1, 2. Abaheereza ba Yehova nibarwana na bintu ki ebigumire?

KURUGA ahari Abeeli kuhitsya na hati abaheereza ba Ruhanga abeesigwa batwire nibarwanirira okwikiriza kwabo. Entumwa Paulo akahandiikira Abakristaayo Abaheburaayo ngu bakaba bagumisiriize “engamba nyingi n’obusaasi,” obwo barikuteeraho kusiimwa Yehova n’okutunga omugisha gwe. (Heb. 10:32-34) Paulo akagyeragyeranisa obweziriki bw’Abakristaayo aha bw’abazaani omu mpaka z’Abagriika nk’okwiruka, okufukaana, n’okuteera entomi. (Heb. 12:1, 4) Obunaku obu, turi omu mpaka z’okutunga amagara, kandi twine abazigu abarikwenda kuturemesa kugira okushemererwa n’okwija kutunga ebihembo omu biro by’omumaisho.

² Abazigu baitu abarikukirayo abu turikurwanisa nari abu turikufukaana nabo, ni Sitaane n’ensi ye. (Efe. 6:12) Ni kikuru ngu twetantare kutwarwatwarwa ebintu by’ensi ebiri ‘nk’ebigo’ by’amaani. Ebi nibitwariramu enyegyesa zaayo, ebigunjano, n’ebikorwa by’akabi, nk’obushambani, okureetsa etaabe, n’okukoresa kubi amaarwa n’emibazi. Kandi twine kuguma niturwanisa obweremwa bw’emibiri yaitu n’okutamwa.​—2 Kor. 10:3-6; Kol. 3:5-9.

3. Yehova naatutendeka ata kurwanisa abazigu baitu?

 ³ Mbwenu shi nikibaasika kusingura abazigu abo ab’amaani? Eego, kwonka tikyorobi. Paulo akeegyeragyeranisa n’omuteezi w’entomi obu yaagira ati: “Nteera entomi, ti nk’orikuteera busha.” (1 Kor. 9:26) Nk’omuteezi w’entomi orikurwanisa ou arikurwana nawe, twine kurwanisa abazigu baitu. Yehova naatutendeka kandi naatuhwera omu kurwana kwaitu. Naatuha eby’okukuratira ebirikukiza amagara ebiri omu Kigambo kye. Kandi nabwo naatuhwera kurabira omu bitabo byaitu ebirikwegamira aha Baibuli, enteerane z’Ekikristaayo, n’enteerane empango. Mbwenu shi ebi orikwega omu nteerane ezo noobita omu nkora? Waaremwa kukikora, nooba ori “nk’orikuteera busha,” otarikuremesa omuzigu waawe omu bwijwire.

4. Nitwetantara tuta okusingurwa ekibi?

⁴ Abazigu baitu nibabaasa kututaahirira tutakimanyire nari twaba tutaine maani, n’ahabw’ekyo twine kuguma tweteekateekire. Baibuli neeturabura eti: “Otasingurwa ekibi, kureka ekibi okisinguze ekirungi.” (Rom. 12:21) Okugira ngu “otasingurwa ekibi” nikyoreka ngu nitubaasa kusingura ekibi. Nitubaasa kukisingura twaguma nitukirwanisa. Kwonka twarekyera aho kurwana, nitubaasa kusingurwa Sitaane, ensi ye embi, n’omubiri gwaitu omweremwa. Toshemereire kwikiriza Sitaane kukutiinatiinisa, reero emikono yaawe akatentebuka!​—1 Pet. 5:9.

5. (a) Niki ekirikubaasa kutuhwera omu kurwana kwaitu kutunga emigisha ya Ruhanga? (b) Nituza kureeba baahi abarikugambwaho omu Baibuli?

⁵ Kubaasa kusingura, twine kwijuka ahabw’enki niturwana. N’ahabw’ekyo kubaasa kusiimwa Ruhanga kandi akatuha omugisha, tushemereire kuguma tutaire omutima aha kuraganisibwa okuri omu Abaheburaayo 11:6: “Omuntu weena orikwija ahari Ruhanga, ashemereire kwikiriza ku ariho, kandi ku aha ebihembo abamusherura.” Okusherura Yehova nikimanyisa ngu twine kuteeraho kukora n’amaani twaba nitwenda ngu atusiime. (Byak. 15:17) Ebyahandiikirwe birimu abashaija n’abakazi abaateireho kurwana kutunga omugisha gwa Yehova. Yakobo, Rakeeli, Yosefu, na Paulo, bakaba bari omu mbeera zigumire, kwonka bakooreka ngu okugumizamu nibarwana nikurugamu emigisha mingi. Nitubaasa kutooreza tuta abaheereza ba Yehova aba bana?

6. Niki ekyahwereire Yakobo kuhamira aha ki arikwenda, kandi akagasirwa ata? (Reeba ekishushani aha kutandika.)

⁶ Omushaija omwesigwa Yakobo akarwana kandi yaagumisiriza ahabw’okuba akaba naakunda Yehova, arikukunda eby’omwoyo, kandi akaba naikiriza ngu Yehova naija kuha omugisha oruzaaro rwe. (Kut. 28:3, 4) Eki nikyoreka ahabw’enki Yakobo obu yaabaire aine emyaka nka 100 y’obukuru yaakozire kyona eki arikubaasa otwariiremu n’okufukaana na maraika wa Ruhanga kubaasa kutunga omugisha. (Shoma Okutandika 32:24-28.) Mbwenu shi Yakobo akaba naayesiga amaani ge omu kufukaana na maraika wa Ruhanga? Ngaaha buzima! Kwonka akaba ari omufukaani oine okumariirira, kandi akooreka ngu tarikubaasa kuhunga embeera egi egumire! Kandi buzima akaheebwa omugisha ahabw’okumariirira kwe. Akatunga eiziina Israeli eririkuhikaana n’eki yaakozire, (eririkumanyisa “Okufukaana [Okuhamira] Ahari Ruhanga” nari ngu “Ruhanga Naafukaana”). Yakobo akatunga ekiconco eki twena turikusherura, okusiimwa Yehova n’okutunga omugisha gwe.

7. (a) Ni mbeera ki ey’obusaasi ei Rakeeli yaabaire arimu? (b) Akaguma ata ari omweziriki kubaasa kuheebwa omugisha?

 ⁷ Enkundwakazi Rakeeli muka Yakobo akaba aine ekihika ky’okureeba obu Yehova araahikiirize eki yaabaire araganiise iba. Kwonka hakaba hariho oburemeezi obwabaire nibureebeka nk’obutarikubaasa kusingurwa. Akaba ataine baana, kandi omu bwire obwo, eki kikaba nikireetera abakazi obusaasi bwingi. Rakeeli akatunga ata amaani g’okugumizamu naarwanisa embeera egi eyaabaire neemaramu amaani, kandi emurengire? Tarahanikire. Omu mwanya gw’ekyo, akaguma naarwanisa embeera egyo arikushaba munonga. Yehova akahurira okushaba kwa Rakeeli okurikuruga aha mutima, kandi bwanyima akatunga omugisha gw’okuzaara abaana. Niyo nshonga ahabw’enki eizooba rimwe Rakeeli akagira ati: “Nfukaine munonga . . . naamwikarira”!​—Kut. 30:8, 20-24.

8. Yosefu akaraba mu mbeera ki ezigumire, kandi akatuteeraho ky’okureeberaho ki ekirungi?

⁸ Eky’okureeberaho kya Yakobo na Rakeeli eky’okutahanika buzima kikakora kihango ahari mutabani waabo Yosefu, kandi kikamuhwera bwanyima ku yaatungire oburemeezi. Obu Yosefu yaabaire aine emyaka 17, embeera ze zikahindukira kimwe munonga. Bakuru be ahabw’okumugirira eihari, bakamuguza omu buhuuku. Bwanyima akagumisiriza embeera y’ekihome omuri Misri. (Kut. 37:23-28; 39:7-9, 20-21) Yosefu taraikiriize kuhwamu amaani nari kubiika enziika, kandi tarateireho kuhoora enzigu. Omu mwanya gw’ekyo, akata omutima gwe aha mugisha gw’okugira omukago murungi na Yehova. (Lev. 19:18; Rom. 12:17-21) Twine kugira eki twayegyera ahari Yosefu. N’obu twakuba twarabire omu mbeera zigumire omu buto nari turi nk’abataine matsiko hati, twine kugumizamu niturwana kandi tutarikuhanika. Twakora tutyo, nitugira obuhame ngu Yehova naija kutuha emigisha.​—Shoma Okutandika 39:21-23.

9. Nitubaasa kutooreza tuta Yakobo, Rakeeli, na Yosefu?

⁹ Naiwe obunaku obu noobaasa kuba nooraba omu mbeera zigumire, nk’okutwarizibwa omu muringo gw’obutari buringaaniza, okushoroorwa, nari okujumwa. Nari nihabaasa kuba hariho omuntu orikukugambaho ebishuba ahabw’okugira ngu aine eihari. Omu mwanya gw’okuhwa amaani okasingurwa, ijuka ekyabaasiise Yakobo, Rakeeli, na Yosefu kugumizamu nibaheereza Yehova baine okushemererwa. Ruhanga akabagumya kandi yaabaha omugisha ahabw’okugira ngu bakaba nibasiima munonga eby’omwoyo. Bakagumizamu nibarwana n’embeera kandi baakora ebirikuhikaana n’okushaba kwabo. Turi haihi n’emperu y’obusingye obu obubi, n’ahabw’ekyo twine enshonga ehikire kuhamira aha matsiko agu Ruhanga atuhaire! Oyeteekateekire kurwana, ekirikumanyisa okwezirika kubaasa kusiimwa Yehova?

10, 11. (a) Ahabw’enki kirikubaasa kutwetengyesa obweziriki kutunga omugisha gwa Ruhanga? (b) Niki ekiraatuhwere kucwamu gye tukasingura ebirikubaasa kutumaramu amaani?

¹⁰ Ni mbeera ki ezirikwetengyesa okwezirika kubaasa kutunga omugisha gwa Ruhanga? Embeera emwe erikukira kuteganisa baingi n’okurwana kusingura obweremwa bw’omubiri. Abandi nibarwana kubaasa kuguma baine emiteekateekyere mirungi aha kubuurira. Naiwe noobaasa kuba noorwana kuguma oine okugumisiriza, n’obu oraabe oine amagara mabi nari oine eihamba. Kandi titwine kwebwa ngu abamwe nibarwana kubaasa kusaasira omuntu owaabakozire kubi. Yaaba tumazire obwire bugufu nari buraingwa nituheereza Yehova, twena  twine kwezirika kurwanisa ebintu ebirikubaasa kuturemesa kugumizamu nitumuheereza, ahakuba naija kutushumbuusha twaguma turi abeesigwa.

¹¹ N’amazima, nikibaasa kuguma kucwamu gye kandi tukahamira aha mitindo y’Ekikristaayo. Eki nikibaasa kuba kityo, na munonga omutima gwaitu engobya gwaba nigwenda ngu tukore ekitahikire. (Yer. 17:9) Waamanya ngu omutima gwawe nigwenda kukuhabisa, shaba omwoyo gurikwera. Waashaba Yehova akakuha omwoyo gurikwera noobaasa kutunga amaani g’okukora ekihikire, reero kikubaasise kutunga emigisha ya Yehova. Kora ebirikuhikaana n’okushaba kwawe. Teeraho kushoma Baibuli buri izooba, kandi gira obwire bw’okweshomesa ,oteereho n’okugira Okuramya kw’Eka otarikwosha.​—Shoma Zaaburi 119:32.

12, 13. Abakristaayo babiri bakahwerwa bata kwerinda ebyetengo bibi?

¹² Hariho eby’okureeberaho bingi ebirikworeka oku Ekigambo kya Ruhanga, omwoyo gurikwera, n’ebitabo byaitu bihwereire Abakristaayo kusingura ebyetengo bibi. Omunyeeto omwe akashoma ekicweka “Noobaasa Kwangira Ota Ebyetengo Bibi?” ekiri omu Awake! y’Okwaikumi-n’abiri 8, 2003. Akatwaza ata? Akagira ati: “Nindwana kwerinda ebiteekateeko bibi. Ku naashomire omu kicweka ekyo ngu ‘baingi nibarwana munonga kusingura ebigyendererwa bibi,’ kikandeetera kuhurira ngu ndi omwe aha b’eishe-emwe omu nsi yoona. Nkamanya ngu tiinye nyenka.”  Omunyeeto ogu kandi akagasirwa omu kicweka “Entwaza y’Omutaano Ruhanga Naagisiima?” ekyabaire kiri omu Awake! ey’Okwaikumi 8, 2003. Akeetegyereza ngu bamwe omu kurwana oku bari nk’abaine “eihwa omu mubiri.” (2 Kor. 12:7) Kwonka, n’obu baraabe nibarwana kubaasa kuguma baine emicwe mirungi, baine amatsiko aha biro by’omumaisho. Ahabw’enshonga egyo, omunyeeto ogwo akagira ati: “Ninteekateeka ngu buri izooba eririkurenga, nimbaasa kuguma ndi omwesigwa. Ninsiima Yehova ahabw’okukoresa ekibiina kye kutuhwera kubaho buri izooba omu busingye obu obubi.”

¹³ Yetegyereze n’ebi munyaanyazi-itwe omuri United States yaagambire. Akahandiika ati: “Niinyenda kubeebaza ahabw’okuturiisa ebi turikuba nitwenda kandi nitubitunga omu bwire obuhikire. Nooba nooshusha ngu ebicweka ebi babihandiikiire nyowe. Kumara emyaka mingi, ntwire nindwana n’ekyetengo ky’amaani aha kintu eki Yehova arikwanga. Obumwe nimba niinyenda kuhanika nkarekyera aho kurwanisa ekyetengo ekyo. Nnimanya ngu Yehova aine embabazi kandi naasaasira, kwonka ahabw’okugira ngu niinye ekyetengo eki ekibi kandi obwo ntarikukyangira kimwe, nooba nooshusha ngu tindikubaasa kutunga buhwezi bwe. Okurwana oku kunteganiise munonga. . . . Bwanyima y’okushoma ekicweka ‘Oine Omutima gw’Okumanya Yehova?’ omu Watchtower ey’Okwakashatu 15, 2013, nkamanya ngu buzima Yehova naayenda kumpwera.”

14. (a) Paulo akaba naatwara ata okurwana kwe? (b) Nitubaasa kurwanisa tuta obweremwa bw’omubiri kandi tukasingura?

¹⁴ Shoma Abarooma 7:21-25. Paulo akaba naamanya gye oku kyabaire kigumire kurwanisa ebyetengo n’obweremwa bw’omubiri omweremwa. Kwonka, akaba naahamiza kimwe ngu naabaasa kusingura okurwana kwe arikwegamira ahari Yehova omu kushaba n’okwikiririza omu kitambo kya Yesu. Kandi shi itwe? Naitwe nitubaasa kusingura twarwanisa obweremwa bw’omubiri. Mu muringo ki? Turikutooreza Paulo tukesigira kimwe Yehova kandi tukaikiririza omu kitambo omu mwanya gw’okweyesiga.

15. Yehova naabaasa kutuhwera ata kuguma turi abeesigwa kandi tukagumira n’ebirikutugyeza?

¹⁵ Obumwe Ruhanga naabaasa kutureka kworeka oku ekintu kirikutwerarikiriza. Nk’eky’okureeberaho, ku twakuba turwaire munonga nari ow’omu ka yaitu niwe arwaire nari haine otutwariize kubi? Nituba twine kworeka ngu nitwesigira kimwe Yehova turikumweshengyereza omu kushaba kutuha amaani g’okuguma turi abeesigwa, twine okushemererwa kandi twine n’omukago murungi nawe. (Fil. 4:13) Eby’okureeberaho bya baingi omu bunaku bwa Paulo n’omu bunaku bwaitu nibyoreka ngu okushaba nikubaasa kutuhamya, kandi tugire n’obumanzi bw’okugumizamu nitugumisiriza.

16, 17. Omaririire kukora ki omu kurwana kwawe?

¹⁶ Omuregi buzima akaayenzire kukureeba noohanika emikono kandi okasingurwa. Mariirira ‘kuhamira aha kirungi.’ (1 Tes. 5:21) Gira obuhame ngu noobaasa kurwanisa Sitaane, ensi ye, n’ebyetengo bibi kandi osingure. Noobaasa kusingura waayesigira kimwe Yehova ngu naija kukuha amaani.​—2 Kor. 4:7-9; Gal. 6:9.

¹⁷ Kora kyona ekirikubaasika kugumizamu ori omweziriki. Gumizamu nooteeraho n’amaani. Gumizamu ori omugumisiriza. Yesigire kimwe Yehova ngu naija ‘kukushukaho omugisha, obure n’ah’okuguta.’​—Mal. 3:10.