ebiragiro bikaba ‘biihirweho.’ Paulo akoongyera kubeegyesa amazima makuru. Akaijutsya Abakristaayo bagyenzi be “amatsiko agarikukira oburungi,” agaabaire nigegamira aha kitambo kya Yesu ekyabaire nikibaasa kubahwera kwirira “haihi na Ruhanga.”—Heb. 7:18, 19.

5. Twine kwetegyereza ki omu kitabo kya Abaheburaayo, kandi ahabw’enki?

⁵ Paulo akashoboororera beene ishe Abaheburaayo ahabw’enki okuramya kw’Ekikristaayo kwabaire nikukirira kimwe omuringo gw’okuramya ogwa ira. Ebyabaire nibikorwa omu diini y’Ekiyudaaya bikaba biri ekishushani ky’ebyabaire nibiza kwija, kwonka amazima gaabyo gakaba gari omuri Kristo. (Kol. 2:17) Ekishushani nikiba nikyoreka oku ekintu kirikushusha, kwonka nikiba kitari kintu ekyo kyenyini. N’ahabw’ekyo okuramya kw’Ekiyudaaya kuba kuri ekishushani ky’okuramya okwabuzima okwabaire nikuza kwija. Twine kumanya entebeekanisa ei Yehova atuteeraireho kusaasirwa ebibi kugira ngu tubaase kumuramya omu muringo ogu arikusiima. Ka tugyeragyeranise “ekishushani” (okuramya kw’Ekiyudaaya) ‘n’okwabuzima’ (okuramya kw’Ekikristaayo), okurikugambwaho omu kitabo ky’Abaheburaayo. Ekyo nikiza kutuhwera kwetegyereza gye hekalu ey’eby’omwoyo n’oku erikutukwataho.

6. Eihema rikaba rikoresibwa rita?

⁶ Okuramya kw’Ekiyudaaya. Paulo akahandiika arikwihirira aha ihema eryaateirweho Musa omuri 512 Y.A. (Reeba  chati “Okuramya kw’Ekiyudaaya—Okuramya kw’Ekikristaayo.”) Abaisraeli bakaba bakiriza eihema barikuruga omu mwanya kuza omu gundi. Bakarikoresa kumara emyaka nka 500 kuhitsya obu Hekalu yaayombekwa omuri Yerusaalemu. (Kur. 25:8, 9; Kub. 9:22) Eihema ry’okubugabuganiramu gukaba guri omwanya ogu Abaisraeli baabaire bateeraniramu kuramya Ruhanga, n’okuhayo ebitambo. (Kur. 29:43-46) Kwonka, rikaba nirijwekyera ebintu birungi ebi Abakristaayo baabaire nibaija kutunga.

7. Ni ryari obu hekalu ey’eby’omwoyo yaateebwaho?

⁷ Okuramya kw’Ekikristaayo. Eihema ry’okubugabuganiramu rikaba riri ‘ekishushani eky’eby’omu iguru,’ nk’oku kirikworekwa omu hekalu enkuru ey’eby’omwoyo. Paulo akagira ngu eihema rikaba nirijwekyera ebiriho hati. (Heb. 8:5; 9:8) Obu yaahandiikira Abaheburaayo, hekalu ey’eby’omwoyo ekaba yaatairweho kandi Abakristaayo bakaba nibagireeba. Ekateebwaho omu 29 Y.A.K. omwaka obu Yesu yaabatizibwa, akashukwaho omwoyo gurikwera, kandi akatandika kuheereza Yehova ‘nk’Omunyamurwa Omukuru rugambwa’ omu hekalu ey’eby’omwoyo. c—Heb. 4:14; Byak. 10:37, 38.

8-9. Kurugiirira aha Abaheburaayo 7:23-27, abanyamurwa bakuru ba Israeli nibataana bata ahari Yesu Kristo Omunyamurwa Omukuru rugambwa?

⁸ Okuramya kw’Ekiyudaaya. Omunyamurwa omukuru akaba aine obujunaanizibwa bw’okujwekyera abantu ahari Ruhanga. Arooni Omunyamurwa omukuru w’okubanza ow’Abaisraeli akatooranwa Yehova obu haateebwaho eihema. Kwonka, nk’oku Paulo yaashobooroire, “abanyamurwa aba ira bakaba bakuratana baingi, ahakuba rufu ekaba ebazibira kugumaho.” d (Shoma Abaheburaayo 7:23-27.) Kandi ahabw’okugira ngu abashaija abo bakaba batahikiriire bakaba baine kuhayo ebitambo by’okurihiirira ebibi byabo. Egi niyo nshonga ahabw’enki hariho entaaniso mpango aha gati y’abanyamurwa bakuru aba Israeli n’Omunyamurwa Omukuru orikukirayo, Yesu Kristo.

⁹ Okuramya kw’Ekikristaayo. Yesu Kristo Omunyamurwa Omukuru ‘naaheerereza . . . omu ihema ery’amazima, eritarateirweho bantu, kureka eryateirweho’ Yehova. (Heb. 8:1, 2) Paulo akashoboorora ngu ahabw’okugira ngu Yesu ‘naagumaho ebiro byona, n’omunyamurwa otarikurugaho’. Paulo akoongyeraho ngu Yesu ‘taine kamogo, ataanisiibwe n’abasiisi,’ kandi okutashushana n’abanyamurwa ba Israeli, ‘tikirikumwetengyesa kutamba ebitambo obutoosha’ ahabw’ebibi bye. Hati ka twetegyereze entaaniso eri aha gati y’amatambiro n’ebitambo ebyabaire biheebwayo ira n’ebirikuheebwayo Abakristaayo obunaku obu.

10. Ebitambo ebyabaire biheebwayo aha itambiro eriheetsirwe omu muringo bikaba nibijwekyera ki?

¹⁰ Okuramya kw’Ekiyudaaya. Aheeru y’omuryango gw’eihema hakaba hariho eitambiro ry’omuringa ahu baabaire baahongyera Yehova ebitambo by’enyamaishwa. (Kur. 27:1, 2; 40:29) Kwonka, ebitambo ebyo bikaba bitarikwihiraho kimwe ebibi by’abantu.  (Heb. 10:1-4) Okuhayo ebitambo by’enyamaishwa aha ihema kikaba nikijwekyera ekitambo ekyabaire nikiija kwihiraho kimwe ebibi by’abantu.

11. Yesu akeehayo nk’ekitambo aha itambiro ki? (Abaheburaayo 10:5-7, 10)

¹¹ Okuramya kw’Ekikristaayo. Yesu akaba naamanya ngu Yehova akamwohereza omu nsi kuhayo amagara ge nk’ekitambo ahabw’abantu. (Mat. 20:28) N’ahabw’ekyo obu Yesu yaabatizibwa, akahikiiriza eki Yehova yaamushabire kukora. (Yoh. 6:38; Gal. 1:4) Yesu akeehayo aha itambiro ry’akamanyiso eryabaire nirijwekyera eki Ruhanga arikukunda ekyabaire nikitwariramu Omwana we kuhayo amagara ge agahikiriire ahabw’abantu. Yesu akahayo amagara ge ‘rimwe yaaheza’ kurihiirira ebibi bya buri omwe orikumwikiririzamu. (Shoma Abaheburaayo 10:5-7, 10.) Ka tushwijume eki ebyabaire biri omu ihema birikujwekyera.

12. N’oha owaabaire naabaasa kutaaha omu bishengye byona eby’eihema?

¹² Okuramya kw’Ekiyudaaya. Eihema na hekalu eyaayombekirwe omuri Yerusaalemu bikaba nibishushana omunda. Omunda hakaba harimu emyanya ebiri—“Aharikwera, n’Aharikwera Munonga,” kandi hataanisiibwe omukingo. (Heb. 9:2-5; Kur. 26:31-33) Omunda y’Aharikwera hakaba harimu etabaaza eheetsirwe omu zaabu, eitambiro ry’okwoteereraho obubaane, n’emeeza eriho emigaati y’okumurikwa. “Abanyamurwa abaashukirweho amajuta” nibo bonka abaabaire nibaikirizibwa  kutaaha omunda y’Aharikwera kukora emirimo erikwera. (Kub. 3:3, 7, 10) Aharikwera munonga hakaba harimu eshanduukye y’endagaano ekozirwe omu zaabu eyaabaire neejwekyera okubaho kwa Yehova. (Kur. 25:21, 22) Omunyamurwa omukuru niwe wenka owaabaire naikirizibwa kutaaha Aharikwera munonga aha Izooba ry’Okurihiiriraho Ebibi buri mwaka. (Lev. 16:2, 17) Akaba ataahayo n’eshagama y’enyamaishwa buri mwaka, kurihiirira ebibi bye n’ebya eihanga ryona. Bwanyima, Yehova arikukoresa omwoyo gurikwera, akooreka gye eki ebyo byabaire nibijwekyera.—Heb. 9:6-8. e

13. Aharikwera n’Aharikwera Munonga nihajwekyera ki omu kuramya okw’Ekikristaayo?

¹³ Okuramya kw’Ekikristaayo. Abeegi bakye ba Kristo abashukirweho omwoyo gurikwera nibo baine omukago gw’omutaano na Yehova. Abantu 144,000 nibo baraaheereze na Yesu nk’abanyamurwa omu iguru. (Kush. 1:6; 14:1) Aharikwera nihajwekyera embeera ey’eby’omwoyo ei abashukirweho omwoyo gurikwera barimu omu nsi nk’abaana ba Ruhanga. (Rom. 8:15-17) Aharikwera munonga nihajwekyera iguru, ahu Yehova arikutuura. “Omukingo” ogwabaire nigutaanisa Aharikwera n’Aharikwera munonga, nigujwekyera omubiri gwa Yesu ogw’obuntu ogu yaabaire aine atakagiire omu iguru nk’Omunyamurwa Omukuru rugambwa owa hekalu ey’eby’omwoyo. Yesu okuhayo omubiri gwe nk’ekitambo ahabw’abantu, akateeraho Abakristaayo entoore boona omuhanda gw’okuza omu iguru. Nabo nibaba baine kufeerwa omubiri gwabo ogw’obuntu kubaasa kutunga ekihembo ky’okuza omu iguru. (Heb. 10:19, 20; 1 Kor. 15:50) Yesu ku yaaherize kuzooka, akataaha Aharikwera Munonga omu hekalu ey’eby’omwoyo, ahu entoore boona baraije kumwegaitaho.

14. Kurugiirira aha Abaheburaayo 9:12, 24-26, ahabw’enki omuringo gw’okuramya Yehova omu hekalu ey’eby’omwoyo gurikukira ogwa ira?

¹⁴ Hati nitwetegyereza gye obukuru bw’entebeekanisa ya Yehova y’okuramya okushemeire okurikwegamira aha kitambo n’obunyamurwa bwa Yesu Kristo. Omuri Israeli, omunyamurwa omukuru akaba ataaha Aharikwera Munonga ahaabaire hakozirwe abantu aine eshagama y’enyamaishwa, kwonka Yesu akataaha “omu iguru,” aharikukirayo kwera munonga, kweyoreka omu maisho ga Yehova. Okwo, akahayo omuhendo gw’amagara ge agahikiriire ahabwaitu “ngu abone kwihaho ebibi ahabw’okwehayo kuba ekitambo.” (Shoma Abaheburaayo 9:12, 24-26.) Ekitambo kya Yesu nikyo kitambo ekirikwogyezaho kimwe ebibi. Nk’oku turikuza kureeba, yaaba twine amatsiko g’okuza omu iguru nari kutuura omu nsi, twena nitubaasa kuramya Yehova omu hekalu ye ey’eby’omwoyo.

15. Ni baahi abaabaire nibaheereza omu mbuga y’eihema?

¹⁵ Okuramya kw’Ekiyudaaya. Eihema rikaba riine embuga mpango ezitiriirwe, ahu abanyamurwa baabaire bakorera emirimo yaabo. Eitambiro rihango eriheetsirwe omu muringa rikaba ryombekirwe omu mbuga otwariremu n’ekinaabiro ahu abanyamurwa baabaire babanza kweyeza batakakozire emirimo y’obunyamurwa. (Kur. 30:17-20; 40:6-8) Kwonka hekalu ezaayombekirwe bwanyima, nazo zikaba ziine embuga ey’aheeru  ahu abatari banyamurwa baabaire nibabaasa kwemerera kuramya Ruhanga.

16. Ni baahi abarikuheereza omu mbuga za hekalu ey’eby’omwoyo?

¹⁶ Okuramya kw’Ekikristaayo. Entoore entsigarira batakagiire omu iguru kuheereza na Yesu nk’abanyamurwa, nibaheereza omu bwesigwa omu mbuga ey’omunda ey’omu nsi eya hekalu ey’eby’omwoyo. Ekinaabiro kihango ekiriho amaizi nikibaijutsya ngu Abakristaayo boona, baine kuguma bashemeire omu micwe n’omu by’omwoyo. Mbwenu shi “omutwe muhango gw’abantu,” abarikushagika beene ishe Kristo omu bwesigwa nibaramiza nkahi? Entumwa Yohaana akareeba “beemereire omu maisho g’ekitebe ky’Obukama,” ekirikujwekyera embuga ey’aheeru, ‘barikuheereza [Ruhanga] omuri hekalu ye nyomushana na nyekiro.’ (Kush. 7:9, 13-15) Nitwesiima munonga ahabw’okuba omu hekalu ya Yehova ey’eby’omwoyo.

17. Ni bitambo ki ebi turikuhayo ahari Yehova?

¹⁷ Obunaku obu Abakristaayo boona baine omugisha gw’okuhayo ebitambo ahari Yehova barikukoresa obwire bwabo, amaani n’ebintu byabo kushagika Obukama bwa Ruhanga. Nk’oku entumwa Paulo yaagambiire Abakristaayo Abaheburaayo nitubaasa kuguma ‘nitutamba ekitambo ky’okusiima Ruhanga, nikyo kyana ky’eminwa erikuhimbisa eiziina rye.’ (Heb. 13:15) Nitworeka ngu nitusiima omugisha gw’okuramya Yehova turikumuha ebitambo ebirikukirayo oburungi.

18. Kurugiirira aha Abaheburaayo 10:22-25, ni bintu ki ebi twine kuguma nitukora kandi niki eki tutashemereire kwebwa?

¹⁸ Shoma Abaheburaayo 10:22-25. Paulo arikuhendera ebaruha ei yaahandiikiire Abaheburaayo, akagamba enshonga eziine akakwate n’okuramya kwaitu ezi tutashemereire kwehuzya. Nizitwariramu okugamba na Yehova omu kushaba, okubuurira abandi, okuza omu nteerane z’ekibiina n’okwongyera kugumyana ‘nk’oku turikureeba ngu ekiro kya [Yehova] kiri haihi kuhika.’ Aha muheru gw’ekitabo ky’Okushuuruurwa, maraika wa Yehova akahamiiriza ebigambo ebi: “Ramya Ruhanga!” (Kush. 19:10; 22:9) Ka tumariirire kuguma nitwijuka amazima makuru agarikukwata aha hekalu enkuru ey’eby’omwoyo kandi tusiime n’omugisha gw’okuramya Ruhanga waitu!