1, 2. (a) Omuringo ogu Yehova arikutwarizamu abantu nigutaana guta n’ogwa bantu abaine obushoboorozi? (b) Nituza kugamba ahari ki omu kicweka eki?

ABAINE obushoboorozi nibakira kwekuriza aha bandi barikubatwariza kubi. (Matayo 20:25; Omubuurizi 8:9) Kwonka Yehova tikwo arikutwaza! N’obu araabe ari ow’Obushoboorozi Bwona, kandi orikukirayo amaani omu nsi n’omu iguru, kwonka naafayo aha bantu abatahikiriire. N’omunyambabazi kandi naafayo aha ku turikwehurira n’ebyetengo byaitu. Naamanya ngu tituhikiriire kandi twine obweremwa, n’ahabw’ekyo tarikutushaba ebi tutarikubaasa kukora.​—Zaaburi 103:13, 14.

² Omu Baibuli nitwega oku Yehova arikufayo aha bantu be. Ka tureebe eby’okureeberaho bishatu ebi: Eky’okubanza, oku yaahwereire Samueli kugambira Omunyamurwa Omukuru Eli obutumwa bw’okucwa orubanja. Ekya kabiri, oku yaagumisiririize Musa obu yayeehurira nk’otarikubaasa kwebembera eihanga rya Israeli kuruga Misri. Kandi ekya kashatu, oku  Yehova yaafiireyo aha Abaisraeli obu baabaire nibaruga Misri. Eby’okureeberaho ebi nibitwegyesa ki ahari Yehova, kandi nitubaasa kumutooreza tuta?

3. Ni kintu ki eky’omutaano ekyabaireho ekiro kimwe obu Samueli yaabaire abyami, kandi nitubaasa kwebuuza ki? (Reeba ekishushani aha kutandika.)

³ Samueli akatandika kuheereza aha hekalu akiri muto munonga. (1 Samueli 3:1) Ekiro kimwe, haine ekintu ky’omutaano ekyabaireho abyami. * (Reeba obugambo obw’ahansi.) (Shoma 1 Samueli 3:2-10.) Akahurira omuntu arikweta eiziina rye. Samueli akateekateeka ngu omunyamurwa omukuru Eli niwe arimweta. N’ahabw’ekyo akaimuka yairuka yaaza ahu Eli yaabaire ari yaamugira ati: “Naija, ahakuba waanyeta.” Kwonka Eli akamugira ati: “Tinaakweta.” Bwanyima y’eki kubaho emirundi eshatu, Eli akamanya ngu Ruhanga niwe arikweta Samueli. N’ahabw’ekyo Eli akagambira Samueli eki araagarukyemu Yehova yaagaruka kumweta, kandi nikyo yaakozire. Ahabw’enki Yehova ataramanyiise Samueli ngu niwe arikumweta? Baibuli terikworeka ahabw’enki. Kwonka Yehova naabaasa kuba yaakozire ekyo ahabw’okufayo aha nyehurira za Samueli.

4, 5. (a) Samueli akakora ki Yehova ku yaamuhaire obutumwa bw’okugambira Eli? (b) Kandi eki nikitwegyesa ki ahari Yehova?

⁴ Shoma 1 Samueli 3:11-18. Yehova akaba aragiire abato okuha ekitiinisa abantu abakuzire, okukira munonga abaine obushoboorozi. (Okuruga 22:28; Abaleevi 19:32) N’ahabw’ekyo kigumire kuteekateeka ngu omwojo muto nka Samueli akaba naabaasa kwimuka omu kasheeshe, reero aze kugambira Eli butunu obutumwa bw’okucwa orubanja. Baibuli neeyoreka ngu Samueli ‘akatiina kugambira Eli ebi yaayorekirwe.’ Kwonka, Ruhanga akamanyisa Eli ngu niwe arikweta Samueli, kandi eki kikareetera Eli kugambira Samueli kutagira ki yaamushereka aha bi Ruhanga araamugambire. Samueli akahurikiza Eli “yaamugambira byona.”

⁵ Obutumwa obu bukaba butari busya, ahakuba enyimaho “omuntu wa Ruhanga” akaba yaagambiire Eli obutumwa nk’obu. (1 Samueli 2:27-36) Eki nikitwegyesa ngu Yehova n’omunyabwengye kandi ngu naafayo.

6. Nitwegyera ki aha muringo ogu Ruhanga yaahwereiremu Samueli?

⁶ Ori omunyeeto? Kyaba nikwo kiri, ebyahikire ahari Samueli nibituhwera kumanya ngu Yehova naayetegyereza oburemeezi n’enyehurira zaawe. Obundi oine enshoni nari nikikugumira kubuurira abantu bakuru nari okuba ow’omutaano aha b’orwingano rwawe. Noobaasa kuhamya ngu Yehova naayenda kukuhwera. N’ahabw’ekyo mushabe kandi omugambire ekikuri aha mutima. (Zaaburi 62:8) Teekateeka  aha by’okureeberaho ebiri omu Baibuli eby’abo abaabaire bari bato nka Samueli. Kandi ogambe n’ab’eishe-emwe ab’orwingano rwawe nari abarikukukira emyaka abaasingwire oburemeezi nk’obu oine. Nibabaasa kukugambira emiringo ei Yehova yaabahwereiremu ei baabaire batarikuteekateeka.

7, 8. Yehova akooreka ata ngu naafayo aha nyehurira za Musa?

⁷ Obu Musa yaabaire aine emyaka 80, Yehova akamuha obujunaanizibwa bw’amaani obw’okucungura Abaisraeli omu bukwatwa omuri Misri. (Okuruga 3:10) Obujunaanizibwa obu, bukareetera Musa okwerarikirira, ahakuba akaba atwire ari omuriisa w’entaama omuri Midiani kumara emyaka 40. Musa akagira ati: “Niinye oha kuturukirira Faraho, nkaiha Abaisraeli omuri Misri?” Yehova akamuhamiza ati: “Buzimazima ndyaba nkwine.” (Okuruga 3:11, 12) Yehova akagaruka yaamuraganisa ngu abakuru b’Abaisraeli nibaija kumuhurikiza. Kwonka Musa akagaruka yaabuuza ati: Kandi shi ku baakwanga ‘kunyikiriza nari kumpurira?’ (Okuruga 3:18; 4:1) Musa akaba ari nk’orikugira ngu Yehova naabaasa kuba agwire! Kwonka Yehova akamugumisiriza, kandi yaamuha n’amaani g’okukora eby’okutangaaza. Nangwa Musa niwe muntu w’okubanza omu Baibuli owaahairwe amaani nk’aga.​—Okuruga 4:2-9, 21.

⁸ Bwanyima y’ebyo byona, Musa akagaruka yaayekwatsa endiijo nshonga. Akagira ngu tarikubaasa kugamba gye. Ruhanga akamugira ati: “Ndyaba ndi hamwe n’akanwa kaawe, nkuhabure ebi origamba.” Mbwenu shi Musa akarugaho yaikiriza kugyenda? Ngaaha, akashaba Ruhanga ngu ayohereze omuntu ondiijo! Bwanyima Yehova akagirira Musa ekiniga. Kwonka ahabw’okugira ngu akaba naafayo aha nyehurira ze, akoohereza Arooni kuba niwe yaamugambirira.​—Okuruga 4:10-16.

9. Okugumisiriza n’embabazi ebi Yehova yaayorekire Musa bikamuhwera bita kuba omwebembezi murungi?

 ⁹ Mbwenu shi eki nikitwegyesa ki ahari Yehova? Ahabw’okugira ngu Yehova niwe w’Obushoboorozi Bwona, akaba naabaasa kukoresa amaani ge kutiinatiinisa Musa kumworobera. Kwonka, Yehova akagumisiriza omuheereza we omucureezi, yaamugirira embabazi, kandi yaamuhamiza ngu naija kuguma nawe. Mbwenu shi ekyo kikakora? Eego! Musa akaba omwebembezi emanzi ow’abaheereza ba Ruhanga. Akateeraho kuba omucureezi n’okutwariza gye abandi, nk’oku Yehova yaamutwariize.​—Okubara 12:3.

10. Nitugasirwa tuta twafayo aha bandi nka Yehova?

¹⁰ Eki nitukyegyeraho ki obunaku obu? Waaba oine omukazi, ori omuzaire, nari omureeberezi, nooba oine obushoboorozi buringaniire aha bandi. Ahabw’enshonga egi, ni kikuru kutooreza Yehova, orikufayo aha mukazi waawe, abaana baawe, nari ab’omu kibiina orikubagirira embabazi kandi okabagumisiriza. (Abakolosai 3:19-21; 1 Petero 5:1-3) Waatooreza Yehova Ruhanga na Yesu Kristo, abandi nibaija kworoberwa kugamba naiwe, kandi noija kubagaruramu amaani. (Matayo 11:28, 29) Kandi noija n’okubabeera eky’okureeberaho kirungi.​—Abaheburaayo 13:7.

11, 12. Yehova akahwera ata Abaisraeli kuhurira baine oburinzi obu baabaire nibaruga Misri?

¹¹ Abaisraeli abarikurenga obukaikuru nka bushatu nibo baarugire Misri omu mwaka gwa 1513 Yesu atakazairwe. Omuri abo, hakaba harimu abaana, abakuzire omu myaka, n’abarwaire nari ebimuga. Abantu nk’aba boona bakaba nibeetenga omwebembezi orikubakunda kandi orikubeetegyereza. Kandi oku nikwo Yehova yaayebembeire Abaisraeli arikukoresa Musa. N’ekyarugiremu, tibaratiinire kuruga omu mwanya ogu baabaire bamanyiriire kuza ahu batarikumanya.​—Zaaburi 78:52, 53.

¹² Niki ekyahwereire Abaisraeli kutatiina kandi bakahurira baine oburinzi? N’ahabw’okugira ngu Yehova akabatebeekanisa nk’eihe eririkuza kurwana orutaro obu baabaire nibaruga Misri. (Okuruga 6:26) Ahabw’okugira ngu bakaba batebeekanisiibwe gye, bakabaasa kwetegyereza ngu buzima, Ruhanga waabo niwe abeebembeire. Yehova akagaruka yaakoresa ‘n’ekicu’ nyomushana n’ekyererezi ky’omuriro omu kiro  kubaijutsya ngu ari nabo, kubeebembera n’okubarinda. (Zaaburi 78:14) Kandi eki kikahwera eihanga ryona kwemera ebyabaire nibiza kubaho.

13, 14. (a) Yehova akajuna ata Abaisraeli aha Nyanja Erikutukura? (b) Yehova akooreka ata ngu aine amaani kukira Abanyamisri?

¹³ Shoma Okuruga 14:19-22. Teera akashushani ori n’Abaisraeli. Mwatangatangirwa ahagati. Eihe ry’Abanyamisri riri enyima yaanyu, kandi Enyanja Erikutukura eri omumaisho gaanyu. Reero Ruhanga agira eki yaakora. Enyomyo y’ekicu eyaaba eri omumaisho eza ahagati yaanyu n’Abanyamisri. Bo bari omu mwirima kwonka imwe nimwakirwa ekyererezi omu muringo gw’eky’okutangaaza! Bwanyima oreeba Musa naagorora omukono gwe aha nyanja, kandi omuyaga gw’amaani kuruga omu burugwa izooba gwija, gubaganisamu enyanja kabiri okuhika seeri. Reero iwe, eka yaawe, n’amatungo gaanyu n’abandi boona abu mwine muraba ahansi ah’eitaka ry’enyanja. Eky’okutangaaza, ahansi tihariho byondo kandi tiharikuterera. Hoomire kandi hahami, n’ahabw’ekyo kyorobi kugyenderaho. Kandi mwena otwariiremu n’abarikugyenda mpora muhika seeri.

¹⁴ Shoma Okuruga 14:23, 26-30. Ebi byona bikiba nibibaho, Faraho ow’amaryo maingi agumizamu ababingire. Reero Musa agaruka agorora omukono gwe aha nyanja, kandi ebisiika bibiri by’amaizi bishenyuka. Amaizi gaacwekyereza Faraho n’eihe rye ryona. Kandi tihaine n’omwe owaahonokaho.​—Okuruga 15:8-10.

15. Ebi Yehova yaakoreire Abaisraeli nitubyegyeraho ki?

 ¹⁵ Ebyabaireho nitubyegyeraho ekintu ekindi ahari Yehova. Ni Ruhanga w’obuteeka, kandi omutwarize ogu nigutuhwera kuhurira twine oburinzi. (1 Abakorinso 14:33) Nk’omuriisa orikukunda entaama ze kandi akazireeberera, Yehova naafayo aha bantu be arikugira eki yaakoraho kubahwera. Naabarinda abazigu baabo. Eki nikituhamiza kandi kituhuumuriza obu turi haihi n’emperu y’obusingye obu.​—Enfumu 1:33.

16. Nitugasirwa tuta twashwijuma oku Yehova yaacungwire Abaisraeli?

¹⁶ N’obunaku obu, Yehova naafayo aha bantu be nk’ekibiina. Naabahwera kuguma baine omukago murungi nawe, kandi naabarinda abazigu baabo. Kandi naija kugumizamu kukora ekyo n’omu kubonabona kwingi okuri haihi kubaho. (Okushuuruurwa 7:9, 10) N’ahabw’ekyo abaheereza ba Ruhanga boona yaaba bato, bakuru, baine obumuga nari batabwine, tibarikwija kutiina omu bwire bw’okubonabona kwingi. * (Reeba obugambo obw’ahansi.) Omu mwanya gw’okugira obwoba, nibaija kwijuka ebigambo bya Yesu ebi: “Mureebe ahaiguru, mwimutsye emitwe yaanyu, ahakuba okucungurwa kwanyu kuryaba kuri haihi.” (Luka 21:28) N’obu baraataahirirwe Googi, ekibiina ky’amahanga ekiine amaani agarikukira aha ga Faraho, abaheereza ba Ruhanga nibaija kumwesiga kubarinda. (Ezekieli 38:2, 14-16) Ahabw’enki? Ahakuba nibamanya ngu Yehova tarikuhinduka. Naija kugaruka kworeka ku ari Omujuni orikukunda abantu be kandi akabafaho.​—Isaaya 26:3, 20.

17. (a) Nitubaasa kugasirwa tuta twashwijuma ebirikworeka oku Yehova yaahwereire abantu be? (b) Nituza kwega ki omu kicweka ekirikukurataho?

¹⁷ Omu kicweka eki, twareeba eby’okureeberaho bimwe oku Yehova aine embabazi, oku arikufaho aha bantu, oku arikubeebembera, n’oku arikubacungura. Waaba nooteekateeka aha by’okureeberaho ebi, teeraho kumanya ekintu kisya ekirikukwata ahari Yehova obundi eki obaire otarikumanya. Waayeyongyera kwega aha mitwarize ya Yehova noija kweyongyera kumukunda n’okuhamiza kimwe okwikiriza kwawe. Omu kicweka ekirikukurataho, nitwija kwega oku turikubaasa kutooreza Yehova turikufayo aha b’omu maka gaitu, ab’eishe-emwe, n’abu turikubuurira.