1. Ahabw’enki Abajurizi ba Yehova baine okushemererwa? (Reeba ekishushani aha kutandika.)

ABAJURIZI BA YEHOVA n’abantu abaine okushemererwa. Ku barikuba bari omu nteerane ekye n’empango, nari aha mukoro, nibaba nibagaaniira kandi nibasheka hamwe. Ahabw’enki nibaba bashemereirwe? N’ahabw’okugira ngu nibaramya Yehova, ‘Ruhanga oine okushemererwa.’ Nibamuheereza kandi bateeraho n’okumutooreza. (1 Timoseo 1:11; Zaaburi 16:11) Yehova niwe burugo bw’okushemererwa, n’ahabw’ekyo naayenda naitwe tushemererwe, kandi naatuha enshonga nyingi ahabw’enki twine kushemererwa.​—Eky’Ebiragiro 12:7; Omubuurizi 3:12, 13.

2, 3. (a) Okushemererwa nikimanyisa ki? (b) Ahabw’enki nikibaasa kutugumira kutunga okushemererwa?

² Kandi shi iwe? Mbwenu shi oshemereirwe? Okushemererwa nikimanyisa okwehurira gye, kandi okagira okumarwa nari obunanukye omu mutima. Baibuli neeyoreka ngu abu Yehova ahaire omugisha nibo baine okushemererwa okwabuzima.  Kwonka shi, ahabw’enki kitoorobi kutunga okushemererwa obunaku obu?

³ Nikibaasa kutooroba kuguma tushemereirwe twaba twine oburemeezi, nk’okufeerwa omukundwa, omunyabuzaare kubingwa omu kibiina, okugaitururwa, nari okufeerwa omurimo. Nikibaasa kutugumira kutunga okushemererwa omu ka haaba hatarimu obusingye ahabw’endwano zitahwaire, abu turikora nabo nari abu turikushoma nabo baatujuma, bakatuhiiganisa nari bakatuta omu kihome ahabw’okugira ngu nituheereza Yehova. Obundi amagara gaitu nigabaasa kweyongyera kuba mabi, nitubaasa kukwatwa endwara etarikurahuka kukira, nari tugire amaganya. Ijuka ngu Yesu Kristo ‘n’omutegyeki oine okushemererwa,’ kandi n’omugabe orikukunda kuhuumuriza abantu n’okubareetera okushemererwa. (1 Timoseo 6:15; Matayo 11:28-30) Omu rubazo rwe orw’aha rushozi, Yesu akagamba emwe aha mitwarize erikubaasa kutuhwera kutunga okushemererwa n’obu twakuba twine oburemeezi bwingi oburi omu nsi ya Sitaane.

4, 5. Tushemereire kukora ki kubaasa kuguma tushemereirwe?

⁴ Enshonga ei Yesu yaabandize kugambaho ni nkuru munonga. Akagira ati: ‘Baine okushemererwa abarikufayo aha kyetengo kyabo eky’eby’omwoyo, ahabw’okuba obukama bw’omu iguru n’obwabo.’ (Matayo 5:3) Okufayo aha kyetengo kyaitu eky’eby’omwoyo, nikimanyisa ngu nitwenda kumanya Ruhanga, kandi ngu nitwenda obuhwezi n’obuhabuzi bwe. Ekyo nitukikora tuta? Twayega Baibuli, tukoorobera Ruhanga kandi tukeebembeza okumuheereza. Okukora ebintu ebi, nikiija kutuhwera kutunga okushemererwa. Okwikiriza kwaitu omu biraganiso bya Ruhanga nikwija kweyongyera kuhama. Kandi ‘amatsiko agarimu okushemererwa’ agari omu Baibuli nigaija kutugaruramu amaani.​—Tito 2:13.

⁵ Twaba nitwenda kuguma tushemereirwe n’obu twakugira oburemeezi, twine kugumizamu nituhamya omukago gwaitu na Yehova. Entumwa Paulo akahandiika ati: “Mushemererwe obutoosha omuri Mukama; kandi ningaruka kugira nti: Mugume mushemererwe!” (Abafilipi 4:4) Yehova yaakuha obwengye nooba munywani we. Ekigambo kya Ruhanga nikigira kiti: “Ohiiriirwe n’omuntu ozoora obwengye, kandi n’omuntu otunga okwetegyereza. N’omuti gw’amagara aha barikubukwata, n’abarikubuhamya nibeetwa abahiiriirwe.”​—Enfumu 3:13, 18.

6. Niki ekindi eki twine kukora kuguma tushemereirwe?

⁶ Kubaasa kuguma tushemereirwe, ni kikuru kugumizamu nituta omu nkora ebi turikwega. Yesu akahamiiriza obukuru bw’okukora eki, obu yaagira ati: “Ku muraabe nimumanya ebyo, muhiiriirwe mwaba nimubikora.” (Yohaana 13:17; shoma Yakobo 1:25.) Eki ni kikuru munonga twaba nitwenda kuhaazya ekyetengo kyaitu eky’eby’omwoyo, kandi tukaguma tushemereirwe.  Kwonka shi nitubaasa kugira tuta okushemererwa haaba hariho ebintu bingi ebirikutuubya okushemererwa kyaitu? Ka tureebe eki Yesu yaagambire bwanyima, omu Rubazo rwe orw’aha Rushozi.

7. Abo abarikuganya nibabaasa kutunga bata okushemererwa?

⁷ ‘Baine okushemererwa abarikuganya ahabw’okuba abo baryahuumuzibwa.’ (Matayo 5:4) Nitubaasa kwebuuza tuti: ‘Abaine amaganya nibabaasa kushemererwa bata?’ Yesu akaba atarikugamba ahari buri omwe orikuganya. Abantu baingi ababi nibaganya nari baine obusaasi, ahabw’oburemeezi ‘bw’ebiro by’emperu’ kandi ebigumire kwemera. (2 Timoseo 3:1) Kandi nibeeteekateekaho bonka omu mwanya gw’okukuheereza Yehova, n’ahabw’ekyo tibarikugira omukago murungi nawe, kandi tibarikutunga okushemererwa. Kwonka Yesu akaba naagamba ahari abo abaine ekyetengo eky’eby’omwoyo. Nibaganya ahabw’okugira ngu nibareeba abantu baingi nibanga kworobera Ruhanga. Nibamanya ngu tibahikiriire, kandi nibaganya ahabw’ebintu bibi munonga ebirikubaho omu nsi. Yehova naareeba abantu nk’abo abahuumuriza kurabira omu Kigambo kye, kandi naabaha okushemererwa n’amagara agatahwaho.​—Shoma Ezekieli 5:11; 9:4.

8. Okuba omucureezi nikibaasa kukuhwera kita kugira okushemererwa?

⁸ ‘Baine okushemererwa abacureezi, ahabw’okuba abo baryahungura ensi.’ (Matayo 5:5) Okuba omucureezi nikibaasa kukuhwera kita kugira okushemererwa? Abantu baingi nibatwaza kubi munonga, ekirikubarugiramu oburemeezi bwingi. Kwonka ku barikwega amazima, nibakora empindahinduka bataho “omuntu omusya.” Kandi nibatandika kugira “omutima gw’esaasi, embabazi, okutwaza gye, obucureezi n’okugumisiriza.” (Abakolosai 3:9-12) N’ekirikurugamu, nibagira obusingye, enkoragana nungi n’abandi, n’okushemererwa. Kandi Ekigambo kya Ruhanga nikiraganisa ngu abacureezi nibaija ‘kuhugura ensi.’​—Zaaburi 37:8-10, 29.

9. (a) Yesu akaba naamanyisa ki obu yaagira ngu abacureezi nibaija ‘kuhungura ensi’? (b) Ahabw’enki abo ‘abarikugirira eby’okuhikiirira enjara n’eiriho’ baine okushemererwa?

⁹ Yesu akaba naamanyisa ki obu yaagira ngu abacureezi nibaija ‘kuhungura ensi’? Abashukirweho amajuta nabaija kuhungura ensi, baaba nibategyekyera omu iguru nk’abagabe kandi abanyamurwa barikutegyeka ensi. (Okushuuruurwa 20:6) Kandi obukaikuru bw’abantu abandi abataine matsiko g’okutuura omu iguru, nibaija kuhungura ensi ku baraikirizibwe kugituuramu ebiro byona. Nibaija kuba bahikiriire, baine obusingye, n’okushemererwa. Kandi nibo abu Yesu yaagambireho ngu baine okushemererwa ‘abagirira eby’okuhikiirira enjara n’eiriho.’ (Matayo 5:6) Yehova naija kuhaazya ekyetengo kyabo eky’eby’okuhikiirira ku araiheho obubi bwona. (2 Petero 3:13) Omu nsi ensya, abahikiriire nibaija kushemererwa kandi tibaraagarukye kugira amaganya ahabw’ebikorwa bibi.​—Zaaburi 37:17.

10. Nikimanyisa ki okuba omunyambabazi?

¹⁰ ‘Baine okushemererwa abanyambabazi, ahabw’okuba abo baryagirirwa embabazi.’ (Matayo 5:7) Okuba omunyambabazi nikimanyisa kugira esaasi n’okutwariza gye  abarikubonabona. Kwonka nabwo, okuba omunyambabazi nikikira aha kugira enyehurira kwonka. Baibuli neeyegyesa ngu okugira embabazi nikitwarimu okugira eki twakora kuhwera abandi.

11. Eky’okureeberaho eky’Omusamaria nitukyegyeraho ki?

¹¹ Shoma Luka 10:30-37. Eky’okureeberaho eky’Omusamaria eki Yesu yaagambire nikitwegyesa eki kirikumanyisa okuba omunyambabazi. Esaasi n’embabazi bikahiga Omusamaria kuhwera omushaija owaabaire naabonabona. Bwanyima ya Yesu kuha eky’okureeberaho ekyo akagira ati: “Gyenda, naiwe okore otyo.” N’ahabw’ekyo nitubaasa kwebuuza tuti: ‘Naanye nikyo ndikukora? Ninkora nk’oku Omusamaria yaakozire? Abandi baaba nibabonabona nimbaasa kugira eki naakora kubahwera? Nk’eky’okureeberaho, nimbaasa kuhwera abakuzire omu kibiina, efaakazi, nari abaana abu abazaire baabo batarikuheereza Yehova? Nimbaasa kugamba omu muringo ‘ogurikugumya abahahaire emitima’?’​—1 Abatesalonika 5:14; Yakobo 1:27.

12. Ahabw’enki nitugira okushemererwa twaba abanyambabazi?

¹² Ahabw’enki okugira embabazi nikitureetera okushemererwa? Ku turikugirira abandi embabazi, nituba nituha abandi kandi Yesu akagira ngu okugaba nikureeta okushemererwa. Enshonga endiijo n’ahabw’okuba nikishemeza Yehova. (Ebyakozirwe 20:35; shoma Abaheburaayo 13:16.) Omugabe Daudi akagamba aha muntu orikworeka embabazi ati: “Mukama aryamurinda, agume ari ohuriire; kandi aryaheebwa omugisha akiri omu nsi.” (Zaaburi 41:1, 2) Twagirira abandi embabazi n’esaasi, Yehova naija kutugirira embabazi, reero nitwija kugira okushemererwa ebiro byona.​—Yakobo 2:13.

13, 14. Ahabw’enki ni kikuru kuba “abashemeire omu mutima”?

¹³ Yesu akagira ati: ‘Baine okushemererwa abashemeire omu mutima, ahabw’okuba abo baryareeba Ruhanga.’ (Matayo 5:8) Nitugira omutima ogushemeire, twaba twine ebiteekateeko n’ebyetengo ebishemeire nari ebirungi. Eki ni kikuru twaba  nitwenda ngu okuramya kwaitu kusiimwe Yehova.​—Shoma 2 Abakorinso 4:2; 1 Timoseo 1:5.

¹⁴ Abo abaine omutima ogushemeire nibabaasa kugira omukago murungi na Yehova, orikugira ati: ‘Baine okushemererwa abarikwozya ebijwaro byabo.’ (Okushuuruurwa 22:14) ‘Okwozya ebijwaro byabo’ nikimanyisa ki? Aha Bakristaayo abashukirweho amajuta, nikimanyisa ngu Yehova naabareeba nk’abashemeire, naija kubaha amagara agatahwaho omu iguru, kandi nibaija kushemererwa ebiro byona. Ahari abo, ab’omutwe omuhango abaine amatsiko g’okutuura omu nsi nikimanyisa ngu Yehova naabaikiriza kuba banywani be ahabw’okubareeba nk’abahikiriire. Baibuli neegira eti: “Bakoozya ebijwaro byabo omu shagama y’Omwana gw’entaama,” byayera.​—Okushuuruurwa 7:9, 13, 14.

15, 16. Abaine omutima ogushemeire nibaija ‘kureeba Ruhanga’ omu muringo ki?

¹⁵ Yehova akagira ati: “Tihariho muntu orindeeba, akagumaho.” (Okuruga 33:20) Mbwenu shi abashemeire omu mutima nibareeba Ruhanga omu muringo ki? “Okureeba” omu Rugriika nikimanyisa okukoresa ebiteekateeko byaitu kuteera akashushani, okwetegyereza nari okumanya. N’ahabw’ekyo ‘okureeba Ruhanga’ nikimanyisa okumwetegyereza gye, kandi tukakunda n’emitwarize ye. (Abaefeso 1:18) Yesu akoorekyera kimwe emitwarize nk’eishe, n’ahabw’ekyo akagira ati: “Ondeebire, biri areebire Isheboona.”​—Yohaana 14:7-9.

¹⁶ Okwongyera ahari ekyo, ‘nitureeba Ruhanga’ twareeba oku arikutuhwera. (Yobu 42:5) Nitubaasa n’okureeba nari kuta omutima aha birungi ebi Yehova araganiise kukorera abaine omutima ogushemeire, kandi abarikumuheereza omu bwesigwa. Abashukirweho amajuta nibaija kureeba Yehova butunu bwanyima y’okuzooka bakaza omu iguru.​—1 Yohaana 3:2.

17. Ahabw’enki abarikureetaho obusingye baine okushemererwa?

¹⁷ Yesu akagaruka yaagira ati: ‘Baine okushemererwa abagarukanisa abantu.’ (Matayo 5:9) Okuteeraho kwaitu okugaruraho obusingye, nikwija kutureetera okushemererwa. Entumwa Yakobo akagira ati: “Abareeta obusingye babiba embibo omu busingye ezireeta ebyana by’okuhikiirira.” (Yakobo 3:18) N’ahabw’ekyo, waaba oine ou otarikukwatanisa gye nawe omu kibiina nari omu ka, shaba Yehova kukuhwera kugaruraho obusingye. Yehova naija kukuha omwoyo gwe ogurikwera, gukuhwere kworeka emitwarize mirungi y’Ekikristaayo kandi noija kutunga okushemererwa. Yesu akooreka obukuru bw’okuteeraho kureetaho obusingye obu yaagira ati: “N’ahabw’ekyo ku oraabe oreetsire empongano yaawe aha itambiro, waijukira aho eki oshobeize mugyenzi waawe, otsigye empongano yaawe omu maisho g’eitambiro, ogyende, obanze  ogarukane nawe, bwanyima ogarukye oheyo empongano yaawe egyo.”​—Matayo 5:23, 24.

18, 19. Ahabw’enki Abakristaayo barikushemererwa n’obu baakuhiiganisibwa?

¹⁸ ‘Imwe mwine okushemererwa ku baribajuma, ku baribahiiga, ku baribabeiherera ekigambo kyona ekibi nibabantura.’ Yesu akaba naamanyisa ki? Akongyeraho ati: “Mushemererwe, mwesiime munonga; ahabw’okuba ebihembo byanyu biryaba bingi omu iguru; kandi nikwo baahiigire batyo baanabi abaabandize imwe.” (Matayo 5:11, 12) Ku baateire entumwa kandi bakabaragiira okutagaruka kubuurira, bakaruga ‘omu maisho g’eishengyero, bashemereirwe.’ Tibarashemereirwe ahabw’okuteerwa. Kwonka bakashemererwa ‘ahabw’okuheebwa ekitiinisa eky’okuhemurwa nibaturwa’ eiziina rya Yesu.​—Ebyakozirwe 5:41.

¹⁹ Obunaku obu, abaheereza ba Yehova nibagumisiriza baine okushemererwa ku barikubahiiganisa ahabw’eiziina rya Yesu. (Shoma Yakobo 1:2-4.) Nk’entumwa, naitwe titurikushemererwa ahabw’okubonabona nari okuhiiganisibwa. Kwonka ku turikuguma turi abeesigwa ahari Yehova, naatuha obumanzi kutuhwera kugumisiriza. Teekateeka aha ky’okureeberaho ky’ow’eishe-emwe Henryk Dornik na mwene ishe omukuru. Omuri Augusto 1944, bakatwarwa omu nkambi. Abaabaire nibabahiiganisa bakagira bati: “Tikirikubaasika kubashendashenda kukora ekintu kyona. Okufeera okwikiriza kwabo nikibareetera okushemererwa.” Henryk akashoboorora ati: “N’obu ndaabe naabaire ntarikwenda kuhiiganisibwa ahabw’ebi ndikwikiriza, okuguma ndi omwesigwa ahari Yehova nyine obumanzi kikandeetera okushemererwa.” Akongyeraho ati: “Okweshengyereza Yehova butoosha omu kushaba kukampwera kumwirira haihi, kandi buzima akampwera.”

20. Ahabw’enki okuheereza ‘Ruhanga oine okushemererwa’ kirikutureetera okushemererwa?

²⁰ Yehova Ruhanga orikushemererwa yaatusiima, nitugira okushemererwa n’obu twakuba nituhiiganisibwa, nitutwarizibwa kubi ab’omu maka gaitu, turwaire, nari tukuzire omu myaka. (1 Timoseo 1:11) Nitubaasa n’okushemererwa ahabw’okuba Ruhanga waitu “otabaasa kubeiha,” aturaganiise ebintu birungi. (Tito 1:2) Yehova ku araahikiirize ebiraganiso bye, tituraagarukye kwijuka oburemeezi obu twine obunaku obu. Obunaku obu titurikubaasa kumanyira kimwe okushemererwa oku turaabe twine n’embeera nungi eraabe eri omu Paradiso! Eego nitwija ‘kwesiima ahabw’okugira obusingye bwingi.’​—Zaaburi 37:11.