1, 2. Ni kugyemeserezibwa ki oku abato baine obunaku obu, kandi nibabaasa kukusingura bata?

MUNYAANYAZI-ITWE omuto kuruga Britain, mugyenzi we aha ishomero akamugira ati: “Nooreebeka nk’orikwetegyereza munonga otashemereire kwikiririza omuri Ruhanga.” Ow’eishe-emwe omuri Germany akahandiika ati: “Abashomesa bangye nibatwara ebi Baibuli erikugamba aha kuhangwa nk’ebitebyo kwonka. Kandi nibakireeba nk’ekitaine nshonga abeegi kwikiririza ngu ebintu bikabaho birikuruga omu bindi.” Munyaanyazi-itwe omuto omuri France akagira ati: “Abashomesa aha ishomero nibatangaara kumanya ngu hariho abeegi abamwe abarikwikiririza omu Baibuli.”

² Waaba ori omuheereza wa Yehova omuto nari orikwega ahari Yehova, noogyemeserezibwa kwikiriza enyikiriza z’obunaku obu, nk’okugira ngu ebintu bikaruga omu bindi, omu mwanya gw’okwikiririza omu Muhangi? Kyaba kiri kityo, hariho ebintu ebi orikubaasa kukora kuhamya okwikiriza kwawe kandi kukaguma kuhami. Eky’okubanza n’okukoresa okubaasa kwawe kw’okuteekateeka oku Ruhanga yaakuhaire ‘okurikwija kukurinda.’ Nikwija kukurinda enyegyesa z’abantu ezirikubaasa kushiisha okwikiriza kwawe.​—Shoma Enfumu 2:10-12.

3. Nituza kushwijuma ki omu kicweka eki?

 ³ Okwikiriza okuhikire nikwegamira aha kumanya Ruhanga. (1 Tim. 2:4) N’ahabw’ekyo, waaba nooshoma Ekigambo kya Ruhanga n’ebitabo byaitu, teeraho kwetegyereza ebi orikushoma. Koresa okubaasa kwawe kw’okuteekateeka ‘kumanya’ ebi orikushoma. (Mat. 13:23) Ka twetegyereze oku okukora ekyo kirikubaasa kukuhwera kwongyera kwikiririza omuri Ruhanga na Baibuli, kandi enshonga ezi ziine ‘obuhame’ bwingi.​—Heb. 11:1.

4. Ahabw’enki okwikiriza ngu hariho Ruhanga nari ngu ebintu bikaruga omu bindi nikyetengyesa okwikiriza, kandi niheetengyesa ki kutunga obuhame?

⁴ Mbwenu shi abantu bakugambiire ngu nibaikiriza ngu ebintu bikabaho birikuruga omu bindi ahabw’okugira ngu enyegyesa egyo neeyegamira aha sayansi kandi ngu okugira ngu hariho Ruhanga nikwegamira aha kwikiriza? Baingi nibateekateeka batyo. Kwonka ni kirungi kwijuka eki: Yaaba omuntu naikiririza omuri Ruhanga nari ngu ebintu bikaruga omu bindi, byombi nibyetengyesa okwikiriza. Mu muringo ki? Tihaine orareebire Ruhanga nari orareebire ekintu nikihangwa. (Yoh. 1:18) Kandi tihaine omuntu n’obu yaakuba omunyasaayansi orareebire ekintu nikirugamu ekintu eky’omuringo ogundi. Nk’eky’okureeberaho, tihaine orareebire enjoka n’erugamu ekicuncu. (Yob. 38:1, 4) Kwonka, twine kushwijuma obuhame kandi tukakoresa okubaasa kwaitu kw’okuteekateeka kuhika aha kihikire. Entumwa Paulo akahandiika aha bihangirwe ati: “Okuruga aha kuhangwa kw’ensi ebya Ruhanga ebitareebwa eby’obushoboorozi bwe obutahwaho, n’obwaruhanga bwe, bikareebekyera kimwe, nibimanyirwa aha bi yaahangire; n’ahabw’ekyo tibaine ky’okwekwatsa.”​—Rom. 1:20.

5. Abaheereza ba Ruhanga tuhwereirwe tuta kukoresa okubaasa kwaitu kw’okwetegyereza?

⁵ ‘Okumanya’ nikimanyisa okwetegyereza ekintu ekitarikureebwa butunu. (Heb. 11:3) N’ahabw’ekyo, abantu abarikumanya ekintu, nibakoresa obwengye bwabo, beitu gatari maisho na matu gaabo byonka. Ekibiina kya Yehova kituhaire eby’okukoresa bingi kutuhwera omu kucoondoza. Ebi nibitubaasisa kureeba Omuhangi waitu turikukoresa amaisho gaitu ag’okwikiriza. (Heb. 11:27) Ebikoreso ebi nibitwariramu vidiyo The Wonders of Creation Reveal God’s  Glory, obutabo Was Life Created? na The Origin of Life—Five Questions Worth Asking, na Is There a Creator Who Cares About You? Kandi nitutunga n’eby’okurya by’omwoyo eby’okuteekateekaho kurabira omu magaziini zaitu. Awake! etwiire neyiziramu eby’okureeberaho by’abanyasayansi n’abandi abarikushoboorora ahabw’enki hati nibaikiririza omuri Ruhanga. Ebicweka ebirikwizira ahansi y’omutwe “Kikahangwa?” nibyoreka ebihangirwe bitari bimwe na bimwe ebirikutangaaza. Abanyasayansi nibateeraho kukora ebirikushushana n’ebihangirwe ebi.

6. Okukoresa ebituhairwe harimu birungi ki, kandi iwe ogasiirwe ota?

⁶ Ow’eishe-emwe ow’emyaka 19 omuri United States akagamba aha butabo bubiri obwagambwaho ati: “Bumpwereire munonga. Nshomire obutabo obu emirundi mingi.” Munyaanyazi-itwe kuruga France akahandiika ati: “Ebicweka ebiri ahansi y’omutwe ‘Kikahangwa?’ nibinshemeza munonga! Nibyoreka ngu abahangu rugambwa nibabaasa kutooreza, kwonka tibarikubaasa kuhika aha miringo yenyini ei ebintu bihangirwemu.” Abazaire b’omwishiki w’emyaka 15 y’obukuru omuri South Africa bakagira bati: “Ekintu eki muhara waitu arikubanza kushoma omu Awake! n’ebicweka ebirikukwata aha bantu abarikubuuzibwa.” Kandi shi iwe? Mbwenu shi nookoresa gye ebintu ebi ebituhairwe? Nibibaasa kukuhwera kugira okwikiriza okuhamire nk’omuti ogwine emizi miraingwa. Omu muringo ogwo, okwikiriza kwawe nikwija kukuhwera kusingura enyegyesa zigwire.​—Yer. 17:5-8.

7. Ahabw’enki Ruhanga naayenda ngu tutaanise ekirungi n’ekibi?

⁷ Mbwenu shi kigwire kubuuza ebibuuzo ebirikukwata aha Baibuli? Ngaaha buzima! Yehova naayenda ngu okorese obushoboorozi bwawe ‘bw’okutaanisa’ kuhamya ngu ebi orikwikiriza n’amazima. Tarikwenda ngu oikirize ahabw’okugira ngu abandi nibaikiriza. N’ahabw’ekyo koresa okubaasa kwawe kw’okuteekateeka kutunga okumanya okuhikire. Reero okwikiriza kwawe nikwija kwegamira aha kumanya okwo. (Shoma Abaheburaayo 5:14; 1 Timoseo 2:4.) Omuringo gumwe gw’okutunga okumanya okwo n’okurabira omu kweyegyesa.

8, 9. (a) Abamwe nibabaasa kukunda kwega ahari ki? (b) Abandi bagasiirwe bata omu kuteekateeka aha bi barikwegaho?

⁸ Abamwe nibakunda kwega aha bunabi bwa Baibuli. Nari nibabaasa kwenda kugyeragyeranisa ebiri omu Baibuli n’ebyafaayo, ebizoirwe omu itaaka, n’oku birikuhikaana na sayansi. Bumwe aha bunabi oburikushemeza obw’okucondoozaho n’oburi omu Okutandika 3:15. Ekyahandiikirwe ekyo nikyoreka obutumwa bukuru oburikushangwa omu Baibuli, okumanya ngu Ruhanga niwe ahikire kutegyeka byona n’okweza eiziina rye arikukoresa Obukama bwe. Omushororongo ogu nigukoresa orurimi rw’akamanyiso, kworeka oku Yehova araamareho okubonabona kwona oku abantu batwiremu kuruga omu Edeni. Noobaasa kwega ota ebiri omu Okutandika 3:15? Noobaasa kuhandiika ebyahandiikirwe ebirikworeka oku Ruhanga mporampora ayorekire abantu abarikugambwaho omu kyahandiikirwe ekyo n’entebeekanisa hamwe n’obuhame oburikworeka ngu obunabi obwo nibwija kuhikiirira. Bwanyima noobaasa kucondooza obu ebyahandiikirwe byahandiikwa kandi obikuratanise. Waareeba oku ebyahandiikirwe ebyo birikuhikaana, buzima noija kwikiriza ngu obunabi bwa Baibuli n’abaabuhandiikire bakahwerwa omwoyo gurikwera.​—2 Pet. 1:21.

⁹ Ow’eishe-emwe kuruga Germany akateekateeka aha ku buri kitabo kya Baibuli kirikushoboorora aha Bukama, reero yaagira ati: “Buzima nikwo kiri, n’obu abashaija 40 baraabe nibo baahandiikire Baibuli. Baingi bakabaho omu bunaku butarikushushana kandi buri omwe atarikumanya mugyenzi we.” Munyaanyazi-itwe kuruga Australia akashemezibwa ekicweka ekiri omu Omunaara gw’Omurinzi ogwa Desemba 1, 2013,  ekyabaire nikishoboorora amakuru g’Okuhingurwaho. Omukoro mukuru ogwo gwine akakwate n’ebiri omu Okutandika 3:15 n’okwija kwa Mesia. Naagira ati: “Ekicweka ekyo kikampwera kureeba oku Yehova ari murungi.” Okumanya entebeekanisa y’Abaisraeli egi n’oku yaahikiririire omuri Yesu buzima kikanshemeza. Nkemereramu naateekateeka aha ku ekiihuro ky’Okuhingurwaho ekyo kyabaire kiri eky’omutaano!” Ahabw’enki munyaanyazi-itwe yaayehuriire atyo? Akateekateeka munonga aha bi yaabaire naashoma kandi ‘yaabimanya.’ Eki kikamuhwera kuhamya okwikiriza kwe n’okwirira haihi na Yehova.​—Mat. 13:23.

10. Obwesigwa bw’abaahandiikire Baibuli nibuhamya buta okwikiriza kwaitu omu bibahandiikire?

¹⁰ Ekindi eki twine ekirikubaasa kuhamya okwikiriza kwaitu n’obumanzi n’obwesigwa bw’abashaija abaahandiikire Baibuli. Abahandiiki baingi aba ira bakaba bahimbisiriza abeebembezi baabo n’obugabe bwabo. Kwonka, baanabi ba Yehova, bakaba bagamba amazima. Beekundiire bakaba bagamba aha nshobe z’abantu baabo, nangwa n’abagabe baabo. (2 Bus. 16:9, 10; 24:18-22) Kandi bakaba bagamba aha bweremwa bwabo nangwa n’obw’abaheereza ba Ruhanga abandi. (2 Sam. 12:1-14; Mak. 14:50) Ow’eishe-emwe omuto omuri Britain akagira ati: “Obwesigwa kw’obwo tiburikukira kureebwa. Eki nikyongyera aha buhame obu twine ngu Baibuli buzima ekaruga ahari Yehova.”

11. Abato nibabaasa kweyongyera bata kusiima obukuru bw’emisingye ya Baibuli?

¹¹ Ahabw’emisingye erikushangwa omu Baibuli, baingi nibahamya ngu buzima Ruhanga niwe yaahwereire abaagihandiikire. (Shoma Zaaburi 19:7-11.) Munyaanyazi-itwe omuto omuri Japan akahandiika ati: “Eka yaitu ku yaagyendeire aha nyegyesa za Baibuli, buzima tukashemererwa. Tukatunga obusingye, obumwe, na rukundo.” Emisingye ya Baibuli neeturinda kutejwanzya omu kuramya kw’ebishuba n’emigyenzo erikuhindura abantu baingi abahuuku. (Zab. 115:3-8) Mbwenu shi okwegyesa ngu tihariho Ruhanga nikikwata aha bandi? Enyegyesa nk’okugira ngu ebintu bikaruga omu bindi nizireetera abantu kuramya ebihangirwe, omu mwanya gw’okuramya Yehova wenka. Abo abarikugira ngu Ruhanga tariho nibaba nibooreka ngu ebiro byaitu by’omumaisho biri omu ngaro zaitu. Tibarikutuha matsiko aha biro by’omumaisho.​—Zab. 146:3, 4.

12, 13. Ni muringo ki omurungi ogw’okugaaniiramu n’abandi aha kuhangwa nari Baibuli?

¹² Noobaasa kuhikaanisa gye ota ebiteekateeko n’abandi aha kuhangwa na Baibuli? Eky’okubanza, otarahukiiriza kuteekateeka ngu noomanya ebi abandi barikwikiririza. Abantu abamwe nibagira ngu nibaikiriza ngu ebintu bikaruga omu bindi, kwonka nabwo nibamanya ngu Ruhanga ariho. Nibateekateeka ngu Ruhanga akareetera ebintu kurugamu ebindi eby’emiringo mingi. Abandi nibaikiriza ngu ebintu bikaruga omu bindi, barikugira ngu ku kitahikire tikyakubaire nikyegyesibwa aha ishomero. Kandi abamwe nibarekyera aho kwikiririza omu Ruhanga ahabw’okugira ngu nibaba batamirwe ediini. N’ahabw’ekyo waagaaniira n’omuntu aha ku ebiine amagara byatandikire, nikiba kiri eky’obwengye kubanza kubuuza ebibuuzo. Banza omanye eki omuntu arikwikiriza. Waaba oine emiteekateekyere mirungi kandi orikuhurikiza gye, noija kumuhiga kukuhurikiza.​—Tit. 3:2.

¹³ Omuntu yaayoreka ngu naayangira kimwe enyikiriza yaawe ey’okuhangwa, omu muringo murungi noobaasa kumuhiga kukushoboororera. Noobaasa kumubuuza akugambire oku ebiine amagara byabaireho hatariho Muhangi. Ebiine amagara kubaasa kugumaho, biine kuba nibizaara ebirikushushana nabyo reero bikakanya. Omuhangu omwe omu by’emibazi akagira ngu ekyo nikibaasa kwetengyesa (1) akahu akarikubirinda, (2) okutunga amaani g’eizooba bikagakoresa, (3) ebirikuhwera omu kukura  kw’ekintu n’endeebeka yaakyo, (4) n’amaani g’okwebaganisamu kurugamu ebindi. Akongyeraho ati: “Omuntu naabaasa kutangaazibwa n’obuhangwa bw’akantu kakye munonga akaine amagara.”

14. Noobaasa kukora ki waaba nooreeba ngu tokabaasize kugamba aha nyegyesa erikugira ngu ebintu bikaruga omu bindi nari aha kuhangwa?

¹⁴ Waaba nooteekateeka ngu toyeteekateekire kugamba aha nyegyesa erikugira ngu ebintu bikaruga omu bindi nari aha kuhangwa, noobaasa kukoresa enshoboorora eyorobi ei Paulo yaakoreise. Akahandiika ati: “Enju yoona eyombekwa omuntu nanka, kwonka Omwombeki w’ebintu byona ni Ruhanga.” (Heb. 3:4) Enshoboorora egyo ni nungi kandi neekora! Buzima ebihangirwe ebigumire kushoboorora kukira enju bishemereire kuba nibikomooka ahari ogwo oine obwengye bw’ahaiguru. Noobaasa n’okukoresa ebitabo ebirikushoboorora enshonga ezo. Munyaanyazi-itwe akakoresa obutabo bubiri obwagambwaho kuhwera omwojo owaabaire naagira ngu tihariho Ruhanga, kandi ngu ebintu bikaruga omu bindi. Hahingwireho nka saabiiti emwe, omutsigazi ogwo akagira ati: “Hati niinyikiriza ngu Ruhanga ariho.” Ekyarugiremu akatandika kwega Baibuli, kandi yaaba omwe aha b’eishe-emwe bagyenzi baitu.

15, 16. Noobaasa kuhindura ota omuringo ogu orikugaaniiramu n’abandi aha Baibuli, kandi nooba oine kigyendererwa ki?

¹⁵ Noobaasa kukoresa emisingye nk’egyo waagamba n’omuntu oine okubanganisa aha Baibuli. Manya eki arikwikiriza n’ebi arikukunda kugaaniiraho. (Enf. 18:13) Yaaba naakunda ebya sayansi, naabaasa kushemererwa waagamba enshonga ezirikworeka ngu Baibuli ehikire ku erikugamba aha sayansi. Abantu abandi nibabaasa kushemererwa baamanya ngu Baibuli erimu obunabi n’ebyafaayo ebihikire. Nari noobaasa kugamba aha misingye ya Baibuli erikuhabura, nk’egyo erikushangwa omu Rubazo orw’aha Rushozi.

¹⁶ Ijuka, ekigyendererwa kyawe n’eky’okuhika abantu aha mitima, beitu kutari kuhakana nabo. N’ahabw’ekyo hurikiza gye. Buuza gye ebibuuzo, kandi ogambe omu muringo ogurikworeka obucureezi n’ekitiinisa, na munonga waaba noogamba n’abarikukukira obukuru. Nibabaasa kuhurikiza ebi orikugamba. Nibaija n’okureeba ngu noocondooza munonga aha bi orikwikiriza. Kwonka ekyo abato baingi tibarikukikora. Kwonka kimanye ngu tikirikwetengyesa kugarukamu abo abataine miteekateekyere mirungi nari abarikutushungisa.​—Enf. 26:4.

17, 18. (a) Niki ekirikubaasa kukuhwera kuhindura amazima agaawe? (b) Nituza kushwijuma kibuuzo ki omu kicweka ekirikukurataho?

¹⁷ Okwikiriza okuhami nikukira aha kumanya ebiri omu Baibuli kwonka. N’ahabw’ekyo yeyongyere kushwijuma ebiri omu Baibuli, nk’orikusherura eky’eitungo ekisherekirwe. (Enf. 2:3-6) Koresa gye ebindi ebiriho omu rurimi rwawe, nka Watchtower Library eri aha DVD, Raiburare y’aha Intaneeti, na Watch Tower Publications Index nari Akatabo Akarikuhwera omu Kucondooza ak’Abajurizi ba Yehova. Kandi, gira ekigyendererwa ky’okushoma Baibuli yoona. Noobaasa kuteeraho kugishoma omu meezi 12. Okushoma Ekigambo kya Ruhanga nikwo kurikukirayo kwombeka okwikiriza. Omureeberezi orikutaayaayira ebibiina ku yaateekateekire aha bunyeeto bwe, akagira ati: “Ekintu kimwe ekyampwereire kumanya ngu Baibuli n’Ekigambo kya Ruhanga n’okugishoma yoona. Ebitebyo by’omu Baibuli ebi naabaire nyegire nkiri muto, ku naagishomire bikakora amakuru. Eki kimpwera kukura omu by’omwoyo.”

¹⁸ Abazaire nimukora kihango omu kuhwera abaana baanyu kutunguuka omu by’omwoyo. Nimubaasa kubahwera muta kugira okwikiriza kuhami? Ekicweka ekirikukurataho nikiza kugamba aha nshonga egyo.