Omushororongo ogu nigugira guti: “Ku orireeba omu ishaza abooro nibahatwa, emanja zaabo niziitwa, kandi nibaakwa n’amaani ebi bashemereire, otaritangaara, ahakuba orikukiza abakuru obukuru aryaba naabireeba kandi hariho orikubakirira kimwe.”​—Mub. 5:8.

Kurugiirira aha ndeeba y’abantu, ebigambo ebi nibishoboorora gye abaine obushoboorozi omu gavumenti. Kwonka nikyoreka n’amazima agarikukwata ahari Yehova, agashemereire kutugumya n’okutuhamiza.

Omubuurizi 5:8 nihagamba aha mutegyeki orikunyangaraza abooro akabaremesa n’okutunga oburingaaniza. Kwonka omwebembezi ogwo aine kwijuka ngu hashemereire kuba hariho ondiijo orikumureeba, kandi orikumukiza ekitiinisa nari obushoboorozi omu gavumenti. Nangwa, nihabaasa kuba hariho abandi abaine omwanya ogurikukira ogwe. Eky’obusaasi, omu gavumenti z’abantu, abategyeki aba boona nibabaasa kuba bari abashomankuzi, kandi abantu ba butoosha baine kwemera obwebembezi bwabo bubi.

Kwonka, n’obu embeera zaakutureetera kwehwa amatsiko zita, nikibaasa kutuhuumuriza kumanya ngu Yehova ‘naareeba abaine obushoboorozi’ omu gavumenti z’abantu. Nitubaasa kweshengyereza Yehova kutuhwera kandi tumwegyekyerere amaganya gaitu. (Zab. 55:22; Fil. 4:6, 7) Nitumanya ngu ‘amaisho ga [Yehova] nigairuka oku n’oku nigabuga ensi yoona, okweyoreka ku ari ow’amaani kuhwera abaine emitima eshugaine ahariwe.’​—2 Bus. 16:9.

N’ahabw’ekyo, Omubuurizi 5:8 nihatwijutsya embeera yenyini erikubaho omu gavumenti z’abantu, ngu butoosha nihaba hariho omutegyeki orikukiza abandi obushoboorozi. Kwonka ekikuru munonga, ekyahandiikirwe eki nikituhwera kuteekateeka ahari Yehova ow’Obushoboorozi Bwona. Hati naategyeka kurabira omu Mwana we, Yesu Kristo, Omugabe w’Obukama bwe. Rukira Boona, naareeba byona, n’omuringaaniza kandi naatwaza gye, nikyo kimwe n’Omwana we.