1. Yesu akagamba ahari mutwarize ki omukuru aha kiro ekyahereerukireyo ari na beegi be?

AHA kiro ekyahereerukireyo Yesu arikuza kwitwa, akagamba ahari rukundo emirundi nka 30. Akagambira abeegi be ngu baine ‘kukundana.’ (Yohaana 15:12, 17) Rukundo egi ekaba neija kureebwa n’abandi, kandi ebahwere kumanya abakuratsi ba Kristo abaabuzima. (Yohaana 13:34, 35) Rukundo ei Yesu yaagambireho ti y’ebigambo bwonka, beitu ni rukundo y’okwefeerereza erikutuhiga kugira eki twakora. Yesu akagira ati: “Tihariho rukundo erikukira egi, omuntu kufeera banywani be. Imwe muri banywani bangye, ku muraabe nimukora ebi ndikubaragiira.”​—Yohaana 15:13, 14.

2. (a) Abaheereza ba Ruhanga obunaku obu nibamanyirwa ahari ki? (b) Nituza kugarukamu bibuuzo ki omu kicweka eki?

² Obunaku obu abaheereza ba Yehova nibamanyirwa ahari rukundo eyaabuzima ei baine, ey’okwefeerereza n’obumwe bwabo. (1 Yohaana 3:10, 11) Eihanga eriturikurugamu, oruganda, orurimi nari oku twakuziibwe ti kikuru. Omu nsi yoona  buzima abaheereza ba Yehova nibakundana. Ahabw’enki kiri kikuru kukundana obunaku obu? Yehova na Yesu nibatwombeka bata omu muringo gwa rukundo? Omu kuhuumuriza n’omu kugumya abandi nitubaasa kworeka tuta rukundo egi?​—1 Abakorinso 8:1.

3. “Ebiro by’akabi kaingi” bikwatsire bita aha bantu baingi?

³ Turi omu ‘biro by’akabi kaingi’ ebijwire ‘enaku’ n’obusaasi. (2 Timoseo 3:1-5; Zaaburi 90:10) Abantu baingi nibabonabona munonga, kandi beehwaire amatsiko. Abantu abarikurenga 800,000 nibeita buri mwaka ekirikumanyisa ngu buri butikitiki 40 omuntu omwe naayeita. Eky’obusaasi, ab’eishe-emwe abamwe beehwaire amatsiko kandi baayeita.

4. Ni baahi abarikugambwaho omu Baibuli abayehuriire kubi munonga bakenda n’okufa?

⁴ Ira bamwe aha baheereza ba Ruhanga abeesigwa bakeehurira kubi munonga ahabw’oburemeezi obu baabaire baine, baahurira barikwenda kufa. Nk’eky’okureeberaho, Yobu akaba aine obusaasi bwingi obu yaagira ati: “Amagara gangye ngatamirwe, tinkyenda kugumaho.” (Yobu 7:16; 14:13) Nabi Yona akahwamu amaani yaahika aha kugira ati: “N’ahabw’ekyo, ai Mukama, ninkweshengyereza, ihaho amagara gangye; haakiri nfe okukira okugumaho.” (Yona 4:3) Nabi Eliya nawe akeehwa amatsiko yaagira ati: “Mperere hi! Mbwenu, ai Mukama, nyita.” (1 Abagabe 19:4) Kwonka Yehova akaba naakunda abaheereza be aba abeesigwa, kandi akaba naayenda ngu bagumeho. Tarabacwereire rubanja ahabw’okugira enyehurira nk’ezo. Kureka akabahwera kugaruka kugira ekyetengo ky’okugumaho, kugira ngu bagumizemu nibamuheereza omu bwesigwa.

5. Ahabw’enki ab’eishe-emwe na banyaanyazi-iwe baine kukundwa obunaku obu?

⁵ Obunaku obu, ab’eishe-emwe baingi baine oburemeezi bw’amaani, kandi twine kubooreka rukundo. Abamwe nibajumwa nari nibahiiganisibwa. Abandi baine kugumira okurahurwa nari okugambuurwa baaba bari aha murimo. Nari baine oburuhe ahabw’okukora eshaaha nyingi nari baine emirimo erikureeta amaganya. Kandi abandi baine oburemeezi bw’amaani omu maka gaabo. Obundi bari omu bushwere n’omuntu otarikuheereza Yehova orikuguma naabacwera orubanja. Ahabw’oburemeezi obu n’obundi bwingi, nibabaasa kwehwa amatsiko, kandi batandikye kwereeba nk’abataine mugasho. N’oha orikubaasa kubahwera?

6. Rukundo ei Yehova ainiire abaheereza be neebagumya eta?

⁶ Yehova naahamiza abaheereza be ngu naabakunda, kandi ngu naija kuguma naabakunda ebiro byona. Teekateeka aha ku Abaisraeli baayehuriire obu Yehova yaabagira ati: “Okambeera enkora-mutima, waaba ow’okuheebwa ekitiinisa, naanye naakukunda,” kandi “otatiina, ahabw’okuba nkwine”! (Isaaya 43:4, 5) Nitumanya ngu buri omwe ahariitwe n’ow’omuhendo ahari Yehova. * (Reeba obugambo obw’ahansi.) Baibuli neeturaganisa eti: ‘Emanzi erikujuna. Aryakushemerererwa, aine obunanukye.’​—Zefania 3:16, 17.

7. Rukundo ei Yehova atwiniire neeshushanisibwa eta n’ey’omukazi orikwontsya? (Reeba ekishushani aha kutandika.)

 ⁷ Yehova naaraganisa kugumya abaheereza be n’okubahuumuriza n’obu baakuba baine buremeezi ki. Akagira ati: “Mwonkye, muheekwe omu rubaju, mugurukagurukibwe aha bibero. Nk’oku nyina w’omwana amurembesereza, nikwo ndibarembesereza.” (Isaaya 66:12, 13) Teekateeka aha burinzi obu omwana arikuhurira aine nyina yaaba amukikiire nari yaaba naamugurutsyagurutsya! Yehova naatukundira kimwe kandi naayenda ngu tuhurire twine oburinzi. Otarigira okubanganisa ngu tori ow’omuhendo ahari Yehova.​—Yeremia 31:3.

8, 9. Rukundo ei Kristo atwiniire neebaasa kutugumya eta?

⁸ Egi n’enshonga endiijo ahabw’enki nituhamya ngu Yehova naatukunda: “Ahakuba oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yohaana 3:16) Ekitambo kya Yesu nikituhamiza ngu naatukunda, kandi eki nikitugaruramu amaani. Baibuli neegira ngu ‘obusaasi, nari okwitwa kubi’ tibirikubaasa kututaanisa n’okukunda kwa Kristo.​—Abarooma 8:35, 38, 39.

⁹ Obumwe nitugira oburemeezi oburikutumaramu amaani omu mubiri n’omu nyehurira, nari oburikutuubya okushemererwa kwaitu omu kuheereza Yehova. Kwonka okwijuka rukundo ei Yesu atwiniire nikituhiga kugumisiriza. (Shoma 2 Abakorinso 5:14, 15.) Rukundo ei Yesu atwiniire neetuhiga kugumizamu nituheereza Yehova. Neetuhwera kutahanika, n’obu twakuhikwaho ebihikiirizi, okuhiiganisibwa, haagira owaatureebya, nari twaba nitwerarikirira.

10, 11. Ni baahi abaine obujunaanizibwa bw’okugumya ab’eishe-emwe abeetamirwe? Shoboorora.

¹⁰ Yehova naakoresa ekibiina kutwombeka omu muringo gwa rukundo. Twaba nitukunda ab’eishe-emwe, nitworeka ngu nitukunda Yehova. Nitukora kyona eki turikubaasa kubahwera kumanya ngu n’ab’omuhendo, kandi ngu Yehova naabakunda. (1 Yohaana 4:19-21) Entumwa Paulo akahandiika ati: “Mugumyane, kandi mwombekane, nk’oku murikukora.” (1 Abatesalonika 5:11) Abareeberezi tibo bonka abarikubaasa kukora eki. Buri omwe ahariitwe naabaasa kutooreza Yehova na Yesu arikuhuumuriza ab’eishe-emwe.​—Shoma Abarooma 15:1, 2.

¹¹ Bamwe omu kibiina abaine amaganya nari obujune nikibaasa kubeetengyesa kureeba abashaho abatendekirwe n’okuheebwa omubazi. (Luka 5:31) Abareeberezi n’abandi omu kibiina nibamanya ngu n’obu baraabe batatendikirwe nk’abashaho, obuhwezi n’okuhuumuriza ebi barikuha ni bikuru. Twena omu kibiina nitubaasa “kugumya abahahaire emitima, turamire abataine maani, kandi tugumisiririze boona.’ (1 Abatesalonika 5:14) Nitwenda kuteeraho kumanya oku ab’eishe-emwe barikwehurira. Tushemereire kubagumisiririza kandi tukagamba nabo omuringo ogurikuhuumuriza baaba beetamirwe. Mbwenu shi nooteeraho kugumya abandi? Noobaasa kukora ki kweyongyera kuba orikuhuumuriza, kandi orikugumya abandi?

12. Ha eky’okureeberaho eky’omwe ou ekibiina kyayorekire rukundo.

¹² Munyaanyazi-itwe omuri Europe naagira ati: “Obwire obumwe ningira ebiteekateeko by’okweita, kwonka nyine  obushagiki burungi. Ekibiina eki ndimu kijunire amagara gangye. Ab’eishe-emwe na banyaanyazi-itwe nibangaruramu amaani kandi nibankunda. N’obu bakye nibo barikumanya ngu nyine amaganya, ekibiina butoosha nikiba kyeteekateekire kumpwera. Kandi hariho omushaija n’omukazi we abari nk’abazaire bangye omu by’omwoyo. Nibandebeerera gye, kandi ahu ndikubeetengyera hoona eshaaha 24 buri izooba nibaba bariho.” Amazima gari ngu, twena titurikubaasa kuhwera omu muringo gurikwingana. Kwonka twena nitubaasa kushagika ab’eishe-emwe na banyaanyazi-itwe. * (Reeba obugambo obw’ahansi.)

13. Tushemereire kukora ki kubaasa kuhuumuriza abandi?

¹³ Hurikiza gye. (Yakobo 1:19) Nitworeka ngu twine rukundo twahurikiza omu muringo gw’embabazi. Buuza ebibuuzo ebirikubaasa kukuhwera kumanya oku ow’eishe-emwe arikwehurira. Naija kumanya ngu buzima noomufaho, kurugiirira aha ndeebeka yaawe y’aha maisho. Yaaba ariyo naagamba, gumisiriza omurekye agambe oku arikwehurira otarikumushara ekirimi. Waahurikiza gye, noobaasa kumwetegyereza, kandi eki nikibaasa kumuhwera kukwesiga. Nikiija kumworobera kuhurikiza ebi orikumugambira waaba nooteeraho kumuhwera. Buzima waaba noofayo aha bandi, noobaasa kubahuumuriza.

14. Ahabw’enki twine kwetantara kucwera orubanja oine amaganya?

¹⁴ Otamucwera orubanja. Omuntu oine amaganya naija kweyongyera kwehurira kubi yaakimanya ngu turiyo nitumucwera orubanja. Ekyo kyabaho, nikibaasa kutugumira kumuhwera. Baibuli neegira eti: “Hariho orahukiiriza ebigambo, ebirikucumita nka rurara, kwonka orurimi rw’omunyabwengye rutamba.” (Enfumu 12:18) N’obu turaabe tutarikubaasa kukigyenderera kukora kubi omuntu oine amaganya ahabw’ebigambo byaitu, kwonka nitubaasa kumureetera obusaasi bwingi twagamba tutabandize kuteekateeka. Ow’eishe-emwe kubaasa kutwesiga, twine kumuhwera omu muringo gw’embabazi turikuteeraho kweta omu mbeera ye.​—Matayo 7:12.

15. Ni bikoreso ki ebirikubaasa kutuhwera omu kuhuumuriza abandi?

¹⁵ Koresa Ekigambo kya Ruhanga kuhuumuriza abandi. (Shoma Abarooma 15:4, 5.) Baibuli neeruga ahari “Ruhanga mukama w’okugumisiriza n’okuhuumuza,” n’ahabw’ekyo tikirikututangaaza kureeba ngu erimu okuhuumuriza kwingi. Kandi twine Watch Tower Publications Index n’Akatabo Akarikuhwera omu Kucondooza ak’Abajurizi ba Yehova. Twakoresa ebikoreso ebi, nitubaasa kutunga ebyahandiikirwe n’ebitabo ebiraatuhwere omu kuhuumuriza n’okugumya ab’eishe-emwe na banyaanyazi-itwe.

16. Ni mitwarize ki erikubaasa kutuhwera kugumya omuntu oine amaganya?

¹⁶ Gira embabazi kandi otwaze mporampora. Yehova ni “Tataitwe ow’okusaasira, kandi Ruhanga ow’okuhuumuza kwona,” kandi ainiire abaheereza be “embabazi.” (Shoma 2 Abakorinso 1:3-6; Luka 1:78; Abarooma 15:13) Paulo akatuteeraho eky’okureeberaho  kirungi omu kworeka embabazi ahakuba akaba naatooreza Yehova. Niyo shonga ahabw’enki yaabaasize kugira ati: “Kwonka tukatwaza gye omuriimwe, nk’oku omurezi arera abaana be. N’ahabw’ekyo, ahabw’okubasaasibwa munonga, tukashemerererwa okubaha, ti ngiri ya Ruhanga yonka, kureka n’okuhayo amagara gaitu, ahabw’okuba mukahinduka abaitu ab’aha mara.” (1 Abatesalonika 2:7, 8) Twagira esaasi kandi tukatwaza gye nka Yehova, nitubaasa kuhuumuriza ow’eishe-emwe omu muringo oguhikire.

17. Twine kugira miteekateekyere ki aha b’eishe-emwe eraatuhwere kubagumya?

¹⁷ Otateekateeka ngu ow’eishe-emwe ahikiriire. Gira emiteekateekyere mirungi. Waateekateeka ngu ab’eishe-emwe bahikiriire, noobaasa kwereebya. (Omubuurizi 7:21, 22) Ijuka ngu Yehova tarikutushaba kukora eki tutarikubaasa. N’ahabw’ekyo twine kugumisirizana. (Abaefeso 4:2, 32) Titurikwenda kureetera ab’eishe-emwe kuteekateeka ngu tibarikukora bingi nari kubagyeragyeranisa n’abandi. Omu mwanya gw’ekyo, nitubagumya kandi tubasiima ahabw’ebirungi ebi barikukora. Eki nikibaasa kubahwera kugira okushemererwa baaba nibaheereza Yehova.​—Abagalatia 6:4.

18. Ahabw’enki tushemereire kwombeka abandi omu muringo gwa rukundo?

¹⁸ Buri muheereza wa Yehova n’ow’omuhendo ahariwe na Yesu. (Abagalatia 2:20) Nitukunda munonga ab’eishe-emwe na banyaanyazi-itwe, n’ahabw’ekyo twine kubatwariza gye, turikusherura “ebirikureeta obusingye n’okwombekana.” (Abarooma 14:19) Buzima twine ekihika ky’okureeba buri omwe, ataine kirikumumaramu amaani omu Paradiso! Nihaija kuba hatariyo ndwara n’entaro. Abantu tibarikwija kugaruka kufa ahabw’ekibi kya Adamu, nihaija kuba hatariho kuhiiganisibwa, oburemeezi omu ka, nari ebirikutwerarikiriza. Aha kuhendera kw’emyaka rukumi, abantu boona nabaija kuba abahikiriire. Abo abaraagume bari abeesigwa omu kigyezo ky’aha muheru, nibaija kuba abaana ba Yehova omu nsi, kandi nibaija kuheebwa obusingye “bw’abaana ba Ruhanga obw’ekitiinisa.” (Abarooma 8:21) N’ahabw’ekyo twena ka tumaririire kugirirana rukundo erikwombeka, reero kitubaasise kuhwerahwerana kubaasa kuhonokaho tukaza omu nsi ensya ey’omuhendo.