1. Ahabw’enki twine kwikiriza obushoboorozi bwa Yehova?

TWINE kuza ahansi y’obushoboorozi * bwa Yehova ahabw’okugira ngu n’Omuhangi waitu. Ahabw’enshonga egi, niwe ahikire kuteeraho ebihangirwe bye emitindo. (Kush. 4:11) Kwonka enshonga endiijo eshemereire kutureetera kumworobera, n’okugira ngu omuringo ogu arikutegyekamu nigwo gurikukirayo oburungi. Omu byafaayo byona, hatwire hariho abategyeki abaine obushoboorozi buringaniire aha bandi. Waabagyeragyeranisa na Yehova, we naabakirira kimwe omu kuba omunyabwengye, kugira rukundo, embabazi, n’okufayo.​—Kur. 34:6; Rom. 16:27; 1 Yoh. 4:8.

2. Kurugiirira aha Abaheburaayo 12:9-11, ni nshonga ki ezirikutureetera kworobera Yehova?

² Yehova naayenda ngu tumworobere, ti ahabw’okugira ngu nitumutiina, beitu ahabw’okugira ngu nitumukunda, kandi ni Tataitwe owa rukundo. Omu baruha ei Paulo yaahandiikire Abaheburaayo, naashoboorora ngu twine kuba tweteekateekire “kworobera” Tataitwe ahakuba naatutendeka “ngu tugasirwe.”​—Shoma Abaheburaayo 12:9-11.

3. (a) Nitworeka tuta ngu turi ahansi y’obushoboorozi bwa Yehova? (b) Nituza kugarukamu bibuuzo ki?

³ Nitweta ahansi y’obushoboorozi bwa Yehova twateeraho kumworobera omu bintu byona, kandi tukanga kwesiga okwetegyereza kwaitu. (Enf. 3:5) Nikitworobera kweta ahansi y’obushoboorozi bwa Yehova twaheza kumanya emitwarize ye mirungi  munonga. Ahabw’enki? Emitwarize ye neereeberwa omu bi arikukora byona. (Zab. 145:9) Oku turikwongyera kwega ahari Yehova, nikwo turikwongyera kumukunda. Kandi twaba nitukunda Yehova, nikiba kitarikwetengyesa omushororongo gw’ebiragiro ebirikutworeka ebi twine kukora n’ebi tutaine kukora. Nituteeraho kwega kugira emiteekateekyere n’enyehurira nk’ebi Yehova arikwenda ngu tugire, kubaasa kwetantara ebibi. (Zab. 97:10) Kwonka obumwe, nikiba kitoorobi kworobera Yehova. Ahabw’enki kiri kityo? Kandi abareeberezi nibabaasa kwegyera ki aha Mukungu Nehemia? Abazaire abashaija nibabaasa kwegyera ki aha Mugabe Daudi? Kandi Abazaire abakazi nibabaasa kwegyera ki ahari Mariamu nyina Yesu? Omu kicweka eki nituza kugarukamu ebibuuzo ebi.

4-5. Kurugiirira aha Abarooma 7:21-23, ahabw’enki obumwe nitugumirwa kweta ahansi y’obushoboorozi bwa Yehova?

⁴ Enshonga emwe ahabw’enki nikibaasa kutatworobera kweta ahansi y’obushoboorozi bwa Yehova n’okugira ngu twena tukahungura ekibi kandi tituhikiriire. N’ahabw’ekyo nikiba kitoorobi obutoosha kworobera Ruhanga. Bwanyima ya Adamu na Haawa kugomera Ruhanga kandi bakarya aha kijuma eki baabaire bazibiirwe, bakeeteeraho emitindo eyaabo. (Kut. 3:22) N’obunaku obu, abantu abaingi nibeehuzya emitindo ya Yehova, reero bacwamu kweteeraho emitindo y’ekihikire n’ekigwire.

⁵ Nangwa n’abarikumanya Yehova kandi abarikumukunda, nibabaasa kugumirwa kweta ahansi y’obushoboorozi bwe omu bwijwire. Eki kikahika aha ntumwa Paulo. (Shoma Abarooma 7:21-23.) Nka Paulo, nituba nitwenda kukora ekihikire omu maisho ga Yehova. Kwonka tushemereire kugumizamu nituteeraho kurwanisa ekyetengo ky’okukora ebigwire.

6-7. Ni nshonga ki endiijo erikubaasa kutureetera kugumirwa kweta ahansi y’obushoboorozi bwa Yehova? Ha eky’okureeberaho.

⁶ Enshonga endiijo erikubaasa kutureetera kugumirwa kwikiriza obushoboorozi bwa Yehova, n’emigyenzo n’entwaza y’abantu abu twakuriiremu. Ebiteekateeko by’abantu ebingi nibiba nibihakanisa ekigyendererwa kya Yehova, kandi butoosha nituteeraho kwetantara kugira emiteekateekyere nk’eyaabo. Teekateeka aha ky’okureeberaho kimwe.

⁷ Omu bicweka bingi, abantu nibakira kugyemesereza eminyeeto kuta omutima aha kusherura esente nyingi. Munyaanyazi-itwe orikwetwa Mary * akahikwaho embeera egyo. Obu yaabaire atakeegire ebirikukwata ahari Yehova, akashomera omu ishomero rimwe aha mashomero marungi omu ihanga rye. Mary akagyemeserezibwa ab’eka ye kutunga omurimo gw’esente nyingi ogurikubaasa kumuhaisa ekitiinisa. Kandi nawe ekyo akaba naakyenda. Kwonka bwanyima y’okwega ebirikukwata ahari Yehova kandi akamukunda, akahindura ebigyendererwa bye. Kwonka nabwo kikaba kitamworobeire. Naagira ati: “Obumwe nindeeba emirimo mirungi eyaakumbaasiise kutunga esente nyingi, kwonka erikubaasa kutaahataaha omu ntebeekanisa yangye y’eby’omwoyo. Ahabw’oku naakuziibwe, na hati nikingumira kwanga emirimo egyo. Nimba nyine kweshengyereza Yehova kumpwera kwangira okwohibwa kwikiriza omurimo ogurikubaasa kundemesa kumuheereza gye.”​—Mat. 6:24.

8. Ni bintu ki ebi turikuza kugaaniiraho?

⁸ Niitwe turikugasirwa twaza ahansi y’obushoboorozi bwa Yehova. Kwonka abaine obushoboorozi buringaniire, nk’abareeberezi, baishe abaana, na baanyina abaana, baine enshonga endiijo erikubareetera kukuratira obuhabuzi bwa Ruhanga. Ebi barikukora nibigasira abandi. Ka tugaaniire ahari bamwe abarikugambwaho omu Baibuli kubaasa kumanya oku turikubaasa  kukoresa obushoboorozi bwaitu omu muringo ogurikushemeza Yehova.

9. Ni mbeera ki ezigumire ezi Nehemia yaabaire aine kushoboorora?

⁹ Yehova ahaire abareeberezi obujunaanizibwa bukuru obw’okureeberera abantu be. (1 Pet. 5:2) Abareeberezi nibabaasa kwegyera ahari Nehemia ebintu bingi baayetegyereza oku yaatwariize abaheereza ba Yehova. Ahabw’okugira ngu Nehemia akaba ari Omukungu omuri Yuda, akaba aine obushoboorozi buringaniire. (Neh. 1:11; 2:7, 8; 5:14) Teekateeka aha mbeera zimwe ezigumire ezi yaabaire aine kushoboorora. Akaba ahuriire ngu abantu basiisire hekalu, kandi ngu tibarikuhayo esente z’okuhwera Abaleevi nk’oku Ebiragiro byabaire nibiragiira. Abayudaaya bakashiisha ekiragiro kya Sabato, kandi abashaija abamwe bakaba bataahire omu bushwere n’abakazi abanyamahanga. Omukungu Nehemia akaba naija kushoboorora ata embeera egi egumire?​—Neh. 13:4-30.

10. Nehemia akabaasa kutwaza ata omu mbeera zigumire?

¹⁰ Nehemia tarakoreise kubi obushoboorozi bwe arikugyema abaheereza ba Ruhanga kwikiriza emitindo ye ahabwe. Omu mwanya gw’ekyo, akasherura obuhabuzi bwa Yehova kurabira omu kushaba, kandi akeegyesa abantu Ebiragiro bya Yehova. (Neh. 1:4-10; 13:1-3) Kandi Nehemia akakorera hamwe n’Abayudaaya bagyenzi be kugaruraho ebisiika bya Yerusaalemu.​—Neh. 4:15.

11. Kurugiirira aha 1 Abatesalonika 2:7, 8, abareeberezi bashemereire kutwariza bata ab’omu kibiina?

¹¹ Abareeberezi nibabaasa kutaraba omu mbeera zigumire nk’ezi Nehemia yaarabiremu, kwonka nibabaasa kumutooreza omu miringo mingi. Nk’eky’okureeberaho, nibakora n’amaani kuhwera ab’eishe-emwe na banyaanyazi-itwe. Kandi obushoboorozi bwabo tiburikubareetera kugira omwetunguuro. Omu mwanya gw’ekyo, nibatwariza gye ekibiina. (Shoma 1 Abatesalonika 2:7, 8.) Rukundo ei bainiire abandi n’obucureezi bwabo nibibareetera kugambira abandi omu muringo murungi. Andrew omazire emyaka mingi ari omureeberezi, naagira ati: “Nyetegyereize  ngu omureeberezi yaatwaza omu muringo gw’embabazi na rukundo, nikikwata aha mitima y’ab’eishe-emwe na banyaanyazi-itwe. Emitwarize egi neehiga abari omu kibiina kukwatanisa n’abareeberezi.” Tony nawe omazire obwire buraingwa ari omureeberezi, naagira ati: “Niinteeraho kugyendera aha biri omu Abafilipi 2:3, kandi butoosha nindeeba abandi nk’ab’ekitiinisa kunkira. Eki nikimpwera kwetantara kutwaza nka ngamba nyenka.”

12. Ahabw’enki ni kikuru abareeberezi kuba abacureezi?

¹² Abareeberezi baine kuba abacureezi, nk’oku Yehova ari omucureezi. Yehova n’obu araabe ari ow’Obushoboorozi Bwona omu nsi n’omu iguru, ‘naayecureeza’ nari nainama kwimutsya enshoberwa “naamwiha omu mucuucu.” (Zab. 18:35; 113:6, 7) Nangwa Yehova naayanga abo abaine amaryo n’omwetunguuro.​—Enf. 16:5.

13. Ahabw’enki omureeberezi ashemereire ‘kurinda orurimi rwe’?

¹³ Omureeberezi ori ahansi y’obushoboorozi bwa Yehova naaba aine ‘kurinda orurimi rwe.’ Kitari ekyo, naabaasa kugamba kubi omuntu yaamutwariza omu muringo gutari gw’ekitiinisa. (Yak. 1:26; Gal. 5:14, 15) Andrew, owaaba yaagambirweho naagira ati: “Obumwe, nkaba mpurira ndikwenda kugambira kubi ow’eishe-emwe nari munyaanyazi-itwe orikureebeka nk’otarikumpa ekitiinisa. Kwonka nkabaasa kuteekateeka aha bashaija abeesigwa abarikugambwaho mu Baibuli, kandi ekyo kimpwereire kumanya obukuru bw’okuba omucureezi n’okwebundaaza.” Abareeberezi nibooreka ngu bari ahansi y’obushoboorozi bwa Yehova barikugamba omu muringo gw’embabazi n’ab’eishe-emwe hamwe n’abareeberezi bagyenzi baabo.​—Kol. 4:6.

14. Ni bujunaanizibwa ki obu Yehova ahaire baishe abaana, kandi naayenda ngu bakore ki?

¹⁴ Yehova ahaire omushaija omuzaire obujunaanizibwa bw’okuba omutwe gw’eka, kandi naayenda ngu atendeke abaana be kandi abahane. (1 Kor. 11:3; Efe. 6:4) Kwonka obushoboorozi bw’omuzaire omushaija bwine obugarukiro, naaba naajunaanwa ahari Yehova, ou buri ka erikukomookwaho eiziina. (Efe. 3:14, 15) Baishe abaana nibooreka ngu bari ahansi y’obushoboorozi bwa Yehova barikukoresa obushoboorozi bwabo omu muringo ogurikushemeza Ruhanga. Nibabaasa kwega bingi barikushwijuma ebi Omugabe Daudi yaarabiremu.

15. Ahabw’enki Omugabe Daudi n’eky’okureeberaho kirungi ahari baishe abaana?

¹⁵ Yehova akatoorana Daudi kuba omutwe gw’eihanga ryona erya Israeli, beitu etari ka ye yonka. Obu Daudi yaabaire ari omugabe, akaba aine obushoboorozi bwingi. Obumwe akakoresa kubi obushoboorozi bwe reero yaakora enshobe z’amaani. (2 Sam. 11:14, 15) Kwonka akooreka ngu ari ahansi y’obushoboorozi bwa Yehova  arikwikiriza kuhanwa. Omu kushaba akagambira Yehova byona ebiri omu mutima gwe. Kandi akateeraho nk’oku arikubaasa kworobera obuhabuzi bwa Yehova. (Zab. 51:1-4) Okwongyera ahari ekyo, akooreka ngu n’omucureezi ekirikumara yaikiriza obuhabuzi burungi kuruga aha bashaija nangwa n’aha bakazi. (1 Sam. 19:11, 12; 25:32, 33) Daudi akeegyera aha nshobe ze, reero yaata omutima gwe aha kuheereza Yehova.

16. Ni mashomo ki agu baishe abaana barikubaasa kwegyera ahari Daudi?

¹⁶ Yetegyereze gamwe aha mashomo agu baishe abaana barikubaasa kwegyera aha Mugabe Daudi: Otakoresa kubi obushoboorozi obu Yehova akuhaire. Ikiriza enshobe zaawe, kandi oikirize n’abandi kukuhabura barikukoresa Baibuli. Waakora otyo, ab’eka yaawe nibaija kukuha ekitiinisa ahabw’obucureezi bwawe. Waaba nooshaba n’ab’eka yaawe, gambira Yehova buri kimwe ekikuri omu mutima bahurire oku orikumwesiga. Kandi okukira munonga, yebeembeza okuheereza Yehova. (Bir. 6:6-9) Eky’okureeberaho kyawe kirungi nikyo kiconco ky’omuhendo eki orikubaasa kuha eka yaawe.

17. Yehova ahaire baanyina abaana bujunaanizibwa ki omu ka?

¹⁷ Yehova ahaire nyina abaana omwanya mukuru omu ka, kandi nawe aine obushoboorozi buringaniire aha baana be. (Enf. 6:20) Nangwa ebi nyina abaana arikugamba nibibaasa kukwata aha baana be ebiro byona eby’amagara gaabo. (Enf. 22:6) Yetegyereze eki baanyina abaana barikubaasa kwegyera ahari Mariamu nyina Yesu.

18-19. Baanyina abaana nibabaasa kwegyera ki ahari Mariamu nyina Yesu?

¹⁸ Mariamu akaba naamanya gye Ebyahandiikirwe. Akaba naaha Yehova ekitiinisa ky’amaani, kandi akaba aine omukago murungi nawe. Akaba ayeteekateekire kwikiriza obuhabuzi bwa Yehova, n’obu kiraabe kyabaire nikitwariramu okuhindura buri kimwe ekirikumukwataho.​—Luk. 1:35-38, 46-55.

¹⁹ Baanyina abaana, nimubaasa kutooreza Mariamu omu miringo mingi. Niyo eha? Ogw’okubanza, oine kugumizamu noohamya omukago gwawe na Yehova kurabira omu kweyegyesa Baibuli n’okushaba. Ogwa kabiri, oine kuba oyeteekateekire kukora empindahinduka kubaasa kushemeza Yehova. Nk’eky’okureeberaho, noobaasa kuba waayoroirwe abazaire abarikurahuka kugira ekiniga, kandi abarikugambira kubi abaana baabo. N’ahabw’ekyo noobaasa kuba waakuzire orikuteekateeka ngu ogu nigwo muringo guhikire ogw’okutwarizamu abaana. Nangwa na bwanyima y’okwega emitindo ya Yehova, nikibaasa kuba nikikugumira kuguma oikaikaine n’okugumisiriza abaana baawe, na munonga baatwaza kubi obu orikuba oruhire. (Efe. 4:31) Omu bwire nk’obwo, okukira obundi bwona, nooba oine kwesiga Yehova kurabira  omu kushaba. Omukazi omuzaire orikwetwa Lydia naagira ati: “Obumwe nkaba mba nyine kushaba munonga kugira ngu ntagamba nyine ekiniga mutabani wangye yaangomera. Obumwe nkaba mba naatandika kugamba reero nkihika rwa gati mpunama kitaraariire nshaba Yehova kumpwera. Okushaba nikumbaasisa kuguma nyikaikaine.”​—Zab. 37:5.

20. Baanyina abaana abamwe nibagumirwa kukora ki, kandi nibabaasa kusingura bata oburemeezi obwo?

²⁰ Ekindi ekirikugumira baanyina abaana abamwe n’okworeka ngu nibakunda abaana baabo. (Tit. 2:3, 4) Abakazi abamwe bakakurira omu maka ahu abazaire baabaire batarikufayo kugirira abaana baabo rukundo. Ku oraabe nikwo waakuziibwe otyo, toine kukora enshobe nk’ezi abazaire baawe baakozire. Omukazi omuzaire orikuta omutima aha bi Yehova arikukunda, naaba aine kwega kworeka ngu naakunda abaana be. Nikibaasa kuba nikimugumira kuhindura emiteekateekyere ye, enyehurira ze, n’oku arikutwaza. Kwonka naabaasa kukora empindahinduka ezo, kandi okukora ekyo nikimuhwera n’eka ye.

21-22. Kurugiirira ahari Isaaya 65:13, 14, nitugasirwa tuta twagumizamu nitwikiriza obushoboorozi bwa Yehova?

²¹ Omugabe Daudi akaba naamanya emigasho y’okweta ahansi y’obushoboorozi bwa Yehova. Akahandiika ati: ‘Eby’okwegyesa bya [Yehova] bihikire, nibigwisa gye omutima; Ekiragiro kya [Yehova] kishemeire, kihwezesa amaisho. Kandi nibyo birikuhabura omwiru waawe, n’omu kubyorobera harimu ebihembo bingi.’ (Zab. 19:8, 11) Obunaku obu, nitubaasa kureeba entaaniso eri aha gati y’abo abarikuguma ahansi y’obushoboorozi bwa Yehova n’abarikwanga obuhabuzi bwe obwa rukundo. Abo abariguma bari ahansi y’obushoboorozi bwa Yehova nibaija kweshongora “ahabw’obunanukye bw’omu mutima.”​—Shoma Isaaya 65:13, 14.

²² Abareeberezi, baishe abaana, na baanyina abaana baikiriza obushoboorozi bwa Yehova beekundiire, nibagira embeera nungi, amaka gaabo nigabamu okushemererwa, kandi ekibiina kyona nikigira obumwe. Kandi ekikuru munonga, nibashemeza Yehova. (Enf. 27:11) Buzima tihariho kintu ekirikureeta okumarwa ekirikukira eki.