1. Niki ekirikubaasa kutureetera kugira okweyendeza?

AHABW’ENKI kitoorobi kugyendera aha bi turikushoma omu Kigambo kya Ruhanga? Enshonga emwe eri ngu twaba nitwenda kukora ekihikire, twine kuba abacureezi. Omu biro ebi “eby’aha mperu” kigumire kuguma turi abacureezi , ahabw’okugira ngu abantu baingi n’abarikwekunda, “abakunzi b’empiiha, abanyamaryo, abarikwemanya,” kandi “abatarikweyangisa.” (2 Timoseo 3:1-3) Itwe abaheereza ba Ruhanga, nitumanya ngu emitwarize egi ni mibi, kwonka obumwe abarikutwaza batyo nibeereeba nk’abasinguzi kandi abaine okushemererwa. (Zaaburi 37:1; 73:3) Nitubaasa n’okwebuuza tuti: ‘N’eky’oburyo kwebembeza ebyetengo by’abandi kukira ebyaitu? Naatwaza omu muringo gw’obucureezi, abantu nibaija kuguma nibampa ekitiinisa?’ (Luka 9:48) Twikiriza emiteekateekyere y’ensi ey’okweyendeza, nitubaasa kushiisha omukago gwaitu n’ab’eishe-emwe, kandi kigumire abandi kutureeba nk’Abakristaayo. Kwonka twayegyera aha by’okureeberaho by’abaheereza ba Yehova abacureezi, kandi tukabatooreza nitwija kutunga emigisha.

2. Nitwegyera ki aha baheereza ba Ruhanga aba ira?

 ² Niki ekyahwereire abaheereza ba Yehova abeesigwa aba ira kuba banywani be? Bakakora ki kubaasa kumushemeza? Bakaiha nkahi obumanzi bw’okukora ekihikire? Twashoma kandi tukateekateeka aha ku baatwarize, okwikiriza kwaitu nikuhama.

3, 4. (a) Yehova naatwegyesa ata? (b) Ahabw’enki okumanya kwonka kutarikumara kubaasa kutunga okwikiriza kuhami?

³ Yehova naatuha ebirikwetengyesa kuhamya okwikiriza kwaitu. Naatuha obuhabuzi burungi kandi atutendeka kurabira omu Baibuli, omu bitabo by’ekibiina, omukura gwaitu jw.org, JW Broadcasting, n’omu nteerane enkye n’empango. Kwonka Yesu akashoboorora ngu okumanya bumanya tikirikumara. Akagira ati: ‘Eby’okurya byangye nikwo kukora eki owantumire akunda n’okuhikiiriza omurimo gwe.’​—Yohaana 4:34.

⁴ Yesu akaba naatwara okukora ebi Ruhanga arikukunda nk’okurya eby’okurya. Twarya eby’okurya by’ekiriisa nibituhwera kwehurira gye kandi nibyombeka omubiri gwaitu. Omu muringo nigwo gumwe, okukora ebi Yehova arikukunda nikitureetera obugwagye kandi nikihamya okwikiriza kwaitu. Nk’eky’okureeberaho, oraagireho omu ruteerane rw’okubuurira otaine maani, kwonka bwanyima y’okubuurira okagaruka omuka oshemereirwe kandi oine amaani?

5. Nitugasirwa tuta twaba abanyabwengye?

⁵ Twakora eki Yehova arikutwenza nitworeka ngu twine obwengye. (Zaaburi 107:43) Kandi abaine obwengye nibo barikutunga ebirungi bingi. “Ohiiriirwe n’omuntu ozoora obwengye, kandi n’omuntu otunga okwetegyereza. . . . N’omuti gw’amagara aha barikubukwata, n’abarikubuhamya nibeetwa abahiiriirwe.” (Enfumu 3:13-18) Yesu akagira ati: “Ku muraabe nimumanya ebyo, muhiiriirwe mwaba nimubikora.” (Yohaana 13:17) Abeegi be bakaba nibaija kushemererwa baateeraho kuguma nibakora eki Yesu yaabaragiire. Bakaba baine kukuratira ebi yaayegyeise n’oku yaabaire naatwaza.

6. Ahabw’enki twine kugumizamu nitugyendera aha bi turikwega?

⁶ Obunaku obu, twine kugumizamu nitugyendera aha ebi turikwega. Teekateeka ahari makanika oine ebikoreso byona ebi arikwetenga, kandi orikumanya kukanika. Ebintu ebi nibibaasa kumuhwera kuba makanika murungi yaaba naabikoresa. Naabaasa kuba ari omuhangu, kwonka naaba aine kuguma naakoresa okutendekwa oku yaatungire kubaasa kuguma ari makanika murungi. Nikyo kimwe, obu twatandika kwega amazima, tukashemererwa ahabw’okugyendera aha bi twayegire omu Baibuli. Kwonka kubaasa kutunga okushemererwa okwabuzima, twine kugumizamu nitugyendera aha bi Yehova atwegyeise.

7. Twine kukora ki kubaasa kwegyera aha by’okureeberaho by’omu Baibuli?

⁷ Omu kicweka eki, nituza kureeba embeera ezimwe ezirikubaasa kuturemesa kuguma turi abacureezi. Nituza kwega oku abaheereza ba Ruhanga abeesigwa ira baagumire bari abacureezi. Kwonka twine kukora ekirikukira aha kushoma ebirikubakwataho. Tushemereire kubiteekateekaho kandi tukabigyenderaho.

8, 9. Niki eki turikwega omu Ebyakozirwe 14:8-15 aha bikwatiraine n’obucureezi bwa Paulo? (Reeba ekishushani aha kutandika.)

⁸ Ruhanga naayenda ngu abantu boona  “bajunwe, bamanyire kimwe amazima.” (1 Timoseo 2:4) Nitureeba tuta abantu abatakeegire amazima? Entumwa Paulo akabuurira Abayudaaya abaabaire baamanyire ebimwe ebirikukwata ahari Yehova. Kwonka akabuurira n’abo abaabaire nibaramya baaruhanga b’ebishuba. Eki kikagyeza obucureezi bwe. Mu muringo ki?

⁹ Paulo omu rugyendo rwe rw’obumiisani orw’okubanza akagyenda na Barunaba omu rurembo rwa Lusitura. Abantu ba Lukaonia baakabatwara nk’abantu b’amaani, kandi baabeeta amaziina ga baaruhanga baabo nka Zeu na Herume. Mbwenu shi bakaikiriza kuhimbisibwa? Mbwenu shi bakareeba ngu hati baatwarizibwa gye kukira oku baabahiiganiise omu ndembo ibiri ezi baabandize kuzamu? Bakateekateeka ngu ekyo shi nikiija kuhwera abantu baingi kuhurikiza amakuru marungi? Ngaaha! Bakagira ekiniga kingi munonga kandi bagamba n’eiraka rihango nibagira bati: “N’enki ekirikubakoresa ebyo? Naitwe turi abantu nkaimwe.”​—Ebyakozirwe 14:8-15.

10. Ahabw’enki Paulo na Barunaba batarateekateekire ngu nibakira Abalukaonia?

¹⁰ Obu Paulo na Barunaba baagira ngu naitwe turi abantu nkaimwe, bakaba nibamanyisa ngu nabo tibahikiriire. Kwonka bakaba batarikumanyisa ngu nabo nibaramya baaruhanga b’ebishuba. Paulo na Barunaba bakaba batoorainwe Ruhanga kukora nk’abamiisani. (Ebyakozirwe 13:2) Bakaba bashukirweho amajuta, kandi baine amatsiko g’omuhendo. Kwonka egyo ekaba etari nshonga y’okubareetera kwetwara nk’abarikukira abandi. Bakeetegyereza ngu abantu abo nabo nibabaasa kutunga amatsiko g’okuza omu iguru, baaheza kwikiriza amakuru marungi.

11. Nitubaasa kuba tuta abacureezi nka Paulo omu kubuurira?

¹¹ Teekateeka aha muringo gumwe ogu turikubaasa kworekamu ngu turi abacureezi nka Paulo. Titurikwenda kuteekateeka ngu omurimo gwaitu gw’okubuurira nari ebintu ebi Yehova atubaasiise kukora nibitureetera kuba ab’omutaano. Nitubaasa kwebuuza tuti: ‘Ab’omu kicweka eki ndikubuuriramu mbaineho miteekateekyere ki? Ninshoorora omu bantu?’ Omu nsi yoona, Abajurizi ba Yehova nibateeraho kusherura abo abarikwenda kuhurikiza amakuru marungi. Abamwe nibakora n’amaani kwega orurimi rusya nari entwaza y’abantu abu barikureeba nk’ab’ahansi. Kwonka tibarikwereeba nk’abarikukira abandi. Omu mwanya gw’ekyo, nibateeraho kwetegyereza buri omwe kubaasa kuhwera baingi nk’oku kirikubaasika kukunda amakuru marungi g’Obukama.

12. Epafura akooreka ata ngu buzima naafayo aha bandi?

¹² Omuringo ogundi ogu turikworeka ngu turi abacureezi n’okushabira ab’eishe-emwe na banyaanyazi-itwe, “abaahairwe okwikiriza kw’obuguzi bwingi nk’okwaitu.” (2 Petero 1:1) Eki nikyo Epafura yaakozire. Baibuli neemugambaho emirundi eshatu yonka. Obu Paulo yaabaire akomiirwe omuri Rooma, akahandiikira Abakristaayo b’omuri Kolosai, arikugamba ahari Epafura ati: “Oyezirika obutoosha kubaijuka omu kushaba kwe.” (Abakolosai 4:12) Epafura akaba naamanya gye ab’eishe-emwe, kandi arikubafaho munonga. Paulo akamweta “embohe mugyenzi” we, ekirikumanyisa ngu Epafura nawe akaba aine oburemeezi obwe. (Filemooni 23)  Kwonka nabwo akaguma naafayo aha byetengo by’abandi, kandi yaabahwera. Epafura akashabira ab’eishe-emwe, naitwe nitubaasa kukora nikyo kimwe nangwa turikugamba n’amaziina gaabo. Okushaba nk’oku kwine amaani maingi.​—2 Abakorinso 1:11; Yakobo 5:16.

13. Noobaasa kutooreza ota Epafura waaba nooshaba?

¹³ Teekateeka aha muntu ou orikubaasa kushabira orikugamba eiziina rye. Noobaasa kuba noomanya banywani baawe nari amaka againe oburemeezi. Obundi baine kucwamu ebigumire nari kwangira okwohibwa. Noobaasa n’okushabira ab’eishe-emwe abu amaziina gaabo gari aha jw.org ahansi y’omutwe, “Jehovah’s Witnesses Imprisoned for Their Faith.” (Za aha NEWSROOM > LEGAL DEVELOPMENTS.) Noobaasa n’okushabira abafeereirwe abakundwa baabo, abaherize kuhikwaho ebihikiirizi nari entaro, n’abaine oburemeezi bw’esente. Hariho ab’eishe-emwe n’abanyaanyazi-itwe baingi abu twine kushabira. Twabashabira, nitworeka ngu titurikuta omutima aha byetengo byaitu byonka, kureka n’eby’abandi. (Abafilipi 2:4) Yehova naagarukamu okushaba nk’okwo.

14. Ahabw’enki turikugira ngu Yehova niwe arikukirayo kuhurikiza?

¹⁴ Omuringo gwa kashatu gw’okworekamu ngu turi abacureezi n’okuhurikiza gye abandi. Ebiri omu Yakobo 1:19 nibituhiga ngu ‘turahukye kuhurira.’ Yehova niwe arikukirayo kuhurikiza. (Okutandika 18:32; Yoshua 10:14) Nk’eky’okureeberaho, shoma aha kugaaniira kwe na Musa okuri omu Okuruga 32:11-14. (Kishome.) Yehova akaikiriza Musa kumugambira oku arikwehurira, n’obu kiraabe kyabaire kitarikumwetengyesa kumwebuuzaho. Mbwenu shi haine orikubaasa kugumisiriza kuhurikiza omuntu owaabaire yaakozireho enshobe reero akuratira obuhabuzi bwe? Yehova we naahurikiza abantu boona abarikumushaba baine okwikiriza.

15. Nitubaasa kutooreza tuta Yehova omu kuha abandi ekitiinisa?

 ¹⁵ Noobaasa kwebuuza: ‘Yehova ku araabe ari omucureezi arikuhurikiza abantu nk’oku yaahurikiize Abrahamu, Rakeeli, Musa, Yoshua, Manoa, Eliya, na Hezekia, naanye tinyine kuteeraho kukora nikyo kimwe? Nimbaasa kwongyera kuha ab’eishe-emwe ekitiinisa ndikuteeraho kuhurikiza obuhabuzi bwabo, kandi nkabugyenderaho kyaba nikibaasika? Hariho ow’eishe-emwe omu kibiina nari omu ka yangye ou ndikubaasa kuteeraho kuhurikiza? Nimbaasa kugira eki naakora kumuhwera?’​—Okutandika 30:6; Abaramuzi 13:9; 1 Abagabe 17:22; 2 Obusingye 30:20.

16. Omugabe Daudi akatwaza ata obu Shimei yaamutwariza kubi?

¹⁶ Kandi obucureezi nibutuhwera kwerinda, abandi baatutwariza kubi. (Abaefeso 4:2) Nitureeba ogwo owaabaasize kukora ekyo omu 2 Samueli 16:5-13. (Kishome.) Shimei, omunyabuzaare w’omugabe Saulo, akajuma Daudi n’abaheereza be. Daudi akaba naabaasa kuzibira Shimei, kwonka omu mwanya gw’ekyo, omu bucureezi akeemera okujumwa okwo. Niki ekyahwereire Daudi kugira omutwarize gw’okwezibira? Nitutunga eky’okugarukamu twashwijuma Zaaburi eya kashatu.

17. Niki ekyahwereire Daudi kwezibira, kandi nitubaasa kumutooreza tuta?

¹⁷ Daudi akahimba ebiri omu Zaaburi eya kashatu obu omutabani Abusolomu yaabaire naayenda kumwita. Omu bwire obwo, nibwo Shimei yaatwariza kubi Daudi, kwonka akatunga obumanzi bw’okuguma aikaikaine. Mu muringo ki? Omuri Zaaburi 3:4, nitushoma ebigambo bya Daudi ebirikugira biti: “Ntakira Mukama n’eiraka ryangye, nawe angarukamu naayema aha rushozi rwe orurikwera.” Twatwarizibwa kubi, twine kushaba nk’oku Daudi yaakozire. Reero Yehova naija kutuha omwoyo gwe gurikwera kugira ngu tugumisirize. Mbwenu shi noobaasa kweyongyera kugira omutwarize gw’okwezibira nari kusaasira abarikukutwariza kubi? Noohamya ngu Yehova naakufaho waaba noobonabona, kandi ngu naija kukuhwera akuhe n’emigisha?

18. Noija kugasirwa ota waagyendera aha buhabuzi bwa Yehova?

¹⁸ Twakora ekihikire, nitwija kuba abanyabwengye, kandi Yehova naija kutuha emigisha. Enfumu 4:7, nihagira hati: “Obwengye n‘ekintu kikuru.” N’obu obwengye buraabe niburugiirira aha kumanya, kwonka nibukira aha kumanya ebihikire. Obwengye nibutwariramu ebi turikucwamu. Nangwa n’ebimunyu nibyoreka obwengye birikwebiikira eby’okurya by’okukoresa omu bwire bw’enjura. (Enfumu 30:24, 25) Kristo, orikwetwa “obwengye bwa Ruhanga,” butoosha naakora ebirikushemeza Ishe. (1 Abakorinso 1:24; Yohaana 8:29) Ruhanga naija kutuha emigisha twaguma turi abacureezi, kandi twayoreka obwengye turikucwamu kukora ekihikire. (Shoma Matayo 7:21-23.) N’ahabw’ekyo gumizamu nooteeraho kureetera ekibiina kuba omwanya murungi gw’okuheererezamu Yehova omu bucureezi. Nikitwara obwire n’okugumisiriza kuta omu nkora ebi turikumanya ngu bihikire. Kwonka twakora ekyo nikyoreka ngu turi abacureezi, kandi nitwija kugira okushemererwa hati n’ebiro byona.