1. Abajurizi ba Yehova nibooreka bata ngu nibakundana?

ABAHEEREZA ba Yehova omu nsi yoona bari omu ka emwe erikubagaita. Nibakundana nk’enyineemwe. (1 Yohaana 4:16, 21) Obumwe nibeefeerereza bingi ahabw’ab’eishe-emwe bagyenzi baabo, kwonka obwire obwingi nibooreka ngu nibakundana barikukorerana ebintu bikye bingi. Nk’eky’okureeberaho, ow’eishe-emwe naabaasa kugambira mugyenzi we ekintu kirungi nari kumutwariza omu muringo gw’embabazi. Twayoreka ngu nitufayo aha bandi, nituba nitutooreza Tataitwe ow’omu iguru.​—Abaefeso 5:1.

2. Yesu akatooreza ata Ishe omu kworeka rukundo?

² Yesu akatooreza Ishe omu muringo oguhikiriire. Butoosha akaba atwariza abandi omu muringo gw’embabazi. Akagira ati: “Imwe mwena abaruhire n’abaremereirwe, mwije ahariinye, mbaruhuure.” (Matayo 11:28, 29) Twatooreza Yesu tukafayo  aha baremereirwe, nitwija kushemeza Yehova, kandi naitwe nitwija kushemererwa. (Zaaburi 41:1) Omu kicweka eki, nituza kureeba oku turikubaasa kufayo aha b’omu maka gaitu, ab’eishe-emwe, n’abu turikubuurira.

3. Omushaija naabaasa kworeka ata ngu naafayo aha mukazi we? (Reeba ekishushani aha kutandika.)

³ Abashaija abaine abakazi, baine kutaho eky’okureeberaho kirungi omu kureeberera ab’omu maka gaabo. (Abaefeso 5:25; 6:4) Baibuli neegira ngu abashaija baine kufayo kandi bakeetegyereza abakazi baabo. (1 Petero 3:7) Omushaija orikwetegyereza naamanya ngu n’obu araabe atarikushushana n’omukazi we omu miringo mingi, tarikumukira. (Okutandika 2:18) Naafayo aha nyehurira ze kandi amutwariza omu muringo gw’ekitiinisa. Omukazi omuri Canada naagamba ahari iba ati: “Tarikwehuzya nyehurira zangye, nari kungira ngu, ‘toine kwehurira otyo.’ Kandi naahurikiza gye. Ku arikuba naampwera kuhindura aha miteekateekyere yangye, naakikora omu muringo gw’embabazi.”

4. Omushaija naaba aine kutwariza ata abakazi abandi kworeka ngu naafayo aha nyehurira z’omukazi we?

⁴ Omushaija orikufayo aha nyehurira z’omukazi we tarikweshunga n’abakazi abandi, nari kubafaho omu muringo ogutashemeire yaaba ari nabo, nari aha mikura y’empurizana. (Yobu 31:1) Tarikukoresa emikura ya Intaneeti kweshunga n’abandi, kandi tarikureeba ebintu bibi ebiri aha mikura. Buzima naaguma ari omwesigwa aha mukazi we yaamukunda, akakunda Yehova, kandi akanga n’ebibi.​—Shoma Zaaburi 19:14; 97:10.

5. Omukazi naabaasa kufayo ata ahari iba?

⁵ Omushaija yaatooreza eky’okureeberaho kirungi ky’omutwe gwe, Yesu Kristo, nikiija kworobera omukazi we kumuha ekitiinisa. (Abaefeso 5:22-25, 33) Kandi omukazi yaaba naaha iba ekitiinisa, naija kuteeraho kwetegyereza enyehurira ze, amutwarize omu muringo murungi yaaba aine bingi eby’okukora omu kibiina nari yaaba aine oburemeezi. Omushaija omuri Britain naagira ati: “Obumwe omukazi wangye naayetegyereza ngu embeera zangye zaahinduka amanya ngu haine ekirikunteganisa. Naagyendera aha musingye oguri omu Enfumu 20:5, n’obu eki kyakuba nikimanyisa okutegyereza obwire obuhikire ‘kumbuuza’ kumugambira, kyaba kiri ekintu eki ndikubaasa kugaaniira nawe.”

6. Twena nitubaasa kuhiga tuta abaana kufayo aha bandi, kandi ekyo nikibagasira kita?

⁶ Abazaire baatwarizana gye, nibateeraho abaana baabo eky’okureeberaho kirungi. Kandi baine kwegyesa abaana baabo kuteekateeka aha bandi, kandi bakabagirira embabazi. Nk’eky’okureeberaho, abazaire nibabaasa kwegyesa abaana baabo kutazaanira omu Kyombeko ky’Obukama. Nari baaba bari aha mukoro, nibabaasa kugambira abaana baabo kutegyereza abakuru bakabanza baatunga eby’okurya. Amazima gari ngu, buri omwe omu kibiina naabaasa  kuhwera abazaire. N’ahabw’ekyo twine kusiima omwana yaakora ekintu kirungi, nk’eky’okureeberaho, yaigurira omuntu orwigi. Eki nikiija kureetera omwana kwehurira gye, kandi nikiija kumuhwera kwega ngu “okugaba” nikureeta okushemererwa “okukira okuheebwa.”​—Ebyakozirwe 20:35.

7. Yesu akooreka ata ngu naafayo aha mushaija omuteta, kandi nitubaasa kumwegyeraho ki?

⁷ Eizooba rimwe, Yesu akaba ari omuri Dekapooli abantu bakamureetera ‘omuteta ofiire amatu.’ (Mako 7:31-35) Yesu akamutambira, kwonka taramutambiriire omu maisho g’abandi. Ahabw’enki? Ahabw’okugira ngu omushaija akaba ari omuteta, naabaasa kuba yaabaire naatiina kuguma ahagati y’abantu baingi. Yesu akeetegyereza enyehurira ze, “yaamwekiikana” wenka ahatari bantu reero yaamutambira. N’amazima itwe titurikubaasa kukora eby’okutangaaza, kwonka twine kuteekateeka aha nyehurira z’ab’eishe-emwe kandi tubagirire embabazi. Entumwa Paulo akahandiika ati: “Ka tuteekateekye oku twakwezirikisana kukundana n’okukora ebirungi.” (Abaheburaayo 10:24) Yesu akeetegyereza oku omuteta yaabaire naayehurira, kandi yaamutwariza omu muringo gw’embabazi. Ekyo ka n’eky’okureeberaho kirungi ahariitwe!

8, 9. Nitubaasa kworeka tuta ngu nitufayo aha baine emyaka ya bukuru n’abaine obumuga? (Ha eby’okureeberaho.)

⁸ Fayo aha bakuzire omu myaka n’abaine obumuga. Omutwarize mukuru omu kibiina Ekikristaayo ni rukundo, beitu kutari kumanya kukora gye ebintu. (Yohaana 13:34, 35) Rukundo neetureetera kuhwera ab’eishe-emwe na banyaanyazi-itwe abakuzire omu myaka nari abaine obumuga kuza omu nteerane n’omu kubuurira. Nitubahwera n’obu kirikuba kitatworobeire nari n’obu barikuba batarikubaasa kukora bingi. (Matayo 13:23) Michael, orikugyendera omu kagaari, naasiima munonga obuhwezi obu ab’omu ka ye n’ab’omu kibiina barikumuha. Naagira ati: “Ahabw’obuhwezi obu barikumpa, nimbaasa kuza omu nteerane enyingi, kandi nyejumba omu kubuurira obumwe n’obumwe. Ninkira kukunda okubuurira ndikukoresa akagaari.”

⁹ Omu Beseeli enyingi, harimu ab’eishe-emwe na banyaanyazi-itwe abakuzire nari abaine obumuga. Abareeberezi abarikufayo nibooreka ngu nibabakunda barikubahwera kwejumba omu kubuurira barikukoresa amabaruha n’esimu. Bill, oine emyaka 86 kandi orikuhandiikira abantu abari hare, naagira ati: “Nitusiima omugisha gw’okuhandiika amabaruha.” Nancy, oine emyaka nka 90, naagira ati: “Tindikureeba okuhandiika amabaruha nk’okugata omu bahaasa kwonka. Ogu n’omuringo gw’okubuurira. Abantu baine kumanya amazima!” Ethel, owaazairwe omuri 1921, naagira ati: “Obwire bwona nimba nyine obusaasi. Ebiro ebimwe nikiba kingumiire kwejweka.” N’obu kiraabe kiri kityo, naakunda kubuurira arikukoresa  esimu kandi aine ab’okugarukira. Barbara, oine emyaka 85, naashoboorora ati: “Ahabw’amagara gangye mabi, ninshanga okwejumba omu kubuurira butoosha kigumire. Kwonka okubuurira ndikukoresa esimu nikimbaasisa kugamba n’abandi. Yebare Yehova!” Omu bwire obutarikuhika omwaka, guruupu y’abakuzire omu myaka bakamara eshaaha 1,228 omu kubuurira, bakahandiika amabaruha 6,265, bakateerera abantu 2,000 amasimu, baagaba ebitabo 6,315! Nitubaasa kuhamya ngu okuteeraho kwabo kukashemeza Yehova!​—Enfumu 27:11.

10. Nitubaasa kuhwera tuta ab’eishe-emwe kugasirwa omu nteerane nk’oku kirikubaasika?

¹⁰ Fayo aha bandi omu nteerane z’Ekikristaayo. Twaba nitufayo aha b’eishe-emwe, nitubahwera nk’oku kirikubaasika kugasirwa omu nteerane. Mu muringo ki? Omuringo gumwe n’okwija kare omu nteerane kugira ngu tutabahuzya. Obumwe nihabaasa kugira ekyatukyerereza. Kwonka twaba nitukira kwija tukyerereirwe, twine kuteekateeka aha ku eki kirikukwata aha b’eishe-emwe, n’empindahinduka ezi turikubaasa kukora kworeka ngu nitubafaho. Kandi ijuka ngu Yehova n’Omwana we nibo barikutweta kwija omu nteerane. (Matayo 18:20) Buzima twine kworeka ngu nitubaha ekitiinisa turikuhika omu nteerane omu bwire!

11. Ahabw’enki ab’eishe-emwe abarikuba baine ebicweka omu nteerane bashemereire kukuratira obuhabuzi oburi omu 1 Abakorinso 14:40?

¹¹ Twaba nitufayo aha b’eishe-emwe, nitwija kukuratira obuhabuzi bwa Baibuli oburikugira ngu “byona bikorwe gye, bitebeekanisiibwe.” (1 Abakorinso 14:40) Ab’eishe-emwe abarikuba baine ebicweka omu nteerane nibakuratira obuhabuzi obu batarikurenzya obwire obu bahairwe. Omu muringo ogu, nibaba nibafayo aha bagambi abarikukurataho, hamwe n’ekibiina kyona. Teekateeka aha ku abandi barikubaasa  kukwatwaho enteerane zaahwa kikyererezi. Ab’eishe-emwe abamwe nibaba nibaruga hare. Abamwe baine kugyenda aha bigyere nari kutemba ebiiruka baaba nibagaruka owaabo. Kandi abamwe abatarikuheereza Yehova nibaba nibenda ngu abakundwa baabo abarikuheereza Yehova bataahe kare.

12. Ahabw’enki twine kukunda abareeberezi kandi tukabaha ekitiinisa? (Reeba akabokisi “ Fayo aha Baine Obujunaanizibwa Bwingi.”)

¹² Abareeberezi nibakora n’amaani omu kibiina n’omu kubuurira, n’ahabw’ekyo twine kubakunda tukabaha n’ekitiinisa. (Shoma 1 Abatesalonika 5:12, 13.) Hatariho kubangaanisa noosiima byona ebi barikukora. Noobaasa kworeka ngu noosiima orikuboorobera oyekundiire kandi orikubashagika, ahakuba “nibo barinda amagara gaanyu, nk’abarikumanya ngu baryagabuuzibwa.”​—Abaheburaayo 13:7, 17.

13. Nitubaasa kwegyera ki aha muringo ogu Yesu yaatwariizemu abantu?

¹³ Nabi Isaaya akagamba ahari Yesu ati: “Orubingo orushatukire tariruhenda, n’orumuri orurikwaka kubi tariruraaza.” (Isaaya 42:3) Rukundo ei Yesu yaabaire ainiire abantu ekamuhiga kubagirira esaasi. Akeetegyereza enyehurira z’abo abaabaire bahwairemu amaani bari ‘nk’orubingo orushatukire’ nari ‘nk’orumuri orurikwaka kubi,’ reero yaabagumusiririza kandi yaabatwariza omu muringo gw’embabazi. N’abaana bakaba nibenda kuba na Yesu. (Mako 10:14) Amazima gari ngu, titurikubaasa kwegyesa abantu omu muringo gwenyine ogu Yesu yaayegyeisemu! Kwonka nitworeka ngu nitufayo ahari abo abari omu kicweka kyaitu kurugiirira aha ku turikugamba nabo, obu turikugamba nabo, n’obwire obu turikumara nitugamba nabo.

14. Ahabw’enki twine kuteekateeka aha ku turikugamba n’abantu?

¹⁴ Tushemereire kugamba tuta n’abantu? Ebibiina by’obushuubuzi, eby’obutegyeki, n’eby’ediini ebishomankuzi bireetaire abantu ‘kuburaburirwa, n’okushoberwa.’ (Matayo 9:36) N’ekirugiremu, baingi tibarikwesiga muntu weena kandi tibaine matsiko. Niyo nshonga ahabw’enki ebigambo ebi turikukoresa n’eiraka ryaitu biine kworeka ngu twine embabazi kandi ngu nitubafaho! Abantu baingi nibaba nibenda kuhurikiza obutumwa bwaitu ti habw’okugira ngu nitumanya kukoresa gye Baibuli kyonka, beitu n’ahabw’okugira ngu buzima nitubafaho kandi nitubaha ekitiinisa.

15. Nitubaasa kworeka tuta ngu nitufayo aha bantu b’omu kicweka kyaitu?

¹⁵ Hariho emiringo mingi ei turikubaasa kworekamu ngu nitufayo aha abantu omu kicweka kyaitu. Twaba nitubuuza ebibuuzo twine kukikora omu muringo gw’embabazi kandi ogurikuhaisa ekitiinisa. Payoniya omwe akaba naaheereza omu kicweka ahu abantu baingi baine enshoni, n’ahabw’ekyo akaba naayetantara ebibuuzo ebirikubareetera kuhemuka baaba batarikumanya eky’okugarukamu ekihikire. Akaba atarikubaasa  kubuuza omuntu ngu, “Noomanya eiziina rya Ruhanga?” nari “Obukama bwa Ruhanga niki?” Omu mwanya gw’ekyo, akaba abuuza ebibuuzo nk’ebi: “Nyegire omu Baibuli ngu Ruhanga aine eiziina. Nkworekye eiziina eryo?” Omuringo ogu tigurikukora buri hamwe, ahakuba abantu baine entwaza zitarikushushana. Kwonka butoosha twine kutwariza abantu omu kicweka kyaitu omu muringo gw’embabazi kandi ogw’ekitiinisa. Kubaasa kukora eki, twine kuteeraho kubamanya gye.

16, 17. Nitubaasa kworeka tuta ngu turi abanyambabazi twaba nitucwamu (a) obu turaaze kubuurira abantu? (b) obwire obu turaamare turikugaaniira nabo?

¹⁶ Tushemereire kuza kubuurira abantu ryari? Twaba nitubuurira enju aha nju, abantu nibaba batarikumanya ngu nituza kuza owaabo, ahakuba nibaba batatwetsire. N’ahabw’ekyo ni kikuru, kuzayo omu bwire obu barikubaasa kwikiriza kugaaniira naitwe. (Matayo 7:12) Nk’eky’okureeberaho, abantu nibakunda kuhondeeza aha wiikenda? Kyaba kiri kityo, noobaasa kutandika orikubuurira aha nguuto, omu myanya erimu abantu baingi, nari ogarukyeyo aha bantu abu orikumanya ngu noija kubashangayo.

¹⁷ Twine kugaaniira nabo kumara bwire ki? Abantu baingi baine bingi by’okukora, n’ahabw’ekyo twine kumarayo obwire bugufu, na munonga gwaba guri gw’okubanza kubabuurira. Nikiba kiri kirungi kugaaniira nabo ebintu bikye omu mwanya gw’okumarayo obwire bwingi. (1 Abakorinso 9:20-23) Abantu baakireeba ngu nitwetegyereza ngu baine bingi by’okukora, nibabaasa kwikiriza kugaaniira naitwe twagarukayo obundi. Twayoreka emitwarize y’omwoyo gurikwera, buzima nitwija kuba abakozi abarikukora hamwe na Ruhanga. Yehova naabaasa n’okutukoresa kuhwera bamwe kwega amazima!​—1 Abakorinso 3:6, 7, 9.

18. Twaba nitufayo aha abandi, nituba twine amatsiko g’okutunga migisha ki?

¹⁸ Ka tuteereho kukora kyona ekirikubaasika kufayo aha b’omu maka gaitu, ab’eishe-emwe, n’abu turikubuurira. Obwo, nitwija kutunga emigisha mingi hati n’ebiro by’omumaisho. Nk’oku Zaaburi 41:1, 2 harikugira, orikusaasibwa omukyene aine okushemererwa, ahakuba Yehova naija kumujuna aha izooba ry’enaku. Yehova naija kumurinda, agume ari ohuriire, kandi naija kugira okushemererwa omu nsi.