1-2. Omuringo murungi gw’okushoma n’okweyegyesa Baibuli ni guuha? Ha eky’okureeberaho.

 KA TUGIRE ngu nooyenda kugura enju. Okaayenzire kubanza waareeba ki otakacwiremu kugigura? Ekishushani kyayo kyonka? Ngaaha. Okaayenzire kubanza waareeba enju egyo yoona enyima na aheeru, ebishengye byayo byona, n’embaju zaayo zoona. Noobaasa n’okwenda kureeba puraani yaayo kugira ngu omanye oku yaayombekirwe. Buzima, okaayenzire kumanya byona ebirikukwata aha nju ei orikwenda kugura.

² Nitubaasa kukora nikyo kimwe twaba nitushoma kandi turikweyegyesa Baibuli. Omuhandiiki omwe naagyeragyeranisa obutumwa bwa Baibuli “n’ekyombeko kihango, ekiine eminaara miraingwa n’omusingi guhami kuruga ahansi.” Mbwenu shi nitubaasa kwetegyereza gye tuta byona ebiri omu Baibuli? Waagishoma noorahukiiriza, noobaasa kwega amazima agarikutandikirwaho, nibyo, “eby’okubandizaho ebyorobi omu byagambirwe Ruhanga.” (Heb. 5:12) Kwonka, nk’oku orikuba oine kutaaha omu nju kubaasa kugimanya gye, n’oba oine “kuteeraho” kwetegyereza gye Baibuli. Omuringo murungi gw’okwega Baibuli n’okureeba oku obutumwa bwayo bwine akakwate. Okuteeraho kwetegyereza gye amazima agu orikwikiriza, n’enshonga ahabw’enki noogaikiriza.

3. Entumwa Paulo akahiga Abakristaayo bagyenzi be kukora ki, kandi ahabw’enki? (Abaefeso 3:14-19)

³ Kubaasa kwetegyereza Ekigambo kya Ruhanga omu bwijwire, twine kwega amazima ga Baibuli agagumire. Entumwa Paulo akahiga Abakristaayo bagyenzi be kuteeraho kwetegyereza  gye ‘oburaingwa, obukiika, obwemi, n’obukiizi’ bw’Ekigambo kya Ruhanga, kugira ngu boongyere “kutsimba emizi” omu kwikiriza kwabo. (Shoma Abaefeso 3:14-19.) Naitwe nikyo twine kukora. Ka tureebe oku turikubaasa kwega gye Ekigambo kya Ruhanga kugira ngu tubaase kukyetegyereza gye.

4. Nitubaasa kukora ki kwirira haihi Yehova? Ha eby’okureeberaho.

⁴ Itwe Abakristaayo titurikumarwa n’amazima ga Baibuli agarikutandikirwaho. Turikuhwerwa omwoyo gurikwera, twine ekihika ky’okwega ebitoorobi kwetegyereza ebya Ruhanga. (1 Kor. 2:9, 10) Noobaasa kutandika kweyegyesa oine ekigyendererwa ky’okwirira haihi Yehova. Nk’eky’okureeberaho, condooza aha ku yaayorekire abaheereza be aba ira rukundo n’oku ekyo kirikworeka ngu naiwe naakukunda. Noobaasa kushwijuma entebeekanisa ya Yehova ey’okuramya omuri Israeli eya ira n’oku eine akakwate n’ey’Abakristaayo obunaku obu. Nari omu kweyegyesa noobaasa kwongyera kucondooza aha bunabi obu Yesu yaahikiriize ari omu nsi.

5. Hariho eki orikwenda kucondoozaho omu kweyegyesa kwawe?

⁵ Bamwe abarikweyegyesa Baibuli barikucondooza bakashabwa kugamba ebi baakwenzire kwongyera kwetegyereza. Bimwe aha bi baagambire biri omu kabokusi “ Ebi Orikubaasa Kwegaho Orikweyegyesa.” Noobaasa kutunga okushemererwa waabyegaho orikuhwerwa ebiri omu Watch Tower Publications Index nari Akatabo k’Okucondoozamu ak’Abajurizi ba Yehova. Waayeyegyesa Baibuli orikucondooza noobaasa kuhamya okwikiriza kwawe kandi kikuhwere kuzoora ‘okumanya Ruhanga.’ (Enf. 2:4, 5) Hati ka tureebe gamwe aha mazima g’omu Baibuli agagumire agu turikubaasa kucondoozaho.

6. (a) Puraani n’ekigyendererwa nibitaana bita? (b) Ahabw’enki nitubaasa kugira ngu ekigyendererwa eki Yehova ainiire abantu n’ensi n’eky’ebiro byona? (Abaefeso 3:11)

⁶ Nk’eky’okureeberaho, teekateeka aha ki Baibuli erikugamba aha kigyendererwa kya Ruhanga. Okugira puraani nikutaana aha kugira  ekigyendererwa. Puraani eri nk’okugira omuhanda ogurikukuhitsya ahu orikuza. Kwonka, puraani neebaasa kutahikiirira haagira ekyaita omuhanda ogwo. Ekigyendererwa kyo, kiri nk’ahu orikuza. Nitumanya gye ahu turikwenda kuza, kwonka nitubaasa kukoresa emihanda etari emwe kuhikayo. Ekirungi, Yehova naatushuuruurira mporampora “ekigyendererwa kye” omu Baibuli. (Efe. 3:11.) Yehova naabaasa kukoresa emiringo etari emwe kuhikiiriza ekigyendererwa kye. (Enf. 16:4) N’ahabw’ekyo ebi Yehova arikukora nibigumaho ebiro byona. Ekigyendererwa kya Yehova niki, kandi akozire mpinduka ki kukihikiiriza?

7. Abantu b’okubanza ku baagomire, Yehova akataho buryo ki obundi kuhikiiriza ekigyendererwa kye? (Matayo 25:34)

⁷ Ruhanga akagambira abantu b’okubanza ekigyendererwa eki yaabaire abainiire. Bakaba bari ‘ab’okuzaara, kukanya, kwijuza ensi ekaba eyaabo, kandi bakategyeka . . . byona ebiine amagara’ omu nsi. (Kut. 1:28) Adamu na Haawa ku baagomire, bakahunguza abantu boona ekibi, Yehova tararemirwe kuhikiiriza ekigyendererwa kye. Akataho oburyo obundi bw’okukihikiiriza. Ahonaaho, akataho Obukama omu iguru oburaije kuhikiiriza ekigyendererwa eki yaabaire ainiire abantu n’ensi omu kubanza. (Shoma Matayo 25:34.) Omu bwire obu Yehova yaataireho, akoohereza Omwana we kwegyesa abantu aha Bukama n’okuhayo amagara ge nk’ekitambo kutujuna ekibi n’okufa. Yesu akazooka yaagaruka omu iguru kutegyeka nk’Omugabe w’Obukama bwa Ruhanga. Kwonka hariho ebindi bingi ebirikukwata aha kigyendererwa kya Ruhanga ebi turikubaasa kwega.

8. (a) Enshonga nkuru erikugambwaho omu Baibuli n’eha? (b) Nk’oku kirikworekwa omu Abaefeso 1:8-11, Yehova naija kuhikiiriza ki ekindi? (Reeba ekishushani aha kipampagare.)

⁸ Baibuli neeyoreka ngu okweza eiziina rya Yehova, n’enshonga nkuru eraashobororwe ku araahikiirize ekigyendererwa kye ahabw’ensi arikukoresa Obukama bwe oburaabe nibutegyekwa Kristo. Ekigyendererwa kya Yehova tikirikubaasa kuhinduka. Naaraganisa ngu byona nibiija kuhikiirira nk’oku yaagambire. (Isa. 46:10, 11, Heb. 6:17, 18) Ensi neija kuhindurwa paradiso, ahu baijukuru ba Adamu na Haawa abahikiriire baraayesiimire amagara “ebiro byona.” (Zab. 22:26) Hariho ekindi eki Yehova araakore. Naija kureetera ebihangirwe bye byona eby’obwengye eby’omu iguru n’omu nsi kugira obumwe. Boona nibaija kubaasa kworobera Yehova nk’omutegyeki waabo. (Shoma Abaefeso 1:8-11.) Torikushemererwa waareeba oku Yehova arikuhikiiriza ekigyendererwa kye?

9. Twashoma Baibuli nitubaasa kumanya birikwingana ki ahari nyentsya?

⁹ Teekateeka aha bunabi obu Yehova yaagambire omu musiri Edeni oburi omu Okutandika 3:15. b Bukooreka ebyabaire nibiija kuhikiiriza ekigyendererwa kye, kwonka bikaba nibiija kubaho bwanyima y’emyaka erikurenga omuri rukumi. Nk’eky’okureeberaho, Yehova akagambira Abrahamu ngu omwijukuru akaba naija kuba Mesia. (Kut. 22:15-18) Bwanyima, omu gwa 33 Y.A.K., Yesu akateerwa ekitsintsiino nk’oku kyagambirwe. (Byak. 3:13-15) Ekicweka ky’aha muheru eky’obunabi obwo, eky’okuteera omutwe gwa Sitaane, nikiija kubaho bwanyima y’emyaka erikurenga omuri 1,000. (Kush. 20:7-10) Kandi, Baibuli neeyoreka bingi ebiraije kubaho obuzigu oburi aha gati y’entebeekanisa y’ensi ya Sitaane n’ekibiina kya Yehova bwayeyongyera.

10. (a) Ni bintu ki ebiri haihi kubaho? (b) Noobaasa kwetebeekanisa ota? (Reeba obugambo obw’ahansi.)

 ¹⁰ Teekateeka aha bintu bikuru ebi Baibuli erikugambaho. Eky’okubanza, amahanga nigaija kurangirira ngu “n’obusingye tihariho kabi.” (1 Tes. 5:2, 3) Ahonaaho, okubonabona kwingi nikwija kutandika amahanga ku garataahirire amadiini g’ebishuba. (Kush. 17:16) Bwanyima y’ekyo, nihaija kubaho okureeba “Omwana w’omuntu naizira omu bicu by’omu iguru aine obushoboorozi n’ekitiinisa kingi.” (Mat. 24:30) Yesu naija kucwera orubanja abantu, nk’orikushoroora entaama omu mbuzi. (Mat. 25:31-33, 46) Omu bwire obwo, Sitaane naija kugumizamu naahakanisa Yehova. Ahabw’okugira ngu naayangira kimwe abantu ba Ruhanga, naija kureetera amahanga ageegaitsire hamwe, agu Baibuli erikweta Googi omu nsi ya Magoogi kutaahirira abaheereza ba Yehova. (Ezk. 38:2, 10, 11) Bwanyima y’obwire bukye, abashukirweho omwoyo gurikwera abaraabe bakiriho nibaija kutwarwa omu iguru kuba na Kristo n’eihe rye kurwana orutaro rwa Haramagedoni, oruraahendere okubonabona kwingi. c (Mat. 24:31; Kush. 16:14, 16) Reero, Obutegyeki bwa Kristo obw’Emyaka Rukumi nibwija kutandika.—Kush. 20:6.

11. Okugira amagara agatahwaho, nikikukwataho kita? (Reeba n’ekishushani.)

¹¹ Teekateeka aha biraabeho bwanyima y’emyaka rukumi. Baibuli neegira ngu Omuhangi waitu akata “omu mitima [yaitu] ebiteekateeko by’obunaku obutahwaho.” (Mub. 3:11) Teekateeka oku ekyo kirikukukwataho n’omukago gwawe na Yehova. Ekitabo Draw Close to Jehovah aha orupapura 319, hariho ebigambo birikushemeza ebi: “Bwanyima y’okutuuraho emyaka igana, rukumi, obukaikuru, nari emyaka obuhumbi, nitwija kumanya bingi munonga ebirikukwata ahari Yehova Ruhanga kukira ebi turikumanya hati. Kwonka nabwo, nitwija kuba nitureeba ngu hakiriyo bingi munonga ebi twine kwega. . . . Amagara agatahwaho nigaija kuba nigatangaaza kandi ekiraakireyo  oburungi n’okwirira haihi Yehova obutoosha.” Mbwenu shi twagumizamu nitwega Ekigambo kya Ruhanga, ni bintu ki ebindi ebi turikubaasa kwetegyereza?

12. Noobaasa kumanya ota ebiri omu iguru? Ha eky’okureeberaho.

¹² Baibuli neetumanyisa bikye aha biri omu maisho ga Yehova “ahaiguru.” (Isa. 33:5) Neetworeka ebintu birungi ebirikukwata ahari Yehova n’ekicweka ky’omu iguru eky’ekibiina kye. (Isa. 6:1-4; Dan. 7:9, 10; Kush. 4:1-6) Nk’eky’okureeberaho, nitushoma aha bintu birikutangaaza ebi Ezekieli yaareebire obu ‘eiguru ryashuuruuka akareeba okworekwa nikuruga ahari Ruhanga.’—Ezk. 1:1.

13. Nk’oku Abaheburaayo 4:14-16 harikworeka, nooyehurira ota ahabw’okumanya obujunaanizibwa obu Yesu aine omu iguru?

¹³ Teekateeka n’aha bujunaanizibwa obu Yesu aine nk’Omugabe waitu omu iguru kandi Omunyamurwa Omukuru oine embabazi. Kurabira omuriwe nitubaasa kwirira haihi “n’ekitebe ky’embabazi” za Ruhanga kandi tumushabe kutuhwera n’okutugirira embabazi ‘ahu turikuzeetengyera hoona.’ (Shoma Abaheburaayo 4:14-16.) Buri izooba twine kuteekateeka aha ki Yehova na Yesu baakozire n’eki barikutukorera bari omu iguru. Rukundo ei batwiniire eine kutukwataho kandi ekatuhiga kuba abeeziriki omu buheereza bwaitu n’omu kuramya.—2 Kor. 5:14, 15.

14. Ni bintu ki birungi ebi turikubaasa kukora kworeka ngu nitusiima Yehova na Yesu? (Reeba n’ebishushani.)

¹⁴ Omuringo murungi gumwe oku turikworeka ngu nitusiima Ruhanga n’Omwana we n’okuteeraho kuhwera abandi kuhinduka Abajurizi ba Yehova kandi abeegi ba Yesu. (Mat. 28:19, 20) Eki nikyo entumwa Paulo yaakozire kworeka ngu naasiima Ruhanga na Kristo. Akaba naamanya ngu Yehova  naayenda “abantu boona bajunwe, bamanyire kimwe amazima.” (1 Tim. 2:3, 4) Akakora munonga omu buheereza kuhwera baingi nk’oku yaabaire naabaasa, kugira ‘ngu omu miringo yoona abone kukiza bamwe.’—1 Kor. 9:22, 23.

15. Kurugiirira ahari Zaaburi 1:2, niki ekiratureetere kugira okushemererwa?

¹⁵ Omuhandiiki wa zaaburi y’okubanza akagira ngu omuntu oine okushemererwa kandi omusinguzi n’ogwo ‘orikushemererwa ebiragiro bya [Yehova]’ kandi ‘orikubiteekateekaho nyomushana na nyekiro.’ (Zab. 1:1-3) Joseph Rotherham omuvunuuzi omwe wa Baibuli arikugamba aha kyahandiikirwe eki, omu kitabo kye Studies in the Psalms, akagira ngu omuntu aine “kukunda obuhabuzi bwa Ruhanga, akabusherura, akabwega, kandi akamara obwire naabuteekateekaho.” Akoongyeraho ati: “Eizooba ryarenga omuntu atashomire Baibuli niriba ryafabusha.” Noobaasa kutunga okushemererwa orikushoma Baibuli waateeraho kwetegyereza omu bwijwire ebirimu kandi okareeba oku biine akakwate. Ka nikireeta okushemererwa waayetegyereza gye Ekigambo kya Ruhanga!

16. Nituza kugamba ahari ki omu kicweka ekirikukurataho?

¹⁶ Amazima g’omuhendo agari omu Baibuli agu Yehova arikutwegyesa nitubaasa kugetegyereza. Omu kicweka ekirikukurataho nituza kugamba aha mazima agagumire, niyo hekalu ya Yehova ey’eby’omwoyo, ei Paulo yaagambireho omu baruha ei yaahandiikiire Abakristaayo Abaheburaayo. Twine amatsiko ngu noija kushemererwa orikwega amazima ago.