ABAISRAELI bakaba nibakunda munonga okweshongora. Baibuli neegamba aha byeshongoro bitari bimwe eby’amaraka gonka, n’eby’amaraka g’enanga, ebi baabaire beeshongora. Nangwa, kimwe kya ikumi ky’Ebyahandiikirwe n’ebyeshongoro, ebingi biri omu kitabo kya Zaaburi, Ekyeshongoro kya Sulemaani, n’eky’Okutonzya. Ekitabo Music in Biblical Life nikigira ngu Baibuli “neeyoreka gye ngu Abaisraeli bakaba nibakoresa munonga ebyeshongoro n’omu mbeera za butoosha.”

Okweshongora omu mbeera za butoosha. Abaisraeli bakaba bateera ebyeshongoro kandi beeshongora. (Isa. 30:29) Abakazi bakaba bateera ebitaasa, beeshongora bashemereirwe, kandi bazina aha kwemekwa kw’omugabe, aha magyenyi, na baasingura engamba. (Bar. 11:34; 1 Sam. 18:​6, 7; 1 Bag. 1:​39, 40) Kandi Abaisraeli bakaba beeshongora ebyeshongoro by’okutonzya barikuganya. (2 Bus. 35:25) Buzima, “Abaheburaayo bakaba bari abantu abarikukunda kweshongora,”nikwo ekitabo McClintock and Strong’s Cyclopedia kirikugira.

Okweshongora omu kikaari ky’omugabe. Abagabe ba Israeli bakaba nibakunda ebyeshongoro. Omugabe Saulo akeeta Daudi omu kikaari kye kumweshongorera. (1 Sam. 16:​18, 23) Bwanyima, Daudi ku yaabaire omugabe, akakora eby’okukoresa omu kweshongora, yaahimba ebyeshongoro, kandi yaatebeekanisa abeeshongozi kweshongora aha hekalu ya Yehova. (2 Bus. 7:6; Amo. 6:5) Omugabe Sulemaani akaba aine abashaija n’abakazi abaabaire nibeeshongora omu kikaari kye.—Mub. 2:8.

Okweshongora omu kuramya. Okukira munonga, Abaisraeli bakaba nibakoresa ebyeshongoro omu kuramya Yehova. Nangwa, abeeshongozi 4,000 bakaba nibeeshongora aha hekalu omuri Yerusaalemu. (1 Bus. 23:5) Bakaba bateera ebitaasa, enanga, endingiri, n’amakondere. (2 Bus. 5:12) Kwonka tibo bonka abaabaire nibaramya Yehova barikweshongora. Abaisraeli baingi bakaba beeshongora barikwambuka Yerusaalemu aha bugyenyi bwa buri mwaka. (Zab. 120-134) Kandi kurugiirira aha bihandiiko by’Ekiyudaaya, Abaisraeli bakaba nibeeshongora Zaaburi za Hallel  a aha bugyenyi bw’Okuhinguraho.

N’obunaku obu, okweshongora ni kukuru aha baheereza ba Ruhanga. (Yak. 5:13) Okweshongora n’ekicweka ky’okuramya kwaitu. (Efe. 5:19) Nikutureetera kugira obumwe n’Abakristaayo bagyenzi baitu. (Kol. 3:16) Kandi nikutugumya twaba twine oburemeezi. (Byak. 16:25) Okweshongora n’omuringo murungi oku turikworeka okwikiriza kwaitu omuri Yehova na rukundo ei tumwiniire.