1. Ni biconco ki ebimwe ebi Yesu atuhaire?

 TIHARIHO omuntu oraabaire efura nka Yesu. Obu yaabaire ari omu nsi, akakora eby’okutangaaza kuhwera abandi. (Luk. 9:​12-17) Akatuha ekiconco ekirikukirayo obu yaahayo amagara ge ahabwaitu. (Yoh. 15:13) Yesu ku yaazookire akagumizamu ari efura. Nk’oku yaaraganiise, akashaba Yehova kutuha omwoyo gwe ogurikwera kutwegyesa, n’okutuhuumuriza. (Yoh. 14:​16, 17; 16:13) Kandi kurabira omu nteerane z’ekibiina, naagumizamu kututendeka kuhindura abantu abeegi omu nsi yoona.—Mat. 28:​18-20.

2. Ni baahi abarikugambwaho omu Abaefeso 4:​7, 8 ‘nk’ebiconco’ omu bantu?

² Teekateeka aha kiconco ekindi eki Yesu yaatuhaire. Bwanyima ya Yesu kuza omu iguru, entumwa Paulo akagira ngu ahaire “ebiconco” omu bantu. (Shoma Abaefeso 4:​7, 8.) Paulo akashoboorora ngu Yesu akatuha ebiconco ebyo kuhwera ekibiina omu miringo etari emwe. (Efe. 1:​22, 23; 4:​11-13) Obunaku obu, “ebiconco” ebi nibitwariramu abaheereza, abareeberezi, n’abareeberezi ba saketi. a Abashaija abo tibahikiirire, n’ahabw’ekyo nibakora enshobe. (Yak. 3:2) Kwonka Mukama waitu Yesu Kristo abatuhaire kutuhwera.

3. Yoreka oku twena turikubaasa kushagika “ebiconco” omu bantu.

 ³ Yesu akaha abashaija abo obujunaanizibwa bw’okuhamya ekibiina. (Efe. 4:12) Kwonka naitwe nitubaasa kubahwera kuhikiiriza obujunaanizibwa bukuru obwo. Nk’eky’okureeberaho, abamwe omuriitwe nitwejumba omu kwombeka Ekyombeko ky’Obukama. Abandi nibashagika omurimo barikuhayo eby’okurya, eby’engyenda, nari obuhwezi obundi. Twena nitubaasa kushagika abaheereza, abareeberezi, n’abareeberezi ba saketi omu bigambo n’omu bikorwa. Ka tureebe oku turikugasirwa omu kukora n’amaani kwabo, n’oku turikubaasa kworeka ngu nitubasiima, kandi nitusiima Yesu ahabw’okutuha “ebiconco” ebyo omu bantu.

ABAHEEREZA NIBAHWERA

4. Abaheereza omu kyasha ky’okubanza bakaba nibahwera bata?

⁴ Omu kyasha ky’okubanza, ab’eishe-emwe abamwe bakaba nibatooranwa kuba abaheereza. (1 Tim. 3:8) Nikireebeka nibo Paulo yaagambireho abaabaire nibakora ‘nk’abahwezi.’ (1 Kor. 12:28) Abaheereza bakaba baine eby’okukora bingi kugira ngu abareeberezi babaase kuta omutima aha kwegyesa, n’okugumya ekibiina. Nk’eky’okureeberaho, abaheereza nibabaasa kuba baahweraire omu kukopoorora Ebyahandiikirwe, nari kugura eby’okukoresa omurimo ogwo.

5. Abaheereza nibahwera mu miringo ki obunaku obu?

⁵ Teekateeka aha mirimo mikuru ei abaheereza barikukora omu kibiina kyanyu. (1 Pet. 4:10) Nibabaasa kuba baine obujunaanizibwa bw’okukora aha mbaririra y’ekibiina, nari ebicweka by’okubuuriramu, kushaba ebitabo n’okubiha ababuurizi, kukora aha byoma by’amaraka na vidiyo, kwakiira abantu, nari kuhwera omu kureeberera Ekyombeko ky’Obukama. Ebyo byona nibyetengyesa ekibiina kubaasa kukora gye. (1 Kor. 14:40) Okwongyera ahari ekyo, abaheereza abamwe nibaheebwa ebicweka omu ruteerane rw’Obuheereza Bwaitu n’Oku Turikutwaza, kandi baha n’embazo za boona. Omuheereza naabaasa n’okutooranwa kuhwera orikwebembera guruupu y’okubuurira. Obumwe, abaheereza abarikuhikiiriza ebirikwetengyesa nibagyenda n’abareeberezi baaba nibaza kugumya ow’eishe-emwe omu kibiina.

6. Ni nshonga ki zimwe ahabw’enki nitusiima abaheereza abeeziriki?

⁶ Ebi abaheereza barikukora nibigasira bita ekibiina? Munyaanyazi-itwe Beberly, b owa Bolivia naagira ati: “Ninsiima munonga abaheereza ahabw’okugira ngu emirimo ei barikukora neembaasisa kugasirwa omu nteerane. Nimbaasa kweshongora, ngarukyemu, mpurikiize embazo, kandi ndeebe vidiyo n’ebishushani. Nibakora aha by’okwerinda, kandi bahwera n’abarikugirira enteerane aha zoom. Bwanyima y’oruteerane, nibahwera omu kuboneza, omu by’esente, kandi nibahamya ngu hariho ebitabo ebi turikwenda. Buzima nimbasiima munonga!” Leslie orikutuura Colombia ou iba ari omureeberezi naagira ati: “Ibanyi naahwerwa abaheereza kuhikiiriza obujunaanizibwa bwe butari bumwe. Kuri batariho, akaabaire aine bingi munonga by’okukora, n’ahabw’ekyo nimbasiima ahabw’okukora n’omuhimbo, kandi beekundiire.” Naiwe nikwo orikwehurira?—1 Tim. 3:13.

7. Nitubaasa kworeka tuta ngu nitusiima abaheereza? (Reeba n’ekishushani.)

⁷ N’obu turaabe nitusiima abaheereza, Baibuli neetuhiga kworeka ngu nitubasiima. (Kol. 3:15) Krzysztof, omureeberezi omuri Finland, naayoreka okusiima kwe ati:  “Nimboheerereza kaada nari obutumwa burimu ekyahandiikirwe, kandi nyoreka butunu oku omuheereza agumize, nari ahabw’enki ninsiima ebi arikukora.” Pascal na Jael, abarikutuura omuri New Caledonia, nibakira kushabira abaheereza. Pascal naashoboorora ati: “Ebiro ebi, okushaba kwaitu, okweshengyereza kwaitu, n’okusiima nikukwata aha baheereza abatoorainwe omu kibiina.” Yehova naahurira okushaba nk’okwo, kandi ekibiina kyona nikigasirwa.—2 Kor. 1:11.

ABAREEBEREZI NIBAKORA MUNONGA

8. Ahabw’enki Paulo yaagizire ngu abareeberezi omu kyasha ky’okubanza bakaba ‘nibakora’ munonga? (1 Abatesalonika 5:​12, 13)

⁸ Abareeberezi omu kyasha ky’okubanza bakaba nibakora munonga omu kibiina. (Shoma 1 Abatesalonika 5:​12, 13; 1 Tim. 5:17) Bakaba nibareeberera ekibiina, barikwebembera enteerane, kandi barikucwamu hamwe nk’akakiiko k’abareeberezi. Kubaasa kurinda ekibiina, bakaba ‘nibahabura’ ab’eishe-emwe na banyaanyazi-itwe butunu, kwonka omu muringo gwa rukundo. (1 Tes. 2:​11, 12; 2 Tim. 4:2) Ab’eishe-emwe abo bakaba bakora munonga kureeberera amaka gaabo, n’okuhamya omukago gwabo na Yehova.—1 Tim. 3:​2, 4; Tit. 1:​6-9.

9. Ni bujunaanizibwa ki bumwe obu abareeberezi baine?

⁹ Abareeberezi obunaku obu baine bingi by’okukora. N’ababuurizi b’amakuru marungi. (2 Tim. 4:5) Nibateeraho abandi eky’okureeberaho kirungi ky’okubuurira n’obweziriki, nibeebembera omurimo gw’okubuurira omu kicweka kyabo, kandi nibatendeka abandi kubuurira gye, n’okwegyesa gye. N’abacwi b’emanja abanyambabazi, abatarikugwera rubaju. Omukristaayo yaakora ekibi ky’amaani, abareeberezi nibateeraho kumuhwera kugaruraho omukago gwe na Yehova. Kandi, nibateeraho kurinda ekibiina kuguma kishemeire. (1 Kor. 5:​12, 13; Gal. 6:1) Ekikuru munonga, abareeberezi nibamanywa nk’abariisa. (1 Pet. 5:​1-3) Nibatebeekanisa gye embazo ezi barikuha ezirikwegamira aha Byahandiikirwe, nibafayo kumanya buri omwe ori omu kibiina, kandi nibataayaayira ab’eishe-emwe kubagumya. Abareeberezi abamwe nibahwera omu kwombeka Ebyombeko by’Obukama n’okubireeberera, nibatebeekanisiza enteerane empango z’ebiro bishatu, nibakora aha Bukiiko Oburikuhikaanisa Abarwaire n’Eirwariro na Guruupu z’Okutaayaayira Abarwaire, kandi baine n’obujunaanizibwa obundi. Buzima abareeberezi nibakora munonga.

10. Ni nshonga ki zimwe ezirikutureetera kusiima abareeberezi baitu abarikukora munonga?

¹⁰ Yehova akaraganisa ngu abariisa nibaija kutureeberera gye, kandi ngu tituraagaruke ‘kutiina bundi n’obu kwakuba okuhahaaza omutima.’ (Yer. 23:4) Ekyo nikyo munyaanyazi-itwe Johanna owa Finland yaayetegyereize, obu nyina yaarwara endwara y’amaani. Naagira ati: “N’obu ndaabe ningumirwa kugambira abandi enyehurira zangye, omureeberezi ou naabaire ntarikumanya gye akampurikiza, yaashaba naanye, kandi yaampamiza ngu Yehova naankunda. Tindikwijuka byenyini ebi yaagambire, kwonka ninyijuka ngu nkehurira gye. Nimpamiza kimwe ngu Yehova akamwohereza kumpwera omu bwire obuhikire.” Abareeberezi omu kibiina kyawe bakuhweraire bata?

11. Nitubaasa kworeka tuta ngu nitusiima abareeberezi? (Reeba n’ekishushani.)

¹¹ Yehova naayenda ngu tworekye ngu nitusiima abareeberezi twihire aha mutima “ahabw’omurimo gwabo.” (1 Tes. 5:​12, 13) Henrietta, orikutuura omuri Finland, naagira ati: “Abareeberezi nibahwera abandi beekundiire, kwonka ekyo tikirikumanyisa ngu baine  obwire n’amaani ebirikukira ebyaitu nari ngu tibarikuhikwaho oburemeezi. Obumwe nimbangira nti: ‘Buzima muri abareeberezi barungi. Kandi naimwe ekyo nimukimanya.’” Munyaanyazi-itwe Sera owa Türkiye c naagira ati: “Abareeberezi baine kugumibwa kubaasa kugumizamu nibaheereza. N’ahabw’ekyo nitubaasa kubahandiikira kaada, tubeete kurya nabo, nari tubashagike omu kubuurira.” Hariho omureeberezi ou orikwenda kusiima ahabw’okukora munonga omu kibiina? Sherura oburyo bw’okworeka ngu noomusiima.—1 Kor. 16:18.

ABAREEBEREZI BA SAKETI NIBAGUMYA EBIBIINA

12. Ni ntebeekanisa ki eyaaretaire ebibiina kuhama omu kyasha ky’okubanza? (1 Abatesalonika 2:​7, 8)

¹² Yesu Kristo akaha ebibiina “ebiconco” omu bantu abarikuheereza omu muringo ogundi. Ahabw’obuhwezi bwe, abareeberezi omuri Yerusaalemu bakoohereza Paulo, Barunaba, n’abandi kutaayaayira ebibiina. (Byak. 11:22) Ahabw’enki? Kugira ngu bagumye ebibiina. (Byak. 15:​40, 41) Abashaija abo bakefeerereza, kandi baata amagara gaabo omu kabi kwegyesa n’okugumya abandi.—Shoma 1 Abatesalonika 2:​7, 8.

13. Abareeberezi ba saketi baine bujunaanizibwa ki?

¹³ Abareeberezi ba saketi nibaba nibagyenda butoosha. Abamwe nibagyenda engyendo ndaingwa kutaayaayira ebibiina. Buri saabiiti nibaha embazo, bataayaayira abandi kubagumya, beebembera oruteerane rwa baapayoniya, orw’abareeberezi, n’enteerane z’okubuurira. Omureeberezi wa saketi naatebeekanisa embazo kandi areeberera enteerane za saketi, n’ez’ebiro bishatu. Naayegyesa omu ishomero rya baapayoniya, atebeekanisa oruteerane rw’omutaano orwa  baapayoniya omu saketi, kandi ahikiiriza n’obujunaanizibwa bukuru obundi, obu ofiisi y’eitaagi erikumuha.

14. Ni nshonga ki ezirikutureetera kusiima abareeberezi baitu ba saketi abarikukora munonga?

¹⁴ Ebibiina nibigasirwa bita omu murimo gw’omuhendo ogw’abareeberezi ba saketi? Ow’eishe-emwe kuruga Türkiye naagamba aha kutaayaaya kw’omureeberezi wa saketi ati: “Okutaayaaya kwabo nikumpiga kwongyera aha bwire obu ndikumara nimpwera ab’eishe-emwe na banyaanyazi. Mbaasize kuba n’abareeberezi ba saketi baingi, kwonka tihariho n’omwe aharibo oroorekire ngu aine bingi by’okukora nari ngu tarikubaasa kugamba naanye.” Johanna, owaaba yaagambirweho, akabuurira n’omureeberezi wa saketi, kwonka tihaine ou baashangire omu ka. Naagira ati: Kwonka nabwo niinkijuka izooba eryo. Barumuna bangye babiri bakaba bafurukire, kandi nkaba mbainiire orushusho rwingi. Omureeberezi wa saketi akangumya, kandi yaampwera kwetegyereza ngu nitubaasa kutatuura haihi n’abanyabuzaare baitu twaba nituheereza Yehova, kwonka omu nsi ensya nitwija kuguma nabo obwire bwona.” Baingi ahariitwe nitwijuka ebirungi bingi ebi abareeberezi ba saketi batukoreire.—Byak. 20:37–21:1.

15. (a) Kuhikaana n’ebiri omu 3 Yohaana 5-8, nitubaasa kworeka tuta ngu nitusiima abareeberezi ba saketi? (Reeba n’ekishushani.) (b) Ahabw’enki tushemereire kusiima abakazi baabo, kandi nitubaasa kukikora tuta? (Reeba akabokusi “ Ijuka Abakazi Baabo.”)

¹⁵ Entumwa Yohaana akahiga Gaayo kworeka obufura ab’eishe-emwe abaabaire nibabataayaayira, kandi ‘bakabaraga gye omu rugyendo rwabo omu muringo ogurikusiimisa Ruhanga.’ (Shoma 3 Yohaana 5-8.) Omuringo gumwe oku turikubaasa kukora ekyo n’okweta omureeberezi wa saketi kurya nawe.  Omuringo ogundi n’okushagika entebeekanisa z’okubuurira yaaba ataayaayiire ekibiina kyaitu. Leslie, owaaba yaagambirweho, naayoreka okusiima kwe omu miringo endiijo. Naagira ati: “Ninshaba Yehova kuha abareeberezi ba saketi ebi barikwenda. Kandi, nyowe na ibanyi nitubahandiikira amabaruha, tubagambira oku okutaayaaya kwabo kutugasiire.” Ijuka ngu, abareeberezi ba saketi nabo baine oburemeezi nkaitwe. Obumwe nibarwara, beerarikirira, kandi bahwamu amaani. Waakoresa ebigambo by’embabazi, nari okamuha ekiconco kikye, nikibaasa kuba eky’okugarukamu ky’okushaba kwe.—Enf. 12:25.

EBICONCO OMU BANTU NIBYETENGYESA

16. Okuhikaana n’ebiri omu Enfumu 3:​27, ab’eishe-emwe nibabaasa kwebuuza ki?

¹⁶ Omu nsi yoona, ab’eishe-emwe baingi nibeetengyesa kuheereza ‘nk’ebiconco’ omu bantu. Waaba ori ow’eishe-emwe obatiziibwe, noobaasa kuhwera omu muringo ogwo? (Shoma Enfumu 3:27.) Nooteeraho kuhikiiriza ebirikwetengyesa kuba omuheereza? Ku oraabe ori omuheereza nookora n’amaani kuba omureeberezi? d Noobaasa kukora empinduka kugira ngu oze omu Ishomero ry’Ababuurizi b’Obukama? Eishomero niriija kukutendeka, kandi rikuhwere kwongyera kukoresibwa Yesu. Waaba nooyehurira nk’otarikubaasa, shaba Yehova. Mushabe kukuha omwoyo gwe gurikwera kukuhwera kuhikiiriza gye obujunaanizibwa bwona obu oraaheebwe .—Luk. 11:13; Byak. 20:28.

17. “Ebiconco” omu bantu nibooreka ki aha Mugabe waitu, Kristo Yesu?

¹⁷ Ab’eishe-emwe abu Yesu atooraine kuba “ebiconco” omu bantu nibooreka ngu atwire naatwebembera n’omu biro by’emperu ebi. (Mat. 28:20) Buzima twine okushemererwa kwingi ahabw’okugira ngu twine Omugabe oine rukundo, efura, orikufayo, kandi orikutuha ab’eishe-emwe kutuhwera. N’ahabw’ekyo sherura oburyo bw’okworeka ngu noosiima abashaija abo abarikukora n’amaani. Kandi oteebwa kusiima Yehova obukomooko ‘bw’engabirano yoona enungi n’ekiconco kyona ekihikire.’—Yak. 1:17.