EKICWEKA EKY’OKWEGA 38
“Mwije Ahariinye, Mbaruhuure”
“Imwe mwena abaruhire n’abaremereirwe, mwije ahariinye, mbaruhuure.”—MAT. 11:28.
EKYESHONGORO 17 ‘Niinyenda’
EBIRAAGAMBWEHO *
1. Nk’oku kiri omu Matayo 11:28-30, Yesu akaraganisa ki abantu?
YESU akaraganisa abantu abaabaire bamuhurikiize ati: “Mwije ahariinye, mbaruhuure.” (Shoma Matayo 11:28-30.) Okuraganisa oku ti birooto burooto. Nk’eky’okureeberaho, teekateeka aha ki Yesu yaakoreire omukazi owaabaire arwaire endwara mbi munonga.
2. Yesu akakorera ki omukazi owaabaire arwaire?
2 Omukazi ogwo akaba naayendera kimwe obuhwezi. Akaba agiire omu bashaho baingi, aine amatsiko g’okukira endwara ye. Bwanyima y’emyaka 12 y’obusaasi bwingi, nabwo tarabaasize kukira. Kurugiirira aha Biragiro, akaba ari otashemeire. (Lev. 15:25) Bwanyima akahurira ngu Yesu naakiza abarwaire, n’ahabw’ekyo akaza kumusherura. Ku yaamureebire, akakwata aha mukugiro gw’omwenda gwe, reero ahonaaho yaakira! Kwonka Yesu akakora ekirikukira aha kukiza omubiri gwe, akamuhwera kugaruka kugira n’ekitiinisa. Nk’eky’okureeberaho, obu Yesu yaabaire naagamba n’omukazi ogwo, akakoresa ebigambo “mwana wangye,” ebirikworeka ngu akamuha ekitiinisa. Omukazi ogwo ka ashemereire kuba yaaruhuukire, nari akahuumurizibwa!—Luk. 8:43-48.
3. Nituza kugarukamu bibuuzo ki?
3 Yetegyereze ngu omukazi niwe yaagiire kusherura Yesu. Niwe yaabandize kugira eki yaakoraho. Nikyo kimwe n’obunaku obu, twine kuteeraho ‘kwija’ ahari Yesu. Ebiro ebi, Yesu tarikukiza endwara z’omubiri omu muringo gw’eky’okutangaaza ‘ez’abarikwija’ ahu ari. Kwonka nabwo naatweta ati: “Mwije ahariinye, mbaruhuure.” Omu kicweka eki nituza kugarukamu ebibuuzo bitaano ebi: Nitubaasa ‘kwija’ tuta ahari Yesu? Yesu akaba naamanyisa ki obu yaagira ati: “Mwekorere omugamba gwangye”?
Nitubaasa kwegyera ki ahari Yesu? Ahabw’enki omurimo ogu yaatuhaire kukora gurikuruhuura? Kandi nitubaasa kugumizamu tuta nitutunga oburuhuuko ahansi y’omugamba gwa Yesu?“MWIJE AHARIINYE”
4-5. Ni miringo ki emwe ei turikubaasa kwija ahari Yesu?
4 Omuringo gumwe ogu ‘turikwija’ ahari Yesu n’okwega bingi nk’oku turikubaasa aha bi yaagambire n’ebi yaakozire. (Luk. 1:1-4) Tihariho ondiijo orikubaasa kutukorera eki, n’obujunaanizibwa bwa buri omwe ahariitwe kwega ebirikukwata ahari Yesu ebiri omu Baibuli. Kandi ‘nitwija’ ahari Yesu turikucwamu kubatizibwa tukaba abeegi be.
5 Omuringo ogundi ogu ‘turikwija’ ahari Yesu, n’okuza kureeba abareeberezi b’ekibiina twaba nitwenda obuhwezi. Yesu naakoresa ‘ebiconco ebi omu bantu’ kureeberera entaama ze. (Efe. 4:7, 8, 11; Yoh. 21:16; 1 Pet. 5:1-3) Tushemereire kuba niitwe twabanza kuzayo kubashaba obuhabuzi. Titushemereire kuteekateeka ngu abareeberezi nibaija kushoma ebiteekateeko byaitu, reero bamanye eki turikwenda. Yetegyereze eki ow’eishe-emwe Julian arikugamba: “Nkaruga omu buheereza bwangye aha Beseeli ahabw’amagara mabi, kandi omwe ahari banywani bangye akampiga kushaba abareeberezi kuntaayaayira kungumya. Omu kubanza, nkaba ntarikuteekateeka ngu nikyetengyesa abareeberezi kuntaayaayira. Kwonka bwanyima nkashaba obuhwezi, kandi okutaayaaya kwabo kukahendera kubaire kimwe aha biconco birungi ebi ndatungireho.” Abareeberezi abeesigwa, nka babiri abaataayaayiire Julian, nibabaasa kutuhwera kumanya “okuteekateeka kwa Kristo,” ekirikumanyisa okwetegyereza emiteekateekyere eye n’okuteeraho kugigira. (1 Kor. 2:16; 1 Pet. 2:21) Buzima eki ni kimwe aha biconco birungi ebi barikubaasa kutuha.
“MWEKORERE OMUGAMBA GWANGYE”
6. Yesu akaba naamanyisa ki obu yaagira ngu “mwekorere omugamba gwangye”?
6 Obu Yesu yaagira ngu “mwekorere omugamba gwangye,” naabaasa kuba yaabaire naamanyisa ‘okwikiriza obushoboorozi bwe.’ Kandi naabaasa kuba yaabaire naamanyisa ngu “mwekorere omugamba muri hamwe naanye, reero tukorere hamwe Yehova.” Omu miringo yombi, omugamba nigutwariramu okukora.
7. Kurugiirira ahari Matayo 28:18-20, tuhairwe murimo ki, kandi nitubaasa kugira buhame ki?
7 Nitwikiriza okweta kwa Yesu oku, twahayo amagara gaitu ahari Yehova kandi tukabatizibwa. Okweta oku n’okwa buri omwe, ahakuba Yesu tarikubaasa kuzibira omuntu weena orikwenda kuheereza Ruhanga omu bwesigwa. (Yoh. 6:37, 38) Abakuratsi ba Kristo boona bahairwe omugisha gw’okwejumba omu murimo ogu Yehova yaashabire Yesu kukora. Nitubaasa kugira obuhame ngu butoosha Yesu naija kuba ari naitwe kutuhwera kukora omurimo ogu.—Shoma Matayo 28:18-20.
“MUUNYEGYEREHO”
Ruhuura abandi nk’oku Yesu yaakozire (Reeba akacweka 8-11) *
8-9. Ahabw’enki abacureezi baabaire nibakunda kuba bari na Yesu, kandi twine kwebuuza bibuuzo ki?
8 Abantu abacureezi bakaba nibakunda kuba na Yesu. (Mat. 19:13, 14; Luk. 7:37, 38) Ahabw’enki? Yetegyereze oku Yesu yaabaire naataanira kimwe aha Bafarisaayo. Abeebembezi b’ediini aba bakaba bataine rukundo kandi baine omwepanko. (Mat. 12:9-14) Yesu akaba aine rukundo kandi ari omucureezi. Abafarisaayo bakaba nibakunda kumanywa, kandi barikwenda ngu abantu babahe ebitiinisa. Yesu akaba naayanga omwetunguuro nk’ogwo, kandi akahiga abeegi be kuba abacureezi reero baheereze abandi. (Mat. 23:2, 6-11) Abafarisaayo bakaba nibategyeka abandi barikubatiinatiinisa n’okubareetera kugira obwoba. (Yoh. 9:13, 22) Yesu akaba naaruhuura abandi arikubakorera eby’embabazi na rukundo.
9 Naiwe nootwaza nka Yesu? Yebuuze oti: ‘Mbwenu shi abandi nibareeba ngu nintwaza gye kandi ndi omucureezi? Ninkora ebirikureebeka nk’eby’ahansi kubaasa kuhwera abandi? Niintwariza gye abandi?’
10. Yesu akateeraho ata abeegi be embeera nungi?
10 Abu Yesu yaabaire naakora nabo, akaba naabateeraho embeera nungi z’obusingye, kandi akaba naakunda kubatendeka. (Luk. 10:1, 19-21) Akaba naahiga abeegi be kubuuza ebibuuzo, kandi akaba naayenda kuhurira ebiteekateeko byabo. (Mat. 16:13-16) Abeegi be bakabeengyeya nk’ekimera ekirikurindwa gye kutashiishwa embeera mbi y’obwire. Bakeetegyereza gye amashomo agu Yesu yaabeegyeise, kandi baayana ebyana barikukora emirimo mirungi.
Ba omuntu oyorobi kuhikwaho kandi orikushemererwa
Gumizamu nooheereza kandi ori omweziriki
Ba omucureezi kandi orikukora n’obweziriki *
11. Ni bibuuzo eki ebi tushemereire kwebuuza?
11 Ori omwe aha baine obushoboorozi? Ku kiraabe nikwo kiri, yebuuze oti: ‘Niinteeraho abandi mbeera ki aha murimo nari omuka? Niindeetaho embeera z’obusingye? Niimpiga abandi kubuuza ebibuuzo? Nimba nyeteekateekire kuhurira ebiteekateeko by’abandi?’ Titurikwenda kuba nk’Abafarisaayo abaabaire nibagirira ekiniga abarikubabuuza, kandi bakahiiganisa n’abaabaire baine ebiteekateeko ebirikutaana n’ebyabo.—Mak. 3:1-6; Yoh. 9:29-34.
‘NIMWIJA KUTUNGA OKUHUUMURA’
12-14. Ahabw’enki omurimo ogu Yesu yaatuhaire kukora gurikuruhuura?
12 Ahabw’enki nikiruhuura kukora omurimo ogu Yesu yaatuhaire? Hariho enshonga nyingi, kwonka yetegyereze zimwe aharizo.
13 Twine abareeberezi abarikukirayo oburungi. Yehova Omureeberezi waitu Orikukirayo, ti mutegyeki oine omwaga kandi entasiima. Naasiima omurimo ogu turikukora. (Heb. 6:10) Naatuha amaani agarikwetengyesa kubaasa kwekorera omutwaro gwaitu ogw’obujunaanizibwa. (2 Kor. 4:7; Gal. 6:5) Yesu Omugabe waitu naatwebembera arikututeeraho eky’okureeberaho. (Yoh. 13:15) Kandi n’abareeberezi abarikutureeberera omu kibiina nibateeraho kutooreza Yesu, “omuriisa w’entaama omukuru.” (Heb. 13:20; 1 Pet. 5:2) Nibateeraho kutwaza omu muringo gw’embabazi, ogurikugaruramu amaani, kandi n’emanzi omu kutureeberera n’omu kuturinda.
14 Twine bagyenzi baitu barungi. Tihariho bantu abandi abaine ekigyendererwa n’omukago nk’ebi twine. Teekateeka ahari eki: Twine omugisha gw’okukora n’abantu abaine emitindo erikukwata aha micwe ey’ahaiguru munonga, kwonka abatarikuteekateeka ngu bahikiriire kukira abandi. Baine etalanta z’amaani, kwonka tibarikwehimbisa, kandi nibatwara abandi nk’abarikubakira. Nibatureeba nk’abakozi bagyenzi baabo, kandi banywani baabo. Kandi omukago ogu baine naitwe n’ogw’aha mara munonga kuhika n’aha kuba beeteekateekire kutufeera!
15. Tushemereire kugira nyehurira ki aha murimo ogu turikukora?
15 Twine omurimo ogurikukirayo oburungi. Nitwegyesa abantu amazima agarikukwata ahari Yehova, kandi tusheeshuura ebishuba ebi Omuregi yaagambire. (Yoh. 8:44) Sitaane naayekoreza abantu emigugu ei batarikubaasa kwekorera. Nk’eky’okureeberaho, naayenda twikirize ngu Yehova tarikwija kutusaasira ahabw’ebibi byaitu, kandi ngu tarikutukunda. Ogwo ka n’omugugu guremeire, kandi ka n’ekishuba ky’akabi! ‘Twija’ ahari Kristo, nitusaasirwa ebibi byaitu. Kandi amazima gari ngu Yehova naatukunda munonga. (Rom. 8:32, 38, 39) Ka nikishemeza munonga kuhwera abantu kwega kwesiga Yehova n’okureeba nibakora empindahinduka omu magara gaabo!
GUMIZAMU NOOTUNGA OBUHUUMURE OMU MUGAMBA GWA YESU
16. Omugamba ogu Yesu arikutushaba kwekorera nigutaana guta n’emigamba eyaitu ei turikuba twine?
16 Omugamba ogu Yesu arikutushaba kwekorera nigutaana aha yaitu ei turikuba twine. Nk’eky’okureeberaho, twaheza kuruga aha murimo gw’okwebaisaho, baingi ahariitwe nituba turuhire kandi tutamazirwe. Kwonka okutaana n’ekyo, twaheza kumara obwire turikuheereza Yehova na Yesu, nituba twine okumarwa n’okushemererwa omu mutima. Nitubaasa kuba turuhire bwanyima y’okuruga aha murimo kwonka twegyemesereze kuza omu nteerane z’ekibiina omwabazyo ogwo. Kwonka obwire obwingi enteerane zaahwa nitugaruka omuka turuhuukire kandi tugarukiremu amaani. Nikyo kimwe na twateeraho kwejumba omu kubuurira nari kweyegyesa Baibuli. Ekirikurugamu nituhurira turuhuukire kandi twine amaani!
17. Ahabw’enki twine kugira emiteekateekyere eringaniire kandi tukaba abeegyendesereza?
17 Twine kwebariirira. Buri omwe ahariitwe aine amaani againe obugarukiro. N’ahabw’ekyo twine kwegyendesereza aha bi turikwikiriza kukora. Nk’eky’okureeberaho, nitubaasa kushiisha obwire turikuteeraho kurundaana eby’obugaiga. Yetegyereze eki Yesu yaagambiire omutsigazi omugaiga owaamubuurize ati: “Nkaakora ki okuhungura amagara agatahwaho?” Omutsigazi ogwo akaba atwire naayorobera Ebiragiro. Ashemereire kuba yaabaire ari omuntu murungi, ahakuba Engiri ya Mako neegamba butunu ngu Yesu ‘akamukunda.’ Yesu akagambira omutsigazi ogu omutegyeki ati: “Irooko ogyende, otunde byona ebi otungire,” reero “haza oije onkuratire.” Omutsigazi ogu akaba naayenda kukuratira Yesu, kwonka nikireebeka akaba atarikwenda kureka “eitungo ringi” eri yaabaire aine. (Mak. 10:17-22) N’ekyarugiremu, akanga omugamba ogu Yesu yaamuhaire yaagumizamu ari omuhuuku w’eby’obugaiga. (Mat. 6:24) Ku ogire ngu okaba ori iwe okaba noija kucwamu ki?
18. Buri kuhinguraho obwire tushemereire kukora ki, kandi ahabw’enki?
18 Buri kuhinguraho obwire, twine kuguma nitushwijuma ebi turikwebembeza. Ahabw’enki? Kubaasa kuhamya ngu nitukoresa amaani gaitu omu muringo gw’obwengye. Teekateeka aha ki omutsigazi orikwetwa Mark arikugamba: “Kumara emyaka mingi, nkaba ninteekateeka ngu nyorobize embeera zangye. Nkaba ndi payoniya, kwonka nkaba ninkira kuteekateeka aha sente n’okugira embeera nungi z’obuteeka. Nkaba niinyebuuza ahabw’enki embeera zingumiire. Bwanyima nketegyereza ngu okukira munonga nkaba ninyebembeza okusherura ebyangye, kandi ndikuha Yehova obwire n’amaani ebyatsigaraho.” Mark akahindura emiteekateekyere ye n’omu mbeera ze yaatunga obwire burikumara omu kuheereza Yehova. Mark naagira ati: “Obumwe ninyerarikirira, kwonka ahabw’okuhwerwa Yehova n’obushagiki bwa Yesu, mbaasize kusingura ebirikundemesa kuheereza gye.”
19. Ahabw’enki ni kikuru kureeba enshonga omu muringo oguhikire?
19 Nitwija kugumizamu nitutunga oburuhuuko omu mugamba gwa Yesu twakora ebintu bishatu. Eky’okubanza, guma nooreeba enshonga omu muringo oguhikire. Nitukora omurimo gwa Yehova, n’ahabw’ekyo twine kugukora omu muringo ogu Yehova arikwenda. Itwe turi abakozi, kandi Yehova niwe Mukama waitu orikutuha emirimo. (Luk. 17:10) Twateeraho kukora omurimo gwe omu muringo gwaitu, nitwija kushanga omugamba guremeire kwekorera. Nangwa n’enimi y’amaani maingi neetunga obuhuta n’oburuhe yaaguma neeteeraho kutoora omu muhanda ogwayo ogu erikwenda, kandi ekateeraho kwetantara omugamba ogu mukama waayo arikwenda ngu eyekorere. Kwonka, nitubaasa kukora ebintu by’omutaano tusingure n’ebirikuturemesa twakuratira obuhabuzi bwa Yehova. Ijuka ngu tihariho orikubaasa kuremesa ekigyendererwa kya Yehova kuhikiirizibwa!—Rom. 8:31; 1 Yoh. 4:4.
20. Tushemereire kuba twine kigyendererwa ki omu kwekorera omugamba gwa Yesu?
20 Ekya kabiri, kora oine ekigyendererwa kihikire. Ekigyendererwa kyaitu n’okuhimbisisa Tataitwe Yehova owa rukundo. Ab’omu kyasha ky’okubanza abaabaire baine omururu n’okweyendeza, bakarahuka kutamwa kandi baatsigaho omugamba gwa Yesu. (Yoh. 6:25-27, 51, 60, 66; Fil. 3:18, 19) Okutaana nabo, abo abaabaire nibakora bainiire Ruhanga rukundo etarimu kweyendeza, kandi barikukunda na bataahi baabo, baine amatsiko g’okuheereza na Kristo omu iguru bakaguma bashemereirwe beekoreire omugamba ogwo obwire bwona obu baamazire omu nsi. Kushushana nabo, naitwe twagira ekigyendererwa kihikire, nitwija kuguma tushemereirwe twekoreire omugamba gwa Yesu.
21. Kurugiirira ahari Matayo 6:31-33, twine amatsiko ngu Yehova naija kutukorera ki?
21 Ekya kashatu, gira emiteekateekyere ehikire. Tucwiremu kwehayo kukora n’amaani kandi twekundiire. Yesu akaturabura ngu nitwija kuhiiganisibwa. Kwonka nitubaasa kuhamya ngu Yehova naija kutuha amaani g’okugumisiriza buri mbeera yoona egumire. Oku turikweyongyera kugumisiriza, nikwo turikweyongyera kuhama. (Yak. 1:2-4) Kandi twine amatsiko ngu Yehova naija kutuha ebirikwetengyesa, Yesu naija kutureeberera, kandi ab’eishe-emwe na banyaanyazi-itwe nibaija kutugaruramu amaani. (Shoma Matayo 6:31-33; Yoh. 10:14; 1 Tes. 5:11) Buzima twine byona ebirikwetengyesa kugumira embeera yoona.
22. Niki ekishemereire kutureetera kusiima?
22 Omukazi ou Yesu yaakirize endwara akaruhuuka aha izooba ryenyine obu yaatambirwa. Kwonka akaba naija kutunga oburuhuuko obw’obutwire yaaba omwegi wa Kristo omuhamiireho. Mbwenu shi nooteekateeka ngu akakora ki? Ku araabe yaacwiremu kwekorera omugamba ogu Yesu yaamuhaire, teekateeka aha mugabo ogu yaatungire, ogw’okuheereza na Yesu omu iguru! Buri kintu eki yaayefeerereize kubaasa kukuratira Yesu kikaba nikiija kuhinduka akantu kakye waakigyeragyeranisa n’omugisha ogwo. Yaaba twine amatsiko g’okuza omu iguru nari kutuura omu nsi, ka nikitureetera kusiima munonga kureeba ngu tukaikiriza okweta kwa Yesu oku: “Mwije ahariinye”!
EKYESHONGORO 13 Kristo Niwe Twine Kutooreza
^ kacw. 5 Yesu naatweta kwija ahariwe. Niki ekirikutwarirwa omu kwikiriza okweta kwe? Ekicweka eki nikiza kugarukamu ekibuuzo ekyo, kandi nikiza kutwijutsya oku turikubaasa kuruhuuka twakora na Kristo.
^ kacw. 60 ENSHOBOORORA Y’EBISHUSHANI: Yesu akaruhuura abandi omu miringo mingi.
^ kacw. 66 ENSHOBOORORA Y’EBISHUSHANI: Nikyo kimwe, ow’eishe-emwe naateeraho kuruhuura abandi omu miringo mingi.