1. Yehova naatwara ata abantu abarikwebundaaza? Shoboorora.

YEHOVA naakunda abantu abarikwebundaaza. Nibo bonka abarikubaasa kugira omukago murungi nawe. Kwonka, ‘ab’amaryo naabamanyira hare.’ (Zab. 138:6) Twena nitwenda kushemeza Yehova kandi nitwenda ngu atwirire haihi, n’ahabw’ekyo tushemereire kwega kwebundaaza.

2. Nituza kushwijuma ki omu kicweka eki?

² Omu kicweka eki, nituza kushwijuma eby’okugarukamu by’ebibuuzo bishatu ebi: (1) Okwebundaaza niki? (2) Ahabw’enki twine kuteeraho kugira omutwarize ogu? (3) Ni bintu ki ebirikubaasa kutureetera kugumirwa kwebundaaza? Nk’oku turikuza kureeba, twagira omutwarize gw’okwebundaaza, nitushemeza Yehova kandi naitwe nitugasirwa.​—Enf. 27:11; Isa. 48:17.

3. Okwebundaaza niki?

³ Okwebundaaza nikimanyisa okwecureeza n’okutagira omwetunguuro nari omwepanko. Baibuli neeyoreka ngu omuntu orikwebundaaza naayetegyereza ngu Yehova naamukira, kandi naaha n’abandi ekitiinisa. Kandi naayetegyereza ngu abandi nibamukira omu miringo etari emwe n’emwe.​—Fil. 2:3, 4.

4-5. Ahabw’enki okwebundaaza gutari mutwarize ogu turikureebera aha ntwaza y’omuntu nari endeebeka ye?

⁴ Abantu abamwe nibeetwara nk’abarikwebundaaza. Nibabaasa kuba bahunami kandi baine enshoni. Nari nibabaasa kuba bari abanyambabazi nari barikugamba gye ahabw’oku baakuziibwe. Kwonka nibabaasa kuba baine obutigi nari omwepanko  gw’omu mutima. Juba nari bwanyima, abantu nk’abo nibaija kworeka kyenyine ekiri omu mutima gwabo.​—Luk. 6:45.

⁵ Aha rubaju orundi, abantu emanzi abatarikutiina kugamba eki barikuteekateeka tikirikumanyisa ngu baine omwetunguuro nari amaryo. (Yoh. 1:46, 47) Kwonka, abaine obumanzi bashemereire kwegyendesereza kuteesiga okubaasa kwabo. Yaaba twine enshoni nari tutaziine twena twine kuteeraho kwebundaaza twihire aha mutima.

6. Nk’oku kiri omu 1 Abakorinso 15:10, niki eki turikubaasa kwegyera aha ntumwa Paulo?

⁶ Teekateeka aha ky’okureeberaho ky’entumwa Paulo. Yehova akamuhwera kutandikaho ebibiina bisya omu ndembo nyingi. Naabaasa kuba yaakozire bingi omu buheereza kukira entumwa eza Yesu Kristo ezindi. Kwonka Paulo tarateekateekire ngu naakira ab’eishe-emwe bagyenzi be. Omu bucureezi akagira ati: “Ndi muto aha ntumwa ezindi, otashemereire kwetwa ntumwa, ahabw’okuba nkahiiga” ekibiina kya Yehova. (1 Kor. 15:9) Paulo akagamba kyenyine ekyamubaasiise kugira omukago murungi na Yehova ngu n’embabazi za Ruhanga ezitamushemereire beitu kutari kubaasa kwe. (Shoma 1 Abakorinso 15:10.) Paulo ka yaataireho eky’okureeberaho kirungi ky’okwebundaaza ahakuba obu yaahandiikira Abakorinso tarayetungwire n’obu bamwe omu kibiina ekyo baabaire nibamugaya!​—2 Kor. 10:10.

7. Ab’eishe-emwe abarikumanywa munonga obunaku obu boorekire bata omutwarize gw’okwebundaaza? Ha eky’okureeberaho.

⁷ Abajurizi ba Yehova baingi bagasiirwe munonga omu byafaayo by’ow’eishe-emwe Karl F. Klein, owaaheereizeho aha Kakiiko Akareeberezi. Ow’eishe-emwe Klein akaba omucureezi yaagamba embeera ezigumire zitari zimwe na zimwe ezi yaarabiremu kumara emyaka mingi. Nk’eky’okureeberaho, obu yaabanza kubuurira  enju aha nju omuri 1920, akashanga ngu kigumire munonga yaacwamu kutagarukayo kubuurira, kumara emyaka nk’ebiri. Bwanyima, obu yaabaire naaheereza aha Beseeli, akaheebwa obuhabuzi, reero yaabiika enziika kumara obwire. Kandi akagira amaganya n’okwerarikirira ekyamurugiiremu endwara y’okwehurira kubi. Kwonka bwanyima akakira yaaheebwa obujunaanizibwa bwingi obw’omutaano. Buzima ow’eishe-emwe ogu okutatiina kugamba obweremwa bwe ka kyayorekire ngu aine omutwarize gw’okwebundaaza! Ab’eishe-emwe na banyaanyazi-itwe nibaijuka ebyafaayo bw’ow’eishe-emwe Klein n’oku yaabaire nabigambaho atarikushereka. *

8. Ebiri omu 1 Petero 5:6 nibituhwera bita kumanya ngu okwebundaaza nikushemeza Yehova?

⁸ Enshonga erikutureetera kugira omutwarize gw’okwebundaaza n’ahabw’okugira ngu eki nikishemeza Yehova. Entumwa Petero eki akakyoreka gye. (Shoma 1 Petero 5:6.) Ekitabo “Come Be My Follower” nikishoboorora ebigambo bya Petero kiti: “Okwetunguura ni nk’obutwa. Ebirikurugamu nibibaasa kuba bibi munonga. N’omutwarize ogurikubaasa kureetera omuntu oine emyoga kubura omugasho ahari Ruhanga. Kwonka okwebundaaza kwo, nikireetera omuntu w’ahansi kuba ow’omugasho ahari Yehova. . . . [Naija] . . . kushemererwa kukuha emigisha ahabw’okwebundaaza kwawe.” * Mbwenu shi buzima, haine ekirikukira oburungi okushemeza Yehova?​—Enf. 23:15.

9. Ahabw’enki abantu nibabaasa kwenda kutwirira haihi twaba twine omutwarize gw’okwebundaaza?

⁹ Oyihireho okushemeza Yehova, nitutunga emigisha mingi ku turikwebundaaza. Twayebundaaza, abantu nibahurira barikwenda kutwirira haihi. Kubaasa kwetegyereza ahabw’enki kiri kityo, teeraho kweta omu bigyere by’abandi. (Mat. 7:12) Titurikukunda kuba n’abantu abarikwenda ngu tukuratire ebiteekateeko byabo kwonka abatarikwikiriza ebiteekateeko ebyaitu. Okutaana n’ekyo, nitukunda kuba n’ab’eishe-emwe ‘abarikukwatanisa, abaine rukundo, abaine embabazi, n’omutima gw’obucureezi.’ (1 Pet. 3:8) Twaba nitukunda kuba n’abantu nk’abo, nabo nibaija kutukunda twaba turi abacureezi.

10. Okwebundaaza nikutuhwera kuta omu mbeera ezigumire?

¹⁰ Okwebundaaza nikutuhwera omu mbeera zigumire. Obumwe nitureeba ebikorwa ebirikureebeka nk’ebitahikire nari ebitari  by’oburingaaniza. Omugabe Sulemaani omunyabwengye akagira ati: “Nkareeba abahuuku nibagyendera aha mbaraasi, n’abanyiginya nibagyendesa ebigyere nk’abahuuku.” (Mub. 10:7) Obumwe abantu abaine emyoga abarikukora ebintu birungi tibarikukira kusiimwa ahabw’ebi bakozire. Kandi abataine myoga y’amaani nibakira kuhimbisibwa. N’obu kiraabe kiri kityo, Sulemaani akagira ngu n’eky’obwengye kwikiriza embeera nk’oku ziri omu mwanya gw’okuta omutima aha bitarikwombeka. (Mub. 6:9) Twayebundaaza, nikiija kutworobera kwikiriza embeera nk’oku ziri, beitu kutari nk’oku turikwenda ngu zibe.

11. Tushemereire kutwaza tuta twaheebwa obuhabuzi?

¹¹ Buri izooba nituba twine omugisha gw’okworeka ngu twine omutwarize gw’okwebundaaza. Teekateeka aha mbeera ezi. Twaheebwa obuhabuzi. Twine kwijuka ngu omuntu yaatuha obuhabuzi nitubaasa kuba tuhabire munonga kukira oku turikuteekateeka. Omu bwire nk’obwo, nitubaasa kugira ekiteekateeko ky’okwenda kwanga obuhabuzi. Nitubaasa kucwera orubanja omuntu owaatuhabura nari omuringo ogu yaatuhaburamu. Kwonka okwebundaaza nikutuhwera kugira emiteekateekyere etagwereire rubaju.

12. Kurugiirira aha Enfumu 27:5, 6, ahabw’enki omuntu yaatuha obuhabuzi twine kumusiima? Ha eky’okureeberaho.

¹² Omuntu orikwebundaaza naikiriza obuhabuzi. Nk’eky’okureeberaho: Ka tugire ngu ori omu nteerane z’Ekikristaayo. Bwanyima y’okugaaniira n’ab’eishe-emwe baingi, omwe aharibo yaakuta aha rubaju reero omu muringo gw’obwengye yaakugira ngu oine eby’okurya omu maino. Hatariho kubangaanisa, noohurira waahemuka. Kwonka shi torikwija kusiima ogwo owaakugambira? Noobaasa kuteekateeka ngu nangwa kuri haine owaakugambira kare! Omu muringo nigwo gumwe, twine kusiima ow’eishe-emwe owaagira obumanzi bw’okutuha obuhabuzi omu bwire buhikire. Omuntu ogwo naaba ari munywani waitu, beitu ti muzigu.​—Shoma Enfumu 27:5, 6; Gal. 4:16.

13. Nitubaasa kwebundaaza tuta abandi baaheebwa obujunaanizibwa omu kibiina?

¹³ Abandi baaheebwa obujunaanizibwa. “Ku ndikureeba abandi barikuheebwa obujunaanizibwa, obumwe niinyebuuza ahabw’enki tiinye ntorainwe,” omureeberezi orikwetwa Jason nikwo arikugamba atyo aha bweremwa bwe. Naiwe oreehuriireho otyo? Tikigwire kukoreerera obujunaanizibwa bw’omutaano omu kibiina. (1 Tim. 3:1) Kwonka, twine kurinda emiteekateekyere yaitu. Twaba tutegyendesereize, nitubaasa kutandika kugira omwetunguuro  omu mutima. Nk’eky’okureeberaho, ow’eishe-emwe naabaasa kutandika kuteekateeka ngu niwe wenka orikuhikiiriza ebirikwetengyesa kubaasa kuheebwa obujunaanizibwa obumwe omu kibiina. Nari munyaanyazi-itwe naabaasa kuteekateeka ngu, ‘ibanyi naakora gye okukira nanka!’ Kwonka twaba turi abacureezi, titurikwija kugira emiteekateekyere nk’egi ey’omwetunguuro.

14. Nitubaasa kwegyera ki ahari Musa ahabw’oku yaatwarize obu abandi baaheebwa obujunaanizibwa?

¹⁴ Nitubaasa kwegyera aha ku Musa yaatwarize obu abandi baaheebwa obujunaanizibwa. Musa akaba naasiima obujunaanizibwa bwe obw’okwebembera ihanga rya Israeli. Kwonka shi akatwaza ata Yehova ku yaikiriize abandi kuheereza hamwe nawe? Tarabagiriire eihari. (Kub. 11:24-29) Akaikiriza abandikumuhwera omu kucwa emanja z’abantu. (Kur. 18:13-24) Eki nikimanyisa ngu Abaisraeli abu yaabaire naacwera emanja, bakatunga obuheereza burungi. N’ahabw’ekyo, Musa akaba naayebembeza eby’abandi ahabw’oburungi bwabo omu mwanya gw’obujunaanizibwa bwe. Ka yaatuteeraireho eky’okureeberaho kirungi! Twine kwijuka ngu twaba nitwenda Yehova atukorese omu bwijwire, okwebundaaza kwaitu kushemeire kuba nikukira okubaasa kwaitu. N’obu Yehova, ‘araabe ari ahaiguru munonga, naata omutima aha bacureezi,’ nari abarikwebundaaza.​—Zab. 138:6.

15. Ab’eishe-emwe baingi beeshangire mu mbeera ki ensya?

¹⁵ Embeera zaahinduka. Omu myaka egi, baingi abamazire emyaka mingi nibaheereza Yehova, obuheereza bwabo buhindukire. Nk’eky’okureeberaho, omu 2014, abareeberezi ba disiturikiti n’abakazi baabo baakashabwa kuza omu buheereza bw’obutwire obundi. Okutandika n’omwaka ogwo, abareeberezi abarikutaayaayira ebibiina baahitsya emyaka 70 nibaruga omu buheereza obwo. Kandi ab’eishe-emwe abaine emyaka 80 n’okukiraho tibaakiheereza nk’abahikaanisa b’akakiiko k’abareeberezi.  Kandi omu myaka ehingwire, Ababeseeli baingi bashabirwe kuza omu buheereza bw’okubuurira. Abandi bakaba baine kuruga omu buheereza bw’omutaano ahabw’amagara mabi, obujunaanizibwa bw’amaka gaabo, nari ahabw’enshonga ezindi.

16. Ab’eishe-emwe na banyaanyazi-itwe boorekire bata ngu n’abacureezi embeera zaabo zaahinduka?

¹⁶ Empindahinduka ezi tizirayorobeire ab’eishe-emwe na banyaanyazi-itwe abo. Hatariho kubangaanisa, bakaba nibakunda obuheereza bwabo obw’okubanza, obu baabaire bamaziremu emyaka mingi. Abamwe bakagira “amaganya” obuheereza bwabo ku bwahindukire. Kwonka bwanyima y’obwire, bakabaasa kumanyiira embeera nsya. Ahabw’enki? Ekikuru munonga, n’ahabw’okukunda Yehova. Bakamanya ngu bakeehayo ahari Yehova, beitu gutari murimo, ekitiinisa, nari obuheereza. (Kol. 3:23) Nibashemererwa kugumizamu nibaheereza Yehova omu bucureezi omu buheereza bwona. ‘Nibamwegyekyerera okushoberwa kwabo kwona,’ barikumanya ngu naabafaho.​—1 Pet. 5:6, 7.

17. Ahabw’enki nikitushemeza kumanya ngu Ekigambo kya Ruhanga nikituhiga kwebundaaza?

¹⁷ Buzima nitushemererwa kureeba ngu Ekigambo kya Ruhanga nikituhiga kwebundaaza. Twateeraho kugira omutwarize ogu, nitwegasira kandi nitugasira n’abandi. Nigutuhwera kwemera embeera haabaho empindahinduka. Okukira byona, nigutubaasisa kwirira haihi Tataitwe ow’omu iguru. Ka nitushemererwa kumanya ngu n’obu Yehova araabe ari ‘Ow’ahaiguru, kandi ari Mukuru,’ naakunda abaheereza be abarikwebundaaza, kandi ngu naabatwara nk’ab’omuhendo!​—Isa. 57:15.