Ekisasi niho omuntu yaabaire ataahiramu arikuza Aharikwera omu hekalu. Kurugiirira aha Baibuli ya New World Translation of the Holy Scriptures eyaashohoziibwe 2023 gutakahikire, “ekisasi eky’omu maisho ga hekalu kikaba kiri mikono makumi abiri oburaingwa, nibwingana n’obukiika bwa hekalu, kandi obwemi bwakyo bukaba buri mikono igana na makumi abiri.” (2 Bus. 3:4) Envunuura ezindi nizooreka ngu obwemi bw’ekisasi bukaba buri “mikono 120”, ekirikumanyisa ngu gukaba guri omunaara gwa mita 53 (fuuti 175).

Kwonka, Baibuli eya New World Translation eyaateirwe 2023 neeyoreka ngu ekisasi kya hekalu ya Sulemaani, “obwemi bwayo bukaba buri mikono makumi abiri,” nari shi mita 9 (fuuti 30). a Yetegyereze enshonga zimwe ahabw’enki empinduka ezi zikozirwe.

Obwemi bw’ekisasi tiburikugambwaho omu 1 Abagabe 6:3. Omu mushororongo ogu, Yeremia akahandiika aha buraingwa bw’obukiizi n’obw’okuzimu obw’ekisasi, beitu butari bwemi bwakyo. Reero omu shuura erikukurataho, akagamba omu bwijwire aha bicweka ebindi ebya hekalu, otwariiremu ekitanka ky’amaizi ekikozirwe omu miringa eyagiibwe, yaakora ebitebe ikumi, n’enyomyo ibiri z’emiringa ezaabaire ziri omu maisho g’ekisasi. (1 Bag. 7:​15-37) Mbwenu shi obwemi bw’ekisasi ku buraabe bwabaire niburenga mita 50, kandi kirikukira hekalu obwemi, ahabw’enki Yeremia atarabugambireho? Bwanyima y’emyaka mingi, abahandiiki Abayudaaya bakagira ngu ekisasi kikaba kitarikukira hekalu ya Sulemaani obwemi.

Abacondooza nibabangaanisa yaaba ebisiika bya hekalu byabaire nibibaasa kubangira ekisasi ky’obwemi mikono 120. Ira, ebisiika biraingwa ebi baabaire bombekyesa amabaare n’amatafaari, nk’endembo za hekalu omuri Misri, bikaba biine omusingi muhango, kwonka biri bikye aha mutwe. Kwonka hekalu ya Sulemaani ekaba eri ey’omutaano. Abacondooza nibagira ngu ebisiika byayo bikaba bitarikurenzya obuhango bwa mikono 6 nari mita 2.7 (fuuti 9). Omunyabyafaayo w’eby’okwombeka Theodor Busink akagira ati: “Kurugiirira aha buhango bw’ekisiika kya hekalu [ah’okutaahiramu], ekisasi tikirikubaasa kuba kyabaire kiine obwemi bwa mikono 120.”

Ebiri omu 2 Obusingye 3:4 nibibaasa kuba bitarakoporoirwe gye. N’obu ebihandiiko bimwe ebya ira birimu mikono “120” omu mushororongo ogu, ebihandiiko ebindi nka, the fifth-century Codex Alexandrinus na the sixth-century Codex Ambrosianus, birimu “mikono 20.” Mbwenu shi ahabw’enki omuhandiiki arikubaasa kuba yaakozire enshobe akahandiika “120”? Omu Ruheburaayo ekigambo “igana” na “mikono” nibishushana. N’ahabw’ekyo omuhandiiki naabaasa kuba yaahandiikire “igana” omu mwanya gwa “mikono.”

Kwonka, n’obu turaabe nituteeraho kwetegyereza gye obushonshorekye obu, n’ebirikukwata ahari hekalu ya Sulemaani, omutima nituguta ahari hekalu enkuru ey’eby’omwoyo ei hekalu egyo yaabaire neejwekyera. Ka nitwesiima ahabw’okugira ngu Yehova naayeta abaheereza be boona kumuheereza omu hekalu egi!—Heb. 9:​11-14; Kush. 3:12; 7:​9-17.